¹ Na ramau in har baci gadota mayum nən, go talta i gadava gəri na guzub, ko da aci ne baci gadota ləmangu. ² I sərum kasən aci a diɗa ndak zari na ndak yarji har se lakwtu mi wara ma 'yawu gəri impau. ³ Kasən ke wa a lakwtu mi wa mamau, nda jəbna wa ikun kilado ki duniya tuku. ⁴ Amman sartu dlamin gara kalkal tunu, Kakasəku da wane wən gəri mi 'ya waci dari ama, ɗi kun dumaya. ⁵ Dlam kasən gaɗa dari ndawa mi a kun dumaya, gaɗa wa gen diggi aɗa i sərum kutlai. ⁶ Gaɗa kun kutli ne, Kakasəku wane Nənwa wən gəri i kun gəzhawa, Nənuwa wara a daura, "Baba Afək". ⁷ Gaɗa be dawu ci gususku guzub bai amman matkam. In ci matkam nin, kasən ke ci na gado da ri Səku. ⁸ Duk na kasən i waci kwazga Səku bai, guzabcin lispir mi tun kade akshi Səku bai ko rab. ⁹ Amman gususku kwa zigana Səku, ko kwa gususku, Səku zəgana kun, dawuntam kwa kaci dakau i ri kilado mi go awayau zam go paida? kwancu kwa kaci nakun i mbasu guzabcin kaki waci? ¹⁰ Kwa ankalta 'yuwan, karara tərarin, sartu, na amananin. ¹¹ Na kəmu kalau, kun. Na kalau gaɗa ka na dlam wana vatku i ri kun. ¹² Na wilata kun, yaganaucin, a dlaɓina kaki 'iyu, gaɗa i ke na dlabi kaki kun. Kwa dlama aibu be wambai. ¹³ Amman kwasgadu i kun dagas ganai na dlami kun wagərma herr ki Səkur. ¹⁴ Ko da halmi na kunu, ki jirewa dawu na kun i kun kaktla gaɗa kwa mowa 'iyu bai ko kwa wayi na 'iyu. I sərum sən kwa gəna 'iyu kaki Maleka Səku, kaki 'iyu Masihu Yeso ne na aɗa gəri. ¹⁵ Gaɗa kasən, gususku, inda pərdai kun? Gaɗa ina saida kun, in a dlaman gara nin, da kwa kultkuɗe na da kun kwa barda. ¹⁶ To kenan, dlaminga makuru kun gaɗa na ramme kun jirewa? ¹⁷ Akshi a maka kun rankata gaɗa herr ɗagai bai. Akshi ancu da burna 'iyu na kun gaɗa kwa ɗigagshi. ¹⁸ A dlam bəlan fatawanke nda dlam wara ki davu be bəlan, ba se na aɗa gayi na kun bai. ¹⁹ Mamuga gangamin, na kun faw tita ka ama mi a miya di gaɗa kun se Masihu ba kuma i kuna kun. ²⁰ Da ngum da ramma na dagai na kun na palci na wara ga gaɗa i na jikta a aɗa kun rankata. ²¹ A rami na, kun mi kwancu kwa kəma be mi dumaya rama bai? ²² Da tarna ma, "Ibrahim na kutli shirən, gayi wən guzabina, gayi wun ama mi da dligɗau. ²³ Bi lawan rankata atu ne wun guzabinagu nda 'yawuci da dəvu bəlan bai, amman wən ama mi nda dligɗu nda 'yawaci dari alkawar. ²⁴ Nda damuna rama be tuku da dəvu tatka kasau, ammatin tuku dlam gənawa na alkawar shirən. Gayi alkawar dari gugyak Sinai. Atu 'yawu kutli guzabcin atune Hajaratu. ²⁵ Gusuku Hajaratu atune gugyak Sinai mi a kun Arabiya. Gina genawa Urshalima ki gususku gaɗa atu a kun guzabina i ɗa gayi na kutli gara. ²⁶ Amman Urshalima mi a dəsku nda dligduna atu , atu 'yawu gusku. ²⁷ Ka ki mi da tarna ma, "A dlam pərdai, kəm duguru, kəm mi galte ka 'yawu bai. A dlam kurwa pərdai kəm mi ngalte ka tamba ɗi matkam bai. Gaɗa kutli duguru akshi gawa, dəka na ama mi na gamsək." ²⁸ Gususku, yaganaucin, ka ki mi Ishaku akuna, wake kasən, wato kutli alkawar. ²⁹ A sartu, aci mi nda 'yawaci da dəvu bəlan bigu, da bar bone i aci mi nda 'yawaci da dəvu Nənwa Səku. Atu kasən har gusku. ³⁰ Amman rama Səku ramma tam? "A rarkina guzabu na matkam gara. Gaɗa matkam guzabu ata gaɗo ida gayi na matkam ama mi nda dligdu bai." ³¹ Gaɗa kasən yaganaucin, wa kutli guzabu bai, i sərum sən wa kutli ama mi nda dligdu.