¹ À A-Be-Jirea-Fu-Ta wúwɔ́ɔŋɔ̂ loô n'á togbɔ tyé, Yesu b'à shi d'àkun lɛ gbârî ri lòɲɛ̀n díryɔ́ŋ mɔ ki don á Tɔ Jɔnɔsɔɔ̂ se, àkun fù kpɛŋn jimiìî mun ni tɛ̀ŋnɛ̀n díryɔ́ŋ mɔ, fɛ̀ mun gbɔ r'à mɔnar, à ri fɛ̀ gbɔ ɲɛ̀n á nìryɛŋn ta ki dénno loké á dɔ to. ² À leê le gbâr ye, Sutana ki Yesu jà nɛ́n gbɔɔ̂ kpɛŋn mɔ ɲɛ̀nmun Simɔn dye-jɛn Judasi Isikariyoti ki nìryɛŋn ta ín, ³ Yesu b'à shi d'àkun Tɔ Jɔnɔsɔɔ̂ ri lo kúur nɔ̀nkurn nɛ́nɲɛ̀n àkun kpɛŋn, d'àkun ni lìɲɛ̀n Jɔnɔsɔ se, d'àkun b'á sɛkɔ́ɔŋn Jɔnɔsɔ se, ⁴ ki dukú à leê kàr mɔ, k'án wáɛ̀ɛ̂ bwɔ, ki wâ kpɛŋn byéen gbɔ̀n, ki fù rɔ á tatîn. ⁵ Fù jìrɛ̂mun kwɔ́ɔn, ki nun jìr gbe kónô dyàn mɔ, ki jo án kɛɛln-bisháɛ̀ŋɛ̂ níi tolóo to, fù nì ki yì níìî tokukûr á tahlɛ̀ŋ wâ kpɛŋn byéenî ɔ. ⁶ À la máno tɛ̀ŋn híin, à ri lò Simɔn Piyɛri fù níi tolóoô to, fù k'à wú à se dé: «Ákún mun ki mún Totɔn ɔ, ákún ki mún níi towú kɛ̀!» ⁷ Yesu k'à wú à se dé: «Mún ki mùmun klɛkún nɛn ákún wo fù mɔfáshu hìn kyáŋmɔ bo, kɛ̀ á b'à mɔfáshua kwɔ́ɔn.» ⁸ Piyɛri k'à wú à se dé: «Owo, ákún wo mún níi towú hìn fífí bo.» Yesu k'àn gbukɛlî mɔli dé: «Mún n'ákún níi toló bo, ákún nin wo tɛŋna ká mún se gbɔ dó mɔ bo. ⁹ Simɔn Piyɛri k'à wú à se dé: «Ń Totɔn, b'à dɔɲɛn mún níiî byéen ta bo dɛ́! Kɛ̀, mún kpɛɛ̂ŋ nì mún ŋmelî nɔkɔŋl towú.» ¹⁰ Yesu k'à wú à se dé: «Tɔnî mun ni nun tyɛ̀lmun ɔ, nun tyɛl togbɔ wo fù se bo [fóro níi tolóo kwó kɛ̀], bóló ɔ bo fù tɔŋnî kur nɔ̀nkurn tofénéjàɲɛ̀n. Yíkun nɔ̀nkurn ni tofénéjàɲɛ̀n, kɛ̀ yíi nɔ̀nkurn shari ɔ bo.» ¹¹ À fá to kwó, Yesu r'á jà nɛ́ntɔnî shi ín kpɛŋn mɔ; fù mùn n'à jɛ́l k'à wú dé: «Yíkun nɔ̀nkurn shari wo tofénéjàɲɛ̀n bo.» ¹² Yesu mùfɔn án kɛɛln-bisháɛ̀ŋɛ̂ níi towú kɔ́ŋnè, k'á kpra nɛ̂n wáɛ̀ɛ̂ gbɔ̀n nɛ́n á kpra, k'á sɛɲínɛ́ɛnè à leê kàr mɔ, ki yì du dé: «Mún ni gbɔɔ̂ mun klɛ̀ yíkun se, yíi r'à mɔfáhlɔ̀ a? ¹³ Yíkun ni mún fɛ́ɛŋn dé Kɛlɔn, fù nì Totɔn, fù ki mún fɛ́ŋn fá tɛ́tɛ̂ ɔ, bóló ɔ bo mún ki fù rɔ. ¹⁴ Á k'à ŋmɔ́n mún ki yíkun níìî towú, mún mun ki Totɔn nì Kɛlɔn ɔ, yíkun saaŋ yanɲɛ̀n yíi ki yíi kísɛ́ŋnî níi towú. ¹⁵ Fù bóló ɔ bo mún ni fù kwò yɛ̀nɲɛ̀n yíkun to, nɔkɔ́ŋl yíi ki bɛ fù kúur kwo yíi kísɛ́ŋnî se kwɔ́ɔn. ¹⁶ Mún n'à lóon yíkun se hlɔ ta, hlɔ ta, dé tɔŋnklɛrɔn dó wo sɔ́tɛɛ̀ŋn á totɔn to bo, tɔ́ŋrɔn dó wo saaŋ sɔ́tɛɛ̀ŋn á tɔ́ŋtɔn to bo. ¹⁷ Yíkun nì fù hlɔ̀, yíkun la á fyâr, nɔkɔ́ŋl má, yíkun k'á klɛgbɔɛ̀ kwo yan fù to. ¹⁸ Mún wo fù gbukɛlî kɛlɲɛ̀n yíkun nɔ̀nkurn se bo dɛ́ ! Mún ni ń mɔtɔ̂ŋnmun jimiìî shi. Kɛ̀, fóro Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ lô gbɔɛ̀ɛ̂ ki kwo mɔyîn. À jɔɔ̂ mun ni ɲínɛ̂nɲɛ̀n mún wɔ́se à leê kàr mɔ, fù ri fɔn á kùmurklîɲɛ̀n mún se . ¹⁹ Ki la gbɔ̀n kyáŋmɔ to, mún n'à lóon yíkun se, dé fù gbɔɔ̂ loô n'á to gbɔ tyé, nɔkɔ́ŋl fù mùkâr ye lò, yíi ki mún ki mún gbɔɔ̂ hlɔja. ²⁰ Mún n'à lóon yíkun se hlɔ ta, hlɔ ta, dé tɔŋnî mun k'á kpɛŋnja mún ǹ kɛl gbukɛlî to, fù tɔŋnî r'á kpɛŋnjaàn mún tɔ́ŋ bɛ̀ tɔŋnî ǹ kɛl gbukɛlî to.» ²¹ Fù gbukɛɛ̀lî kɛl jìrɛ̂mun kwɔ́ɔn Yesu se, à tɛ́l ki mɔkɛŋlè tɛ́tɛ̂, ki hlɔtabê gbukɛl mɔ à yɛ̀n dé: «Hlɔ ta, hlɔ ta, mún n'à lóon yíkun se dé yíkun mɔ jir bè mún jà nɛ́nbɛ̂ kpɛŋn mɔ.» ²² À kɛɛln-bisháɛ̀ŋɛ̂ ki jo yíi lɛ to, yì b'á byéen duùn yìkun mɔ Yesu jà nɛ́ntɔnî gbɔ ɔ kpɛŋn mɔ. ²³ Yesu ǹ kɛɛln-bisháɛ̀ŋɛ̂ mɔ à gbɔmɔnar tɔŋnî ri ɲínɛ̂nɲɛ̀n ín à blɛ̀ se à le le fɔŋnî mɔ. ²⁴ Simɔn Piyɛri k'á kpɛŋn ɔ kɛl à wɔ́se duklɛ mɔ d'à ri gbò gbɔ lóon? ²⁵ Fù jɔɔ̂ k'á yɛŋn ɲɛn Yesu tàshɛŋ tɔŋn, k'à du dé: «Ń Totɔn, fù jɔɔ̂ ki gbò rɔ?» ²⁶ Yesu k'à mɔli dé: «Mún bè jɔɔ̂ mun ǹ won-myɛ̂l fùnkùr toɲíkí libɛ̂ à mɔ́nî mɔ, ń k'à tè à to, fù jɔɔ̂ rɔ.» Yesu k'à won-myɛ̂lî toɲíkí, k'à tè Simɔn dye-jɛn Judasi Isikariyoti to. ²⁷ Judasi wo saaŋ à won-myɛ̂l fùnkùr toɲíkîmunî shɛ́ máá, Sutana ki dé ɲínɛ́ɛnè à nìryɛŋn ta á mɔkâr ɔ. Yesu k'à wú à se dé: «Á r'à se á ki gbɔɔ̂ mun kwo, fù kwo á mɔnân ɔ.» ²⁸ Kɛ̀, à leê kàr mɔ ɲínɛ́nɲɛ̀n fɛ̀ɛ̂ mɔ dó w'àni gbukɛlî kɛl ŋmel hlɔ̀ à se bo. ²⁹ Fù la klɛ̀ híin, Judasi ǹ dɔ́tɔnbéê se, à jimiìî ǹ jɛ́ɛn mɔ dé Yesu r'à lóon à se, d'à wo don à togbɔ mɔ́ɛ̀ɛ̂ sɔŋnké à wúwɔ́ɔŋɔ̂ wúwɔ́ɔŋ ɔ, fù nì kwoa bo ki mɔ́n dyàn sɔŋn bɛ tè à dàkpɛɛ̂ŋlî to. ³⁰ Judasi k'à won-myɛ̂l fùnkùrî gbɔ̀n, ki li ɲáa toflì tokyɛ̂ tyé mɔ. Fù gbâr ye wóon bwàrmun ɔ ín. ³¹ Judasi mùfɔn lɛ̀, Yesu k'à wú dé: «Jimin Dye-Jɛn la kyáŋmɔ ŋmelɔnkrɔ̂ ŋmɔ́n, Jɔnɔsɔ ki ŋmelɔnkrɔ̂ ŋmɔ́n fù se. ³² Jɔnɔsɔ nì ŋmelɔnkrɔ̂ ŋmɔ́n fù se híin, kyáaŋn tɛ̀ŋn àkun Jɔnɔsɔ nɔ̀nkurni b'à kwobɛ̂ Dye-Jɛn ki ŋmelɔnkrɔ̂ ŋmɔ́n fù se. ³³ Yíkun bisháɛ̀ŋɛ̂ ɛ̀, mún bè tɛŋnbɛ̂ yíkun wɔ́se kyáaŋne yé. Yíkun bè mún bén ɲɛ́na, ń ni fáâ to à ló ín à Yawutuìî se dé: "mún ni kɔ́ɔŋn tíkɛ́lî mun mɔ, yíkun wo don hìn mímí bo." mún saaŋ fù núkúuri lóon yíkun se kyáŋmɔ. ³⁴ Mún ni gbukɛl fâŋl yɛɛ̀n yíkun to: Yíi gbɔ ki yíi mɔnukwó; yíkun gbɔ ki mún mɔnukwɔ́ fáâ to; yíkun gbɔ wo saaŋ máno yíi mɔnukwó. ³⁵ Fù nì klɛ̀, jimiì nɔ̀nkurn b'à shua dé yíkun ki mún ǹ kɛɛln-bisháɛ̀ŋ ɔ, yíkun gbɔ nì yíi mɔnukwɔ́.» ³⁶ Simɔn Piyɛri k'à du dé: «(Ń Totɔn,) á ri kɔ́ɔŋn fɛ́ɛŋn?» Yesu k'à mɔli dé: «Mún ni kɔ́ɔŋn tíkɛ́lî mun mɔ, ákún wo kpé hìn mún ta kyáŋmɔ á ki don mímí bo, kɛ̀ á bè kwɔ́ɔn kpéa mún ta.» ³⁷ Piyɛri k'à du dé: «Ń Totɔn, myɛ́n núkwɔ́ɔn mún wo kpé hìn ákún ta kyáŋmɔ bo? À ta la jà mún ki ń byéen tè kún to ákún núkwɔ́ɔn.» ³⁸ Yesu k'à mɔli dé: «Á b'á byéen tebɛ̀ kún to mún núkwɔ́ɔn! Mún n'à lóon á se dé hlɔ ta, hlɔ ta, ákún bè ɲa mún hlɔ̀ kaarn gbɔ tyaŋna fóro ɲáa tyáar, sùnkwɔ́ɔ ki kwɔ́ɔn to.»