¹ Baniko, unime amo ni aka ibibi game nye me, nnya yi nu ulufu tẹ, gini'a sunu-sunu nu ulufu. Nde mede ni iwu yen ye ne ginye du nya ka pili la. ² Nyine su gevovo kẹ idiya, gi nyina me ibe izizi ya Alimasifu agwo. ³ Nde unime usu gẹ̀dẹ uvu ubede, uwa vu gyẹngyẹ la, wa ze iu yana. ⁴ Gongo a nyine gatime kana, gi ubeme ugigi uwo gwone iwu yana tẹ avu na kili, uka vu uni dika la. ⁵ Gebo gẹ̀dẹ gongo esu gevovo kana. ⁶ Unime aga lika te ugwo gẹ̀dẹ wa za aka isele ni unime utsina tẹ nẹ ⁷ Aka zẹẹ la. Nya du Usigapa uwulu la, gebo gẹ̀dẹ ubeme nye zu tẹ, nya te ya libo-libo. ⁸ Gebo gẹ̀dẹ unime uzu ibe kwo ya aka ibibi ya guwupa kana te, ni ibe ibibi ya guwupa guye uwa teya libo-libo gi wa li lutu kẹ iwu yana. Unime uzu ibe kwo ya ulufu tẹ, ni ulufu uwa ta ulayi wa gbogbo agè libo-libo ni ulufu. ⁹ Ikẹ le agbila na aka isele gamẹ̀ la, gebo gẹ̀dẹ ni utu umẹ ugwa tẹ ibeme izu tẹ ya teya libo-libo, nde ye tse yapu fene la. ¹⁰ Gebo guye te kẹ inya utu me tẹ nbeli gi ya mẹ̀ lika isesele ya gi banị́ gbi, gè gebi banị́ mẹ nbavu banị́ gami ka aduwa tẹ. ¹¹ Nyine a pa uwasika unikpukpu umẹ̀ nka gyene nu gubo kami ne tẹ. ¹² Banị́ mẹ nbe ye amaka usesele ni guwupa te, be ye amẹ̀ ntsi ni ba me ibeme kili gebo gẹ̀dẹ aka gye ba gebo ka uki gapa ka Alimasifu la. ¹³ Gebo gẹ̀dẹ ko bani mẹ nba mẹ iwu yaba galo ga tsi tẹ ba be ibe izizi du la, nde be ye gẹ̀dẹ nya mẹ̀ ugalo ga tsi, gi nbe gwone iwu yaba gebo ka guwupa kenye. ¹⁴ Nde iwu yami gẹ gwone wa vu wa uki gapa ko Adayi Uyesu Alimasifu, ume, ngasẹ gumẹ kya gapa gebo kami ni gase gumẹ nẹ tẹ. ¹⁵ Si galo ga tsi si galo ga tsi la, udodẹ aba aza la nde ubeme aza kili tẹ uvu ibe ipupa. ¹⁶ Banị́ mẹ nba mọ lika guye gubo tẹ ni ba nba nya liyesi ni liyeba ne nlutu kaba, si lutu kọ Islaila wo Usigapa. ¹⁷ Kyẹkyẹ mẹ agẹ gezuge gongo eke vu tuva nimi nẹ la, gẹ̀dẹ nsu gusa kọ Uyesu ni guwupa kami. ¹⁸ Aniheli wo Adayi Uyesu Alimasifu aba ni ulufu enẹ nẹ. Amin