¹ Uyesu nabo mẹyẹ, ugẹẹ ukpasa wọ Uyahudiya getsesa kọ ukogi ya Uludu, ngedu gini babe, ugini atsịnị ba alada yana. ² Ifalisiyawa be weze yana, nba gẹ̀dẹ uyeliye gẹ̀dẹ unị wa nabo unyine ana? Be byi ligẹ gi ba mọa a pa. ³ U wụlụ ba gẹ̀dẹ, ngyẹ Umusa giẹ nẹ, ganu gẹ̀dẹ nyine a mẹ? ⁴ Nba gẹ̀dẹ umusa gẹ̀dẹ aka utakada wọa gamvọ ga tsị. ⁵ Gebo kọ ukpakpaki ya iye yẹnẹ u ka utakada mẹ giẹ nẹ, Uyese gẹ̀ ba tẹ̀. ⁶ Nde ni ngbọngbọ Usigapa me uloloni nu Unyineni nẹ. ⁷ Gebo kagayitẹ̀ ulolo wa nabo gami ka Ada ana ni Nma ana nẹ, giwa dẹ nu unyine ana ne. ⁸ Gi banị bẹva a vu udẹ̀ ni gụwụpa, giba ka vu iva la, ndẹ̀ ude ni gụwụpa. ⁹ Gebo gụyẹ tẹ̀ ube umẹ Usigapa ni kyẹ̀ tẹ̀, gọngọ a ka tsi a la. ¹⁰ Kọ bele ngam tẹ̀ batsegba wọ Uyesu ginio byia ligẹ. ¹¹ U gẹ̀ ba gẹ̀dẹ unị umẹ unabo unyine an u vọ unyine udika umẹ ikila. ¹² Unyine mẹ unabo ubana ana u vọ ulolo udika umẹ ikilaki. ¹³ Bani bene bebiki gẹnyi-genyi gẹ̀dẹ wa da ba, n batsegba mẹ ba ukana. ¹⁴ Uyesu pa ba, u mẹ ipisi u gẹ̀ ba gẹ̀dė, ba nabo bebiki gi be be wezami ba ka gu ba la gẹ̀dẹ litsẹ kan nki vu ya bebiki. ¹⁵ Kụkwasi ma gẹ̀ ẹnẹ gbyi unị me uwa gu litsẹ kọ Usigapa kanko ya bebiki la, wa zwi litsẹ kan nki la. ¹⁶ N nẹyẹ u su ba u dẹ ba anibalika. ¹⁷ Utu ume uwa gẹẹ tuzu tẹ̀, unị dẹ̀ tsaki be u woza ana, u ta nnẹ́po nu gezugẹ kana, u byia gẹ̀dẹ, Umali usesele, ma mẹ gunẹ mẹ n ma wọ ulayi gbogbo a gẹẹ? ¹⁸ Uyesu gẹ̀dẹ ngye nnya vala mi gẹ̀dẹ unị usesele? A nya unị umẹ uvu unị usesele la, Usigapa kili uvu unị usesele. ¹⁹ Nya kpu ibe izizi ka wụ la, ka mẹ ikilaki la, ka yị ibe la, ka kyẹ iwa ya ami la, ka tsa'ami la, fuluba Ada yẹnyẹ ni Nma yẹnyẹ nẹ. ²⁰ Unị ye gẹ̀dẹ, umali, nfuluba ibe imẹ, tun nu libiki kami. ²¹ Uyesu pa ubaliyeba kana u gẹa gẹ̀dẹ, ube dẹ̀ kie. Gẹẹ nnyẹa ga zụnẹ ibe imẹ nnyẹa nya tẹ̀, gbyi gi nnye a gi banị litoloci, gi nyẹa wa gibe ni nki, ngene, nye a baba mi. ²² Kụ wu tẹ́ tẹ̀, iye yana ni byibyi, u gii, iye yana ni zọe, gẹ̀dẹ unya gibe gengye ²³ Uyesu pa batsegba yana u gẹ̀dẹ, wa nya liyẹ̀ gi banị gibe a wa litse ka Usigapa. ²⁴ Uvu batsegba lika ka aninyini. Uyesu gẹ̀ ba gẹ̀dẹ, nyene bebyi yami unya liyẹ̀ gi a zwi litse ka Usigapa. ²⁵ Wa yi fẹnẹ gi ulakumi a zwi iyapu ya ugeza, gi unị gibe a zwi litse ka Usigapa. ²⁶ Lika guye ni dama ba, nbe byi edika gẹ̀dẹ ngọ wa wa gana? ²⁷ Uyesu nyine ba u gẹ̀dẹ nigapa kọ uniyapu u nya liyẹ̀, nde nu Usigapa wa nya liyẹ̀ la. Genge vu ubibi ngegu kọ Usigapa. ²⁸ Ubutulusu ga gẹ̀dẹ, nyine, i nabo genge i bae. ²⁹ Uyesu ge ba gẹ̀dẹ kukwasị, a nyo unume wa nabo gam kana, ukiki, unịkọ yineni, nma, ada, bebyi, tị̀zẹ gebo kami ni silaka kọ Usigapa, ³⁰ ngọ wa ka gu udeli ni gasẹ, gam, ukiki, unịkọ yineni, nma, bebyi, ne tị̀zẹ gebo ka liye gi gase gume uwo be te uka wo ulai wa nki la. ³¹ Nde banị ya ngbongbo bavu ye igi, banị ye igi bavu ya ngbongbo. ³² Nba zutuzu a gaa Ulusalima Uyesu a gẹ ngezuge ka ba. Unị dama batsegba yana n banị me nba ba ni igi tẹ̀ ba mo nzize. Uyesu bene ban ba bone-iva kpasa dẹ̀, ugine geba ubeme u wetua a tsutsu tẹ̀. ³³ Pa ya ge Ulusalima, ubyi wo unị a gi banị Ifilistoci ni banị ga ka ne. Ba ma lika bibyi, nba wa, nba gi bani idika. ³⁴ Ba ma agbo, be tseki ke ela, be legagi n ba gini a wa. Nde izi ita wea like. ³⁵ Uyakubu nu Uyahaya ne, ni bebyi yo Uzebede nbebe wọ ze ana nba gẹ̀dẹ umali me ye gẹ̀dẹ nyanea meyi ubeme iyeye tẹ̀. ³⁶ U geba gẹ̀dẹ n gé nyinee eye gẹ̀dẹ ma me ene? ³⁷ Nba gẹ̀dẹ wolu gi ya dende nlitse ke nye, unịde ngubo galili, unịde ngubo gẹpele. ³⁸ Uyesu gine ba gẹ̀dẹ, nyenaa kpụ ubeme nnya ne abyi lige tẹ̀ la. Nyene bi ga wu nu kọpi umee nme wu tẹ̀, ko ubatizima umee a memi tẹ̀? ³⁹ Nba ge gẹ̀dẹ, niba bi, Uyesu ge ba gẹ̀dẹ u kọpi ume nme wu tẹ̀ n nyene a wu, ubatizima wami nnyene a me. ⁴⁰ Nde ngọ́ uwa dende ngubo galili, ko gepele wa vu nime nma gi la, nde uvu wa banị me ame gebo ka ba tẹ̀. ⁴¹ Nde ko batsegba ubo wu lika guye tẹ̀, nbasa me ipisi nu Uyakubu nu Uyahaya kukwa. ⁴² Uyesu vala ba gi iwu yana ugẹ̀dẹ, nyene kpu banị me esuba gẹ̀dẹ batinibo ya ban kiki tẹ̀, ba nyene ntsi nlutu kaba. ⁴³ Nde uka yi tẹ̀ nginye kene la. Unime we yé avu unị nukpụkpụ nginye kẹne wani iwu yana agine befu. ⁴⁴ Nde unịme weye a vu gezuge ngi nyene kene wa vu befu wa gongo. ⁴⁵ Ubyi wọni wo be gẹ̀dẹ ame agina la nde wa me agi banị, gi ugi na gi ulai ana gebo ka gongo. ⁴⁶ Bebe Ujeliko, ubana nabo Ujeliko ni batsegba yana ne gedu unikpukpu ne, ubyi wọ Utimakus, Ubatima, uvuyepu dẹ dende nu kpasa dẹ wọ timozi. ⁴⁷ U wu gẹ̀dẹ Uyesu Banizale uwa kẹ tẹ̀, kukwa u su ligba gẹ̀dẹ Uyesu ubyi wọ Udauda aba sẹmi. ⁴⁸ N bani ni gedu ne a wulu gẹ̀dẹ wa gẹ̀te la. Nde we go ligba a pete gẹ̀dẹ ubyi wọ Udauda pagunugba kame. ⁴⁹ Uyesu genge u giganu gẹ̀dẹ a vala. ba vala unime uvu uveyapu tẹ̀, nba gẹ̀dẹ ka mo nzize la like, wa vela li. ⁵⁰ U tse nye yana, uge nu Uyesu. ⁵¹ Uyesu wula u gẹ̀dẹ nge ma me ma ge? uveyapu me gẹ̀dẹ neye gẹ̀dẹ na pa nneki. ⁵² Uyesu ga gẹ̀dẹ likẹ age gẹ̀dẹ ubangasikya wọ nye ne sẹ. Kukwa u wa pa nneki, u baa nu timozi.