¹ Yeso atka rakan gǝri da wunduwa Sǝku tǝn, gayi dakun pakuraucin gu da rami ci ma, "Mallum ai ki gugyak blan na lima bǝlan tuku ² sei Yeso da ramikshi ma, "Kwe kana limamin bǝlan tuku ba? go wara da bizau i aɗa kammancu wara da rǝbgo bai." ³ A ci mbasu i aɗa gugiyak olive ba ka wunduwa Sǝku tǝn, Bitrus, na Yakubu na, Yahai na, Anderawus da jayi ci dadǝbsa ⁴ "A ramija, bitiku a wakata fatawan? alama wakata bǝ tiku nǝn tam? ⁵ Yeso da ɓanji dlamǝk shi rama ma, "A dlamina ankal nǝn wan da ɗaya kun bai ⁶ Ndawa gawa aye ni i kun dlagunga da ramma, i'u ne Christi, zam aɗayina ndiwa gawa. ⁷ In kwakima labar zha na papyak zha nǝn, ankal kun da tla bai; Gǝd bǝtuku se dlamu, zam dadiru de bai ⁸ lardi a tli aɗak lardi, garva ke da tli i aɗa garva. Da dlam rǝb gagai i rai gawa, na maya. Amman gǝd sau ɓanda bone ⁹ A dlamina mbasu ikun asǝn. nda yana gun i kama garvavin da ni da dadgi kun i kun seseu wuda rama: kwaye ridɗi i kema gwamnanin na garvavin gaɗa ganai, ka ki bi tana ga irikshi. ¹⁰ Amman sukur labar herr ga nai sai zada lardi tawnke ¹¹ In dajǝb kun da jina kun da bar na kun kwa dameta bai ida be kwaye ramau. A srtu tunu be kwa ye rammau nda bardikun amman kwa ye raman kun bai se Nǝnwa Suku ¹² Yagana a barna yagana gǝri i mutu, afak a bar na wun gǝri, mamu atlai aɗak madyawawin shi, har da dawukshi i dǝvo mutu. ¹³ Ndawa gawa a ye kurna kun gaɗa tligun ga. Amman nǝn wara ridin gǝri i miyau nǝn abe aro. ¹⁴ Lakwtu kwe ka be blan bai a wakata nin kwǝka be wara ari atu bai (baci karatu da zigadu) ndiwa wara a Judiya da rawa nakshi i aɗa gugiyak, ¹⁵ nǝn wara a dǝsku wunduwa da fuwena i ɗa bai, ko nǝn wara a dǝsku sugiri da fuwena bai da mi ɓe da kunu, ¹⁶ nǝn wara a pata nǝn, da katina i ma gwadam gǝri bai ¹⁷ wadare nda kutlai da barik ananyi i lakwtu! ¹⁸ A dlamina magit biu da wakata i kun diman bai. ¹⁹ Da dlam tsanani wara galte da tlambai tun in pik duniya watra Kakasku tlamatu, har gusku, na har abada a tlama bai. ²⁰ Gaɗa Sǝku pulutina yuwan gu bin, na nǝn wara a bi aro bai. Amman gaɗa ndak Sǝku, ndiwa wara a ci ckiɗu A ci pulutuna yiwan gu. ²¹ Zam nǝn wara ramici, 'aiki' so tai Christi!' ko sotai aci kwa gina bai ²² Ndawa wara Christi bai na nabaucin papiya a ye pakayi nda dlam bi gaginawa na ajab gaɗa da ɗayinakun in a dlamangaran har ndawa wara da chikɗo gu. ²³ Ardina iriɗa kun, na randikun bi tiku kabin da wakaci ²⁴ Amman akun bar bone ki yuwan aku ti; Afa dlaman gara ayuwa, tara a bari ɓyan gara bai, ²⁵ gishiwawcin a pai nakshi da dǝsku. D rǝbna kǝrmai wara a dǝsku. ²⁶ Da ritunu da lawanna wun ginin ani da kun kǝrabak na marǝm kǝrmai. ²⁷ Daritunu a wanayi malaikaucin gǝri a ci a cacpana ndawa wara a ci chikɗo i aɗa gayi da gabtatin hudu da dadigǝri gagai na ki dǝsku. ²⁸ A dlamina gugza dari waka ayawu. Da lakwtu wara gaptau jǝbna pthayu da jina awai, azigina du dǝman gaza gawa bai ²⁹ kasǝn ke, lakwtu kwekau be tuku a wakata nin, a ziginadu aci a ɓram dantau, na mafgi. ³⁰ Jirewa, na rame kun, zaman tuku a nuta bai se bitiku wakatu. ³¹ Dǝsku na ɗa a bǝnta nakshi amman tilam ga a binta bai. ³² Gaɗa gafu tunu ko lakwtu,na ninzigabai, ko da malaikaucin wara kun dǝsku, balle wungu, amman se Afak. ³³ Ambasina na zigaya na lawan, gaɗa kwasga lakwtu bai. ³⁴ Atuka ba ci rakan wara aye buwa aivana wuduwa gǝri da dawido aikok zadaucin gǝri da ankalci na wuduwau, ti ye na wana gǝri se a ci darami ba ci wanak ɗire ma dlama yuwan bai. ³⁵ Gaɗa ka sǝn a tlaɓina na zigayakun, gaɗa kwasga lakwtu ba ci wunduwaw akatayi bai; a dlaɓangara aduwaw, ko i gadava dǝvid, ko lakwtu kwaryak gaskam, ko i kun dlanik ɗa. ³⁶ In a ci dew kwaram nin, da ta se na ci ga yuwan bai. ³⁷ Benaramikun na rame tiye a dirina!