1 Letsughu muène Sése apóle ghu nzo yi ndè bade, nayènde ghu tsaghele va tungu mudibe. 2 Anaghe ghutso mbungu, nàtsaghele, mu piti a baate mvua yo vè yàdinge ndè. Baate nibàsale va tungu mudibe. 3 Ndè nalongichi bo mambe mvuamo vè mutso makókóme ndé: Letsughu lemóchi mutu nàyènde ghu yinianze tsange. 4 Va ndè nianze tsange, ayéne tsange niyaraghe mu ndjile, baniódi nibayayade ghu doko. 5 Ayéne tsange niyaraghe va yulu yilala, toto yisabade ya kunu vè. Yo yisadinge na mène vè mu toto yabade pése. 6 To niange yibapóle bunubu, biéle nibiakani mu mikèngi misatode vale vè. 7 Ayéne tsange niyaraghe mutso bakième. Bakième na biéle nibamènenge ndile ka tchitse. Bakième bàpote biéle, biéle nibiakuade. Ayéne tsange niyaraghe vatso leniènge. 8 Biéle bimène, nibiatode. A lèlechine labóte biéle mvua bio vè, aléne lechine làbóte mua bia kunu, aléne lechine labóte bia tchitse. 9 Sése amane kókóme tade nàlèle ndé: « Babalelidi na matchui mu yóghe mambe, bayóghe. » 10 Baate ba Sése bakukulu va pédi a ndè nibafulu ndè bó: « Wè muki wè yambele na baate ndile mutso makokome. » 11 Sése nakale bo ndé: Bamamane béne pandele mambe ma buyumunu bua Nzèmbi bua ghu yulu ma ndè pabadenge na mo ghutso mutéme. To basapandele mo ghulidi bane vè. 12 Baate babalidi na biabo, nibababuèse bikime. Wakambe na bio, nibapóke ndè na mua ndji yi ndè lidi na yo. 13 Aléne ni le mè yambele na bo mutso makokome mu bo nabakèngese, bo yikumbu ni yikumbu mone vè; na bo nabayóghe mambe, bo mo tchikese vè. 14 Tchambe muène ni lakuani tchitse na le Yisai muyélichi a baate mabighe ma Nzèmbi alébele ndé: Béne nileyoghe mambe, to béne lesakatchikese mo vè. Béne nilekèngesenge, to béne lesakamone yikumbu ni yikumbu vè. 15 Muti mitéme mia baate muène bunono. Bo bamadibeghe matchui mu bó, lesayóghe mambe muène. Bamadibeghe na mise mu bó, lesamone. Bo basatonde mone na mise ma bo vè. Basatonde yóghe na matchui ma bo vè, basatonde tchikese na mitéme mia bo vè. Bo basatonde ghèle bichidili biabo bia mambe vè. Nimulo mè satughi bo ubèlese vè. 16 To béne buédi lelidi, mu mise ma béne mamone bikumbu, na mu matchui ma béne mayóghe mambe. 17 Mumbuli mè lèle béne mé, bayélichi ba baate mabighe ma Nzèmbi na baate babade ba sóngene va busu bua Nzèmbi batonde mone ma béne lekade mu mone, to bo basamone mo vè. Bo batonde yóghe ma béne lekade mu yóghe, to basayóghe mo vè. 18 Kakiyóghani bu basópele kókóme muniènzi a tsange. 19 Baate babayóghe mambe ma buyumunu bua Nzèmbi, bo mo tchikese vè, wumubi wóne ayade, akamase mambe ma bo bayughi mu mitéme mia bo. Mitéme mia bo vane ka ndjile yitsange yaraghe mu mbade a yo mia fuane. 20 Abane, yilale cha mamani chi tsange yaraghe ghu yulu a cho ba fuane: Bo bayóghe mambe ma Nzèmbi, bachinge mo na ngombe, to bo basakèle mo vè. 21 Mabighe ma Nzèmbi masasondese mikèngi ghutso mitéme mia bo vè. Mambe ma Nzèmbi masaghuade mu mitéme mia baate muène vè. Mambe ma paghe ma yadele, baate basade bo mambe mangusu mu mbate a mabighe ma Nzèmbi, bo basaname mitéme mbise ghabese vè. 22 Toto yiyilidi na bakième yi tsange yaraghe vatso yo, baate babayóghe mabighe ma Nzèmbi ya fuane. To yibèyi cha mambe ma ghu toto ghuni na nzale buchine bi bameghe mabighe muène, mo machibabóte milónde vè. 23 Toto yiyibuè baate babayóghe mambe ma Nzèmbi na tchikese mo ya fuane. Bo bótenge milónde mia kunu. Bakè mukame. Abane, makumimasamene. Abane, makumimatate. 24 v 24 Sése nabaghabeghele bo kókóme tade ndé: Mambe ma ghu mbóghe a Nzèmbi ghu yulu ghu ndè yumu ngana tsange yi mutu anianze ghu nungi a ndè malidi. 25 Baate balase chiolo, wavidenge wavade nakise ghu yinianze a yèndi tsange yiyibi ghutso yambèghi. Amane nianze, nayènde. 26 Bivèdi bimène, bibóghe, bi bande bóte, mughunu a tsange yiyibi na ndè namène ghutso biéle bibibuè. 27 Basèli bangua nungi bayènde ghu mbóghe a kumu a nungi nibafulu ndè bó: A Kumu, mughunu wu wè nianze ghu nungi a wè mé bómbe wu mubuè? Bivèdi bibibi biéne ka ghuni bia mate? 28 Nàkale bo ndé: Mbène niwuchidi tchambe muène. Basèli bèndi nibafulu ndè bó: Bése leyènde ghu yitópele bivèdi muène bibibi? 29 Ndè nabakale bo ndé: A nibóne vè. Ti béne latópele bivèdi bibibi, béne latópele na bibibuè mutso bio. 30 Niaghani bio biótchi bibóghe tchitse nachi lekèse la tóle biéle lekatode. Va batóli bakayènde ghu tole mè kalèle bo mé: Patolani bimbe bibibi, béne leghade bio mu bibutu, bakatsóghe bio ghutso mbuaghe. Bibibuè, béne lekakokese bakakèle ghutso nzo yi mè kèle biéle. 31 Sése nabaghabeghele bo kókóme kime tade ndé: Mambe ma ghu mbóghe a Nzèmbi ghu yulu ghu ndè yumu ngana mua mulónde a mutarede wu mutu àbonge, navade ghutso nungi a ndè malidi. 32 Mulónde muène mua yikumbu cha pése buèndji alidi vatso bivèdi biéne biótchi. To amène, abóghe, akalótele miti miéne miótchi. Akabade ka muti wumunéni, wu baniódi bayade ghu tónge manzo ghutso matake mèndi. 33 Sése nabaghabeghele bo kókóme kime tade ndé: Mambe ma ghu mbóghe a Nzèmbi ghu yulu ghu ndè yumu ngana yikumbu chicha nzanzese mapè chibatède lévure malidi. Mukaase abonge chio, abughu na biétse bitate bia farine. Farine muène yika nzanzene. 34 Sése ayambelenge mambe muène mótchi ndile mutso makókóme. Ndè sayambelenge na bo, ndè kókóme utade vè vè. 35 Ndè sadenge bóne mu ndé mambe ma muyélichi a baate mabighe ma Nzèmbi alèle ma kuani. Ndè lèle ndé: Mè kayambelenge na bo ndile mutso makokome. Mè nipose bo mambe ma basuèghe, bande na va Nzèmbi asade tsènge. 36 Sése aniaghe piti a baate, nayènde ghu nzo. Batóme bèndi bakukulu va pédi a ndè nibalèle ndè bó: Sópele bése kókóme mughunu wu mubi wubàvade ghutso nungi. 37 Sése nakale bo ndé: Wavade mughunu wumubuè Wabonge ndjime a baate. 38 Nungi bulonge bunubu. Mughunu wumubuè ni baate babasade mambe ma buyumunu bu Nzèmbi. Mughunu wu mubi baate babayóghele mambe ma Wumubi. 39 Wavidenge ngua nungi diable. Tolo ghua biéle nilefuade la mambe ma bulonge bunubu. Batóli ba biéle ni bikumbu bia buyimbe bibia salele Nzèmbi. 40 Bu batópele bivèdi bibibi mu yitsóghe ghutso mbuaghe, abóne ni bu mambe makabade va mambe ma bulonge bunubu makachike. 41 Wabonge ndjime a baate natchindeghe bikumbu bia buyimbe bibiasalele ndè, bio nibimase baate bótchi babarémbele bambèghi, namóni a babasade mambe mamabi. 42 Nibatete bo ghutso mbuaghe yabukèni. Aghóne ni ghu bo bakalélenge na ghuèdenge mine. 43 Avanekaniva baate babayimbese Nzèmbi baka ngéyinenge ghu mbóghe a Taate a bo ghu yulu ghu ndè yumu ngana letèdi. Babalidi na matchui buèchi mayóghe mambe, bayóghe mambe muené. 44 Buyumnu bua ghu mbóghe a Nzèmbi ghu yulu ngana kobi bikumbu bibibuè yibasuèghe ghutso nungi bulidi. Mutu abakese yo, nabaghabeghele basuèghe va yitchighe yikime. Nangombe yótchi ayènde nasómbese biótchi bi ndè bade na bio. Na badole ba ndè bàghe nayisómbe nungi muène. 45 Buyumunu bua ghu mbóghe a Nzèmbi ghu yulu ngana muyughu wasaghenge misange mimibuè mibuè mibasolele mu bunono bulidi. 46 Ndè bakese musange wubasómbe mu lefunu lelenono, nayènde ghu yisómbese biótchi bi ndè bade na bio. Abaghe badole nayènde ghu yisómbe musange. 47 Buyumunu bua ghu mbóghe a Nzèmbi ghu yulu ngana mbusu yibabuaghe ghutso mubuwavènangulu, yikabubu milinge mia batchui bótchi bulidi. 48 Yibase, babuèghi bakadutughu yo va tungu. Batsaghele, bakasole. Bo bakabase mapóndji na batchui. Bikumbu biéne biótchi, bo bakabusu. 49 Abóne nibubakasade va fuade ghua mambe ma ghu toto ghuni. Batóme ba Nzèmbi baghu yulu nibayade ghu yikaghele baate bababuè na bababi. 50 Nibatète baate bababi ghutso mbuaghe yabukèni. Aghóne nighu bo bakalélenge na ghuèdenge mine. 51 Sése nafulu baate bèndi ndé: Béne letchikichi mambe muène mótchi? Bo nibayaghele ndè bó, èè, leyughi. 52 Ndè nabaghabeghele bo lèle ndé: Musupili a mabighe ma Nzèmbi wabayighe mambe ma buyumunu bua Nzèmbi vane ka kumu a nzo wa bonge bikumbi bia kale na bia na manze ghutso kobi yènde kèle bikumbu bièndi bibibuè afuane. 53 Sése amane makókóme muène tade, namate vane kèse muène. 54 Ayènde ghu Nazarète bóle bu ndè bóghe, nalongichingi mutso manzo ma bayimbesenge Nzèmbi. Baate babayóghenge ma ndè longichingi nibaghémbenge nalèlenge bó: Ndè buyédi bunubu ghuni abaghe? Wavède ndè bungudi buasade bimuile binebi na? 55 Ndè salidi muaane a Sarependi vè? Ndè salidi muaane a Mari vè? Baghèghe bèndi a Sake na Sosèfe na Chime na Suda vè? 56 Bakédi bèndi, a ni babalidi na bésabéne vaneve vè? Mambe ma ndè sade maneme ghuni mamate. 57 Mambe muène nimasadenge ti baate ba bise bóle lebioghe mu ndè. Avanekaniva Sése alèle bo ndé: Muyélichi a baate bayimbese ndile mu malonge makime, to ghu bóle bubabóte ndè na ghu mbóghe a ngaghe a ndè vè. 58 Mu baate basa bólenge lebioghe mu ndè vè, ndè nàsadede ghu Nazarète ndile mua bimuile bia tchitse.