^{1 2 3} 1 ಅಪ್ಪೋರು ಯೆರೂಸಲೆಮುತಿಂಡು ಪರಿಸಾಯರು ಮತ್ತೆ ಕೆಲು ಜನ ಸಂಪ್ರದಯಾತ ಬಗ್ಗೆ ಕೋಕುರುಕು ಯೇಸು ಅಂಚುಗು ವಂದು . 2 ನಿಟ ಶಿಷ್ಯರು ನಂಗಲತ ಬೆರಯ್ಯಲತ ಅಚಾರತ ಮೀರಿ ಕೈ ಕೊಯಿಗ್ಯರ್ಕನಿ ಕಲಿ ತಿಂಗ್ಯನು . 3 ಅತ್ಗು ಯೇಸು ಅಯಿಲಿಕಿ ನಿಂಗ ಯಂತ್ಗು ಆಜ್ಞೆಮೀರಿ ನಡಕರಂಗ ಇಂಡಸ್. ^{4 5 6} 4 ದವ್ರು ನಿಂಗುಲುಕು ಅಪ್ಪಣೆ ತಂದು ಸೋನ್ನಿಕ್ರದು ಯಂದದು ಇಂಡೆಕೆ ನಿಟ ತಾಯಿ ತೊಪುನ ಸನ್ಮಮನಿಸ್ಸರ್ದು ,ಮತ್ತೆ ಎದಾನ ತಾಯಿ ತೊಪುನ ಶಪಿಸನೇಕೆ ಅಯಿಗ್ಯ ಸಗರಲೇಬೇಕು ಇಂಡು , 5 ಅನೇಕೆ ನಿಂಗ ಎದಾನ ತಾಯಿನ ಇಲ್ಲ ತೊಪುನನ ಪಾತು ನಾನು ನಿಂಗಲತ ರಕ್ಷಣೆಕಯಿ ತರತ್ತ ,ದವ್ರುಕುಕಯಿ ಅಚ್ಚಿರೆ ಇಂಡು ಸೋನ್ನೇಕೆ, 6 ಅದು ತಪ್ಪಲ ಅಯಿಗ್ಯ ತಾಯಿ ತೊಪುನ ಸನ್ಮನಿಸರ ಅವಶ್ಯಕತೆ ಇಲ್ಲ ಇಂಗ್ಯರಂಗ .ಈ ತರ ಸಂಪ್ರದಯಾತ ನಿಮಿತ್ತವಯಿ ದವ್ರತ್ತ ಆಜ್ಞೆ ಮೀರಿ ನಡಕರಂಗ ^{7 8 9} 7 ಕಪಟಿಲೆ ನಿಂಗಲತ ವಿಷ್ಯವಾಯಿ ಯೆಶಯನು ಸರಿಯಯ್ಯೇ ಪ್ರವಾದಿಸಿದು ,ಅದು ಯಂದದು ಇಂಡೆಕೆ 8 ಈ ಜನು ತಂಗಲತ ವಯಿಟ್ಟು ನನ್ನ ಶಪಿಸಿ ತುಟಿಲಿಂಡು ನನ್ನ ಸನ್ಮಾನಿಸನು ;ಅನೇಕೆ ಅಯಿಲಿತ ಹೃದಯ ನನಿಂಡು ತೂರಿದು . 9 ಅಯಿಗ್ಯ ಮಣುಸ್ ರು ಬೋದಿಸಿ ಕೆಪ್ಪಿಚ್ಚಿಕ್ರತಿಂಡು ನನ್ನ ಆರಾದಿಸರದು ವ್ಯೆರ್ಥ ಇಂಡು. ^{10 11} 10 ಯೇಸು ಜನತಾ ಅಗುಸೂ ಅಯಿಲಿಕಿ –ಪರಂಗೋ ಕೋಟು ತಿಲ್ಜ್ ಗೊಂಗೋ ; 11 ವಾಯಿವುಲ್ಲಿಕಿ ಹೋಗರಂತದು ಮಣುಸ್ ನ ಕಡಕುದಿಲ್ಲ ;ಅನೇಕೆ ವಯಿಂಡು ಬೆಲಿಕಿ ವರ್ರಂತದು ಮಣುಸ್ ನ ಕಡಕದು ಇಂಡಸ್. ^{12 13 14} 12 ಪರಗುಂಡ್ ಅದ್ಗ ಶಿಷ್ಯರು ವಂದು – ಫರಿಸಯರು ನಿಟ ವೋಕ ಕೊಟೋಟು ಅಭ್ಯಂತರ ಪಟ್ಟುಸುನು ಇಂಡು ನಿನುಕು ಗೊತ್ತಸಾ ಇಂಡು ಕೊಟುಸ್ನು . 13 ಅತ್ಗು ಯೇಸು ಅಯಿಲಿಕಿ –ಪರಲೋಕತ ನಂಗ ಆವಾ ನೆಡರಂತ ಪ್ರತಿಯೊಂಡು ಶಡಿನು ಬೇರೂ ಸಹಿತ ಪಿಚ್ಚೋಡ್ರಾದಕ್ಕುದು ಆಯಿಲ್ಯ ಉಟ್ಟೋಡೋಂಗೋ; 14 ಅಯಿಗ್ಯ ಕುರುಡುರ್ರ ನಡಿಪ್ಪಿಕ್ರ ಕುರುಡುರ್ರುತರ ,ಕುರುಡುನೆ ಕುರುಡುನಾ ನಡಿಪ್ಪಿಚ್ಚಿಕೆ ರಾಂಡಳು ಗೊಂಡಿಕೋಕು ಬೂಗಾನು ಇಂಡಸ್. ^{15 16 17} 15 ಅತ್ಗು ಪೇತ್ರ ಇತ್ರ ಅರ್ಥ ಯಂದದು ಸೋನ್ನು ಇಂಡಸ್ . 16 ಅತ್ಗು ಯೇಸು –ನಿಂಗ ಇನ್ನು ಗ್ರಹಿಸಿಲ್ಲ್ಯ, 17ವಯಿಂಡು ವುಲ್ಲಿಕಿ ಹೋಗರಂತದು ಬಹಿರಭೂಮಿಕಿ ಹೊಕ್ಕುದು ಇಂಗ್ಯರದು ನಿಂಗುಲುಕು ಗೊತ್ತಿಲ್ಲ್ಯ. ^{18 19 20} 18 ಅನೇಕೆ ವಯಿಂಡು ಬೆಲಿಕಿ ವರ್ರದು ಹೃದಯತಿಂಡು ವಂದು ಮಣುಸ್ ನ ಹೊಲೆ ಸೇಯ್ಯದು . 19 ಏನಾಗು ಇಂಡೆಕೆ –ಹೃದಯತಿಂಡೆ ಕೊಟ್ಟಿ ಆಲೋಚನೆ ,ಕೊಲೆಗ್ಯ ಹಾದರತ ಸೇಯ್ಯಿರದು ,ಜಾರತ್ವ ,ಕಳ್ಳತನು ,ಸುಳ್ಳುಸಾಕ್ಷಿಗ್ಯ ,ದೇವಾದೂಷಣ,ಬೆಲಿಕಿ ವರ್ರದು . 20 ಇಂತಯಲೇ ಮಣುಸ್ ನ ಕಡುಕದು ;ಅನೇಕೆ ಕೈ ಕೊಯ್ಯಿಗ್ಯದೆ ಕಲಿ ತಿಂಗಿರದು ಮಣುಸ್ ನ ಕಡುಕುದಿಲ್ಲ. ^{21 22 23} 21ಪರುಗುಂಡ್ ಯೇಸು ಗಲಿಲಾಯತಿಂಡು –ತೂರು ಸಿದೋನ್ ತಿರಾಲ್ಕು ವಂಚು. 22 ಅಪ್ಪೋರು ಕಾನಾನ್ಯಳತ ಒಂಡು ಪಂಬಳಾದು ಅದೇ ಉರುತಿಂಡು ವಂದು ಅತನುಕು –ಓ ಕರ್ತಾನೆ ,ದಾವೀದನ ಕುಮಾರನೇ ನನ್ನ ಮೆಕು ಕರುಣೆ ಕರುಣೆ ಅಯ್ಯಿ ;ನಮ್ಮ್ ಮಗಲಾ ದವ್ವು ಪುಡ್ಸ್ ಗೊಂಡು ಶನ ಸಂಕಟ ಪಡತಿದು ಇಂಡು ವದ್ರಿ ಸೋನ್ನುಸು 23 ಅನೇಕೆ ಯೇಸು ಅತ್ಗು ಯಂದು ಉತ್ತರ ಕುಡುಕುಲ್ಲ ;ಅಪ್ಪೋರು ಅದ್ಗ ಶಿಷ್ಯರು-- ಸ್ವಾಮಿ ಅತ್ತ ಆಂಪ್ಪೆಡು ಯಂತ್ಗು ಇಂಡೆಕೆ ಅದು ನಂಬ್ರ ಪರುಗೋಟೆ ವದೆರ್ರೆಗೊಂಡೆ ವರದು ಇಂಡು ಕೋಟುಗೊಂಡುಸುನು. ^{24 25 26} 24 ಅನೇಕೆ ಯೇಸು ಪ್ರತ್ಯುತ್ತರವಯ್ಯಿ –ತಪ್ಪಿಸಿಕೊಂಡ ಕುರುಬಡ್ ಲ ತರ ಇಕ್ಕರ ಇಸ್ರಯೇಲಿನಿ ಮನೆತನತಯಿಲಂಚುಗು ಮಾತ್ರ ನಾನ್ನ ಆಂಪ್ಪಿದು ಇಂಡಸ್ 25 ಅಪ್ಪೋರು ಅದು ವಂದು ಯೇಸು ಅತ್ತ ಅರಾದಿಸಿ –ಕರ್ತನೆ ನನುಕು ಸಹಾಯ ಸೇಯ್ಯಿ ಇಂಡು ಕೋಟುಗೊಂಡುಸು 26 ಅತ್ಗು ಯೇಸು –ಮಕ್ಕಿಲ್ಯಾತ ರಟ್ಟಿ ಅತ್ಗೊಂಡ್ ನಾಯಿಲಿಕಿ ಹೊಡ್ರದು ಸರಿಯಲ್ಲ ಇಂಡು ಸೋನ್ನುಸು. ^{27 28} 27 ಅತ್ಗು ಆ ಪಂಬಳಾದು ಯೇಸುಕು ಇದು ಕರನೇ ?ಅನೇಕೆ ಮೇಜುಮೆನಿಂಡು ಬುಗಾರ ರೊಟ್ಟಿ ತುಂಡುಲಾ ನಾಯಿಗ್ಯ ತಿಂಗ್ಯನೆ ಇಂಡಸ್. 28 ಅಪ್ಪೋರು ಯೇಸು ಅತ್ಗು –ನಿಟ ನಂಬಿಕೆ ಬೇರದು ;ನೀನು ಇಷ್ಟ ಪಟ್ಟತರಾನೆ ನಿನುಕು ಅಗೋಟು ಇಂಡಸ್ .ಮತ್ತೆ ಅದಾಗ ಮಗ ಆ ಕ್ಷಣನೆ ಅರಮಾಸು. ^{29 30 31} 29 ಪರುಗುಂಡ್ ಯೇಸು ಅಟ್ಟಿ0ಡು ಗಲಿಲಾಯ ಸಮುದ್ರತಂಚುಗು ವಂಚು ;ಮತ್ತೆ ಗಟ್ಟ್ ಹತ್ತಿ ಉಕ್ಕೊಂಡ್ಸು . 30 ಅಪ್ಪೋರು ಜನು ಕುರುಡುರು ಕುಂಟುರು ಕಿವುಡರು ಮತ್ತೆ ಅನೇಕೆ ರೋಗಿಲ್ಯ ಅಸ್ಗೊಂಡ್ ವಂಚುನು ಮತ್ತೆ ಯೇಸು ಆಯಿಲ್ಯ ಅರಮುಸೆಂಚು . 31 ಮುಕ್ಯಾಯ ವಸ್ಸೇತ್ತರತ್ತ ,ಕುರುಡುರುಕು ಕನ್ನ ಕಂಗರತ್ತ ಕಿವುಡುರುಕು ಸವ್ವಿ ತೆಲಿರತ್ತ ರೋಗಿಗ್ಯ ಅರಮಾನತ್ತ ಪಾತು ಜನು ಇಸ್ರಾಯಲ್ಯರು ದವ್ರ ಅರಾದಿಸಿ ಮಹಿಮೆ ಪಡಸ್ಸುನು. ^{32 33 34 35} 32-33 ಯೇಸು ತಟ ಶಿಷ್ಯರ ಅಗುಸು ,ನಾನು ಈ ಜನರುಕು ಕರುಣೆ ಕಟರೆ :ಯಂತ್ಗು ಇಂಡೆಕೆ ಇಪ್ಪೋರು ಮೂಡುನಾಲುತಿಂಡು ಇಯಿಗ್ಯ ನಾನಂಟೆ ಇನು ;ಮತ್ತೆ ಅಯಿಲಿಕಿ ತಿಂಗಿರುಕು ಯಂದದು ಇಲ್ಲ ;ಏಗಿಕೋರು ಅಯಿಗ್ಯ ಬಳಲಿ ಹೋಗುಬಹುದು ,ಆಯಿಲ್ಯ ಉಪವಾಸ ಅಂಪ್ಪರ ಅವಶ್ಯಕತೆ ಇಲ್ಲ . ಅತ್ಗು ಅದ್ಗ ಶಿಷ್ಯರು ,ಅತನುಕು ಇಂತ ಬೇರ್ ಗುಂಪ ತೃಪ್ತಿ ಪಡ್ಸ್ರದ್ನ ಕಲಿ ಈ ಕಟುಕೊರು ಎಟಿ ಸಿಕ್ಕದು , 34 ಅಪ್ಪೋರು ಯೇಸು ಅಯಿಲಿಕಿ ನಿಂಗಲಂಚಿಲಿ, ಎದ್ನು ರಟ್ಟಿಗ್ಯ ಇನು ಇಂಡು ಕೊಟುಸು,ಅತ್ಗು ಅಯಿಗ್ಯ 7 ರಟ್ಟಿ ಮತ್ತೆ ಮೀನುಗ ಇನು ಇಂಡಸ್ನು, 35 ಅಪ್ಪೋರು ಯೇಸು ಜನು ಸಮೂಹತ್ಗು ಪುಲ್ಲು ಮೆಕು ಉಕ್ಕುರುಕು ಅಪ್ಪಣೆ ಕುಡ್ತಸು ^{36 37 38 39} 36 ಯೇಸು ಆ 7 ರಟ್ಟಿ ಮತ್ತೆ ಮಿನುಲಾ ಅತ್ಗೊಂಡು ಸ್ತೋತ್ರ ಸೆಂದು ಆಯಿಲ್ಯ ವಡ್ಸು ತಟ ಶಿಷ್ಯರುಕು ಕುಡಚುನು ಮತ್ತೆ ಅದಾಗ ಶಿಷ್ಯರು ಜನುತ್ಗು ಕುಡಚುನು . 37 ಅಯಿಗ್ಯ ಅದ್ದಿ ತಿಂಡರು ತೃಪ್ತರಾಸನು ;ಮತ್ತೆ ಉಳಜ ತುಂಡ್ಲ ಕುಡಸನ್ನಪರುಗು 7 ಬುಟ್ಟಿಗ್ಯ ಮೆತ್ತುಸುನು . 38 ಕಲಿ ತಿಂಡರಯ್ಯ ಪಂಬಳಯ್ಯ , ಮಕ್ಯ ,ಅಲ್ಲದೆ ನಾಲು ಸಾವಿರ ಅಂಬಳಯ್ಯ . 39 ಪರುಗುಂಡ್ ಯೇಸು ಜನು ಸಮೂಹತ ಅಂಪ್ಪೆಟು ದೋಣಿ ಹತ್ತಿ ಮಗದನ್ ತಿರತ್ಗು ವಂಚು.