^{1 2 3} 1 ಅರಸ ಅನಾ ಹೆರೋದು ಅಲ್ದ್ರ ಕಳ್ತ್ಗೊರು ಯುದಾಯ ಸೀಮೆಕೋರು ಬೆತ್ಲೇಹೆಮ್ ಇಂಗ್ರ ಊರುಕೊರು ಪರ್ಚು ,ಯೇಸು ಪರ್ದಪೋದು ಸ್ವಲ್ಪು ಮಂದಿಗ್ಯ ಸೂಚಿಸ್ರ ನಕ್ಷತ್ರ ಮೂಲ್ಕ ಮೂಡಣ ನಲ್ತಿಂಡು ಯೆರುಸಲೆಮ್ಕು ವಂಚ್ನು. 2 ಆಗ್ಯ ಅಟಿಕ್ರ ಮಂದಿಲ್ಕಿ ಕೊಟುಸ್ನು ಯೇಹುದ್ಯ ಅರಸನಯಿ ಪರ್ದಿಕ್ರದು ಎಟಿದು?ನಂಗ ಮೂಡಣ ನಡ್ಕೊರು ನಕ್ಷತ್ರ ಪಾತುಅದು ಪರ್ದಿದುಅಂಡು ತಿಳ್ಜು ಅತ್ಗು ಆರಾದಿಸರ್ಕ್ ವಂದಿರೋ. 3 ಈ ವಿಷಯತೆಯ ಕೊಟು ಅರಸ ಅನಾ ಹೆರೋದು ಈ ಮಂದಿಗ್ಯ ಎಂತಾಸೋನ್ತಯಿನೂ ಇನ್ದು ಚಿಂತುಸ್ತಯಿಂಚು ,ಯೆರುಸಲೆಮು ಮಂದಿಗ್ಯ ಕೂಡ ಚಿಂತುಸ್ತಯಿಂಚು. ^{4 5 6} 4ಅಪೋದು ಹೆರೋದು ಯೆರಸಲೀಮುಅದ್ದಿ ಮಹಾಯಜಕರನು ಶಾಸ್ತ್ರಿಗಳನು ಅಗ್ಸು ಎಟಿ ಪರ್ಕಕು ಇನ್ದು ಪ್ರವಾದಿಗ್ಯ ಪ್ರವಾದನೆ ಸೋನಿನ್ನು ಇನ್ದು ಕೊಟ್ಸು. 5 ಅತ್ಗು ಆಗ್ಯ ಸೋನದು ಅದು ಬೆತ್ಲೇಹೇಮ್ ಇಂಗ್ರ ಉರ್ಕೊರು ಪರ್ದಿದು ;ಬೆತ್ಲೇಹೇಮ್ ಯಹುದ್ಯದ ಮುಖ್ಯ ಪಟ್ಟಣವಾಯಿಂಚು .ಯಂತ್ಗು ಇಂಡೆಕೆ ಪ್ರವಾದಿಯಾನ ಮಿಕನು ಇನ್ಗು ವರ್ಜಿಂಚು. 6 ಯುದಾಯದ ಬೆತ್ಲೇಹೇಮ್ ಸ್ಯನ ಮುಕ್ಯ ,ನಿನ್ವುಲ್ಲಿ ಒಂಡು ರಾಜು ವರಕು, ಅದೇ ನನ್ನ ಮಂದಿಗ್ಯ ಇಸ್ರಯೇಲ್ಲತೆಯ ಆಳ್ವಿಕೆ ಸೈಯಾಕು. ^{7 8} 7 ಅರಸಅನಾ ಹೆರೋದು ಯತ್ಗು ಗೊತಗ್ರುಕನಿ ಆ ಜೋಯಿಸರನ್ನು ಅಗ್ಸು ಅಲ್ಕಿ ನಕ್ಷತ್ರ ಕಂಡ್ಗೋಡ ಸಮಯತೆಯ ನಲ್ಗು ತಿಳ್ಜೋಂಡು 8 ನಿಂಗ ಬೆತ್ಲೇಹೆಮ್ಕು ಓಹಿ ಎಟಿ ಇಂಗ್ರತ ತಿಳ್ಜ್ಗೊಗೊಂಗು ,ಅದು ಸಿಕ್ನಪೋದು ,ವಂದು ನನ್ಕು ಸೋನಂಗೋ ,ನಾನು ಹೋಯಿ ಅತತ್ತೆಯ ಅರಾದಿಸ್ಯೋಟು ವರ್ರೆ ಇಂಡು ಸೋನ್ಸು. ^{9 10} 9 ಅಪೋದು ಆ ಮಂದಿಗ್ಯ ಬೆತ್ಲೇಹೆಮ್ಕು ಹೋಸ್ನು ಆಗ್ಯ ಮೂಡಣ ದೇಶತಿಂಡು ಕಂಡ ಆಶ್ಚರ್ಯಕರ ಅನಾ ಆ ನಕ್ಷತ್ರ ಆಯಿಲ್ಯ ಮುನ್ಮುಂಕು ಹೋಯಿ ಆ ಮವ್ವು ಇಂದ ಉಟ್ಮೆನಿ ನಿಂಡ್ರುಸು, 10ಅಗ್ಯ ಆ ನಕ್ಷತ್ರತಾ ಪಾತು ಶನ ಖುಷಿ ಪಟ್ಟ್ಸುನು, ^{11 12} 11 ಅಗ್ಯ ಉಟತ್ತೆಯಿ ಗೊತ್ತು ಸೇನ್ದ್ಗೊಂಡು ಉಲ್ಕಿ ಹೋಯಿ ಆ ಕೂಸು ಮತ್ತೆ ಅದ್ಗ್ ಅಮ್ಮ ಮರಿಯಳತ್ತೆಯ ಪಾತು ಅಡ್ಡಬೂದು ಆರಾದನೇ ಸೆಂಚುನು ,ಮತ್ತೆ ಅಯಿಲ್ಲ್ತ ಮುಟಾ ಅಮ್ತು ಆ ಕೂಸ್ಕು ಬಂಗಾರು ದೂಪುರಕ್ತಬೋಳಲತ್ತೆಯಿ ಕುಡ್ತುಸುನು . 12 ಪರಗುಂಡು ದವ್ರು ಕೆನವೊಕೊಕು ಅಲಿಕಿ ನಿಂಗ ತಿರ್ಗಿ ಹೆರೋದನಂಚಗು ಹೋಗಮಾನಂಗ ಇಂಡು ಅಪ್ಪಣೆತ ಕುಡ್ಚ್ಚು . ಅದೇರೀತಿ ಅಗ್ಯ ವಂದ ಏಗಿ ವುಟ್ ಬೇರೆ ಎಗಿಂಡ್ ಅಲ್ತ ದೇಶಕು ಹೊಸುನು. ^{13 14 15} 13 ಆ ಮಣಸುರು ಹೊನ್ನಪದು ದೇವದೂತು ಯೋಸೆಫನ ಕೆನವುಕೊಕು ವಂದು ಅದ್ದಿ , ಆ ಕೂಸು ಮತ್ತೆ ಅದಗ್ ಅಮ್ಮ್ಯ ಅಸ್ಸ್ಗೊಂಡು ಐಗುಪ್ತ ದೇಶತ್ಗು ಓಡೋಯೋ ,ನಾನು ಸೋನ್ನರ್ತನಕ ಅಟ್ಟೆ ಇರು , ಯಂತಗು ಇಂಡೆಕೆ ಹೆರೋದನು ನಿಮವ್ವುನಾ ಕೊಲ್ಲರ್ಕು ಸೈನಿಕರ ಅಂಪ್ಪಿದು . 14 ಅಪೋದು ಯೋಸೆಫನು ಅದ್ದಿಂದು ಅದೇ ನಮರ್ಲಿ ಆ ಕೂಸುನು ಅದಗ್ ಅಮ್ಮ್ಯ ಅಸ್ಗೊಂಡು ಐಗುಪ್ತದೇಶತಗುಹೊಡಿಹೊಸು, 15 ಅಯಿಗ್ಯ ಅರಸನಾಯಿಕ್ರ ಹೇರೋದ ಸಗರತನಕ್ ಅಟ್ಟೆ ಇಂದು ಪರ್ಗುಂಡು ಐಗುಪ್ತತಿಂಡು ಬೆಲಿಕಿವಂಚುನು , ಇನಾಗು ದವ್ರು ಪ್ರವಾದಿಯಯಿಕ್ರ ಹೋಶೆಯಾನ ಮೂಲಕ ಸೋನ್ನಿಕ್ರಂತ ನುಡಿ ನೆರವೆರ್ಸು , ‘’ನಮ್ ಮಾವ್ವುನ ಐಗುಪ್ತತಿಂಡು ಅಗಸ್ನೆ ಇಂಡು ‘’ ¹⁶ 16 ಅಪೋದು ಹೆರೋದು ನನ್ಕು ಆ ಮಣ್ಸುರ್ ಮೋಸ ಸೆಂಚುನು ಇಂಡು ತಿಲ್ಜುಗೊಂಡು ಶನ ಯಾಸ್ರು ಸೆಂದ್ಗೊಂಡುಸು ,ಯಂತ್ಗು ಇಂಡೆಕೆ ಯೇಸು ಇನ್ನು ಬೆತ್ಲೇಹೆಮ್ಕೋರೆ ಈದು ಇಂಡುಗೊಂಡು ಹೆರೋದನು ಆ ಕೂಸು ಎದ್ನು ವಟಕಲ್ತದು ಇಂಡು ಲೆಕ್ಕ ಸೆಂದುಗೊಂಡು ,ಜೋಯಿಸ್ರು ನಕ್ಷತ್ರತ ಪಾತ ಸಮಯತ್ಗು ಸರಿಯಾಹಿರಂಡು ವಟುಕಾಲತ ಅದ್ದಿ ಮಕ್ಕಿಲ್ಯ ಕೊಲ್ಲರ್ಕು ಸೈನಿಕರ್ಲ ಅಂಪುಸು ^{17 18} 17 ಹೆರೋದನು ಇನ್ಗು ಸೇಂದುಪರ್ಗುಂಡು ಆ ಕಲ್ತ್ಕೊರು ಪ್ರವದಿಯಾಯಿಕ್ರರಾ ಯೇರೆಮಿಯನು ಸೋನಿಕ್ರ ನುಡಿ ನೆರವೆರ್ಸು , ಅದು ವರಿರಪ್ಪರು ಬೆತ್ಲೇಹೆಮಿನ ಪಕ್ತ ರಾಮತ್ಕೊರು . 18 ಪಂಬಳತ್ರದು, ವೆದನೆಯಿಂಡು ಅಗ್ರ ದ್ವನಿಕೋಕದು” ರಾಹೇಳಲು ಶತ್ತುಹೊನ ತಟ ಮಕ್ಲುಸಂಬಂದು ಅಗ್ತಿಂಚು , ಜನು ಎದ್ದ್ನೆ ಸಮಾದಾನ ಸೆಂದೇಕು ,ಸಮಾದಾನ ಆಗುಲ್ಲ ಯಂತಗುಇಂಡೆಕೆ ಅದ್ದಿ ಮಕ್ಯ ಶೆತ್ತುಹೊಯಿಂಚುನು. ^{19 20 21} 19 ಯೋಸೆಫ್ ಮತ್ತೆ ಅತ್ರ ಕುಟುಂಬತಯಾ ಇನ್ನು ಐಗುಪ್ತಕೋರು ಇಂದಪರೆಗೆ ಹೆರೋದು ಶೆತ್ತುಹೊಸು , ಅಪ್ಪೊದು ದೇವದೂತು ಯೋಸೇಪನ ಕೆನಾವ್ಕೋಕು ವಂದು 20 ಯೋಸೇಪನ “ಅದ್ದಿ, ಕೂಸು ಮತ್ತೆ ಅತ್ಗುಅಮ್ಮ ಪರ್ದಿರ್ಗಿ ಇಸ್ರಯೇಲ್ ದೇಶತ್ಗು ಅಸ್ಗೊಂಡ್ಹೋ , ಯಂತ್ಗುಇಂಡೆಕೆ ನಿಂಗ್ ಮವ್ವ್ನ ಕೊಲ್ರುದು ಇನ್ದುಗೊಂಡಿಕ್ರದು ಸೇತ್ತೊಸು , 21 ಅಪೋದು ಯೋಸೇಪು ಮವ್ವು ಮತ್ತೆ ಅತ್ಗ ಅಮ್ಯ ಅಸ್ಗೊಂಡು ಇಸ್ರಯೇಲ್ಕು ಹೊಸು. ^{22 23} 22 ಅನೆಕ್ಯ ಅರ್ಖೆಲಾಯನು ಅದ್ಗ ಅವಿಕಿ ಬದಲಾಯಿ ಯೂದಯತ ಅಳ್ತಾಹಿದು ಇಂಡು ಯೋಸೆಫು ಬಿತ್ಗೊಂಡ್ಸು, ಅಪೋದು ಅದು ಕೆನವ್ಕೋರು ದವ್ರ್ತ ಮಾರ್ಗದರ್ಶನತ ಪಡಚುಗೊಂಡ್ಸು , ಪರ್ಗುಂಡು ಅದು,ಮರಿಯಳು ಮತ್ತೆ ಅದಗ್ ಮವ್ವು ಗಲಿಲಾಯತಗು ಹೊಸ್ಸ್ನು . 23 ಅಯಿಗ್ಯ ನಜರೆತುಕು ವಂದು ಉಳುಜುಗೊಂಡ್ಸ್ನು ಆ ಕಲ್ತ್ಕೊರು ಪ್ರವಾದಿಯು ಸೊನ್ನ ನುಡಿ ನೆರವೆರ್ಸು : “ಅದು ಯಂದದುಇಂಡೆಕೆ ನಜರಾಯ ಇಂಗ್ರ ಪೆರು ವರದು.