^{1 2} 01.ಇದಾನಪೋದು ಅದ್ದಿ ಸುಂಕತಾಗ್ಯಾ ಪಾಪಿಗ್ಯ ಉಪದೇಶ ಕೊಕುರ್ಕು ಅತ್ತಂಚ್ಗು ವಂಚ್ನು. 02.ಫರಿಸಾಯರು ಮತ್ತೆ ಶಾಸ್ತ್ರಿಗ್ಯ- ಇದು ಪಾಪಿಲತ್ತೆಯ ಅಗುಸ್ಗುಕು ಅಲೆಂಟಿ ಕಲಿ ತಿಂಗ್ಯಕು ಇಂಡು ಸೊನತ ಗುಣಗುಟ್ಟಿ ಇಂಚ್ನು. ^{3 4 5} 03.ಅದು ಅಲ್ಕಿ ಈ ಸಾಮ್ಯತ್ತೆಯ ಸೋನ್ಸು. 04.ನಿಂಗ್ಲುಕೊರು ಎದೆ ಮನುಷ್ಯ ತನ್ಕು ನೂರು ಕುರಿಯಿಂದು ಅಲ್ಕ್ಯೋರು ಒಂಡತ್ತೆಯ ಕಳ್ಜು ಗೊಂದೆಂಟೆಕ್ಯ ಅದು ವಂಬುದ್ರಕಪೋತ್ತು ಕಾಟುಕೊರು ಉಟೋಟು ಕಳ್ಜೆಕ್ರತ ಸಿಕ್ರುತನ್ಕು ಅತ್ತೆ ದೌಗ್ಯೊಂಡು ಹೋಗ್ದಿಲ್ಯ. 05.ಅದು ಆ ಕುರಿಯತ್ತೆಯ ಪಾತಪೋದು ಸಂತೋಷ ಪಡ್ತ ಅತ್ತತೆಯ ತಟ ಬುಜುತ್ಮೇನಿ ಪೆಚ್ಗ್ಯುಕು. ^{6 7} 06.ಅನ್ಬೇಸಾಲಿ ಅದು ಉಟಗ್ ವಂದು ತಟ ಸ್ನೇಹಿತರತ್ತೆಯ-ಬಂದುಲತ್ತೆಯ ಅದ್ದಿ ಅಗ್ಸು.ಅಲ್ಕಿ ನಾನು ಸಂತೋಷತಿಂಡು ಇರೆ ನಿಂಗು ಸಂತೋಷ ಪಡಂಗೋ,ಯಾ೦ತ್ಗು ಇಂಡೆಕೆ ನಟ ಕುರಿಯತ್ತೆಯ ನಾನು ದೌಗ್ಯೊಂಡು ವಂದೆ ಇಂಡು ಸೋನಾಕು. 07.ಅತ್ರುತರನೆ ಮಾನಸಾಂತರಕು ಅವಶ್ಯ ಇಲ್ದೆ ಇಕ್ರದು ವಂಬುದ್ರುಕಪೋತ್ತು ಮಾನ ಸಂತರ ಪಡ್ರ ಒಂಡು ಪಾಪಿ ವಿಷ ಯವಾಯಿ ಪರಲೋಕುತ್ಕೊರು ಸಂತೋಷ ಆಗ್ದು ಇಂಡು ನಾನು ನಿಂಗ್ಲುಕು ಸೋನಾರೆ. ^{8 9 10} 08.ಎದೆ ಪಂಬ್ಲಾದಗೊಟು ತನ್ನಚ್ಲಿ ಪತ್ತು ಬೆಳ್ಳಿ ನಾಣ್ಯ ಇಂದೂ ಒಂಡು ನಾಣ್ಯ ಕಳ್ಜೋಟೆಕ್ಯ ಹೋಲ್ಕು ಆಂಟಿಚ್ನು ಉಟ್ಟತೆಯ ತುಗ್ತು ಅದು ಅತ್ತತೆಯ ಸಿಕ್ರುಗಂಟು ಹುಡುಕಾಕೆ? 09.ಅದು ಅತ್ತ ಪಾಥಪೋದು ತಟ ಸ್ನೇಹಿತರ್ಕು ಬಂದಲ್ಕು, ನನ್ಕುಸಂತೋಷ ಆಗ್ತ ಇದು ನಿಂಗ ಸಂತೋಷ ಪಡಂಗೋ ಯಾತ್ಗು ಇಂಡೆಕೆ ನಾನು ಕಳ್ಜೋದಿಂದ ನಾಣ್ಯ ಸಿಕ್ಸು ಇಂಗ್ಯಾಕು. 10.ಅದೇ ತರ ಮಾನಸಾಂತರ ಪಡ್ರ ಒಂಡು ಪಾಪಿ ವಿಷಯತ್ಕೋರು ದೇವದುತರ ಮುನ್ಕು ಸಂತೋಷ ಅಕ್ದು ಇಂಡು ನಾನು ನಿಂಗ್ಲುಕು ಸೋನಾರೆ. ^{11 12} ಸೋನಾರೆ. 11.ಅದು-ಒಂಡನೊಂಡು ಮನುಷ್ಯನ್ಕು ರಂಡು ಅಂಬ್ಲೂ ಮಿಕ್ಕಿಗಿಂಚು. 12.ಐಲ್ಕೋರು ಚಿನ್ನು ಮೌವು ಅತ್ಗು ಅವ್ಕು ಆವ ಅಸ್ತಿಕೋರು ನನ್ಕು ಪಾಲುತ ಇಂಡು ಸೋನ್ಸು ಅಪೋದು ಅದು ಅಲ್ಕಿ ಆಸ್ತಿಯತ್ತೆಯ ಪಂಚುಸು. ^{13 14} 13.ಸ್ವಲ್ಪ ನಾಲ್ತುಗೋರು ಚಿನ್ನುಮೊವ್ವು ಆಸ್ತಿ ಅಡ್ಡಿ ಆತೊಂಡು ಟೆರೆ ದೆಶುತ್ಗು ಹೋಯಿ ಅಟ್ಟಿ ಇಂಡು ಜೀವನ ಸೇಂದು ತಟ ಆಸ್ತಿ ಅತ್ತೆಯ ಹಾಳು ಸೋಂಚು. 14.ಅದು ಅದ್ದಿ ದುಡ್ಲತೆಯ ಖರ್ಚು ಸೇಂದನಪೋದು ಆ ದೇಶತ್ಕೊರು ಬೇರು ಬರ ಉಂಟಾಸು,ಹಿನ್ಗೆ ಅದು ಕೊರತೆ ಪಡ್ರುತರ ಹಾಸು. ^{15 16} 15.ಅಪೋದು ಅದು ಹೋಯಿ ಆ ದೇಶ್ತ್ ಮಂದಿಯೊಂಡೆ೦ಟ್ಟಿ ಸೆರ್ಗೊಂಡ್ಸು: ಆ ಮನುಷ್ಯ ಪಂಡ್ರಿಲತ್ತೆಯ ಮೆಸುಕ್ರು ಅತತ್ತೆಯ ತಟು ಕೊಲ್ಲುಕು ಆಂಪ್ಸು.ಅದು ಪಂಡ್ರಿಗ್ಯ ತಿಂಗ್ತಯಿಂದ ಕಲಿಯ ತ್ತೆಯ ತಿಂದ್ರು ವರ್ಕು ಮೇತಾಡುಸ್ಗುರ್ದು ಇದೊಂಡಿಂಚ. 16.ಅದು ಪಂಡ್ರಿಗ್ಯ ತಿಂಗ್ತಾಯಿಂದ ಕಲಿಯತ್ತೆಯ ತಿಂಗಿರ್ದು ಇದೊಂಡಿಂಚು ಅನೇಕೆ ಎದು ಅತ್ಗು ಕುಡ್ಕುಲ್ಲ. ^{17 18 19} 17.ಅತ್ಗು ಬುದ್ದಿವಂಡ ಪೋದು ಅದು-ನಂಗವು ಎದ್ನೋ ಪನಿ ಆಳುಲ್ಕು ಕುಡ್ತು ಉಳಿರದ್ನ ಕಲಿಯಿದಲ್ಯ! ನಾನನೇಕೆ ಪೆಸಿಯಿಂಡು ಸಾಗ್ತಯಿರೆ. 18.ನಾನು ಅದಿಂದು ನಗವಂಚ್ಗು ಹೋಯಿ ಅತ್ಗು ಆವಾ, ಪರಲೋಕುತ್ಗು ವಿರೋದವಾಯಿ ನಿಟ ಮುನ್ಕು ಪಾಪ ಸೇಂದಿರೆ. 19.ಇನ್ಮುಂಕು ನಾನು ನಿಟ ಮೌವು ಇಂಡು ಸೋನಿಸ್ಗಕ್ಕು ಯೋಗ್ಯ ಅಲ್ಲ ನಾನು ನಿಟ ಪನಿ ಸೈರಲೆಂಟಿ ಒಂಡಾಯಿ ಇಕ್ಯಾರೇ ಇಂಡು ಸೊಂನಾರೇ ಇಂದ್ಗೊಂಡ್ಸು. ^{20 21} 20.ಅದಿಂದು ತಟ ಅವುತ್ಗುಟಗ್ ವಂಚು ಅನೇಕೆ,ಅದು ಇನ್ನು ತೂರಿಕ್ರಪೋದೆ ಅತ್ಗುವು ಆತ ಪಾತು ಕನಿಕರ ಪಟ್ಟು ಓಡಿವಂದು ಆತತ್ತೆಯ ತಬ್ಗೊಂಡು ಅತ್ಗು ಮುತ್ತು ಕುಡ್ಕುಕು. 21.ಮೌವು ಅತ್ಗು ಅವಾ ನಾನು ಪರಲೋಕುತ್ಗು ನಿಟ ದೃಷ್ಟಿಕೋರು ಪಾಪಸೆಂದೇ ನಿಟ ಮೌವು ಇಂಗಿಚ್ಗುರ್ಕು ನಾನು ಯೋಗ್ಯ ಅಲ್ಲ ಇಂಡ್ಸು ^{22 23 24} 22.ಅನೆಕೆ ಅವ ಪನಿಅಳುಲ್ಕು- ನಲ್ಲ ಬಟ್ಲತೆಯ ಅತೆಂದು ಇತ್ಗು ಹೋದಂಗೋ ಇತ್ರು ಕೈಕಿ ಉಂಗುರತ್ತೆಯ ಕಾಲ್ಕಿ ಸೇರ್ದು ಹೆದಂಗೋ. 23.ಇದಲ್ದೆ ಬೇರು ಕರು ಅತ್ತೆಂದು ಅರಂಗೋ, ನಂಗ ತಿಂದ್ರು ಸಂತೋಷ ಪಡೋನಂಗ. 24.ಯಾತ್ಗು ಇಂಡೆಕೆ ನಟ ಮೌವು ಸೇತ್ತೊಕ್ರದೈಂಚು ಅನೇಕೆ ಅದು ಪದ್ರಿಗಿ ವಂದಿದು ಕಳ್ಜು ಹೊಂಚು,ಇ ಪೋದು ಸಿಕ್ಕಿದು ಇಂಡು ಸೋನ್ಸು ಹಿನ್ಗೆ ಐಗ್ಯದ್ದಿ ಸಂತೋಷ ಪಡ್ತ ಇಂಚ್ನು. ^{25 26 27} 25.ಅಪೋದು ಬೇರು ಮೌವು ಕೊಲ್ಲುಕೊರುಯಿಂಚು,ಅದು ಉಟ್ನ೦ಚ್ಗು ವರ್ತಯಿಕ್ರ ಪೋದು ಉದ್ರತ ಉದ್ರತ ಕೊದೊಂಡ್ಸು. 26.ಅದು ಸೇವಕ ಒಂಡತ್ತೆಯ ಅಗ್ಸು ಎಂದ ನಡುಕ್ರ ಇದು ಇಂಡು ಕೊಟ್ಟಪೋದು. 27.ಆ ಸೇವಕ ಅತ್ಗು-ನಿಂಗ ದೆಂಬಿ ವಂದಿದು ನಿಂಗವು ಅದು ವಂದತ್ಗು ಕರ್ರಿ ಅರ್ತು ಸ್ವಗತ ಸೈತ ಇದು ಇಂಡು ಸೋನ್ಸು. ^{28 29 30} 28.ಅತ್ಗು ಅದು ಎಸರು ಸೇಂದಗೊಂಡು,ಉಲ್ಕಿಹೋಗ್ದೆ ಇಂಚು,ಅತ್ಗು ಅತ್ಗವ ಬೈಲಿ ವಂದು ಉಲ್ಕಿ ವಾ ಇಂಡು ಬೇಡಿಗೊಂಡ್ಸು. 29.ಅನೇಕೆ ಅದು ಪದ್ರಿಗಿ ತಟ ಅವ್ಕಿ-ಇದೋ ಇದ್ನು ವಟಲು ನಾನ,ನಿಟ ಸೇವೆ ಸೈತಯಿರೆ ನಾನು ನಿಟ ಹೊಕತ್ತೆಯ ಎಮಾನು ಮಿರುಲಾ ಅನೇಕು ನಾನು ನಟ ಸ್ನೇಹಿತರೆಂಟಿ ಸಂತೋಷ ಪಡ್ರುಕು ಒಂಡು ಕರ್ಬಡು ತರುಲ್ಲ. 30.ಅನೇಕೆ ನಿಟ ಬದುಕ್ತತೆಯ ಸುಳೆಯಲ್ಲತೆಯ ಕನ್ನೆಲಾಯಿ ಹಾಳುಸೆಂದ.ಈ ನಿಟು ಮೌವು ವಂದಪೋದೇ ಅತ್ಗೊಸ್ಕರ ಕುರ್ಬಡತೆಯ ಆರ್ಪಿ ಕ್ತಯಿರ್ಯ ಇಂಡು ಸೋನ್ಸು. ^{31 32} 31.ಅಪೋದು ಅತ್ಗುವು-ಮೌನ್ನೇ ನೀನು ಎಪ್ಪೋದು ನನ್ನೆಂಟಿ ಇಂದ ನನ್ನ೦ಚ್ಲಿ ಇಕ್ರದದ್ದಿ ನಿದ್ದೆ. 32.ಅನೇಕೆ ಈ ನಿಂಗ್ ದೆಂಬಿ ಸೇತೊಕ್ರದೈಚು ತಿರ್ಗಿ ವಂದಿದು,ಕಳ್ಗೊಚು,ಇಪ್ಪೋದು ಸಿಕ್ಕಿದು ಅತ್ರಿಂಡು ನಾನು ಸಂತೋಷ ಪಡ್ತಾಯಿರೆ ಇಂಡು ಸೋನ್ಸು.