¹ Mi nyan bé nɛ mian nyigbandji xoewó gban lɔ, mi la trɔ ȡo xɔganganwó le Mawu gbɔ. Axoe xɔnwó yɛ lɔ, ŋde agbetɔ lɔ yí tuio, vɔ axoe tsi la nɔn anyi ȡáá le djiŋkushi. ² Le gbadɔ tsɛ mɛ lɔ, mi le ŋɛnŋɛnwɔ le tenɔnɔn nɛ woado mian djiŋkúshi yo xoe lɔ nɔn mi. ³ Ðo lɔ, mi do awu, wó da kpɔ mi le amá amá o. ⁴ Nyawoé, tsi mi le gbadɔ tsɛ mɛ lɔ, mi le ŋɛnŋɛnwɔ, agban le mian kpɛnwɔ. Mi ŋde djí bé wó aȡe tsɛ nɔn mi o, bohun wó agbe do bu nɛ mi bé ne agbeɛ ne le tsi nɛ kú nɔn. ⁵ Metsi le djadjraȡo woawɔ nɛ nu tsɛwó kpata lɔ yí nyi Mawu, yí sɔ gbɔngbɔn na mi shigbe atanŋkánkán nɛ nutsi lává vá nɛnɛ. ⁶ Vɔ lɔ, mí ȡo nɔn kánkánȡodji kokoko, mí dui djeshi bé ne mi kpɔtɔ le ŋtilan mɛ lɔ, mí djidji le axoétɔ ŋtsi ŋtɔ. ⁷ Ðo mi le zɔnzɔnwɔ le xɔse mɛ, ŋde le ŋkúvi nukpɔkpɔ nuwó. ⁸ Ðo mi ȡo kánkánȡodji, mi ȡo la nɔn djidjixoé bohun nɛ ŋtilan nɛ mian nɔn kúdo axoétɔ lɔ. ⁹ Yí mi sɔ xɔn woa mian ȡoȡo, alo mian nɔn ŋtilan xɔn mɛ, alo le akpabu dji, nɛ mian djenú. ¹⁰ Ðo mian kpata, mi lá vá zé le kodjosósó yo fiɔzikpí Kristo tɔ lɔ ŋkɔ, kpɔ ȡo xɔn ŋtsi lɔ, mɛshiamɛ la xɔ nu tsi wóȡo ȡɛ ȡo yo ŋtsilan mɛ, nɛ nyui lóo alo nɛ vuin. ¹¹ Vɔ lɔ, le nunyan mɛ nɛ axoétɔ vɔnvɔn lɔ, mí ná nɔn kánkánȡodji amɛwó. Nutsi mi nyi lɔ le nyanyan mɛ nyuiȡe nɔn Mawu. Yí ŋtɔ te bé nɛ miá nyin ȡo miɔn djitsinnyanwó tsan mɛ nyuiȡe. ¹² Mi ŋde kpɔ le miɔn ŋtɔ ȡoȡo woa nɔn mi o, vɔ mi la xɔ ȡoŋti so mɛnxɔnwó tsiwoe le wóȡekiwó djrawɔ to wó zézéwó mɛ, ŋde nutsi le wó djimɛ o. ¹³ Ðo nɛ miŋde le mian ȡokiwó me o lɔ, Mawu ŋtsi yɔ, yí nɛ mi gbɔva mian ȡoki me lɔ, miɔn lɔnlɔn ŋtsi yɔ. ¹⁴ Ðo Kristo yo lɔnlɔn zé ȡo mian dji, ȡo nuyí ŋtsi lɔ mi kánȡo xɔn dji : bé amɛ ȡeká kú ȡo amɛwó kpátá tá, yí ŋtsilɔ amɛwó kpata kú. ¹⁵ Yí Kristo kú ȡo amɛwó kpátá tá, le nɛnɛ nu lɔ, amɛtsiwó le agbe lɔ ȡo lá nɔn agbe vɔ ŋde agbedjidji nɛ woaŋtɔwó, vɔ nɛ amɛtsi nɛ kú trɔ fɔn lɔ. ¹⁶ Le nyamɛ sósó tsɛ ŋtsi, so fifiɛ lɔ, mi ŋde dja ȡo kodjó kú amɛȡe le ŋtsilan mɛ, ne mi gbe kpɔ Kristo le nɔnɔn me tsɛ me vayi san lɔ, mi ŋde dja gbe ȡo kodjó nɛnɛ há tɔngbe o. ¹⁷ San xoxo, ne amɛȡe le Kristo me lɔ, etrɔ zunɔn nuwoawoa yéyé. Nuxóxówó va yi, wó trɔ zun nuyéyéwó. ¹⁸ Nu tsɛwó kpátá so Mawu gbɔ, yi trɔ woa ȡéká kú mi to Kristo dji, tsi na mi ȡekáwoawoa yo sɛnsɛn. ¹⁹ Ðo Mawu nɔn Kristo me, yí trɔ tsáká le xixeɛ kúȡo yeŋtɔ dome, le nùvuinwó kɔntá mawoamawoa me, yi sɔ ȡeká woawoa yo nyan do mian mɛ. ²⁰ Nene yi mi trɔ zun Kristo yo texoé nɔntɔ, shigbe bé Mawu le yió yɔyɔ woawɔ to miádji nɛnɛ. Miȡe kúkù nɔn mi le Kristo lɔnlɔn tá : " mi trɔ wɔ ȡeká kùdo Mawu. " ²¹ Etrɔ Kristo yí vá zun vɔsá nɛ miɔn nuvɔnwó. Yí tsi nyi amɛtsi ŋde woa nuvɔn kpɔ o, yí trɔ zun nuvɔn le miá tá, nɛ mian trɔzun djɔdjɔnyínyí nɔn Mawu.