¹ Ahad wa oggan amud wa n Akkay, issân ɣaysa as alwaq-net osa-du wa daɣ z'igməd əddənet iqqəl Abba. ɣaysa faw da isaknu inəttulab-net tara, amaran əmərədda isannahal-tan əsəkni ən tara ta dasan-iga. ² Itamansaw ɣaysa əd nəttub-net ehad, as itaggu awen da Iblis igâ daɣ əwəl ən Yahuza wa n ag Simɣon Isxarəyuti təkaddilt-net. ³ Issân ɣaysa as Məššina di n Abba igâ arat kul daɣ əfus-net, issân deɣ as igmâd-du Məššina amaran ad t-iqqəl. ⁴ Ibdad fəl mensewan, ikkas takadkat-net ta nafalla, idkal afər igbas-tu, ⁵ Təzzar iga aman daɣ əɣlal ad išarad idaran ən nəttulab-net, immas-tan s əfər wa igbas da. ⁶ As d-ewad ɣaysa Simɣon Butros inn-as Ǝməli, kay, a z'išširədan idaran-nin ⁷ Inn-as ɣaysa Awa tagga da wər təfrega əgərri-net əmərədda mišan a tu-tagara dəffər awa. ⁸ Inn-as Butros kay, ad təšširəda idaran-in Wala ənəmihaz Inn-as ɣaysa As dak-kan-wər-əššorada nak dər-ək nəmmizzay. ⁹ Inn-as Simɣon Butros Daɣ adi Ǝməli, wərge idran-nin ɣas, širəd harkid fassan-in d aɣaf-in. ¹⁰ Inn-as ɣaysa Awedan iššoradan, wər iddarar ar əširəd ən daran fəl ad izdag ketnet, amaran kawanay, təzəddigam, mišan wərge ketnawan. ¹¹ ɣaysa issân wa tu-z-akkaddalan; adi a fəl inna Wər təzəddigam ketnawan. ¹² As iɣrad ɣaysa əširəd ən daran-nasan, izlag takadkat-net, iqqal edag-net, inn-asan Awak təgrâm awa dawan-əge da. ¹³ Təgannim-i Aməsəsseɣri d Ǝməli, təgannim a olaɣan, fəlas əmosaq-qan. ¹⁴ Daɣ adi dad zamas nak imosan Ǝməli d Ǝməsəsseɣri, əššorada idaran-nawan, iwâr-kawan, kawanay da, daɣ ilkam a ad tətimaširidam idaran. ¹⁵ Ǝsəknaq-qawan arat wa fəl a tu-tətaggim kawanay da s əmmək was dawan-t-əge. ¹⁶ Ǝggəyyeɣ silakanaɣ-awan as, aklu wər oger məššis, anammazal deɣ wər oger wa t-id-izammazalan. ¹⁷ Dad zamas təssânam aratan win, wədi təbbilalam kudis tətamazalam-tan. ¹⁸ Wər dawan-ganna ketnawan; win sannafrana ku əzdâyaq-qan amaran kundaba inda awa imal awal ən Məššina as inna Wa dər ədrawa, iqqal amaksan-in. ¹⁹ Arat wa, as igâ ad təzzəgzənam as nak a imosan Wa zillan da Adi da a fəl dawan-t-ənneɣ əmmərədda harwa wər iga. ²⁰ Ǝggəyyeɣ silakanaɣ-awan as wa iqbalan iyyan daɣ nəmmuzal-in, nak iman-in a iqbal. Harwa wa di-iqbalan, wa di-d-izammazalan a iqbal. ²¹ As inna ɣaysa awen, əɣšadan man-net, təzzar inna Ǝggəyyeɣ əsilakanaɣ-awan as iyyan daɣ-wan a di-z-agin fassan. ²² Ad tinəməswidan nəttulab-net, əqqânan ɣafawan-nasan i was igannu. ²³ Iyyan daɣ nəttulab-net, wa isannahal ɣaysa tra, isiɣamar daɣ ihəz n ədmaran ən ɣaysa. ²⁴ Isaffagan-as Simɣon Butros ad issəstən ɣaysa əd was igannu. ²⁵ Təzzar inaz-in ənattalib wen fəl ədmaran ən ɣaysa, inn-as Ǝməli, ma z'iqqəl. ²⁶ Ijjəwwab-as ɣaysa inn-as Wa əkfe akarammu ən təgəlla wa z'əssəlməɣa daɣ ədrəz a Təzzar issəlmaɣ akarammu ən təgəlla ikf-ay i Yahuza ag Simɣon Isxarəyuti. ²⁷ As igraw Yahuza akarammu wen, iggaz-tu Aššaytan Təzzar inn-as ɣaysa Tagaɣet tarmd awa kay-iwaran. ²⁸ Awa fəl inna ɣaysa awen i Yahuza, wər iha inəttulab-net win hadatnen siɣamarnen den tattin i t-igrân. ²⁹ Wiyyad ordân as, iduf wa iga Yahuza azrəf ən nəttulab a fəl das-inna ɣaysa Zanza-du arat was za naddarar y əmud; madeɣ akfu šiləqqawen arat iyyan. ³⁰ Ibaz Yahuza akarammu ən tagəlla, igmad tarmad, as itaggu awen da ehad igâ. ³¹ As igmad Yahuza, inna ɣaysa Ǝmərədda tanaya-nin nak Ag Aggadəm tənîfalal, tənifala daɣ-i deɣ tanaya ən Məššina, ³² Dad zamas tanaya ən Məššina tənifalal daɣ-i, Məššina da ad isənnəfiləl daɣ man-net tanaya-nin ank Ag Aggadəm daɣ alwaq ihozan wəllen. ³³ Imaran-in, alwaq wər nəggət a ɣur-wan z'ga A di-təgməyam mišan edag wa əkkeɣ wər təfregam a t-in-tawadam. kala ad ənneɣ adi i kəl-Ǝlyəhud, amaran kawanay da əmərədda ənne-awan-tu. ³⁴ A kawan-akfaɣ alwajib aynayan, a t-imosan as namariwat. Namariwat kawanay da s əmmək was kawan-are. ³⁵ As tənamaram, ad issusən adi aytedan kul as kawanay inəttulab-in ³⁶ Inn-as Simɣon Butros Ǝməli, mənid təkke. Inn-as ɣaysa Edag wa əkke, wər təfrega a di-sər-əs-təlkəma əmərədda, eges a din-təlkəma dəffər awa. ³⁷ Inn-as Simɣon Butros Ǝməli, mafəl as wər əfrega a dak sər-əs əlkəma əmərədda. Ǝgaraɣ iri y a fall-ak akfa iman-nin. ³⁸ Inn-as ɣaysa Adis a fall-i takfaɣ iman-nak Ǝggəyyeɣ silakanaɣ- ak as wər z'aɣru əkəji aɣora wər di-təggeda har karadat tãklaten.