1 Amma ay na saawara wo tabbatandi ay bina ra: ay si ye ka kaa araŋ do da bine saray. 2 Zama nd'ay n'araŋ biney sara, may no g'ay farhandi, da manti bora kaŋ ay n'a bina sara? 3 Ay na hayey din hantum araŋ se mo, zama waati kaŋ ay ga kaa, ay ma si du bine saray borey do kaŋ yaŋ ga homa k'ay farhandi. Ay go ga naanay aran kulu gaa kan ay farha hari no ga ti araŋ kulu wane mo. 4 Zama ay hantum araŋ za kankami booba da bine saray ra da mo-mundi boobo mo. Manti ay n'a te hal araŋ biney ma sara no bo, amma zama araŋ ma bay baakasinay beero gaa kaŋ ay gonda araŋ se. 5 Amma da boro fo na bine saray hari te, manti ay hinne se no a n'a te bo, amma aran boro kulu se no amma aran boro cindey biney mana sara gumo(ay ma si araŋ tiŋandi gumo). 6 Goojiyaŋ kaŋ araŋ borey baayaŋ te bora din se wasa a se. 7 Sohon kay a ga hima araŋ m'a yaafa, k'a bina gaabandi, hala bora din dumi ma si koy miri bine saray booba sabbay se. 8 Woodin sabbay no ay g'araŋ ŋwaaray araŋ ma baakasinay tabbatandi a se. 9 Mafaaro kan se ay hantum araŋ se ga ti: ay m'aran gosi ka di hal aran ga gana hay kulu ra. 10 Amma boro kaŋ se aran na hay fo yaafa, ay mo yaadin no. Haŋ kaŋ ay yaafa_ d'ay gonda hay fo kaŋ ay ga yaafa_ay n'a te no araŋ sabbay se Almasihu jine, hala saytan ma si du daama iri boŋ. 11 Zama iri ga bay hayey kaŋ yaŋ a ga sijiri gaa. 12 Waato kaŋ ay kaa tawarasa Almasihu baaru hanna waazuyaŋo sabbay se, nango kaŋ Rabbi na fondo feeri ay se, 13 ay laakal mana kani zama ay mana ay nya-izo titos gar. Kal ay n'a noodin to baani ka gana ka koy masidoniya. 14 Amma iri ma Irikoy saabu, nga kaŋ alwaati kulu a ga konda iri jina ka naŋ iri ma te zaama Almasihu ra. A ga nga bayra bangandi danga waddi haw nangu kulu ra iri do. 15 Zama iri ya Almasihu waddu haw kaanoyaŋ no Irikoy se, borey kaŋ yaŋ goono ga du faaba nda borey kaŋ yaŋ goono ga halaci game ra. 16 Woone se iri ga ciya buuyaŋ haw kaŋ ga kande buuyaŋ. Boro fey din semo iri ga ciya fundi wane kaŋ ga fundi no. May binde no ga wasa hayey din se? 17 Zama iri wo iri siino ga Irikoy sanno diibi-diibi ka fatawci nda'a, sanda mate kan cine boro boobo go ga te. Iri goono ga salan da cimi kwaaray Almasihu ra Irikoy jine, mate kaŋ cine Irikoy n'iri donton d'a.