¹ Uvu umẹ anya ibo gadẹ nu ginyẹ kọ alimasihu uvu umẹ anya guyitsa nu liyeba kana, uvu umẹ anya lutu gagọ nu gununu kana nẹ, uvu umẹ anya ibo gadẹ nu ganigba nẹ. ² Nyinẹ gimi liyesi, nyinẹ anya iye udẹ̀ nu idanẹ nyinẹ amẹ imọna za, liye ba kẹnẹ wavu udẹ̀ ngyinyẹ nya gamunu udẹ̀ nyinẹ amẹ gyẹngyẹ za. ³ Nyine gamẹ gyengyẹ yẹ iwụ yẹnẹ geye la, nu gafulu ba ida nẹ ganuguyẹ tẹ̀ nyinẹ afulu aba idika, nyinẹ apa bani dika gẹ̀dẹ bepe nẹ. ⁴ Gọngọ nẹ amẹ gyẹngyẹ yẹ iwụ yana kili la, nyinẹ amẹ ibe si ya bani kiki. ⁵ Nyinẹ anya lika ganyinẹ kọ Alimasihu Uyesu. ⁶ uyi gayi Usigapa, nde wa mọ gayi mọ'a kana nu Usigapa nẹ la. ⁷ Gayi tẹ̀we su iwụ yana zi gengye la, usu iwụ yana zi kọ gufe tẹ̀, uyi kọ uniya pu tẹ̀. ⁸ Usinẹ lutu kana tịzẹ gbogbo unu nu ni gitsinẹ, ugini vu gitsi kọ gakyẹ ga pa! ⁹ Gebo guyi tẹ̀ Usigapa su'a pe gọngọ ugya liyẹ gume upe ya gẹngẹte. ¹⁰ Umẹ gebo ka gẹ̀dẹ, gbyi nnẹpo a vuni agi'a, ni bani nki ya bani gasẹ gumẹ nẹ, si bani imẹ nbele nu gada keyi tẹ̀. ¹¹ Umẹtẹ̀ gebo ka gẹ̀dẹ Uyesu na uvu Alimasihu ubyi wọ Usigapa, nu ge yeliye kọ Usigapa Ada. ¹² Gebo guyẹ tẹ̀, bani liyeba kami kẹ nyinẹ sa afulu abami tẹ̀ avu nu iyapụ yami kili la, si nu igi yami, gatimẹ ka gasẹ kẹnẹ, wayi nu izize nẹ. ¹³ Uvu Usigapa uwa mẹ gatimẹ nu ginyẹ kẹnẹ nyinẹ amẹ gyẹngyẹ nu liyesi kana nẹ. ¹⁴ Nyinẹ a gana mẹ gyẹngyẹ nu gamintsi nẹ la. ¹⁵ Gi nyinẹ a gavu ube wa tutu la, nyinẹ vu bani ya akukwasi bebyi ya Usigapa bavu ya tutula. Nyinẹ amẹ tẹ̀ gi nyinẹ a kuku kẹ gyiwa nu gasẹ gumẹ tẹ̀, nu gakigaki nu utu ubibisa mẹ. ¹⁶ Nyinẹ'evo lika kọ ulayi ni ntsi nẹ gima wa ga yaba nu usigapa nu uzu wa gebye nẹ! nnẹ yẹ nma kpụ gẹ̀dẹ liyẹ kami si ga timẹ kami wayi sala. ¹⁷ Si ga gẹ̀dẹ adẹmi uwụlụ gẹ̀dẹ gegi kami, si liyẹ kami nu lutu kẹnẹ uyisa, n yi ni liyesi nẹ nu lutu kẹnẹ gyi. ¹⁸ Gebo guyẹ tẹ̀ nyinẹ a yi nu liyesi ne, liyesi kẹnẹ wayi nu lutu kami dụ ¹⁹ Neye gẹ̀dẹ mené utimoti gitẹ nu woze nẹ, gẹ̀dẹ uvumi ube ya liyesi gime wu nyinẹ a mẹtẹ̀. ²⁰ Gẹ̀dẹ ma wulu nu gọngọ ne kankọ yana la, umẹ uwe ye nẹ tẹ̀. ²¹ Gẹ̀dẹ be ye iwụya ba kili be ye ibe wọ Uyesu Alimasihu la. ²² Nyinẹ kpụ kụ tẹ̀, kan ko umẹ ubyi sa'a Adẹ adana ibo tẹ̀ tẹ̀, uwa dẹmi ibo nu lika kọ Usigapa. ²³ Nya gẹẹ nẹ gitẹ nde beli mapa kụ gatimẹ kami uyi tẹ̀ tse. ²⁴ Nde nu gawulu kọ Usigapanẹ, mẹ belị bani gana ka giwa nẹ. ²⁵ Nde npa gẹ̀dẹ uyeliye gi ma gini nẹ Abafaroditus uvu unịkọ wami, ulolo ya gatimẹ nu ulolo ya lukọ nẹ unị gitẹ kẹnẹ nugufe umẹ uwa dẹmi gatime gamẹ tẹ̀. ²⁶ Lụwọ ka gapa amẹ mi wayi sala, gebo gumẹ nyinẹ wu gẹ̀dẹ wayi gẹlẹ latẹ̀. ²⁷ Nu u tata nẹ uzi liba kụki gẹ̀dẹ we tsi tẹ̀, nde Usigapa ni ginyẹ kọ aniheli yana upa gunungba kana, uvu na kili, nde si nimi gi iye yami a ge zo gbogbo la. ²⁸ Meye gẹ̀dẹ me nẹ gitẹ nu woze nẹ, gẹ̀dẹ nyinẹ pa iye si nẹ, nimi nẹ du, mawa gabana. ²⁹ Nyinẹ a gụ Abafauloditus ni ibo ivẹva nẹ ni ginyẹ ka adanu kpụkpụ. Nyinẹ apa gayi sesele ka banị kanko yana. ³⁰ Gẹ̀dẹ gebo ka gatimẹ kọ Alimasihu uweye tsi ugi iwu yana gebo ka gatimẹ gumẹ nnyinẹ a mẹ nu latẹ̀.