¹ Na rama jirewa i kunu Masihu. Na papiya bai, na kuramga dlamin gara saida ga i kunu Nənuwa Səku. ² gaɗa i kunu ga na dlamtu gəshi na dləra i kunu gəshi ga. ³ Da mana bartaga nda ɓəra na iyu na Masihu gaɗa yaganaucin wara ndaga nai kə təka. ⁴ Akshi Israilawa. Nda gənnakshi ka ki kutli Kakasəku, na martapa gəri, na alkawar, na bar shariya na nakwana i Kakasəku na gagəzhin alkawar. ⁵ Darik kakancinshi Masihu da nai i kunu təka- A ci wara Kakasəku kə ti ke. Nda saksakta ci har dadigiri. Amin ⁶ Amman gaɗa alkawar Kakasəku bata bai. Gaɗa mak nən tawanke bai a kunu Israila a ci nən Israila kə jirewa. ⁷ Zuriya Ibrahim ke mak kutligəri ki jirewa bai. Amman, "Darik Ishaku ne nda ni nda dauri zuriya ci." ⁸ Kasən, kutli təka ai kutli Kakasəku bai. Amman kutli alkawar akshi ka kakancin. ⁹ Sutku ne, atu rama alkawar; "Nani i lakwtu, nda bar na mayim i Saratu." ¹⁰ Su tuku rugara bai amman aku Rifkatu cam bana madau dari nən gayi, afək kun Ishaku- ¹¹ nda yawu mamugo bai dəgo a ci dlam be bəlan ko gabshu bai, gaɗa nufi Kakasəku i cikit da dlaɓi, gaɗa wana nin bai, amman gaɗa ba ci daurau- ¹² nda rami tu ma, "Marryamu a dlama butkena i gangam gu." ¹³ Su tuku ka ki be wara nda tarnu: "Na ntutu Yakubu, amman na ngubtu Esua." ¹⁴ To wa ramau ma tam? Na rashi jirewa bi i ri Kakasəku? su ngalte a dlama bai. ¹⁵ A turo a ci rami Musa, "Na dlama kanjino i ndawa wara na dlamau jigiyayi, na dlama jigiyayi i ndawa wara na dlama jigiyayi." ¹⁶ Gaɗa kasən, amman gaɗa nən ancu bai, ko gaɗa nən a dlama rawa, amman gaɗa Kakasəku, baci tatka kanjino. ¹⁷ Kakkadu rama Səku rami Firauna, "Gaɗa kasən na tlatla ci, gaɗa na tatki garva kunaga i kuna ci, gaɗa nda yayaci dləgun i kunu duniya duk." ¹⁸ Gaɗa sən, Kakasəku na kanjino i aɗa nən ancu, na nən a ci an cu, a ci dai vinakshi na gauɗak aɗa. ¹⁹ Kwa rama nai maya, "Gaɗa gəmo gusku yaye a ci amaka aipu?" A dlama gauɗak aɗan tai na ntu gəri?" ²⁰ Amman nən, ci tai ka dlam gamɗaya na Kakasəku? Be wara nda ləmu a dəmu na rame baci ci ləma gəɗri bi ma, "Gaɗa gəmo ka dlama Iyu kasau? ²¹ Ko ba ci ləma dawai a dəmu gu bai dangwi rəba kalkal wara dami dauri bena bəlan, na zam dalami dawai ke wana kulum? ²² Nana in Kakasəku, wara a tatka dlimatu gəshi gəri na da tatka kərmai gəri ndasga, dlami na kəmar gawa kəmar na ndawa wara a ci a gəshi na akshi na wara bata kambeta. Dlam kasən gaɗa da tatki gawa saksakta gəri? ²³ Ntu gəri ne tatki ɓərit kə saksakta wara a ci a kunu i ndawa wara a ci dlamikshi kanjino wato, ndawa wara a ci dlam dekshi mpayi kə saksakta? ²⁴ Su tam, in har ka dəmuna dlam be kasən i jan, mi i ka dauru da kunu yahudiya jab bai amman harda kunu ndawa mi zəga Kakasəku bai? ²⁵ Ka ki mi a ci rami Hosaya, "Na daura ndawa wara mi zəga Iyu bai, "Na ndaganai, zam da dlam nakshi nda ntu ga. ²⁶ Ani nda ramikshi ma, Kun ndaga bai, i ri tunu nda daurakshi kutli Kakasəku ba ci aro." ²⁷ Nabi ishaya dlam daura a ɗak Israila, "Da gawa kutli Israila ka ki aisawu miya anku yaye da gagshin rab ne dakunakshi ne abi raa." ²⁸ Gaɗa Kakasəku a miya na rama gəri idak duniya, na dlimit laktu bai a niya du mak." ²⁹ Ka ki mi Nabi Ishaya ramu waci, "In Məgəngyi baci dəsku dai kadugu bin, da wa dlama nawa ka ki nda Sadom , da zam nda katanawa kaki Gomarata."? ³⁰ Wa ramau matam? Ndawa mi wara Yahudiya bai wara maki adalta bai, da bina adalta, adalta da ri bari jirewa. ³¹ Amman Israila, wara ma ki adalta dari shariya, akshi dəma dlamau bai. ³² Gaɗa gəmo? gaɗa akshi maku da dəvo jirewa bai, amman dari wanakshi . Akshi gayi aɗak guyak da dagamu nakshi . ³³ Ka ki yadda nda tarnu, "Aiki, I na kunu Sihiyona na dəba gulaguyak mi ndawa adagamu. Nən wara bara na jirewa nin a ci a kəmu zhirau bai."