¹ Tezzar issesten Elimam wa zewweran estefanos ,inn-as : «Awak aratan win tidet ?» ² inna Etefanos «kawanay imedrayan -in d abbaten -in ,sesemat-i! messina di nemeli en tanaya ,enta as kala a d-inafalal y amarraw -nana Ibrahim harwa iha akal wa n mezobotameya, dat temexsurt-net daɤ akal wa n xaran ³ Inn-as :"Egmed akal-nak ed marwan -nak ,takkaɤ akal wa kay-z-assakna" ⁴ Tezzar igmad Ibrahim akal wa n kasdaytan , ixsar daɤ wa n xaran .deffer iba n abba-net a t-id -isaggalat messina s akal wa da daɤ texsaram da azlada . ⁵ Akal wa ,wer daɤ-as ikfa messina Ibrahim edag as z'iggezan tekasit-net ,wala ɤas edag daɤ-as ikfa messina Ibrahim edag as z'iggezan tekasit-net ,wala ɤas edag daɤ issensa adar-net , misan idkal-as messina arkawal n a das-t-akfu enta d ezzurreyya-net , kuddeɤ as alwaq wen ,wer ila Ibrahim ara waliyyan. ⁶ Enta da awa inna messina :"ihayawan-nak ad exseran daɤ akala daɤ emosan iɤerab, eqqelan daɤ-as iklan ,ad tawazaɤazzaban har agin ekkozat temad n awatay ⁷ Misan addawlat ta tan-tegat eklan ,nak iman-in a tat -z-abezan s esseriɤa ,deffer adi ,ekkesaq -qan-du daɤ-as, eɤbedan-i daɤ adag wa da." ⁸ tezzar inamagga merssina d ibrahim arkawal en tassaq e enta as imos emenked ejwel-net .Adi a felas ,as ihew barar-net isehaq isammankad-tu ezel wa n ettam deffer tehewt-net Iga Isehaq awen da i barar-net Yaqub deɤ iga awen da Ibararan-net emosen maraw d essin ,win emosen aljadan-nana. ⁹ Enkaran medan win emosen aljadan -nana emmezaɤan amadray-nasan yusaef ,tezzar ezzenzan -t-in ,immaway s akal en masar ;missan issan daɤ-as messina ¹⁰ Ikkas-t-idu Messina daɤ temeɤutar kul sin iggaz .ikf-ay masnat ,d udem ɤur firɤawna wa n emenokal en masar ,har as ig-ay firɤawna daw-es , izzozar-tu y akal en Masar d aɤaywan net ketnet. ¹¹ Deffer awen ,iga laz daɤ akal en masar ketnet ,enta ed wa n kanan. Ad taɤazzaban aytedan wellen ,aba i maddan win emosen aljadan-nana a etsan ¹² As isla Yaqub as Master teh-et tebzest,izammazal ser-es meddan win dana -sahhayawenn ,imos awen iki-nasan y-as wa azzaran ¹³ ɤur iki-nasan Masar wa n essin ,ad izzezday Yusef iman-net i medrayan-net ,eggazan deɤ salan Firɤawna n aɤaywan wa d-igmad Yusef. ¹⁴ Issegmay Yusef abba-net Yaqub ed marwan -net kul ,emosan essayat temerwen n awedan ed semmos ¹⁵ Tezzar iras Yaqub akal en masar, s enta a daɤ t-aba, aba daɤ-as deɤ imarawan-nana . ¹⁶ Emmewaynat teɤeswen-nasan s eɤrem en sekem , tawanbalnat daɤ ezekka wa izzenza Ibrahim azref wa ibalalaɤan ɤur maddanes en Xamor daɤ sakem ,y ad iqqel tanbelt-net. ¹⁷ As d-ihoz alwaq wa daɤ z'assandu Messina arkawal wa fel ihad y Ibrahim ,tamattay-nana tettey, temôs taxlek tagget daɤ Masar, ¹⁸ har"iggaz iyyan emenokal wer nessen fel Yusef taɤmar [em Masar]." ¹⁹ ikkerras kel-tamet-nana ,iga i marawan [nana] ezeɤezzeb labâsan har âs isahhassal-tan a din -tayyin bararan-nasan win es seket ehewan daɤ esuf fel ad wer eddran ²⁰ Azzaman en da a daɤ ihew Musa ,imos barar ihossayan, igrâwan arraxmat en Messina.Ettafan-tu marwan -net daɤ ahan-nasan har iga karadat telil ²¹ Oyyan -t-in marwan -net ɤas fel afay n Ennil,tenay-tu tabarart en Firɤawna, tedkal-tu teg-ay barar-net ,teg-as esedwel wa za tagu i barar en tedist-net. ²² Itawasasaɤru Musa masnat kul ta n kel-Masar ,iqqal ales ilân tenna daɤ awa igannu d awa itaggu ²³ As iga ekkozat temerwen n awatay ed tehewt, iggaz-t-id a din-asu imedrayan -net kel-israyil iney awa der t-ellan ²⁴ Inay iyyan daɤ-san tawagginat-as tarsexsad ,oɤ-as sinaɤen , iga iman n aw Masar wa das-itaggin ark aratan ²⁵ Iɤil ad agrin medrayan-net kel-israyil as Messina a t-id-izammazalan ser-san fel a tan-assafsu, misan wer egren awen. ²⁶ Ezel wa ilkaman i wen ,osa-du essin daɤ-san eknâsan, Igmay d a tan-aknu, nemeggin alxer ,inn-asan "meddan, kawanay emosnen imedrayan, mafel as tetinemenyim?» ²⁷ misa ibdaq-q-in ales wa itaggin tarseesad y emidi-net ,inn-as :"ma kay-igan emuzar -nana wala emasraɤ-nana? ²⁸ Engem a tareɤ a di-taga tenaɤay ta tegeɤ y aw Masar wa n endazel?" ²⁹ Isla Musa i battu ten ɤas , teggaz-tu tasa ,igmad Masar ilɤas daɤ akal wa n mideyan, iqqal daɤ-as eɤerib , izlaf daɤ-as igraw essin bararan ³⁰ As eganat ekkozat temerwen n awatay deffer awen "inafalal -as du angolos daɤ tefseq tebilaglagat daɤ taneray ɤur edɤay" wa n sinay. ³¹ Isammaklal es Musa arat wa das-d-inafalal den. Itihaz-in za tafseq fel ad annaflay daɤ awen ,as isla y emesli n emeli messina as das-inna ³² "Nak a imosan Messina en marawan-nak ,Emeli n Ibrahim,d Isahaq ed Yaqub ." Tendaw taysest Musa ab'as ihal ad iles aswad daɤ tefseq en. ³³ Inn-as deɤ emeli: "Ekkes iɤateman-nak ,felas edag wa daɤ tebdadaɤ eddi amadal zeddigan a imos. ³⁴ Eɤɤeyyanaɤ alɤazab wa tetaggu tamattay-nin daɤ masar ,eslêɤ deɤ ihererrekitan-nasan.Ezzebbe-du fel a tan-assafsa.Emeredda ihaz-du, a kay-zemmizela es Masar." ³⁵ Musa wen da ,a enkuran es tenna ta das-egan "ma kay-igan emuzar-nana wala emasraɤ-nana? Enta en da za ,a d-izammazal Messina y ad izar i kel-israyil ,isedderfet-tan ,es tarna n angalos wa das-d-inafalan daɤ tefseq ³⁶ Enta en da , a tan-d-ikkasan daɤ Masar s aratan simaklalnen win itaggu ed telmeɤjujaten emosen alɤalamaten en tarna en Messina .Iga aratan wiyyad simaklalen ed telmeɤjujaten emosen alɤamaten ɤur araday wa egan daɤ taneray har iga ekkozat temerwen n awatay ³⁷ Musa en da ,a innan i kel -israyil : "ilkâm a ser-wan d-izemmizel Messima ennebi iyyan en silat-in ,a kawan-du-z-igmedan ." ³⁸ As teddew tamattay n Israyil daɤ taneray en sinay , enta en da a ibdadan ger marawan-nana win den d angalos wa das-issewalan fel edɤaɤ wa n sinay ,tezzar ikf-ay Messina awalan hakkinen temeddurt y a dana-tan-imel ³⁹ Misan ugayan marawan-nana s ad elkeman y awa inna Musa ugayan ser-es, saddaranan ad eqqelan Masar ⁴⁰ Ennan i Harun :" Ag -ana imalan a z'emelnen dat-na ,felas Musa wa dana-d-ikkasan daɤ akal en masar da, wer nessen awa daɤ-as in-igan ." ⁴¹ Adan en da a daɤ egan essenem igân temewit a n abarkaw, ekatan fall-as. Isidawat-tan wellen arat wa egan es fassan-nasan. ⁴² Tezzar inamaggag der-san Messina ,oyy-en ed man-nasan ,eɤbadan ed tellit detran , imos awen arat ennân Elkettaban ,as ennan :"ya kel-israyil ,awak nak as tetaggim sizegzam ed tekutawen daɤ ekkozat temerwen n awatay sin daɤ teneray ? ⁴³ Wergeɤ ahaket nessenem wa igan Molox a tewayam ,ed sasselan n etri wa igan remfan wa n essenem-nawan,emosnen esseneman win teagm " fel a tan teɤbedam!"Adi fel kawan-z-esteɤa har takeyam"babrylon ⁴⁴ Amaran imarawan-nana win d-ikkas Messina daɤ Masar eggazan teneray,elân ehaket wa n emeney ed Messina ,was omar Messina Musa s ad t-agus emmek wa t-issekna ⁴⁵ Ahaket en ,iggaz-du es marawan-nana win deffer win den azzaman win daɤ dasan-azzar joswe ewayan-tu s akal wa ebazann s enta a daɤ istaɤ Messina tawseten dat-san,Iggaz ahaket wen akal en da har azzaman n ennebi Dawed. ⁴⁶ Ennebi Dawed igrâw arraxmat ɤur Messina turagat n ad ikres ehan y Emeli en Yaqub. ⁴⁷ Misan ennebi suliman a igrawan turaget ten, ikras ehan y Emeli Messina ⁴⁸ Der iga awen da ya, Messina di n Amadkol wer ixser daɤ a ekrasan fassan n aytedan. Adi a inna ennebi Isayas as inna ⁴⁹ Inna Emeli Messina:"Ijennawan a emosen texawit-in ta n taɤmar ,amadal wer imos ar arat illan daw daran -in. Daɤ adi ma imos ezzenef n ahan wa di-za -tekresam?Madeɤ edag wa daɤ z'assanfa? ⁵⁰ Wergeɤ efus -ina d-ixlakan adi kul?"» ⁵¹ Harwa inn-asan Estefans: «ya meddan win eqqessatnen, texfâlam iwallan-nawan, tedbâyam s infas wa zeddigan. Adi da a egan marawan-nawan. ⁵² meni daɤ ennebitan wa werv zaɤɤazzaban marawan-nawan? egan iman en nemmuzal en Messina win emalnen dat alwaq assa en wa oɤadan, as kawanay emeradda a t-ikkeddalan tegam iman-net . ⁵³ kawaney win d-issoka Messina angalosan ewâynen elqanun-net,misan tugayem s a das-telkemam.» ⁵⁴ As eslan i battu ten ,iggaz-tan alham labasan, ad samadadan fel alham n Estefanos ⁵⁵ Misan enta indkâran Infas wa zeddugan ,idkal aswad-net sa ser jennawan ,inay tanaya en Messina ,inay deɤ ɤaysa ibdâd daɤ eɤil en Messina. ⁵⁶ Tezzar inn-san: «Eneyat ,ijennawan ennolaman! Hannayaɤ ag aggadem ibdâd daɤ eɤil en Messina» ⁵⁷ Eslan y awen ɤas ,ad zayyakan edbâɤan simezzugen-nasan ,eggaden-in ketnasaan s Estefanos, ebazan-tu ⁵⁸ Ekkasan-tu daɤ eɤrem, ad t-eggaren es tehum. Amaran meddan win fall-as egeyyatnen, n ammas igân esm Talut a ɤur essensan ibernaz-nasan. ⁵⁹ Eggâram Estefanos es tehun es ittar inna : «ya Emeli ɤaysa ,eqbel iman-in !» ⁶⁰ Deffer awen ,igaraffat ,idkal emesli-net s afalla ,inna : «Ya Emeli, a tan -wer-tessewaraɤ abakkad wa!» As inna awen, egmadan-tu man.