¹ Sése akolene mukonge, piti a baate mvuayovè niyaduku ndè. ² Mutu wabade na makédi, nakutunu va busu buèndi ndé: «A Kumu, ti wè tonde, wè tóghe bèlese.» ³ Sése asókele ghogho chèndi, abèmbe ndè nalèle ndé: Mè tonde mé niutu a wè yibuèye. Tolatole makédi nimafuade, niutu niyabuèye. ⁴ Sése nalèle ndè ndé: «Yènde ghu mbóghe bavédi ba malaghe bo bayabe bo we mabèleghe, bo bakalèle ghulidi baate ba musènge makédi ma wè bédi na mo mamafuade. Tso wè toghe babade béne a bo yitchighe yimochi. Yalèle tchambe ghulidi baate bakime, mukabe na ghulidi bavédi ba malaghe. Wè mane wè kayènde ghu nzo Nzèmbi ghu Séresalème ghu vède lelaghe le Muise àlèle ndé, baate ba makédi ma mate mu niutu bakavède.» ⁵ Va Sése asóte ghu Kapèrenaume, yivónde cha baghodi àyade ghu mbóghe a Sése nàbonde ⁶ ndè ndé: «A Kumu, mutu a mè ndóne ghu nzo alase nguu na bèle, niutu yótchi yavole.» ⁷ Sése nalèle ndè ndé: «Mè yènde ghu bèlese ndè.» ⁸ To yivónde cha baghodi nakale Sése ndé: «Mè salidi mutu wasóngene wu wè kitóghe ninghele ghu nzo ndè vè. Lèle ndile lebighe, mutu a mè lo nabèleghe. ⁹ Mè na bivónde bibiatóme mè. Mè nème na baghodi babayoghele mè. Mè lèle wóne mé yènde ghunughu, ndè kayénde. Mè balèle wóne mé, payade, ndè kayade. Mè balèle musèli a mè mé: sade bunubu, ndè kasade.» ¹⁰ Sése ayóghe bu mutu muène lèle, àghémbe, nàlèle baate kémbenge na ndè ndé: «Mumbuli mè lèle béne mé, nachi mè lidi, mè sàmàmone ghu tsènge a Yichirayèle yótchi mutu wulidi na lebioghe ngana la mutu wunuwu vè. ¹¹ Nimulo mè lèle béne mé, baate mvuabovè nibàmate ghu ngulu yi letèdi lapóle na ngulu yi lo la lase. Bóne a ba Barame na Yisake na Sakobe nibatchade yilambe ghu mbóghe a Nzèmbi ghu yulu. ¹² To ba Nzèmbi àsole kèti a tsómi mu ningese ghu mbóghe a ndè ghu yulu, nibáfunzu bo ghutso yipfundu cha bèmbii. Aghóne ni ghu bo bákálélenge na ghuèdenge makéke.» ¹³ Avanekaniva Sése àlèle yivónde cha baghodi ndé: «Kiyènde ghu mbóghe a wè. Nzèmbi amavède wè le wè fuli na lebioghe lótchi.» Va kèti a vane musèli yivónde cha baghodi nàbèleghe. ¹⁴ Sése àyènde ghu nzo Pière, nàbakese buko buèndi bua mukaase alase na lesalele. ¹⁵ Sése àbèmbe ndè mu ghogho, lesalele nilafuade. Ndè sóghe, nàvède ndè bia tchade. ¹⁶ Va mavivinde ma buchi, nibayade Sése na baate mvuabovè bàbàbadenge na badéme mu maniutu. Sése àfunzu badéme, nàbèlese babéde bótchi. ¹⁷ Ndè nasade mambe muène mu ndé lebighe le Yisai wa muyélichi a baate mabighe ma Nzèmbi àlèle ndé: «Ndè nàbonge biku bia bésabéne, napape na mabéde ma bésabéne ghu yulu a ndè,» lebuane. ¹⁸ Sése àmone ndé piti a baate mvuayovè ya dinge ndè, nàlèle baate bèndi ndé, wókani lesabeghani ngulu mudibe a Ngalilé yéne. ¹⁹ Musupili a mabighe ma Nzèmbi àkukulu va pédi a ndè nàlèle ndè ndé: «A Kumu, mè tonde duku wè mu bitchighe biótchi bi wè kayèndenge.» ²⁰ Sése nakale ndè ndé: «Mingani na mapuku. Baniódi ba yulu na manzo. To mè Wàbonge ndjime a baate, mè salidi na yitchighe cha sóse kiti mutsuè vè.» ²¹ Mutu mumóchi vatso baate babadukungu ndè nàlèle ndè ndé: «A Kumu, chingese mè mu payènde ghu yi kundu taate a mè.» ²² Sése nàkale ndè ndé: «Duku mè, niaghe bamvumbi na bamvumbi ba kundunu bo muène ghóne.» ²³ Sése anaghe ghutso mbungu bóne a baate bèndi nibàyènde. ²⁴ Avanekaniva mukungu mvua ndè vè aghédene mu yulu mubuwavènangulu, mingébe mighóbe mu mbungu, yo niya mbé base na maambe. Sabóne Sése ndile àbade lase a lase. ²⁵ Baate bèndi bakukulu va pédi a ndè nibasole ndè nàlèle bó: «A Kumu, potele bése! Bése li ka ni leku.» ²⁶ Sése nàlèle bo ndé: «A baate babalidi na lebioghe mu Nzèmbi ndile pése banebe, béne bome buaki? Atèmene, nàkubusu mukungu na mingébe. Bio nibiàbade ndile ka lingi. ²⁷ Baate bótchi baghémbe nibàlèle bó: «A wu mutu ndóghe na, wu mukungu na mingébe bia yimbese wunuwu?» ²⁸ Sése amane sabeghe mudibe, nasóte ghu kèse a bichi Ngadarénié. Avanekaniva baate boli bababade na badéme bàpóle ghutso mapéchi, nibayènde ghu yibuane na ndè. Bo bukèni mvuabuovè bàbàdenge na buo, nimulo baate basavioghenge mu ndjile muène vè. ²⁹ Bamone ndè, nibadumunu michime bó: «A muaane a Nzèmbi, bésabéne tchambe na? Lekèse kipatode vè, wè yade ka ghu yóngese bése? ³⁰ Sabóne dimbe la bangulu mvualovè mua vale na bo latchadenge. ³¹ Badéme nibabonde Sése bó: «Kokole a wè, wè funzu bése, tchindeghe bése ghutso dimbe la bangulu lineli.» ³² Sése nalèle bo ndé: «Yèndani.» Bo bàpóle ghutso maniutu ma baate muène, nibayiningele ghutso bangulu. Dimbe la bangulu lemate ghu yulu a mbènge nilapateghe ghutso mudibe. Bangulu bótchi nibàfuade na nionge ghutso mudibe. ³³ Baate babakèlenge bangulu babate, nibàkóme ghu yulu musènge. Basóte nibayóle misame mia mambe mótchi, na wa baate bababadenge na badéme ghutso maniutu. ³⁴ Avanekaniva bichi musènge bótchi bayènde ghu kèsele Sése. Bamone ndè nibabonde ndè mu mate va kèse a bo.