¹ Nde nyine te, nyina gima vu i-tsitsi ni aka ibibi ya'ene ² Ni ginye ka aka ibibi ya ene, nnyine zu tuzu gume uvu kana wa gase gume te. Nyine zu tuzu gume usi tizuge ya afu ya nki iye te, ulufu me uwa me gatime ni banị́ me nba nya azi la te ne. ³ I gima le za ni banị́ iko yene, ya ba guwupa kẹ ye, ya me ibeme nguwupa kẹ yi eyete igini si yi iye te, ni wa guwupa, ivu banị́ me u gwo gẹ̀dẹ Usigapa a me ipisi niyi ne kankwo a banị́ ikiki te ⁴ Nde Usigapa nya liyeba gebo ka geye gume u yeyi tolo te ⁵ kẹ ini tsi ni aka ibibi te, ugi yi ulayi ni Uyesu - iwa gana gebo ka aniheli yana ⁶ Usigapa likyene yi za ni Uyesu ne, ugini gigi ile ni nne udode za ni Uyesu ne ni nki, ⁷ gebo gẹ̀dẹ, ni gezuge gude me wa'ebe li te, wa tsini yi aneheli yana me i wa ni Uyesu te. ⁸ Gẹ̀dẹ a seyi ni aneheli ne gebo ka ubangaskiya, lika gume wa'efu ni woze ene la, uvu kana gamunu gume ufe ni woze Usigapa te. ⁹ Avu gebo ka gatime gume te uwa'awa aniheli la, gebo guye te, gọngọ aka yí luvu la. ¹⁰ Gẹ̀dẹ ivu ibe ya gatime ka Usigapa, me a me yi ni Uyesu Alimasifu gẹ̀dẹ ya me aka isensele me Usigapa kyẹ́ zi bya gẹ̀dẹ ya zutuzu niya ne te. ¹¹ Gebo guye te, nyine a te gẹ̀dẹ nyine gima vu guke idika ni guwupa. A vala'ene gẹ̀dẹ "Bani galo ga tsí" nu ubeme a vala gẹ̀dẹ "galo ga tsí" ni guwupa gume a me ni ibo ya uniyapu ne te ¹² Tu ye te nyine ni'na ni Uyesu ne. Nyine vu baniza ni gegu ka Islailawa nyine vu baniza nu uliguba ka anikewoli nee. Nyine gima tse iyapu ba gyengye ni gezuge la. nyine gima le ba Usigapa. ¹³ Nde gebo ka Uyesu te, nyine me nyine gima tse likpa ni Usigapa ne, e bene ene pele ni beyi ka Uyesu ne. ¹⁴ Gẹ̀dẹ na uvu liyesi kẹ yi. Gẹ̀dẹ ugini iv'a udode. Ni guwupa kana ne, u zo ibeme igima ni yi n'a te. ¹⁵ U zo ibe izizi, gi wa me uniyapu udode ni ginye kana, gi liyesi a yi. ¹⁶ Uyesu bene yi lubo-lubo ni Usigapa gebo ka ukyégapa, u zo ibeme nba gima niyi tsi iv'a te. ¹⁷ Uyesu bene liyesi vo banị́ me nba le pele te si banị́ me nba le ni likpa ne te. ¹⁸ Gẹ̀dẹ gebo ka Uyesu iwa nni ga kye ni ulufu udode ge ni Ada. ¹⁹ Gebo guye te, kekye me te, nyine guké ikiki me nyine avu beniza ga la. Nyine yi za ni banị́ tsaa ya Usigapa ne, nyine vu banị́ gami kana. ²⁰ A mẹ̀ ene ba ni gesipo ka batsagba ni anebi ne ne, nyine Uyesu ni iwu yana ne uku wa nkpakpatu. ²¹ Ni iwu yana nguza yu ye mo libo-libo u kyẹ kẹ guza ka aduwa te ni Ada. ²² Ni ginye kana am'ene ni nnee udode n nyine vu nni ga de ka Usigapa ni ulufu.