¹ Anya unide ni tize kọ Ukaisariya, avula gẹ̀dẹ Ukarniliyas, gesuge ka isoza ya lubo gume avula Italiya te. ² Uvu uni sele, ume ugi uwu yana si bebyi yana ni gatume ka Usigapa te; wana me gamunu agi Iyahudawa, ugini ame aduwa zam agi Usigapa ³ Ni iyapu-ga-ku ne, upa ula-kulu gẹ̀dẹ umaleka wa Ada nikpu-kpukinki be weza na uge nina gẹ̀dẹ, "Ukarniliyas!" ⁴ Ukarniliyas si umaleka iyapu ni nzize ne ugẹ̀dẹ "Nge yi, Ada gami?" Umaleka wulu'a gẹ̀dẹ "Aduwa ni gamunu gume nya me bani litoloci te nu nki ume ate ni gegu ka Usigapa te. ⁵ Ne banị́ gite kyekye me gene tize kọ Uyafa giba bene unide me avula gé Usaminu agini avula Ubulutusu te. ⁶ Ude ni Usaminu UMajemi ne, ume ngami kana pi ganu kọ uzo tẹ. ⁷ Kọ umaleka ge lika byé te ugi, Ukarniliyas fune banba iva ni ginye ka bebyi ya gatume kana, ugini vala ude ni ginye ka isoza yana me u nya nzize ya Usigapa te. ⁸ Ukarniliyas geba ubeme uyi te u nebe gite gene Uyafa. ⁹ Ni iyapu gaku ne (ni uzu ne nlutu) nba zu tuzu kuba tsutsu ni ile ne te, Ubutulusu go gapa ka guza gẹ̀dẹ ni na ame aduwa. ¹⁰ Nlime gua uwa ye ubeme wa litẹ nde ku banị́ ame ibelili tẹ, u pa ula-kulu ¹¹ Upa nki vu ugugu, ukwankwa esi tize, ubede ku gugye kukulu te esi tize du, a pa ni kpasa yana ino ne. ¹² Ni ginye ka niya ibe ikpakpa bani nne ino ni ime nbe kọkọ ntize ne si anaki ya nki. ¹³ Ngule ga gẹ́dẹ. "Like, Ubutulusu, gina wu ali". ¹⁴ Nde Ubutulusu gẹ̀dẹ a'a, "avute la, Ada nikpukpu, ma li ubeme wa yi tsa ko uvu ubibinsa te pabe la. ¹⁵ Nde ugini wu gule kọ uvuva wa; "Ubeme Usigapa ni nyini tsa, ka vula gẹ̀dẹ ubibi gala. ¹⁶ Uyite kale ita; kukwa-kukwa esu ngbami ye gone nki. ¹⁷ Ubutulusu ni gbu iyapu gebo kọ ula-kulu ume upa tẹ. nbanị́ me Ukarniliyas neba gite te gyengye ni ganu kọ ukpaki, ku ba bii lige kọ utumwezi wa gami te. ¹⁸ Ba li atsu nba bii lige gẹ̀dẹ Usaminu ume agini avula Ubutulusu te de te li. ¹⁹ Kọ Ubutulusu tsitsi de ni ginye gamẹ́ ka ula-kulu ye, ulufu ga'a gẹ̀dẹ, "Pa, ban bata de aye li". ²⁰ Like gina si nna ge niba ne, kali utu wa gage niba ne la, gebo gẹ̀dẹ nimi nneba gite". ²¹ Ubutulusu si be waze banị́ ye u geba gẹ̀dẹ "Nimi nvu unime bnyine eya te. Nge yi? ²² Nba ga gẹ̀dẹ, gezuge ka isoza Ukarniliyas, uvu uni pilili ugini'a ba Usigapa, age lika sele kana ni tize ka Iyahudiyawa, nna umaleka utsa wọ Usigapa na gẹ̀dẹ̇ nye be gami kana, gi wa wu gite. ²³ Ubutulusu geba gẹ̀dẹ ba zwi ginye giba le nina ne. Ga yapu gaku ugee niba ne, banị́ de ni Uyafa ba puna. ²⁴ Ga yapu gaku kana nba zu Ukaisariya, Ukarniliyas wa pu ba; uvala banikọ si belolo yana me nbe le kpukpu te. ²⁵ Ku Ubutulusu a zwi te, Ukarniliyas gona'a u ta nnapo gẹ̀dẹ nina aya ba. Nde Ubutulusu ²⁶ likena gẹ̀dẹ "Like gyengye! Nsi vu uniyapu kanko enye du. ²⁷ Ku Ubutulusu wa ge lika tẹ, u zwi ginye u pa gedu ka banị́ gọ nnedede ²⁸ U geba gẹ̀dẹ, "Nyine ni iwuyene ne nyine kpu gẹ̀dẹ Ubayahude agọ gẹ̀dẹ wa de ko wa gẹẹ uniza ni guke ikiki ni tize gude la. Nde Usigapa tssini mi gẹ̀dẹ nka vula gọngọ uni bibi ko wa yi tsa la la. ²⁹ Gebo guye nma me gamintsi la nbe te, ene gite ni waze'a mi. Gebo guye te ngeyi nne ne gite gẹ̀dẹ me be. ³⁰ Ukarniliyas gẹ̀dẹ, izi ino me ikyé te nnẹmẹnẹ́ me, nma me aduwa ni uzu ga mo ne (ukerepe ita) ni gami kami npa unide gyengye ni gezuge kami ni ngye izule ne. ³¹ Ugẹ̀dẹ, "Ukarniliyas, Usigapa wu aduwa yenye, si gamunu gume nyame banị́ litoloci te u té lika kanye. ³² Gebo guye te ne unide gite ni Uyafa, uvula unide ume uli Usaminu agini avula gẹ̀dẹ Ubutulusu. Ude ni gami kọ Usaminu Umajemi, ume gami kana pyi ganu kọ uzo te. ³³ Nsi ne gite ve kukwa, nna gini me gye nne be te. Niyi igwo ni gegu kọ Usigapa te, gi ya wu ubeme Ada nikpu-kpunki né gẹ̀dẹ nya ga yi te. ³⁴ Ubutulusu pye ganu gẹ̀dẹ "Ugaskiya, nkpu gẹ̀dẹ Usigapa apye banị́ la. ³⁵ Gebo guye te, nnono-nnono unime uwulu nane wa'awa gagu ni gegu kana. ³⁶ Nyine kpu gite gume une vo banị́ Israila te, ni utume ubene lika sele wa liyesi vo banị́ ni gubo kọ Uyesu te, ume uvu Ada nikpu-kpunki gbii te. ³⁷ Nyine kpu ibeme iyi ni Uyahudiya, tepo ni Ugalili, ni ngi ya ivẹ ya ubatizima ya Uyahaya gegu. ³⁸ A ge ibeye ni lutu kọ Uyesu Ubanazere, Usigapa fune Ulufu sesele ni ntsi ne te. Ume gatume sesele si bani me Usetan ni ba kwó te wa gase gebo gẹ̀dẹ Usigapa de na ne. ³⁹ Niyi ivu bani isenda ye ibeme ume ni tize kọ Uyahudiya ni Uliselima ne te, Uyesu ume awa, ni ga zana ni ukyégapa te, ⁴⁰ nde Usigapa likena ni uzu ututa, ugini gigi gi'apa, ⁴¹ avu gebo ka banị́ kili la, nde si banị́ me Usigapa fune ba ni ngbọgbọ-niyi ni iwuyeyi nee ume ili igini wu nane ni ge like kana ni bekune. ⁴² Uge yi gẹ̀dẹ ya ge lika kana gẹ̀dẹ Usigapa fune nina aza banị́ ulayi si banị́ itsi-tsi iwa. ⁴³ Nu woza na innebi ne ge lika, gẹ̀dẹ unime uwulu nane wa'awa gase ka aka ibibi ne ni liye kana. ⁴⁴ Ni lika ga ge kọ Ubutulusu, ulufu tsa si nu lutu ka banị́ me nbe wu lika kana te. ⁴⁵ Banị́ me nbe le ni lubo ka banị́ aduwa nba wulu ni galo gatsi te ne, gbii banị́ me nba be ni Ubutulusu ne te pa lika dadama, gebo gẹ̀dẹ ulufu utsa si ni guke iki-ki du. ⁴⁶ Gẹ̀dẹ be wu guke iki-kime age lika ni gakule udiya ne nba gini ayaba liye kọ Usigapa te. ⁴⁷ "Ko anya unime waka wulu gẹ̀dẹ ame banime ubatizima ni uzo ne, ku ba gu ulufu utsa kanko eyi me te? ⁴⁸ Ugẹ̀dẹ ameba ubatizimani liye kọ Uyesu Alimasifu. Nba ga gẹ̀dẹ tsutsuku de niyi ne ya izi iva tse.