^{1 2} ನೀನು ಧರ್ಮತ ಸೇಯಂದು ಬೆರೆಯ್ಯ ಪಕೋಟುನಿಂಡ್ ಸೆಯಿಮಾನದು ,ಜನ ನಿನ್ನ ಪಾತು ಹೆಚ್ಚಿನದಿ0ಡ್ ಭಾವಿಸ್ಬೋದು , ನಟ ದರ್ಮತ ಜನ ಪಾತು ಹೆಚ್ಚಿನದಿಂಡ ಭಾವಿಸಕಾನು ಇಂಡು ಬಯಿಸ್ನೇಕೆ ಪರಲೋಕತ್ಕೊರು ಇಕ್ಕ್ರ ನಿಟ ದವ್ರು ನಿನಕು ಯಂದು ಬಹುಮಾನತ ತರ್ದಿಲ್ಲ . 2 ಅತ್ರಿಂಡ ನೀನು ಬಡವರಕು ಯೆಪ್ಪೋದೆ ಕುಡ್ಕಂದು ಜನ ಪಕೊಟುನು ಇಂಗಮಾನ ,ನಿಂಗ ಪ್ರಾರ್ಥನೆ ಸೇಯಂದು ಜನ ಹೋಗಳೋಟುನು ಇಂಡು ಕಪಟಿಲ್ತರ ಜೋರಾಯಿ ಸೇಯಿಮಾನಂಗ ಇನಗು ಜನ ಹೋಗಳೋಟುನು ಇಂಡು ಸಬಾಮಂದಿರತ್ಕೊರು ಬಿದಿಲ್ಕೊರು ಪ್ರರ್ತ್ಸ್ರಂಗ ಇತ್ತ ಮನಸ್ಕೊಕು ಅಚ್ಕೊಂಗೋ ಕಪಟಿಲಿಕಿ ಜನತಾ ಹೋಗಳಿಕೆನೆ ಬಹುಮಾನ. ^{3 4} 3 ಇತ್ತ ಸೇಯಿರತ ಬದಲಾಯಿ ,ನೀನು ಬಡವರಕು ಕುಡ್ಕಂದು ಬೇರೆ ಜನತ್ಗು ಯಂದದು ಇಂಡ ಗೊತ್ತಗ್ರದುಮಾನ 4ಈ ರೀತಿ ನೀನು ರಹಾಸ್ಯವಯಿ ಬಡವುರ್ಕು ಕುಡ್ಕಂದು ನಿಟ ಅಂತರಂಗತ ಪಕ್ಕ್ರ ನಿಂಗ ಅವ ನಿಂಗ್ಲಕು ಫಲತ ತರದು. ^{5 6 7} 5 ನೀನು ಪ್ರಾರ್ಥನೆ ಸೇಯಂದು , ಕಪಟಿಲ್ತರ ಸೆಯಿಮಾನ ಜನ ಪಕೋಟು ಇಂಡು ಸಭಾಮಂದಿರತ್ಕೊರು ಮತ್ತೆ ಬೀದಿಲಿಕೊರು ಪ್ರಾರ್ಥನೆ ಸೆಯನು ಯಂತಗು ಇಂಡೆಕೆ ಜನ ಇಯಿಲ ಹೆಚ್ಚಿನಯ ಇಂಡು ತಿಳ್ಜ್ಗಾನು ಇಂಡು, ಇತ್ತ ಮನಸ್ಕೊಕು ಹಚ್ಚುಗೊಂಗೋ ಅಯಿಲಿಕಿ ಸಿಕ್ರ ಫಲ ಜನರತ ಹೊಗಳಿಕೆ ಮಾತ್ರ . 6 ಅನೇಕೆ ನೀನು ಪ್ರಾರ್ಥನೆ ಸೇಯಂದು , ಎದು ಪಕರಕನಿ ನಿಟ ಕೋಲಿಕೊಕು ಹೋಯಿ ವಸ್ಲ ಮುಚ್ಚಿಕೊಂಡು ನಿಂಗ ಅವ ಅಯಿಕ್ರ ದವ್ರುಕು ಪ್ರಾರ್ಥನೆ ಸೇಯಿ , ನಿಟ ಅಂತರಂಗತ ಪಕ್ರ ದವ್ರು ನಿನಕು ಫಲತ ತರದು . 7 ನೀನು ಪ್ರಾರ್ಥನೆ ಸೇಯಂದು , ಗೊತ್ತಿಲರಾಯ ಸೇಯಿರ್ಕನಿ ಸೇನಜೆಪು ಉಕೊಂಡು ಸೆಂದಿಕ್ರತ್ತೆ ಸೆಯಿಮಾನ , ಅನ್ಯಜನ ಇಂಡಗಾನು ಅಯಿಗ್ಯ ಹೆಚ್ಚು ವಸ್ತನೇಕೆ ಅಯಿಲ್ತ ದವ್ರು ಕೊಟ್ಟಿಕ್ರತ್ತ ಕುಡ್ಕಾದು ಇಂಡು ^{8 9 10} 8 ಅಯಿಲತರ ಸೋನ್ನತ್ತೆ ಸೋನ್ನುಮಾನದು, ಯಂತಗು ಇಂಡೆಕೆ ನೀನು ಕೊಕ್ರತ್ ಕಿಂತ ಮುನ್ನೆ ನಿನ್ಕು ಯಂದದು ಬೇಕು ಇಂಡು ನಿಟ ದವ್ರುಕು ಗೊತ್ತಿದು. 9 ಅನಗಯಿ ಇನಗು ಪ್ರಾರ್ಥನೆ ಸೇಯಂಗೋ, ’’ಪರಲೋಕ್ ತ್ಕೊರು ಇಕ್ರ ದವ್ರೆ ಅದ್ದಿಜನು ನಿನ್ನ ಘನಪಡಸೊಟನು, 10 ಅದ್ದಿಜನು ಮತ್ತೆ ಪ್ರತಿಯೊಂಡ್ಮೆಕು ನೀನು ಆಳ್ವಿಕೆ ನಡಪಿ, ನಿಟ ಚಿತ್ತ ಪರಲೋಕತ್ಕೊರು ನಡ್ಕರ್ಕನಿ ಭುಲೋಕ್ತಕೊರು ನೆರವೆರೋಟು. ^{11 12 13} 11 ಪ್ರತಿ ದಿನಾಲೂ ಬೇಕಯಿಕ್ರ ಆಹಾರತ ಈ ಹೊತ್ತು ನಂಗುಲ್ಕು ತಾ . 12 ಬೇರೆಯಲ್ತ ತಪ್ಪ್ಲತ್ತೆಯಿ ನಂಗ ಕ್ಷಮ್ಸ್ರ್ಕನಿ ನಂಗಲ್ತ್ ಪಾಪಲತ್ತೆಯಿ ನೀನು ಕ್ಷಮಿಸು . 13 ನಂಗ ಶೋದನೆಕು ಒಳಗಾಯಿ ತಪ್ಪು ಸೇಯರ್ಕನಿ ಸೈತಾನನ ಕೇಡುತಿಂಡು ನಂಗಲ್ನ್ನ ಕಾಪಾಡು. ^{14 15} 14 ನಿನಕು ವಿರುದ್ದವಾಯಿ ತಪ್ಪು ಸೆಂದಯಲ ಕ್ಷಮಿಸು , ಯಂತ್ಗು ಇಂಡೆಕೆ ಇನಗು ಸೆಂದೇಕೆ ಪರಲೋಕತ್ಕೊರು ಇಕ್ರ ದವ್ರು ನಿಂಗಲತ ಪಾಪಲತ್ತೆಯಿ ಕ್ಷಮಿಸದು . 15 ಅನೇಕೆ ನೀನು ಬೆರೆಯಲ್ತ ತಪ್ಪಲತ್ತೆಯಿ ಕ್ಷಮಿಸ್ದಿಂದೇಕೆ ನಿಟ ತಪ್ಪಲ ದವ್ರು ಕ್ಷಮಿಸುದಿಲ್ಲ. ^{16 17 18} 16 ನೀನು ಉಪಾವಾಸ ಸೇಯಂದು ಕಪಟಿಲ್ತರ ಸಪ್ಪಗು ಇಕ್ಕಮಾನಂಗ ಜನು ಪಾತು ಕಲಿ ತಿಂಗಿಲ್ನು ಇಂಡು ಹೆಚ್ಚಿನಯ ಇಂಡು ತಿಳ್ಜ್ ಗಾನು ಇಂಡು ಬೇರೆಯ ಮಗುತ ಸಪ್ಪಗು ಸೆಂದಗನು, ಇತ್ತ ಮನಸುಕೋಕು ಹಚ್ಚುಗೊಂಗೋ, ಜನ ಅಯಿಲ ಹೆಚ್ಚಿನಯ ಇಂಡೆಕೆ ಇದೆ ಅಯಿಲಿಕಿ ಸಿಕ್ಕ್ರ ಬಹುಮಾನ, 17 ಅತರ ಬದಲಾಯಿ ನೀನು ಉಪಾವಾಸಸೇಯಂದು ಮಾಮೂಲಿತರ ತಲಕ್ಕಾಯಿಕಿ ಅನ್ನಿಆಂಟಿಚಿಗೊಂಡು ಮಗತ್ ಕೊಯಿಗೊಂಗೋ, 18 ಯಂತಗು ಇಂಡೆಕೆ ಜನ ನಿಂಗ್ಲನ ಉಪವಾಸಿಗ್ಯ ಇಂಡು ಕಂಡುಪುಡಿಕರ್ದಲ್ಲ, ಅನೇಕೆ ಅಂತರಂಗತ ಪಕ್ರ ದವ್ರು ನಿಟ ಉಪವಾಸತ ಪಾತು ಫಲ ತರದು. ^{19 20 21} 19 ನಿಂಗ ಭೂಲೋಕತ್ಕೊರುಜಾಸ್ತಿ ದುಡ್ಡು ಅಗೋಟು ಮತ್ತೆ ನಲ್ಲ ವಸ್ತುಲತ್ತೆಯನಿಂಗ್ಲಕಾಯಿ ಹಚ್ಚುಗುಮಾನಂಗ, ಯಾಂತಗು ಇಂಡೆಕೆ ಭುಲೋಕತ್ಕೊರು ಇಕ್ಕರಂತ ಅದ್ದಿ ವಸ್ತು ನಶವಗ್ರಂತದು, ಉದಾಹರಣೆಕು ಭುಲೋಕ್ತಕೊರು ವಸ್ತುಗ ನುಸಿಪುಡಿಕನು ಕಿಲುಬು ಹಂಟದು, ಮತ್ತೆ ದೊಂಗಯ್ಯ ದೊಂಗ ಸೆಯನು. 20 ಅತ್ತಕಿಂತ ದವ್ರುಕು ಮೆಚ್ಚಿಗಿಯಗ್ರಂತಹ ಕಾರ್ಯತ ಸೇಯಂಗೋ, ಪರಲೋಕತ್ಕೊರು ನಿಂಗಲ್ತ್ ಗಂಟತ್ತೆಯಿ ಸೆಂದುಗೊಂಗೋ, ಆಟಿ ನುಸಿಪುಡಿಕಿದಿಲ್ಲಕಿಲುಬು ಹಂಟುದಿಲ್ಲ ಮತ್ತೆ ದೊಂಗಯ್ಯ ದೊಂಗ ಸೇಯಿದ್ಲ್ನು. 21 ಒಂಡ ನೆನಪುಕು ಅತ್ತೆಂದುಗೊಂಗೋ ನಿಂಗ್ಲುಕು ಮುಖ್ಯವಯಿಕ್ರತ್ತ್ ಮೆನೆ ನಿಂಗಲತ ಮನ್ಸು ಇಕ್ಯದು. ^{22 23 24} 22 ನಿಟ ಕನ್ನುಗ ನಿಟ ದೇಹಕು ಬೆಳಕಯಿದು , ಯಂತ್ಗು ಇಂಡೆಕೆ ಅಯಿಗ್ಯ ವಸ್ತುಲ ಪಕುರುಕು ಸಹಾಯ ಸೆಯನು , ಅತ್ತರಿಂಡ ದವ್ರು ಪತ್ಕನೆ ನೀನು ಪತೆಕೆ , ಅದು ನಿಟ ದೇಹಕು ಬೆಳಕಯಿ ಇಕ್ಯದು . 23 ಅನೇಕೆ ನಿತ ಕನ್ನುಗ ಕೊಟ್ತ್ಯ ಲತ್ತೆಯ ಸರಿಯಾಯಿ ಪಕುತಿಲ್ಲ , ನೀನು ನಬ್ಬುಕೊರು ಇಕ್ಯಂದು ಎದ್ದನು ಕೊಟ್ತ್ಯವ 24 ಯೆದೆಅಗೋಟು ಒಂಡೇಕಡ್ತು ರ0ಡಳು ಯಜಮಾನರ್ಕು ಸೇವೆ ಸೇಯಿರ್ಕು ಆಗುದಿಲ್ಲ ,ಅದು ಯಂದನ ಇತ್ತ ಪ್ರಯತ್ನ ಸೆಂದೇಕೆ ಒಂಡ ಪ್ರೀತಿಸಿ ಇನೊಂಡ ದ್ವೇಷಿಸುರ್ದಕ್ಕುದು . ಅಥವಾ ಒಂಡ ಅಗ್ಸಗೊಂಡು ಇನೊಂಡ ತಿರಸ್ಕರದಕ್ಕ್ದು , ಅದೇ ರೀತಿ ನಿಂಗ ಒಂಡೇಕಡ್ತು ದುಡ್ಡು ಮತ್ತೆ ದವ್ರ ಸೇವ್ಸೃಕು ಅಗದಿಲ್ಲ ^{25 26} 25 ಆಕರಣತಿಂಡ ನಾನು ನಿಂಗ್ಲುಕು ಸೋನ್ನ್ರದು ನಿಂಗ ಪಕ್ಕಿರತ್ಕು ಯಂದಬೇಕು ಇಂಡು ಚಿಂತ್ಯ ಸೇಯಿಮಾನಂಗ , ನಿಂಗುಲುಕು ಕಲಿ ಇದಾ ಕುಡಿಕ್ರ್ಕು ಇದಾ ಇಲ್ಲ ಇಟ್ಟಗ್ರುಕು ಬಟ್ಟಾಗ ಇದ ಇಂಡು ಚಿಂತ ಸೇಯಿಮಾನಂಗ ನಿಂಗಲ್ತ್ ಜೀವು ಇದಅದ್ದಿಕಿಂತ ಮುಖ್ಯವಯಿರ್ಕ್ದು. 26 ಪಕ್ಷಿಲಾತ್ತೆಯಿ ಪರೊಂಗೋ , ಆಯ ಬಿತ್ತುದಿಲನು ಅರಕುದಿಲ್ಲನು ಸುಗ್ಗಿಕಾಲತ್ಕೊರು ಕಣಜಕೊಕು ಮೆತ್ತಡಸ್ಗು ದಿಲ್ಲನು ಅನೆಕೂ ಅಯಿಲಿಕಿ ತಿಂಗಿರ್ಕು ಕಲಿ ಯೋಪ್ಪೋತಿಗು ಇಕ್ಯದು ಯಂತಗು ಇಂಡೆಕೆ ಪರಲೋಕತ್ ದವ್ರು ಅಯಿಲಿಕಿ ಕಲಿ ಒದಗಿಸಿಕುಡಕದು ಮತ್ತೆ ನಿಂಗ ಆ ಪಕ್ಷಿಲಿಕಿಂತ ಎದ್ನೋ ಹೆಚ್ಚಿನಯ ಅತ್ರಿಂಡ್ ನಿಂಗಲತ ಕೊರತೆ ದವ್ರು ನಿಗಿಸದು ಇಂಡು ಬರವಸೆಉಳ್ಳವರಯಿ ಇರೊಂಗೋ. ^{27 28 29} 27 ನಿಂಗ ಯಾರನಾ ಚಿಂತಸೆಂದು , ದವ್ರು ತಂದಿಕ್ರ ಆಯಸ್ಸುಕೊರು ಒಂಡು ನಿಮಿಸ್ ಕೂಡ ಸೇರಸ್ರುಕು ಆಗುದಿಲ್ಲ ಅತ್ರಿಂಡ್ ನಿಂಗಲ್ತ್ ಅಗತ್ಯಲಕು ಚಿಂತಸೆಯಿಮಾನಂಗ. 28 ಬಟ್ಟಲತ ವಿಶಯತಕೋರು ಚಿಂತ ಸೇಯಿಮಾನಂಗ ಗದ್ದಿಕೊರು ವಲಜಿಕ್ರ ಪುವುಲ್ ಬಗ್ಗೆ ಯೋಚನೆ ಸೇಯಂಗೋ ಅಯಿಗ್ಯ ದುಡಿದಿಲ್ಲನು , ಬಟ್ಟಲು ಸೇಯಿದ್ಲುನು . 29 ಅನೇಕೆ ನಾನು ನಿಂಗ್ಲುಕು ಸೋನ್ನರೆ ಅರಸನಾಯಿಕ್ರ ಸೋಲೇಮನನು ಸಹ ಚಂದ ಇಕ್ಕಿರ ಬಟ್ಟಲ ಇಟ್ಗಂಚು , ಅನೇಕು ಪುವುಲುಕು ಇಕ್ಕ್ರ ಸುಂದರ ಅಲಂಕಾರ ಅತ್ತ್ರ ಬಟ್ಟಲ್ಕು ಇಕ್ಕಿಲ್ಲಾ. ^{30 31} 30 ಅದು ಒಂಡುನಾಲು ಇoದು ತಲ್ಲರಿ ಜನ ಅತ್ತ ಕಸ್ತ ಪಾಲು ಸೆಯನು , ಆ ಪುವುಗ ಕೆಲವು ಸಮಯ ಇಂದು ಪರ್ಗುಂಡು ಬಾಡೆಕೆನು , ಆ ಅಡವಿಯ ಪುಲ್ಲುಕು ದವ್ರು ಸುಂದರವಾಯಿ ಸೆಂದೇಕೆ ನಿಂಗ ಅಲಿಕಿಂತ ಹೆಚ್ಚಿನಂಗ ಅಲ್ಲ್ಯ, ಅತ್ರಿಂಡ್ ಅಲ್ಪ ವಿಶ್ವಾಸಿಲೆ ದವ್ರ ನಂಬೊಂಗೋ 31 ಅತ್ರಿಂಡ್ ನಿಂಗ ಯಂತ ತಿಂಗಿರ್ದು , ಯಂತ ಕುಡಿಕ್ರದು ಅಥವಾ ಯಂತ ಇಟ್ಟಗುರ್ದು ಇಂಡು ಚಿಂತ ಸೇಯಿಮಾನಂಗ. ^{32 33 34} 32 ಇಲಿಕ್ಯದ್ದಿ ದವ್ರ ನಂಬರಾಯ ಚಿಂತ್ ಸೆಯನು, ಅನೇಕೆ ಪರಲೋಕತ್ ದವ್ರುಕು ನಿಟ ಅಗತ್ಯ ತಿಲಿಜಿದು ಅತ್ರಿಂಡ್ ಅತ್ರ ವಿಶಯವಾಯಿ ಚಿಂತ್ ಸೇಯಿಮಾನಂಗ. 33 ಇತ್ತ ಬದಲಾಯಿ ದವ್ರರಾಜ್ಯತ್ಕಾಯಿ ತವಕ ಪಡಂಗೋ, ಮತ್ತೆ ನಿತಿಕಾಯಿ ಜಿವಿಸ್ರಕು ಪ್ರಯತ್ನ ಸೇಯಾಂಗೋ, ಇನಗು ಸೆಂದೇಕೆ ಆತನು ನಿಂಗ್ಲುಕು ಬೆಕಯಿಕ್ರತ ಅದ್ದಿ ತರದು. 34 ಅತ್ರಿಂಡ್ ತಲ್ಲರಿತ ವಿಷಯವಾಯಿ ಚಿಂತ ಸೇಯಿಮನಂಗ ಯಂತ್ಗು ಇಂಡೆಕೆ ಆ ದಿನತ ಕಾಟ ಆ ದಿಂತ್ಗೆ ಶನ ಮುನಕು ಅಗ್ರತ್ ಬಗ್ಗೆ ಚಿಂತ ಮನ.