¹ Yakobo, mukoli wa Luhanga na w'Omukama Yesu Kilisito o mubhutula ekumi na bhubhili obhwahanjikane, Mulayo! ² Bhana bha maha, mulole ngu nkyamakuni munu mmwegengiye mu bhilengeso bhikaniye, ³ Mukenge ngu kulengesebhuwa kw'okuhikilija kwanu kukubhaha kugumisilija. ⁴ Noo, Kibonganuwe kugumisilija kusulisiye bhikoluwa bhyakuwo, nukuwo mubhe bhantu bhasuye mutakusaghuwa mu bhyona. ⁵ A kati kanu n'abhayoo oghu atali n'okwetegheleliya, akusabhe ewa Luhanga oghu akuhagha bhyona atakudidimaaga. ⁶ Noo akusabhe n'enikilija magilaa kudidimaaga; nanga oghu akudidimaagagha asusane ng'emeeli y'a nanja eghi ekutalibhanagha bhw'empwegha neghisindika mpande syona. ⁷ Omuntu ngoghu ataasukila kutunga kantu kulugha ewa Mukama. ⁸ Ni muntu ataali na bhumilililo, wa kwegaalagaaliya mu bhihanda bhiye. ⁹ Oleke w'olughanda w'oluleengo lwansi esinde bhw'okuninibhuwa mukitinisa. ¹⁰ Kuyoho olekee omuguuda, esinde bhw'okusundukibhuwa kuwe; nanga alisaala ng'ekimwole ky'ekisingo. ¹¹ Musana ghwatoye n'ekituumo kyaghuwo kisakaaye, ghwomiya ekisingo, ekimole kyakiyo kyalaghala, n'obhulungi bhwa kiyo bhwabhulingisane: Nikwanokuwo muguda alihoonga nge kimole mu milimo siye. ¹² Ali n'emigisa muntu oghu akugumisilija mu bhilengeso; nanga, akakubhisagha alitunga sipewa y'obhw'omili, eghi Mukama atekanije bhwa bhamukundiiye. ¹³ Muntu wena obhu ali mukilengeso ataghila ati: Luhanga niye andengiye. Nanga Luhanga takuguba kulengesebhuwa na bhibi, kandi takulengagha muntu n'omuwi. ¹⁴ Noo bhuli omuwi akulengsebhuwagha abuliuwe na kutingitibhuawa n'okweghomba. ¹⁵ Dumbi okweghomba nkwakuliya kubhyala nsobhi ewa Luhanga; N'ensobhi niyakula ebhiyala luku. ¹⁶ Mutedima bhana bha maha bhakundibhuwa: ¹⁷ Bhuli ngughuma siluungi na kiembo ekihikiliiye, bhikulughagh'eghulu, ew'enini ebhyeleeli ambali kweegalia kutali keda kyelughulilia kya kuhinda hinduka. ¹⁸ Akatubhyala ha kubala kuwe, kusalila kighaambo kya majima, nukuwo tubhe nga mughanulo ghw'ebhihanguwa bhiye. ¹⁹ Mukikenge bhana bha maha bhakundibhuwa. Hatii, bhuli muntu abhe mwangu mu kutegheeleliya, bhukebhuke omukubhugha, bhukebhuke omu kusughala; ²⁰ Nanga kusuughala taku kusulisia bhilaghilo bhya Luhanga. ²¹ Nabhweki, munabengiye bhulofu bhwona na bhuli nsaagi ya bhubi, mutangilile ekighambo ekyaheleuwe hali enuwe, na ekikuguba kukiliya emyooyo syanu. ²² Mukoleesiye ekighambo, na mutahelela a kukiighuwa ni mwedima enuwe bhoonini na bhyelilikano bhyebhisuba. ²³ Nanga, muntu nategheleiye kighambo, asaghuwa gha kikoleesiya, asusane ng'oghu ekebheye mu ndebheluwamu, ²⁴ Dumbi kukamala kwelola ngoku asusiye aaliso, aghenda na kweyibhululuwa. ²⁵ Noo oghu atumaane na kuloliya maso ghe omukilaghilo kihikiye, kilaghilo ky'okweghonja, na nagumilila kimuwi atali nga mutegheleliya wa kubhululuwa, noo neeta a mulimo, alibha omu bucheme a mulimo ghuwe. ²⁶ Muntu neighuye ati ni muna diini, noo ataakuguba kulinda ekilimi kiye baitu nedima omu mutima ghuwe, ediini y'omuntu oghu teeli na mughaso. ²⁷ Ediini eghi etali na bhulofu, kandi etali n'ebhitoneji mu maaso gha Luhanga Es'etuwe, ni kubhungila nkubi n'abhakwisiya omu kubhonabhona kwabho, na kweeta akpengbu y'obhulofu bhw'ensi.