¹ Gususku, yaganaucin, a dlami ne ja magita gaɗa rama mǝgǝngyi da ci kǝma da dlam rawa ka ki kǝ dagayi na kun. ² A magita gaɗa ja bi lata dari kǝmangar na kunu gabshu ndawa gaɗa gǝd shi bai bari jirewa. ³ Amman Mǝgǝnyi baci adalta a lǝma na kun, kuru a ra nakun da ri kunu gabshu. ⁴ Kunaja gayi i kunu Mǝgǝngyi i aɗa kun, kwa dlamu kuru kwa tǝka dlama be mi wara ja rami kun. ⁵ Mǝgǝngyi dadgǝna gǝsha kun ntu Sǝku na kǝmar Masihu. ⁶ Gususku be mi wara ja rame kun, yaganaucin wa, i kun dlugun Mǝgǝngyi Yeso Masihu ivina nǝn mi wara a mbasu vatku iɗa aɗa mi kwaba dari ja bai. ⁷ Gaɗa kun na aɗa kun kwazgadu dlamǝn gara bǝlan kwa gugzi zada mbasa ja. Ja dlam mbasu i gadava kun ka ki ndawa mi na ladaɓ bai ⁸ Kuru ja ta aben nin wambai mi ja bar dakwdau bai. I serǝn su ja wana dǝvid na afa i kun gǝd fau na bone, gaɗa jampa dukshi iɗa nǝn bai. ⁹ Ja dlan kasau gu ma gaɗa ja bukina kǝrmai bai. Amman ja dlam sau gaɗa ja dlaɓ bik gugza i ri kun gaɗa kwan kwa gugzhi da ri ja. ¹⁰ Lakwtu mi wara waɗa gayi na kun, ja rame kun, "Gǝd nǝn mi wara an cu wana bai, da ta bik ta bai." ¹¹ Gaɗa ja kǝma na ndawa i kuna kun mi awana bai, se tufa i kun wana ndawa dama. ¹² Zada be ka ndau, ja ramdu zam ja gabɗa kun dari kǝrmai Mǝgǝngyi Yeso Masihu, maya akshi da dlami wana i kunu ankal, akshi da ci na aɗakshi. ¹³ Amman kun yaganaucin, kwaiva dlama be mi wara kal-kal bai. ¹⁴ Nǝn mi wara kuri na bari aɗa gǝri i tǝlam cin saktu tukun, a dlama yakin na a ci zam aiva na dlama tamke na a ci, gaɗa da kǝrmai zhirau. ¹⁵ Kwa ma ci iɗa makuri nǝn bai, amman a gabdina ci i dan yagana. ¹⁶ Mǝgǝngyi salam a ci na aɗa gǝri da bari kun salam fatawanke da dǝvu tawanke. Mǝgǝngyi da dlabi ri kun mak. ¹⁷ Sutuku atu ndima dari ga, Iyu, Bulus, na aikwak ga mi wara na tarna aikwak ga i saktu tawanke. na tarnau kasau. ¹⁸ Herr Mǝgǝngyi Yeso Masihu da dlabi na kun mak.