^{1 2} 1 ಕಡೇ ಕಾಲತ್ಕುರು ಕೆಲವರು ವಂಚುಸುರ ಆತ್ಮತ್ಗು ದೌಟ ಬೋದನೆಕು ಲಕ್ಷ್ಯಕುಡ್ತು ನಂಬಿಕೆಯಿಂಡು ತೊಲಗಿಹೊಕ್ನುಯಿಂಡು ಆತ್ಮನು ಸ್ವಸ್ಟವಾಯಿ ಸೋನಕು . 2 ಆಗ್ಯ ಕಪಟತ್ಕುರು ಸುಳ್ಳು ಸೊಂಡ್ರಗ್ಯ ತಂಗ್ಟ ಮನಸ್ಸಕ್ಷಿಕುರು ಕಬ್ಬಿಣತ ಬರೆ ಹೊಟಲ್ಪಟವರಾಯಿಂದು . ^{3 4 5} 3 ಕನೇಲ್ ಹಗ್ಬಾರ್ದು ಇಗ್ರತ ಎದು ನಂಬಿ ಸತ್ಯನ ಗ್ರಹಿಸ್ಕೊಂಡಿನೋ ಆಗ್ಯ ಕೃತಜ್ಞತಾ ಸುತ್ತಿ ಸೇದು ತಿಗ್ರಕೊಸ್ಕರ ದೌರು ಉಂಟು ಸೇದ ಆಹಾರನ ತಿಗ್ಬಾರ್ದುಯಿಂಡು ಆಜ್ಞಪಿಸಕ್ನು . 4 ದೌರ್ತ ಪ್ರತಿಯೊಂಡು ಸೃಷ್ಟಿ ನಾಲ್ಲದು ;ಸ್ತೋತ್ರ ಸೇದು ಅತ್ಗುರ ಪಕ್ಷತ್ಗು ಎತುನು ನಿರಾಕರಿಸಬಾರ್ದು . 5 ದೌರ್ತ ವಾಕ್ಯತಿಂಡು ಪ್ರಾರ್ಥನೆಯಿಂಡು ಅದು ಪವಿತ್ರವಕ್ದೆ. ^{6 7 8} 6 ಈ ಸಂಗತಿನ ಅನ್ನಬೆಂಬಿಮಾರ್ಕು ತಿಳಿಸ್ನೇಕೆ ನೀನು ಅನುಸರ್ಸ್ರ ನಂಬಿಕೆ ಸುಬೋದನೆ ವಾಕ್ಯತ್ಕುರು ಪೋಷಣೆ ಹೊಂದ್ರಗ್ಯರಯಿ ಯೇಸು ಕ್ರಿಸ್ತನ ನಾಲ್ಲ ಸೇವಕರಕ್ರಂಗ . 7 ಆನೆಕೆ ಅಜ್ಜಿ ಕಥೆಕಾನಿಯಿಕ್ರ ಆಶುದ್ದ ಆ ಕಥೆನ್ನ ನಿರಕರ್ಸಿ ನೀನು ಭಕ್ತಿಯ ವಿಷಯತ್ಕುರು ಸಾಧನೆ ಸೇದ್ಗೋ . 8 ವಡ್ಮು ಸಾದನೆಯು ಸ್ವಲ್ಪ ಮಟ್ಟಿಕಿ ಲಾಭವಾಯಿದು ,ಭಕ್ತಿಯನೇಕು ಆದಿ ವಿಷಯತ್ಕುರು ಲಾಭಕರವಾದು ;ಆನೇಕೆ ಇಪೋದು ಮುನ್ಕು ವರುರ್ಕು ಜಿವಾಗ್ದನ ಈದು . ^{9 10} 9 ಈ ಓಕು ನಂಬ್ರದಾಯಿದು ಸರ್ವಂಗಿಕಾರವಾಯಿ ಯೋಗ್ಯವಾಯಿದು. 10 ಆತಿಂಡು ನಂಗ ಕಷ್ಟ ಪಟಗ್ಯ ನಿಂದೆ ಅನುಬೋವಿಸಿಕ್ರಗ್ಯ ಅಯಿನು ; ಯೆಂತಿಗಿಂಡೆಕೆ ಆದಿ ಮನುಷ್ಯರ್ಕು ವಿಶೇಷವಾಯಿ ನಂಬುರಲ್ಯಕಿ ರಕ್ಷಕನಾಯಿ ಜೀವವುಳ್ಳ ದೌರ್ ನ ನಂಗ ನಂಬರೋ . ^{11 12 13} 11 ಈ ವಿಷಯಾನ ಆಜ್ಞಾಪಿಸುರ್ದು ಬೋದಿಸುರ್ದು . 12 ಯೌವನಸ್ಥಯಿಂಡು ನಿನ್ನ ಅಸಡ್ಡೆ ಸೈಯಿರ್ಕು ಆವಕಾಶ ಕೊಡ್ಕ ಮಾನ ನಂಬುರಲ್ಯಕಿ ನಡೆ ನುಡಿ ಪ್ರೀತಿ ಆತ್ಮ ನಂಬಿಕೆ ಶುದ್ದತ್ವತ್ಕು ನಿಂಗೆ ಮಾದರಿ ಆಗೊಂಗೋ . 13 ನಾನು ವರ್ತಂಕ ಓದರತ್ಕುರು ಎಚ್ಚರಿಸ್ರತ್ಕುರು ಬೋದಿಸ್ರತ್ಕುರು ಲಕ್ಷ್ಯಕುಡು. ^{14 15 16} 14 ನಿಂಕುರು ಈಕ್ರ ವರನ ಆಲಕ್ಷ್ಯ ಸೈಮಾನ ;ಸಬೇ ಹಿರಿಯಾರು ಪ್ರವಾದನೆಯಿಂಡು ನಿನ್ನ ಮೆನ್ಕು ಕೈ ಹಚ್ಚಾಪೋದು ಅದು ನಿಂಕು ವಂದಿದು. 15 ಈ ವಿಷಯತ್ಕುರು ದ್ಯಾನಿಸ್ರವನಾಯಿರು ;ನಿನ್ನ ಸಂಪೂರ್ಣವಾಯಿ ಆತ್ತುಗು ಒಪ್ಪಿಸಿಕೊಡು ;ಹಿಂಗು ನಿಂಕಾನ ಲಾಭ ಆದೆರ್ಕು ಕಂಗಕು . 16 ನಿಟ್ಟು ವಿಷಯತ್ಕುರು ಉಪದೇಶ ವಿಷಯತ್ಕುರು ಎಚ್ಚಾರಿಕೆಯಾಯಿರು .ನಿನ್ನು ಇತ್ಕುರು ನಿರಂತವನಾಯಿರು ;ಹಿಂಗು ಸೈರತಿಂಡು ನೀನು ನಿನ್ನ ನಿಟ್ಟು ಉಪದೇಶನ್ನ ಕೊಕ್ರಲ್ನ ರಕ್ಷಿಸಾರ .