^{1 2} 1.ಯೇಸು ತಟ ಶಿಷ್ಯರ್ಕು ಇನ್ಗು ಸೋನ್ಸು ಶ್ರೀಮಂತ ಆನಾ ಒಂಡು ಮನುಷ್ಯನ್ಕು ಒಂಡು ಉಟುಪನಿಸೈರ ಅಳಿಂಚು ಇತ್ರ ವಿಷಯತ್ಕೊರು ಯಜಮಾನನಂಚ್ಲಿ-ಇದು ನಿಟ ಆಸ್ತಿಯತ್ತೆಯ ಅಲ್ಜೈತ ಇದು ಇಂಡು ಎದೋ ಸೋನ್ಸು. 2.ಅತ್ಗು ಯಜಮಾನ ಅತತ್ತೆಯ ಅಗ್ಸು ಅತ್ಗು ಇದ್ಯಾಂದ ನಾನು ನಿಟ ವಿಷಯತ್ಕೊರು ಕೊಕ್ರ ಇಕ್ರದು? ಉಟ್ಟತಲೆಕ್ಕಾಚಾರ ಒಪ್ಸು.ಯಾಂತ್ಗು ಇಂಡೆಕೆ ನೀನು ಇನ್ಮೆನಿ ಪನಿ ಆಳಾಯಿ ಇಕ್ಕಿಮಟ ಇಂಡ್ಸು. ^{3 4} 3.ಅಪೋದು ಆ ಆಳು ತನ್ನುಲೇ-ನಾನೆಂಚೈಯಿರ್ದು ಯಾಂತ್ಗು ಇಂಡೆಕ್ಯ ನಟ ಯಾಜ್ಮಾನ ನನ್ನತ್ತೆಯ ಪನೀ ಇಂಡು ವಂಗ್ಯೋಡಕು, ನಾನ್ಕು ಆಗಿರ್ಕು ಅಗ್ದಿಲ,ಬಿಕ್ಷೆ ಬೆದ್ರುಕು ನಾಲ್ಕು ನಾಚಿಕೆಯಾಕ್ದು. 4.ಪನಿಯಿಂಡು ನನ್ನತ್ತೆಯ ವಂಗ್ನಪೋದು ನನ್ನತ್ತೆಯ ಉತ್ಗುಅಗುಸೃಕನಿ ನಾನು ಸೈಬೇಕಾನತ್ತ ಯೋಚಿಸಿರೆ ಇಂಡು ಅದ್ಗೊಂಡ್ಸು. ^{5 6 7} 05.ಹಿನ್ಗೆ ಅದು ತಟ ಯಜಮಾನನ ಸಾಲುಗಾರುಕೋರು ಅದ್ದಿ ಅಗ್ಸು ಬಂಡೆಯತ್ಗು ನೀನು ನಟ ಯಜಮಾನುನ್ನು ಎದ್ನು ಕುಡ್ಕುರ್ದು ಇಂಡು ಕೊತಟ್ಗು. 06.ಅದು ಒಂಡು ನೂರು ಅಳತೆ ಅನ್ನಿ ಇಂಡ್ಸು ಅಪೋದು ಅದು-ನಿಟ ಬೆಲೆ ಪಟ್ಟಿ ಅತ್ಗೊಂಡು ಬೇಗ ಉಕೊಂಡು ಅಂಜ್ರುಕಪೋದು ಇಂಡುವರಿ ಇಂಡು ಅತ್ಗು ಸೋನ್ಸು. 07.ಇದಲ್ದೆ ಅದು ಇನ್ನೊಂಡ್ಕು-ನೀನು ಎದ್ನು ಕುಡ್ರುದು ಇಂಡತ್ಗು ಅದು- ಒಂಡ್ನೋರು ಅಳತೆ ಗೋದಿ ಇಂಡ್ಸ.ಅಪೋದು ಅದು ನಿಟ ಚೀಟಿ ವಂಗಿ ಅಗ್ರುಕತ್ತು ಇಂಡು ವರಿ ಇಂಡ್ಸು. ^{8 9} 08.ಅಪೋದು ಯಜಮಾನು ಅನ್ಯಾಯಗಾರ ಅನಾ ಪನಿ ಸೈರದು ಜಾಣತನ ಸೇಂದಿದು ಇಂಡು ಆತ ಹೊಗ್ಲುಸು ,ಯಂತ್ಗು ಇಂಡೆಕೆ.ಈಲೆಕ್ತಮಕ್ಕಿಗ್ಯ ತಂಗ್ಲ ವಂಶತ್ಗೋರು ಬೆಳಕಿನ ಮುಕ್ಲುಕಿಂತ ಜಾನರೈಕ್ಯಾಕ್ನು. 09.ನಾನು ನಿಂಗ್ಲುಕು ಸೊಂದ್ರದು ಎಂದ ಇಂಡೆಕೆ ಅನ್ಯಾಯದ ದುಡ್ಲಿಂದು ನಿಂಗ್ಲುಕು ಸ್ನೇಹಿತರತ್ತೆಯ ಸೆಂದ್ಗೋ, ಅದು ನಿಂಗ್ಲತೆಯ ಉಟೋಟು ಹೋನಪೋದು ಐಗ್ಯ ನಿಂಗ್ಲತ್ತೆಯ ಶಾಶ್ವತ ಆನಾ ಉತ್ಗೋರು ಅಗುಸ್ಗಾಕ್ನು. ^{10 11 12} 10.ಎದು ಅಳುದ್ನೆ ಇಕ್ರತ್ಗೋರು ನಂಬಿಗಸ್ತ ಕ್ಯಕೋ ಅದು ಸೆನ್ನಾ ಇಕ್ರತ್ಗೋರು ನಂಬಿಗ್ರಸ್ತ ಆಯಿಕ್ಯಾಕು ಎದು ಅಳುದ್ನೆ ಇಕ್ರತ್ಗೋರು ಅನ್ಯಾಯಗಾರ ಆಯಿಕ್ಯಾಕೋ.ಅದು ಸೇನ್ನಾತ್ಗೊರು ಅನ್ಯಾಯಗಾರ ಆಯಿಕ್ಯಾಕು. 11.ಅತಿಂಡು ಅನ್ಯಾಯ ಅನಾ ದುಡ್ಲಕೊರು ನಿಂಗ ನಂಬಿಗಸ್ತರಗ್ಲು ಗುಂಟೆಕ್ಯ ಕರ ಆನಾ ದುಡ್ಲತೆಯ ನಿಂಗ್ಲುಕು ಎದು ತರಕು. 12.ಇದಲ್ದೆ ಬೇರೆಯತ್ರ ವಸ್ತುಕೋರು ನಂಬಿಗಸ್ತ ರಾಗ್ಲು ಗುಂಟೆಕ್ಯ ನಿಂಗ್ಲ ಸ್ವಂತ ತತ್ತೆಯ ಎದು ತರಕು. ¹³ 13.ಎದೆ ಸೇವಕ ರಂಡು ಯಜಮಾಮನನತ್ತೆಯ ಪ್ರತಿಸುದಿಲ್ಲ ಯಾಂತ್ಗು ಇಂಡೆಕೆ ಅದು ಒಂಡತ್ತೆಯ ದ್ವೇಷ ಸೇಂದು.ಇನ್ನೊಂಡತ್ತೆಯ ಪ್ರಿತಿಸಾಕು.ಇದಲ್ದೆ ಒಂಡತ್ತೆಯ ಅಗುಸ್ಗಾಕು ಇನ್ನೋಡತೆಯ ತಿರಸ್ಕರ ಸೈಯಾಕು ನಿಂಗ ದೌರತ್ತೆಯ ದುಡ್ಲತೆಯ ರಂಡು ಸೇವಿಸ್ ಮಾಡಂಗ. ^{14 15} 14.ಅಪೋದು ಲೋಬಿಗಾನ ಫರಿಸಾಯರು ಸಹ ಇಲ್ಯದ್ದಿಕೋಟು ಅತ್ಗು ಪರಿಹಾಸ್ಯ ಸೆಂಚ್ನು. 15.ಅಪೋದು ಅದು ಅಲ್ಕಿ ಮನುಷ್ಯರ ಮುನ್ಕುನಿತಿವಂತರಾಯಿ ಕಾಟಿಗ್ರಂಗ ನಿಂಗ ಅನೇಕೆ ದೌವ್ರು ನಿಂಗ್ಲ ಹೃದಯ ಅತ್ತೆಯ ಪಕ್ತಾ ಇದು ಯಾಂತ್ಗು ಇಂಡೆಕೆ ಮನುಶೃಕೊರು ಎದು ಶ್ರೇಷ್ಟ ನಲ್ಲದು ಇಂಡು ಕಂಗೊಕೋ.ಅದು ದೌವ್ರು ಕನ್ನುಕೋರು ಅಸಹ್ಯ ಅಕ್ಯಾಕು. ^{16 17} 16.ನ್ಯಾಯ ಪ್ರಮಾಣ ಪ್ರವಾದನೆಗ್ಯ ಯೋಹಾನಅತುಲ್ಕಿ ನಾಲ್ಕೋರು ಇಂಚು,ದೌವ್ರು ರಾಜ್ಯ ಅಮಾನ್ ತಿಂಡು ಸಾರಲ್ಪಡ್ತ ಇದು ಅದ್ದಿ ಬಲವಂತತಿಂಡು ಅತುಲ್ಕಿ ನುಗ್ಗುಕ್ಕು. 17.ನ್ಯಾಯ ಪ್ರಮಾಣತ ಒಂಡು ಹೋಕು ಬೂದು ಹೋಗ್ರುಕ್ಕಿಂತ ಆಕಾಶ ಭೂಮಿಯೂನಾಶ ಅಗ್ರದು ಸುಲ್ಬ. ¹⁸ 18.ಎದು ತಟ ಪಂಡತ್ತೆಯ ಉಟ್ಟೋಟ್ಟು ಬೇರೆ ಯಾತ ಕಾನೆಲು ಅಕ್ದೋ ಅದು ವ್ಯಬಿಚಾರ ಸೈಯಾಕು ಎದು ಮನಾಗೂ ಉಟ್ಟೆಕ್ರತ ಕಾನೆಲು ಅಕ್ದೋ ಅದು ವ್ಯಬಿಚಾರ ಸೈರಾದುಯೈದು. ^{19 20 21} 19.ನಯವಾದ ನಾರು ಮಡಿಯತ್ತೆಯ ಬಟ್ಲತೆಯ ಹುಟ್ಗೊಂಡು ಅದ್ದಿನಾಲು ಸಮೃದ್ದಿಯಾಯಿ ಕಲಿತಿಗ್ತಾ ಇಂದ ಒಂಡು ಐಶ್ವರ್ಯ ಮನುಷು ಇಂಚು. 20.ಅತ್ರು ವಾಸ್ಲುಕೊರು ಜರಇಂಗ್ರ ಒಂಡು ಬಿಕ್ಷೆ ಕೊಟುಗ್ರದು ಇಂಚು ಅತ್ರ ಹೊಡುಮೆನಿ ಸೇನಾ ಹುನ್ನೆ ಇಂಚು ಗಾಯಗ ಆಯಿಂಚು. 21.ಐಶ್ವರ್ಯವಂತನ ಮೇಜು ಮೆನ್ನಿಂಡು ಬುಗ್ರ(ರೊಟ್ಟಿ)ತುಂಡು ಲತ್ತೆಯ ತಿಂದ್ರು ವರ್ಗು ಮೆತಡುಸ್ರ್ಗುದು ಇಂದೊಂಡಿಚು. ^{22 23} 22.ಇದಾನಪೋದು ಸ್ವಲ್ಪನಲ್ ಅನಪೋದು ಆ ಬಿಕ್ಷುಕ ಸೇತ್ತೊಕ್ದು,ದೂತ ಅತತ್ತೆಯ ಅಬ್ರಹಾಮನ ಎದೆಕು ಒರುಸಾಕ್ನು.ಆ ಐಶ್ವರ್ಯವಂತೂ ಸಹ ಸಾಗಕು,ಆತತ್ತೆಯ ಅತ್ಗೊಂಡು ಹೋಯಿ ಮನ್ಸು ಸೆಂಚ್ನು. 23.ಅದು ಅಪೋದು ಪಾತಾಳತ್ಗೊರು ಯಾತನೆ ಪಡ್ತಾ ಇಂದಪೋದು ತಟ ಕನ್ನು ಪೆಂಚಿ ಮೇನಿ ತುರ್ಕೋರು ಅಬ್ರಹಾಮಾನತ್ತೆಯ ಅತ್ರ ಅದೆಯಚ್ಲಿಂದ ಲಾಜರನತ್ತೆಯ ಪಾಚು. ²⁴ 24.ಅದು ಅವನಾ ಅಬ್ರಹಾಮೆ ನನ್ನ ಮೇನಿ ಕರಣೆ ಅಚ್ಚು ಲಾಜರನತ್ತೆಯ ತಟ ತುದಿ ಬೇರಲಿಟ್ಲಿ ತನ್ನಿ ಅದ್ದಿ ನಟ ನಾಲಿಗೆಯತ್ತೆಯ ತಣ್ಣಗು ಸೈರುಕು ಅಂಪು,ಯಾಂತ್ಗು ಇಂಡೆಕೆ ನಾನು ಈ ನೇರ್ದುಗೋರು ಕಷ್ಟಪಡ್ತ ಇರೆ ಇಂಡು ಸೋನ್ಸು. ^{25 26} 25.ಅನೇಕೆ ಅಬ್ರಹಾಮು-ಮೌನೆ ನೀನು ನಿಟ ಜೀವತು ಕಾಲ್ತುಗೋರು ನೀನು ನಲ್ಲತೆ ಹೊಂದಿದೆಅನೇಕೆ ಇಪೋದು ಅದು ಆದರಣೆ ಹೊಂದ್ತ ಇದು ನೀನು ಕಷ್ಟ ಪಡ್ತ ಇರಾ. 26.ಇದಲ್ದೆ ಇಚಿಂಡು ನಿನ್ನಿಂಚ್ಗು ದಾಟಿ ವರುಕು ದಾಟ್ತೆ ಇಕ್ರುತರ ಅತಿಂಡು ನಂಗ್ಲಚ್ಲಿ ವರುಕು ನಂಗ್ಲುಕು ನಿಂಗ್ಲುಕು ಮದ್ಯೆ ಒಂಡು ಬೇರು ಅಗಾಧ ಸ್ಟಾಪಿಸಿದು ಇಂಡ್ಸು. ^{27 28} 27.ಅಪೋದು ಅದು ಅವ ಅನ್ಗನೇಕೆ ನೀನು ಆತತ್ತೆಯ ನಟ ಅವಚ್ಗು ಅಂಪು ಇಂಡು ಕೊಟ್ಗೊಡ್ಸು. 28.ನನ್ಕು ಅಂಜು ಮಂದಿ ಅನಾತೆಂಬಿಗಿನು ಇನು ಐಗ್ಯು ಸಹ ಈ ನರುಕುತ್ಗೊರು ವರ್ದನ್ಚು ಅನ್ಗು ಇದು ಹೋಯಿ ಅಲ್ಕಿ ಸಾಕ್ಷಿ ಸೋನ್ನೋಟು ಇಂಡ್ಸು. ^{29 30 31} 29.ಅತ್ಗು ಅಬ್ರಹಾಮು ಅತ್ಗು ಅಲ್ಕಿ ಮೊಷೆಯು ಪ್ರವಾದಿಗ್ಯ ಇನ್ನು ಐಗ್ಯ ಸೋನ್ನತ ಕೋಕೊತ್ನು ಇಂಡ್ಸು. 30.ಅಪ್ಪೋದು ಅದು ಅನ್ಗಲ್ಲ ಅವಾನಾ ಅಬ್ರಹಾಮ ಸೇತ್ತೊಕ್ರಲುಲ್ಲಿ ಒಂಡು ಐಲ್ಯಚ್ಗು ಹೊನೇಕೆ ಐಗ್ಯ ಮಾನಸಾಂತರ ಪಡಕ್ನು ಇಂಡ್ಸು. 31.ಅನೇಕೆ ಅದು- ಐಗ್ಯ ಮೋಶೆಯು ಮತ್ತೆ ಪ್ರವಾದಿಗ್ಯ ಸೊಂದ್ರತ ಕೊಕ್ದೆ ಹೊನೇಕೆ ಸೇತ್ತೊಕ್ರಲ್ಕೊರು ಒಂಡು ಅದ್ದಿಂದು ಹೊನೇಕು ಐಗ್ಯ ಒಪ್ಪುದಿಲ್ಕು ಇಂಡು ಅತ್ಗು ಸೋನ್ಸು.