¹ Itakada mẹ nka akiye-kiye tẹ̀, Tiyofilo, Ugẹ̀ gbyi ibe mẹ Uyesu tọtọ a mẹ tẹ̀ Utsene ya, ² gbogbo gẹẹ akimẹ asu'a tẹ̀, ni igii mẹ ugiganu, nu ulufu utsa, gi batsagba umẹ fune tẹ̀. ³ Ni igii ya liyẹ̀ kana, ubene iwụ yana nu ulayi nẹ, tsini ba, giba pa. Uzu wogba Ufuba ba, nba pa'a, ugẹ̀ lika nu lutu litsẹ kọ Usigapa. ⁴ Kẹ ba gwe'e ida na'a nẹ tẹ̀, ugi ba ganu gẹ̀dẹ be gegii ki Uriselima la, nde ba pụ u anikeweli ya Ada, Umẹ ugẹ̀dẹ, "Nyimẹ wu ni woza mi, gẹ̀dẹ, ⁵ Uyahaya mẹ uba tizima nu uzọ nẹ, nde a mẹ nẹ, ubatizima nu ulufu usta nẹ, ni izụ gunẹ'ẹ nẹ." ⁶ Kẹ ba givọ za'a tẹ̀, nbe byi'a, "Ada Unikpụkpụ, uvu utu mẹ, nyẹ kolegi litsẹ ka iseyila a bene?" ⁷ Ugẹ̀ ba gẹ̀dẹ, "Wa vu gẹ̀dẹ nyinẹ kpụ utu umẹ Ada zi ni ntsi yanatẹ. ⁸ Nde nyinẹ a ga ntsi, utu mẹ ulufa utsa be lutu kẹnẹ tẹ̀, nyinẹ a fumi iwa nu Uriselima nu Yahuda nẹ, nu Usamaliya, nu gbogbo a g ẹẹ gebye ka gasẹ nẹ." ⁹ Kụ Uyesu ni aka mẹ gẹ̀ tẹ̀, nba pa nki, uwe go, abenbele kulu'a. ¹⁰ Kẹ ba ni iyapu sị nki ga pa tẹ̀, ugo, nbanị iva dẹ̀ ni ngye izule nẹ, gyẹngye ni ba nẹ. ¹¹ Nba gẹ̀dẹ, "Nyinẹ banị Uyalili, ngyẹ nnyine gyengye nnẹ̀ mẹ a pa nki? Uyesu mẹ a su'a ki ẹnẹ gone nki mẹ tẹ̀, we ko legi a be kẹ nyinẹ si pa'a ke asu'a gone nki mẹ tẹ̀." ¹² Keẹ be kolegi nu lụgụ kọ uzatu tẹ̀, tsutsu nu Uriselima nẹ tẹ̀ tuzu kọ uzu wọ usati. ¹³ Kẹ ba nụ tẹ̀, nbe go guza ka nki, nnẹ̀mẹ nba gima le tẹ̀. Ba vu, Ubuturusu, Uyahaya, Uyakubu, Anduru Ufilibusu ya Alfa, Usima uni ukpakpaki, ni Uyahuza ubyi ya Uyakubu nẹ. ¹⁴ Lutu kaba vu udọdẹ̀, nba sa'a ma aduwa. Umariyamu nma wọ Uyesu ni banịkọ yana nẹ le mọ. ¹⁵ Utu yẹ Ubiturusu, likyè ni ginyẹ ko banịkọ imẹ nba vu bamị ukuri ni azvanẹ tẹ̀, gẹ̀ dẹ, ¹⁶ "Banịkọ, uvu ntsi gẹ̀dẹ lika kọ Usigapa afu gyẹ, gẹ̀dẹ ulufu utsa gẹ̀ lika ni ganu ka Udawuda, nu lutu ka Uyahuda, umẹ ugigi a mọ Uyesu tẹ̀. ¹⁷ Uvu udẹ̀ ni guiyẹ keyi, nde uni ukpo ya gatimẹ kana gụ." ¹⁸ Uyahuda si tizẹ ni gatimẹ ko ko ukikpa na'a nẹ, nnẹ̀yẹ upili gine lutu sine sine, nginyẹ kana tsaka, igwụ yana fu gasẹ. ¹⁹ Gbyi banị Uriselima wu lika guyẹ, nba vala nnẹ̀ yẹ ni gakulẹ ka ba nẹ, gẹ̀de "Akedama" "Upegye ya beyii tẹ̀." ²⁰ Gebo gẹ̀de aka nu Uzabura, gẹ̀dẹ, 'Nbeli gi upegye ye wa vu azadu, aga'a gigi, nabo gọngọ gi be le nmo la, 'ko, anabo unị dẹ̀ gi wa su lizu kana.' ²¹ Gebo guyẹtẹ̀, banị me nbe le niyi nẹ, tuni utu mẹ Ada Unikpụkpu, a gẹẹ ni gebe tẹ̀ nẹ, ²² tọpọ nụ Uyahaya uni ubatizima gbogbo be utu mẹ, a su'a gone nki tẹ̀, wa vu udẹ̀ ni ginyẹ kẹyi, umẹ uwa gẹ̀ lika ka ge likye kọ Uyesu." ²³ Nbe nene banị iva, Uyasufu umẹ avala'a gẹ̀dẹ, Ubanaba tẹ̀, umẹ a dẹ'a liyẹ gẹ̀dẹ, Ujusitu ni Umatiya nẹ. ²⁴ Nba mẹ aduwa nbe gẹ̀dẹ, Ada unikpụkpụ nyẹ'ẹ nnyẹ'a kpụ iye ya bani tẹ̀, gẹ̀ yi unị umẹ iye fune ni ginyẹ ka banị iva mẹ tẹ̀. ²⁵ Gi we su, guki ka Uyahuza mẹ, uni va gẹẹ uweze'ana mẹtẹ̀." ²⁶ Nba ta ibo, Umatiya ga li, aza'a zwi nẹ ginyẹ ka ba tsagba ubo nẹ udẹ̀.