¹ Ye Yesu wu ba samwani: "mu masonga, yi lusamwana: kwena ti bahika mu kati dia benu ba telemi haka ba fwoku khonda kumona ki pfumu kia Nzambi kisa ti ngolu." ² Ye ku nima bilumbu bisambanu, Yesu mongi Petelu, yakobi ti Yowani, ebuna wu banati ti yandi ha zulu dia mongu wanda. Kunima wubaluki ku twala bawu. ³ Miledi miandi mieka ngela pi misemi, mieka pembi yingi, mupila ni ata kima kia pembi kia kukoku kusemisemia bwosu pembi yina. ⁴ Kunima, Eliya ti Moyise ba moniki ye ba yandiki kusolula ti Yesu. Hakana Petelu vutudi ye zonzi kwena Yesu: "longi, buluti mboti kikuma kia betu twa hwena hakaka. ⁵ Tuheka nzila twa tunga nzu tatu za thenda, mosi ya ngeyi, mosi ya Moyise ti mosi ya Eliya." ⁶ Ebuna Petelu kamoniku khi kazonza, khiawu ba kadi ya boma. ⁷ Dituti disi pi dibafiki. Ebuna ndinga yilubuki mu dituti: "yandu kena mwana meni wa zola, muyukilenu." ⁸ Mu mbala mosi, thangu ba tadi munziunga bawu, ata mutu ba moniku, kaka Yesu nani. ⁹ Bu bakulumukiki mongu, Yesu wu ba kebisi ni ata mutu ba samwaniku mambu ma ba moni ti kuna Mwana mutu kafutumuka mu kati dia bafwa. ¹⁰ Ba simbi ndinga yina ye ba yandiki kudihiula bawu ye bawu khi disongidila kufutumuka mukati dia bafwa. ¹¹ Ba muhiudi: "mukuma kia khi ba soniki bizonza ni Eliya kafweti kwisa theti?" ¹² Wu ba vutwadi ni : Eliya kafweti kwisa theti mu kuyidika mambu mosu. Kasi mukuma kia khi bwa sonama ni Mwana mutu ka fweti mona pasi mu mambu mingi ye kumu monga bwosu mutu mosi wa pamba? ¹³ Kasi yi lusamwana ni Eliya wisa kedi ye ba musadi mosu mabazodi bwosu yi zonza ndinga mukuma kia yandi. ¹⁴ Mu kuvutuka mu kati kia balonguki bahika, ba wani kibuka kia neni munziunga bawu, ti ba soniki basiki paka ti bawu. ¹⁵ Mumbala mosi, mu tangwa di ba mumoni, kibuka kiosu kiyuki kiesi, ti kimongi thinu mu ku mu heka mboti. ¹⁶ Wu hiudi ku ba longuki bandi: "Khia kima lwabati sia paka ti bawu? ¹⁷ Mutu mosi mu kati dia kibuka mu vutuadi: "longi, yakunatini mwan'ama, kena ye pefi ya baba. ¹⁸ Yi musimba pi yi mulosa ha tshi, yi mu lubula mafulufulu, yi mu kwetisa menu ebuna ki kuma ngolu. Ya lombi kwa ba longuki baku bamu kuleya, kasi ba kuki ku. ¹⁹ Wu ba vutuedi: "kikanda kia konda lukwikilu, banda thangu kwa ya kala ti benu? Banda thangu kwa ya banda lutala bwabuna? Mundatinenu yandi." ²⁰ Ba munatini yandi mwana. Thangu yina pefi buya moni Yesu, mbala mosi yi yandiki ku mukonisa mwana. Wu bwi hatsi ye mafulu fulu mamulubukiki mu munw'andi. ²¹ Yesu wu hiudi kwa tat'andi: "banda thangu kwa kena pila yayi?" Yandika kileki kiandi wu vutudi tata mwana. ²² Ya mulosaka mbala za hika mu mbawu to mu mamba pi ya sosaka ya muhonda. Yuka wa lenda kusala kimakimosi, tu yukila mawa pi tu sadisa." ²⁵ Yesu wu mu vutwedi: " yuka wa lenda? mosu ma lenda kwena wuna wu kwikila". ²⁴ Mu mbala mosi, tata mwana wu boki ye zonzi: "yi kwikila! wisa kulusadisu lua konda lukwikilu lwama ". ²³ Tangwa Yesu kamoni kibuka kisi thinu kwena bawu, wu nganini pefia ya mbi ye zonzi: "nge pefia baba ye kifwa matu, yi ku heka tswa lubuka, ye vutukiku dihika." ²⁶ Pefi yi ngani, yi mukonisi ngolu mwana, kunima yi lubuki. Mwana weka fwanani kunga mvumbi mupila ni kibuka kia zonziki: "wa fi". ²⁷ Kasi Yesu wu mu mongi, wu mutedimisi, ye mwana yakala wu telemi. ²⁸ Tangwa Yesu ka koti mu nzu, ba longuki bandi ba muhiudi mukingenga: "mukuma kiakhi twa kukiku ku kula pefi yayi? ²⁹ Wu ba vutwedi: "pefi ya pila yayi balendi ba kuleya kaka mu nzila bisambu." ³⁰ Ba katuki hana bakadi bendi ye balutidi munzila Galilea. Ka zodiku ni batu bazaya kuna bakadi. ³¹ Khiawu ka longiki balonguki bandi. Wu ba samwani: "mwana mutu ba muhana kwa moku ma batu ba muhonda. Thangwa ba muhonda, katelema mu lufwa kunima bilumbu bitatu". ³² Kasi ba bakisikiku ndinga yayi ye ba kadiya boma mu ku muhiula. ³³ Hamana ba kumi ku Kapernaum. Muthangwa di kakadi mu nzu, wu hiudi kwe balonguki bandi: "Nkhi lu bati sila thembi mu nzila?". ³⁴ Kasi, ba kadi pima, khiawu mu nzila ba siki thembi bawu ye bau mukuzaya nani mbuta. ³⁵ Wu zakadi pi wu tedi bau kumi ya zodi mu kimvuka, ebuna wu basamwana: "yuka mutu kizola kakala wa theti, mu ba bosu, ka fweti kala wa tsuka, kunima tsadi wa ba bosu." ³⁶ Wu mongi mwana khunda pi wu musi hakati dia ba bosu. Wu mu mongi hana moku m'andi ye basamwadi: ³⁷ "wuna wu yambi mwana bwosu yandu mu zina dia meni, wu ngiambi, keku meni hika ka yambi, kasi pi wuna wa thuma. ³⁸ Yowani wu mu samwani: "pfumu, twa moni mutu mosi kikula pefi za mbi mu zina dia ngeyi ye twa mu pekisi khiawu kisiku tu landa. ³⁹ Kasi Yesu zonzi: "hamupekisi, khiawu ke mutu mosi ku ka kala mukitesu kia kusala kisalu kia kitoku mu zina dia meni yeka lenda zonza diaka kima kia mbi ki tadidi meni. ⁴⁰ Wosu wuna keku ti mambu ya betu kena ti betu. ⁴¹ Wosu wuna wu luheki dikopa dia mamba khiawu lwena batu ba Khlisitu, yi lusamwana mukiedi, kwi disoku lufutu lwandi. ⁴² Wosu wuna wu sadini kabwa mosi mu kati dia baleki baba bi kuikila mwena meni, buluti mboti mukuma ki yandi ba mu sia kibende kia neni mu tsingu, hamana ba mulosa mu mamba. ⁴³ Yuka kakudiaku di kubenda wa sumuka bukune dia. ⁴⁴ Bu luti mboti mukuma kia ngeyi wa kota mu luzingu koku kibuku wakala ti moku modi, kunima wenda mu bilungi, ku mbau yina yi zima koku. ⁴⁵ Yuka kuludiaku di kubenda wa sumuka, bukune dia, khiqwu buluti mboti mu kuma kia ngeyi wakota mu luzingu lwa mvula ya mvula kikata, ⁴⁶ ke wa kala ti malu modi, kunima ba kulosa mu bilungi. ⁴⁷ Yuka disu diaku dikubenda wa sumuka, katule dia, khiawu buluti mboti mu kuma kia ngeyi wakota mu ki pfumu kia Nzambi ti disu dimosi, wakala ti mesu modi ye kunima bakulosa mu bilungi, ⁴⁸ kuna misobi mi bawu mi fwa koku ti mbawu zi zima koku. ⁴⁹ Khiawu kosu mutu kamona pasi. ⁵⁰ Mungwa wa mboti, kasi yuka wa mana thomu, khia pila ba mu vutudileya dihika? kalenu ti mungwa mukati dia bemwenu ye kalenu mu ngemba benu ti bahika.