¹ Nən ʋ kin sə ntər wι ka ren haaʋ nən yesu, nən ι shɨɔləm, nantə kisʋ, nən kʋrmatə lapə ka fisu ta, nən sartə lapə, nən kʋñəm nartə, ² Ιι la, lələn kantə ma hɔɔr tɔ tən sə ι wιι na mɔsəm kʋɖəmpə. ³ Ιι ra- la ntər ka mι rəcel rɔ-na, ya ι kpantʋ fala, ama ι mιsə rəyamla nə ι rə mι mɔsəm ta sə mι rana kələn-mι. ⁴ Ʋ ta mɔna sə ι ci wontə hιιn mι na ka mι rəcel rə, ama ι ci wontə hιι-n mι na ka mι raana rə. ⁵ Ι wιn mɔsəm mpə ka mι ta, sə wompə ka wι kristʋ yesu ta na, ⁶ Woñι ka wι ι tən sə Ashia na, ι ta mʋsə ι ta sə ñən Ashia wa wι atarʋ sə ntər kəna sə ι rʋkʋnιtə. ⁷ Ama, ι ləsə tətən ñɔ ι ta, ι sʋ ι tι sə ι ci yər wan. ⁸ Ι tɨsə ι tι nən ñastə n'ʋrι n'ʋtal səm nən akantəmər rə səm. ⁹ N' tə rɔna Ashia kpaas-ι paa ka awɔr cəkpɔlɖə ta n'ι cəlι yəɖə nɖə kələn yəla tən na ¹⁰ . Sə fιnə yesu yəɖə rə nə nankpaya tən kuru atι,nən wompa wι ashita na, nən tιtə rə, nən tιtə tιna. ¹¹ Nə nιιsə tən hul sə wʋtə sə yesu kristʋ ci na ñuŋ yaɖə, wʋrtə ka raci Ashia. ¹² Səmpə na, ma rana sə wonana ι ñɔŋ tamtam na, ʋ ra cin ma yəsa ta rə celɔ-na, ama kɔhən -ñι ʋkəl sə ma tan mι cal.Ι lak təmər ka mι ñuŋ yapə rə nən nantə mapə, nən nafatə. ¹³ wontə rə na Ashia lakə na təmər ka mι ta nən ι shɨɔləm sə wonana ι ci na. ¹⁴ Ι lakə tə tən,ι ra mɨntʋ nə ι ra kalʋ kalasə. ¹⁵ Fιnə ι mιsə rəyalyal sə Ashia yɨa mpa wι rəyuyu ka wa tan awrkasə na, wa naa hʋlmən ka kɔrʋ nkʋ rə ka kɔhən wakɔ, tan sartə yəra mpa hɨakʋta. ¹⁶ Rʋkʋna n'ʋlə sartə ka fisu ta tɨam sə fιnə mpιsə ma wιn tʋfələm sə ma wɔrə kristʋ ayʋkʋ rə wontə rə na ma sən sə ma ta see fala nə ma ta la təmər ka fala. ¹⁷ Ama nən ma lesə ma fisu sə laatə ntə alaatə, nən təmər lapə ka mι tɨsu rə, ʋ kɔ mata n' ma nι lələn ka kpatrə nən mι tən. ¹⁸ Nən mι rərə ʋ mɔna sə ʋkɔ-mι ta nι nιι lələn ka kpatrə nən ma. ¹⁹ Ama ma wι ma honkʋ n'aci yesu rə sə ma tɨr tɨmote ka mι cal, ka ʋra lʋl, sə ι kɔmpa, nι na wontə ι lakə tə na ʋ kpasə ma namtə ta ka ren ²⁰ . Ma tan nιr ka ce n'ʋtasən Tɨmote ka ι mɔsʋ mι rə ka tʋfələm. ²¹ Wontə rə na wa ciiwa tətər wa yəntə rəcelɔ-na, n'ʋ ta ci i yesu kristʋ yəntə. ²² Ama ι sən wonana Timote wʋl ι tι na, wontə rə na, sə wι sən ka cii ka wona, ι ta təmər nən ka tɨam hosʋta ²³ . Səmpə na, wonana ma mɔsʋ sə ma tɨrɨ ka ʋra lʋl nə mana wonana ʋ walʋ ma cal na. ²⁴ Ama ma tɨsu paa ñuŋ yaɖə rə sə ma rərə ma kʋsə ma kɔn nʋ ra lʋl. ²⁵ Ma mɔsʋ sə ʋsara sə ma yel Epafratɨtus n'ι pəsə mι cal ι cii ma rɨtafal, nə ra lakə təmər kʋrmər sə sʋcana, woñι ι tɨrɨ na wontə ka she nəm na. ²⁶ Wontə rə na ι nι ya sə ʋ wι wa tɔ tən nə waciwa sə ι cɔ ma cal. ²⁷ Ama tʋfələm na ι hənɖə wιsɔ,waa kasə cəkʋa kəna sə ya səpa, ama Ashia nan ι yəntʋ, nə ʋta ci ι rəcelɔ na, ama nən mɔna sə fιnə sɨsɨn nιʋ ra tasə sɨsɨn rə. ²⁸ Səmpɔ-na ma ci tən sə ma yekι sə fιnə ι pəsa n'ι naaι ma ta la lələn n'ι ra kəl yəntʋ ka mι tι s'ʋkəl ²⁹ . Ι mʋ rəñantəla ka Epafratitus nən lələn nən ñuŋ yaɖə rə, n'ι haι ñamtə s'ʋwɔsʋ wona ³⁰ .Wontə rə na n'nɔɔn ʋkasə cəkʋa kəna s'ι sə, n'ι wι n'ι lakə kristʋ təmər, sə ι yel ι fisu nι səməm nən wontə maa hιιn tə na, ka mι awɔrta wontə rə na ιι ta pιsʋwa sə ι kan ma tətər.