¹ Paulo, mukwenda wa Yesu Kilisito, akilaghilo kya Luhanga mujuni waatu na Yesu Kilisito, kuniila kwatu, ² ewa Timisewa, mana wanje enini omu nikiliija: Ngughuma, mbabhaji n'obhusinge kulugha ewa Luhanga Esetuwe na Yesu Kilisito Mukama waatu, si bhele nawe. ³ Nkusukiye kihanulo ekinakuhaye, obhu naghendagha e Makedoniya, obhu nakulaghila nti okale e Bhuefeeso, nukuwo okonkomelele bhantu bhamuwi bhateghesiya enjeghesiya enji, ⁴ na otakwamangana na bhighano na njaluwa sya bhataata bhitakubhagha na mpelo, bhikuletagha mpaka ambali bhyongutwala mulimo ghwa Luhanga mu maiso omu nikiliija. ⁵ Ekighendelewa kye bhilaghilo, ni bhumaanji bhulughiye mu mutima ghuseniye, bhyelilikane bhisemeye, na nikiliija ya majima. ⁶ Bhamuwi, mbeegaliliiye bhintu ngebhi, bhakabhulila mu ebhugha litali na mughaso; ⁷ bhakubalagha kubha bhakugu bha bhilaghilo, noo bhatamaniye n'ebhi bhakwete kubhugha keda kugumiya. ⁸ Tumaniye ngoku bhilaghilo bhisemeye, naani tubhikoleeseiye mu majima. ⁹ tunakengiye ngoku bhilaghilo tabhikoleuwe bhwa bhantu bhahikiliiya, noo abhwa bhantu bhasakaaye, bhjeemi, bhakoli bhe bhibi n'abhasisi, bhatamiye diini na bhakafwile, bhatii bha bhabhyaye bhabho, na bajindi, ¹⁰ bhasiani, bhakoli bha bhihaliyo, bhaabi bha bhantu, bhahii bha bhisuba, bhalaili bha bhisuba, kyona ekili n'engabhanija n'enjeghsiya eseniye, ¹¹ ku kwamangana n'enjili y'ekitinisa kya Luhanga w'emigisa yoona, enjili eghi nahebheuwe. ¹² n'ebhaliye oghu nkantamu maani, Yesu Kilisito , nanga kuntaamu bhwesighibhuwa, ¹³ abhwa kunjuweka mu mu bhuheleliya, kuni nkali nili mwambuli wa Luhanga, muhihi wa bhakoli bha Luhanga, muntu asakaye. Noo naatunga mbabhaji, nanga nakolagha ebhi ntamaiye n'omubhukafwile; ¹⁴ na ngughuma sya mukama waatu sya nsesekela, mu nikiliija n'obhumaanji obhuli mu Yesu Kilisito. ¹⁵ Nikighambo kyamajima na kya kihikiliye kukitunga, ngu Yesu Kilisito akaasa munsi kujuna abhasiisi, abha nanje ndii wokubhanja. ¹⁶ Noo nkatunga mbabhaji, nukuwo Yesu abhooneke omu siye lwokubhanja, nibhe kya kuloleloho abha kumuikiliija nukuwo bhatunge bhwomili bhw'ebhilo n'ebhilo. ¹⁷ Ew'Omukama w'ebhilo n'ebhilo, mutakuwa, mutabhoneka, Luhanga omuwi, kitiinisa n'obhukulu,bhimughendele, bhilogholi n'ebhilogholi! Amina! ¹⁸ Uwe, Timisewa, mana wanje, kilaghilo ndima kuha ku kwamangana na ndanga syakoleuwe ambele ahabhwawe, nkughamba ngu, kukwamangana nasiyo, olwane bhulemo bhusemeye, ¹⁹ onalindiye enikiliija na bhyelilikane bhilungi. Ebhyelilikano ebhi bhamuwi bhakabhibhuliya, na bhadiikila mwebhi loiliye enikiliija. ²⁰ Omu bhantu abha halimu Himeneo na Alekisanda, abha nahembiye ewa Sitani, nukuwo bheghee kutasemanga Luhanga.