¹ Yesu eghesiya akisiyo kya nanja. Kigambi kya bhantu kya gumbana hai naye, anina omubhuati na asitama omu nanja atandika kweghesiya bhantu bhanali akisiyo. ² Abh'eghesiya bhintu bhikaniye omunsimo, omukweghesiya kuwe abhaghila ati ³ Mughuwe. Mulimi akaghenda kusigha nsigho yee. ⁴ Obhu anasighagha, bhumuhi hasigho bwalaghala omukihanda kati,noni syasa syabhuliya. ⁵ Bhumui aa nsigho yee bwalaghala etaka lyamabhale bwatuwa bwangu nanga etaka kutakano. ⁶ Ti obhu musana ghwatoye ghwabhokiya, bhwahotoka nanga miiliyabhuho ekabha etatahiye byani mu etaka. ⁷ Bhumui haa nsigho yee bwalaghala mumahuwa , dumbi yakula esosokeye, etaana nakighuma. ⁸ Bhumui ansigho bhwalaghala etaka lisemeye: bhwanamu kighuma kisemeleye kimui, kulughamu makumi asatu, kanji mikumi mukagha kanji eghana. ⁹ Dumbi abhaghila ati: oghu ali namatui gha kughua aghuwe. ¹⁰ Obhu abhagha ali enkaa na bhahesebhuwa bhee ekumi na bhabhili na bhantu bhanji abhabhagha bhamukitiye eki ensimo syawe sikumanikisa bhiki. ¹¹ Abhakukamu ati: enuwe muhebhuwa nsita sya bhulemi bhwa Luhanga; noo abhali enja bhakughwilagha nsita esi munsimo, ¹² nikuwo mbaloliye bhalole na bhatabhona, na mbaghuye bhaghuwe noo bhatetegheleliya, mbakoliye bhatiyo bhakukukoho Luhanga kandi bhaghanuluwe. ¹³ Kandi abhaghila ati: tamuetegheleye olisimo olu? ti nasinji syona mulasyetegheleliyagha mutiya? ¹⁴ omusighi akasigha kighambo kya Luhanga. ¹⁵ Abho nibhoo ensigho eghi ekalaghala akpengbu y'ekihanda, nibhantu abhakughwagha ekighambo kya Luhanga, dumbi mulimu ghwisa ghubhayamu kiyo. ¹⁶ Ensigho eghi ekalaghala amabhale, nibhantu abha kudeduwagha bhaghuye kighambo kya Luhanga; ¹⁷ noo tabhali na mili omubho bhonini, bhakukalaghoo bhwele bhukee, na kajibhu ka bii nkabhaikoho, dumbi kuikilija kwabho kuhuwa. ¹⁸ Kandi ensigho eghi ekamisuwa omumahuwa, kikumanisiya bhantu abha kughuagha kighambo kya Luhanga, ¹⁹ noo kutalibhana kw'obhwomili bhw'ensi, kudimaguwa kwa etunga na kweghomba bhintu bhinji, bhileka kighambo kya Luhanga kitabha na mughaso. ²⁰ Ensigho eghi ekamisuwa etaka liseye, kikumasiya bhantu abha kughuwagha kighambo kya Luhanga kandi kibhaghasilla milundi makumi asatu, bhanji makumi mukagha, bhanji eghana. ²¹ Atoda abhaghila ati: aliyo muntu oghu akubakiya tala aghiswikila nakighegha, kida aghita ebhukungwisi? nandiki akughitagha ameja niikuwo ebhakiye omunumba yona? ²² Nanga takiliyo kyona ekikukoluwa mubhubhiso ekitangugubha kumanuwa, keda ekyebhisiye ekitalimanuwa . ²³ oghu alinamatuhi ghakughuwa, aghuwe. ²⁵ Nanga oghu alinakantu, niye aliyongeluwa baitu oghu atali nakantu naka alinako kalimulugho. ²⁶ Yesu atoda aghila ati: bhukama bhwa Luhanga bhuli ngamulimi oghu akuhelagha nsigho yee mumusili; ²⁷ Mukilo alangala, kisankiya amuka kukola milimo yee nsigho yatuwa yabha ndimuwa yakala nenakula eye atamaniye ngoku ekwete kukula. ²⁸ Etaka niliyo likutuwesiyagha nsigho eghi ,dumbi ndimo ekula yaana ti yeela. ²⁹ N'endimo eghi ya keliye, dumbi mulimi oghu aghikesa, nanga ekesa lyahikiye. ³⁰ Atoda aghila ati: bhukama bhwaLuhanga tubhususaniye na bhiki, keda lusimo ki lungubhusobholola. ³¹ Bhususane na kasigho ka kalatusi, aka, obhu bhakukahelagha mwetaka, niko kaghuma kabii munsigho yona eghi eli mwetaka; ³² noo, nakakuheluwagha, kakula, kabha kanamulito kusaliya bhiti bhyona, na katwesiya bhitahi, toli noni sikwela mu. ³³ Ni kusalila omunsimo sikaniye ngesi Yesu abheghesiyagha kighambo, nikuwo bhagubagha kwetwghleliya. ³⁴ Tabhaghambiye kantu kona etali munsimo; noo; akabhagha ali na bhakwenda bhe, abhaghambilagha ebhi sikumanisa. ³⁵ Ekilo eki kyonini, lwagholo, Yesu abhaghila ati: tubasuke luhande lweli lwa nanja ³⁶ Akahumiye ekibula, bhanina omubhwati obhu abhaghamu, mati ghaghenda ghabhulabiye. ³⁷ Kiwegha kya mani kyasa, na mighina sya tandika kusamba obhwati, masi ghabala kubhusulamu. ³⁸ Naye, akabha alangaye antina ya bhwati aghwesaghiye. bhamususumula, na bhamughila bhati: Mweghesiya, tofuyoo ntuna twika? ³⁹ Obhu asusumukiye, amuka, atanuka ekiwegha eki, na aghila nanji ati: holiya! dumbi kiwegha kyaleka, nanja eduda. ⁴⁰ Na abhaghila ati: abhwaki muli na bhwobha? abhwaki mutali na nikiklija? ⁴¹ Bhobhaila kimui, na bhabhulaniye: oni ni muntu kii, oghu kiwegha na nanja bhikughwagha?