¹ Yeso wunda majirakuniy dirbole be i modi nami onsu gedo ka kelui disa, ta rokinsu hena, darante lei shida gollai yiya ke. ² Kauso sun majirakui dirboloi woi nzuni. Yo tono, Siman [yo shaf a wunda si Bitrus], ki Andarawus yagenani; Yakubu lah Zabadi, ki Yahaya yagenani; ³ Filibus, ki Bartalamawus; Tomas, ki Matta a biska ngalana; Yakubu la Alfa, ki Yahuza; ⁴ Saminu ngoi kani ana, ki Yahuza Iskariyoti yo ongko si. ⁵ Dirboloi maye Yeso sarko nzuni. Si zofsu kola idansu ansu ta, "Ngu go be is ana mure ona jire deishendi bu, ke ngu ro tong gyabanik Samariyaku bu. ⁶ Kika ka ai nda gem temkai bo'ino ma ban Israila. ⁷ Na ngu ndangko, 'ya wazu ngu ani ta, 'Mene Ndeyi into nem.' ⁸ Daranta ana golla, jugta ana mato, daranta ana wale, ke hokdatik singkau. Ngu biskangko sarei, ona sarei. ⁹ Ngu nam dinar, azurfa, domana lu'u lu'u tong lihungku bu. ¹⁰ Ngu nam batkar marshetku bu, donama suba bolo'yak seshi, do taho, do zawa, kika a ruta suba oni wo'oto. ¹¹ Lei shida gyabani do genga harei ngu rangkoi, gyaza ngoi subatko, deya wondi kaba nang gokku hindangko. ¹² Nang gotku rishe tong banos ana ta, barka urtu katku. ¹³ Na banos subai, era salamku urtu kato. Me na suba bui, erá salamku meto katku. ¹⁴ Mamayei kudangkok biska nguni do kudangkok kola eningkui, na ngu hetek banos do gyabanis, tatakdatik bugdoi shekengku. ¹⁵ Jiren anshengku, a deya gelko elik Sadoma ki Gomarata a hoti sherya ka gyabani wonsi 'i. ¹⁶ Moyai, Ne sarshe nguni kit temka hotok adai riya, deyak wayo kit samma wara bana kit korkodi. ¹⁷ 'Ya hangkal ki algi! a ona ngunik ana mene, a iku jibo tong ban donshunsu. ¹⁸ A moka nguni dom ana maito ki ma'inshek bo ne-e, kika ngu on shaida a domsu ki mure ana ona jirey. ¹⁹ Na nzuni mokangko nguni, ngu damte ka ei ngu gotku anshe bu, kika ei ngu gotku anshei a ongkuti jajum wommi'i. ²⁰ Kika a ina eniy nguni bu, me Kelu Bokui bu'uno a ina eni ki bonku. ²¹ Yagena ontik yagenani bo mato, boti ke ona lani. Milla hihinda ka ana le'insu a kunzesu bo maftisu. ²² Lei ngoi yiya kuda ngunik ka suno. Me ngoina ngarkok tilini har tatakai, ngoi wom a watik wangu. ²³ Na nzuni kudangko nguni gyabani wonses, ndatku so'oto, kika ne anshengku jire, ngu gita kokranta banai elik Urushalima bu Lah ngo menni. ²⁴ Majiri walla malumni bu, do ngaru walla bobi abano bu. ²⁵ Ka' do majiri deyi kit malumni, ngaru ke kit bobi abano. Na nzuni wundanko abanoi Ba'elzabuba, shida yabtui yiya a idik a bano ye! ²⁶ Kika woi ngu 'e zuba su bu, kika an 'ei ngarangko yo a hetetu hena bu, ke andi 'ei bungkeno yo a manta bu. ²⁷ Ei ne anshengku tong bunko, anak hili, ei ngu kolangko suskanni tong kumangku, akna si ka soro. ²⁸ Ngu 'e zubak mayei a dugshe zugo me a gishe duga zau bu. Kika woi 'ya zubak woi yo a giti dugtik zugo shafki zau tong yesi. ²⁹ Rayinshe bolo budu bo'itangko ka anini ye? Shaf an modik hawosu so ngata eli wara mantu Boku. ³⁰ Me lei som yo katku shaf masno. ³¹ Ngu 'e zuba bu. Me kawatku wallitkok rayinshe shei. ³² Kika ka 'a lei ngoi yiya na tamko ne 'e dom algiy, Ne 'e ken tama si dom Bono yo tong baba. ³³ Me ngoina iko shanak manta ne 'e dom algi, si ken ina shananni dom Bono yo tong baba. ³⁴ Kadang ani tan ndino moka deinok lahiya tong dunya. Ne ndino moka lahiya bu, kaba dirba me 'e. ³⁵ Ne ndinon gomte ka ngok bobi, ba'ati ki nonti, man lah ki sorkiti kek sorkito. ³⁶ A deya ana gyahak ngoi ma tong banonni. ³⁷ Ngoi nda bobi do noni wallinoi yono bu. Ke ngoina nda lahni do ba'i wallinoi yono bu. ³⁸ Ngoina namko shoho longkuni dafko ne 'e bui yono bu. ³⁹ Ngoi a deita zauni a yakliti. Me ngoina yakta zaunik kannoi a wati. ⁴⁰ Ngoina biska nguniy biska ne'e, ke ngoina biska ne 'ei biska ngoi sarno ne'e. ⁴¹ Ngona biska Nabi kika si Nabiy a biska bo hawok Nabi. Ke ngoina biska ngoi zina kika si ngoi zinai a biska bo hawok ngoi zina. ⁴² Lei ngoi yiya na ongkok milla mayei, lei ham leilei do se, kika si majirino, jiren anshengku, a damba yakla bo hawonni bu."