^{1 2 3} 1 ಯೇಸು ಕ್ರಿಸ್ತನ ಪ್ರಕಟಣೆಯು ,ಅದು ಮುನ್ನೆ ಆಗ್ರಾ ಬೇಕೈಕ್ರ ಸಂಗತಿಲ್ಲತ್ತೆಯ ತಟ ದಾಸರ್ಕು ಕಾಟ್ರುಕಾಯಿ ದೌರಿಂಡು ಈ ಪ್ರಕಟಣೆಯತ್ತೆಯ ಹೊಂದಿದು ;ಇದಲ್ದೆ ಅದು ತಟ ದೂತನತ್ತೆಯ ಅಂಪಿ ಅತ್ರು ಜಾಯಿಂಡು ಆ ಸಂಗತಿಲ್ಲತ್ತೆಯ ತಟ ದಾಸ ಆನಾ ಯೋಹಾನ್ಕು ಸೂಚನೆ ಸೆಂಚು . 2 ಯೋಹಾನು ಅದು ಪಾತತ್ತದ್ದಿ ತಿಳುಸ್ರದಾಯಿ ದೌವ್ರ ವಾಕ್ಯತ ವಿಷಯವಾಯಿ ಯೇಸುಕ್ರಿಸ್ತನು ಸೋನ್ನ ಸಾಕ್ಷಿಯ ವಿಷಯವಾಯಿ ಸಾಕ್ಷಿ ಕುಡ್ಚು . 3 ಈ ಪ್ರವಾದನವಾಕ್ಯಲ್ಲತ್ತೆಯ ಓದ್ರಂತದು ಕೋಕ್ರದು ಈ ಪ್ರವಾದನೆಕೋರು ವರ್ಜಿಕ್ರ ಒಕತ್ತೆಯ ಕೈಗೊಂಡು ನಡುಕ್ರಗ್ಯ ಧನ್ಯರು ,ಅದು ನೆರವೇರ್ರ ಗಳ್ಗಿ ಅತ್ರಯೈದು. ^{4 5 6} 4 ಆಸ್ಯ ಸೀಮೆಕೋರು ಇಕ್ರ ಹೋಗು ಸಭೆಲ್ಕು ಯೋಹಾನು ವರಿರಾದು ಎಂದಯಿಂಡೆಕ್ಯ –ವರ್ತಮಾನ ಭೂತ ಭವಿಷ್ಯಕಾಲುತ್ಗೋರು ಇಕ್ರತಿಂಡು ಮತ್ತೆ 5 ಅತ್ರ ಸಿಂಹಸಾನ್ತ ಮುನ್ಕು ಇಕ್ರ ಹೋಗು ಆತ್ಮಲಿಂಡು ಮತ್ತೆ ನಂಬ್ರಂತ ಸಾಕ್ಷಿಯೂ ಸೆತ್ತಲುಲ್ಲಿಂಡು ಮುನ್ನಿ ಅದ್ದಿಂದು ವಂದಾದು ಭೂರಾಜ್ರ ಒಡೆಯನು ಐಕ್ರ ಯೇಸು ಕ್ರಿಸ್ತನಿಂಡು ನಿಂಗ್ಲುಕು ಕೃಪೆಯೂ ಶಾಂತಿಯೂ ಆಗೋಟು .ನಂಗ್ಲತ್ತೆಯ ಪ್ರೀತುಸ್ರದು ತಟ ರಗುತಿಂಡು ನಂಗ್ಲತ್ತೆಯ ಪಾಪ್ತಿಂಡು ಉಡಿಪ್ಚಾದು 6 ನಂಗ್ಲತ್ತೆಯ ರಾಜ್ಯವಾಯಿ ತಟ ಆವಾನ ದೌವ್ರುಕು ಯಾಜಕನ್ನಾಯಿ ಸೇ೦ದಿಕ್ರದು ,ಐಕ್ರತ್ಗು ಯುಗಯುಗತ್ಗೋರು ಘನ ಮಹತ್ವ ಇಕ್ಯೋಟು ,ಆಮೆನ್ ^{7 8} 7 ಇದೋ ಮೇಘತುಲ್ಲಿಂಡು ವರಕೂ ;ಅದ್ಯರ್ತು ಕನ್ನುಗ ಅತ್ತತ್ತೆಯ ಕಂಗಾಕು ;ಅತ್ತತ್ತೆಯ ಕೊಂಡ್ರಗ್ಯ ಸಹ ಕಂಗಾಕು ;ಭೂಮಿಮೇನಿ ಇಕ್ರ ಅದ್ದಿ ಕುಲ್ತಾಗ್ಯ ಅತ್ತತ್ತೆಯ ಪಾತು ಎದೆಬಡ್ಜುಗಕ್ನು ,ಅಂಬೋ ,ಅನ್ಗೆ ಅಕ್ದು ,ಅಮೆನ್ . 8 ನಾನು ಆದಿಯೂ ಅಂತ್ಯವು ವರ್ತಮಾನ ಭೂತ ಭವಿಷ್ಯತ್ ಕಾಲುತ್ಗೋರು ಇಕ್ರದು ಸರ್ವಶಕ್ತನು ಹೈರೆ ಇಂಡು ದೌರನ ಕರ್ತನು ಸೋನ್ನಕು. ^{9 10 11} 9 ನಿಂಗ್ಲ ಸಹೋದರನು ಯೇಸುವಿನ ನಿಮಿತ್ತ ಹಿಂಸೆಕೋರು ರಾಜ್ಯತ್ಗೋರು ತಾಳ್ಮೆಕೋರು ನಿಂಗ್ಲೆಂಟಿ ಪಾಲುಗಾರ ಐಕ್ರ ಯೋಹಾನಯಿಂಗ್ರ ನಾನು ದೌವ್ರ ವಾಕ್ಯತ್ಗಾಯಿ ಯೇಸುವಿನ ವಿಷಯವಾಯಿ ಸಾಕ್ಷಿಕಾಯಿ ಪತ್ಮೊಸ್ ದ್ವೀಪತ್ಗೋರುಯಿ೦ದೇ . 10 ನಾನು ಕರ್ತನ ನಲ್ತ್ ಗೋರು ದೌರತ್ಮ ವಶನಾಯಿ ನಟ ಪರ್ಗ್ಲಿ ತುತೂರಿಯ ಶಬ್ದತರಯಿಕ್ರ ಮಹಾ ಶಬ್ದತ್ತೆಯ ಕೋಟೆ . 11 ಅದು –ನೀನು ಪಕ್ರತ ಬುಕ್ಕೊರು ವರ್ಜು ಎಪೆಸ ,ಸ್ಮುರ್ನ ,ಪೆಗರ್ಮ ,ಥುವೈತೈರ ,ಸಾರ್ದಿಸ್ ,ಫಿಲದೆಲ್ಫಿಯ ,ಲವೊದಿಕೀಯ ಇಂಗ್ರ ಹೋಗು ಪಟ್ಟನುತ್ಗು ಸಭೆಲ್ಕಿ ಅಂಪುರ್ದು ಯಿಂಡು ಸೋನ್ಸು. ^{12 13} 12 ನಟ ಜೋತಿ ಮೇನಿ ವಸೆತ್ತಯಿಂದ ಶಬ್ದವು ಎತ್ರದುಯಿಂಡು ಪಾಕುರ್ಕು ಪರ್ಕು ಪಾತೇ . 13 ತಿರ್ಗ್ನಪೋದು ಹೋಗು ಬಂಗಾರ್ತ ದೀಪಸ್ತಂಭಲತ್ತೆಯ (ಒಲ್ಕು )ಆ ದೀಪಸ್ತಂಭತ ಮದ್ದಿತ್ಗೋರು ಮಣ್ಸು ಕುಮಾರ್ ತರ ಇಕ್ರತ ಪಾತೇ .ಅದು ನಿಲುವಂಗಿಯತ್ತೆಯ ಒಟ್ಗೊಂಡು ಬಂಗಾರ್ತ ಪಟ್ಟಿಯತ್ತೆಯ ಎದೆಕೂ ಕಟ್ಗೊಂಡಿ೦ಚು. ^{14 15 16} 14 ಅತ್ರ ತಲ್ಕಾಯಿ ಮಗ್ರು ಒಲ್ಲ ಉಣ್ಣಿ ತರ ಹಿಮ ತರ ಒಲ್ಗಿಂಚು . 15 ಅತ್ರ ಕನ್ನುಗ ನೆರ್ಪ್ ತರ ಅತ್ರ ಪಾದ ಕುಲುಮೆಕೋರು ಕಾಸ್ನ ತಾಮ್ರ ತರ ಅತ್ರ ಧ್ವನಿ ಜಲಪ್ರವಾಹತ ಘೋಷತರ ಇಂಚು . 16 ಅತ್ರ ಉನ್ ಗೈಕೋರು ಹೋಗು ನಕ್ಷತ್ರಯಿಂಚು ;ಅತ್ರ ವಾಯಿಂಡು ಹದ ಐಕ್ರ ಇಬ್ಬಾಯಿ ಕತ್ತಿ ಹೋಗ್ತಾಯಿಂಚು ,ಅತ್ರ ಮೊಗು ಮಧ್ಯಾನುತ್ಗೋರು ಪ್ರಕಾಶಿಸ್ರ ಸೂರ್ಯನ್ ತರಯಿಂಚು. ^{17 18} 17 ನಾನು ಅತ್ತತ್ತೆಯ ಪಾತಪೋದು ಸೇತ್ತಲ್ ತರ ಅತ್ರ ಪಾದತಂಚ್ಗು ಬೂದೆ ,ಅದು ತಟ ಉನ್ ಗೈಯತ್ತೆಯ ನನ್ನ ಮೇನಿಹಚ್ಚು –ಬೀತ್ಗುಮಾನ.ನಾನು ಮುನ್ಯಾವ್ನು ಕೊನ್ನೇತದು ಎಪೋದು ಜೀವಿಸ್ರದು ಹೈದು. 18 ಸೇತೋಕ್ರು ತರ ಹಾನೇ ,ಮತ್ತೆ ಇದೋ ಯುಗಯುಗಾಂತರಕೊರು ಬದುಕ್ರವ್ನುಯೈರೇ ;ಮರಣತ್ ಮತ್ತೆ ಪಾತಾಳ್ತ ಬೀಗುತ್ ಕೈಗ ನನ್ನಂಚ್ಲಿ ಇದೂ. ^{19 20} 19 ಅತಿಂಡು ನೀನು ಪಾತ್ತತ ಇಪೋದು ನಡುಕ್ತಯಿಕ್ರತ ಮುನ್ಕು ಆಗ್ರತ ವರಿ . 20 ನಟ ಉನ್ ಗೈಕೊರು ನೀನು ಪಾತ ಹೋಗು ನಕ್ಷತ್ರತ ಮತ್ತೆ ಹೋಗು ಬಂಗಾರ್ತ ದೀಪಸ್ತಂಭತ ಗೂಢರ್ಥತ್ತೆಯ ವಿವರಿಸರೇ –ಆ ಹೋಗು ನಕ್ಷತ್ರಗ ಇಂಡೆಕ್ಯ ಆ ಹೋಗು ಸಭೆಲ್ತ ದೂತರು ;ಆ ಹೋಗು ದೀಪಸ್ತಂಭಗ ಇಂಡೆಕ್ಯ ಆ ಹೋಗು ಸಭೆಗ್ಯ.