^{1 2} 1 ಅನ್ನಾತೆಂಬಿ ಮಾರ್ಲೆ ನಂಗ ಸುಮ್ ಸುಮ್ಮದೇ ನಿಂಗ್ಲಚ್ಗು ವರುಲಯಿಂಗ್ರತ ನಿಂಗ್ಲುಕು ತಿಳ್ಜಿಕ್ರ . 2 ಪ್ರಕಾರ ನಂಗ್ಲುಕು ಪಿಲಿಪ್ಪಿ ಪಟ್ಟಣತ್ಗೋರು ಹಿಂಸೆ ಅವಮಾನ ಮುನ್ನಿ ಅನೇಕು ನಂಗ ನಂಗ್ಲ ದವ್ರ ಮೂಲಕ ಧೈರ್ಯತಿಂಡು ಸೇನ ವಿರೋದತ್ತೆಯ ಅನುಭವುಸ್ರಗಾಯಿ ನಿಂಗ್ಲುಕು ದವ್ರ ಸುವಾರ್ತೆಯತ್ತೆಯ ತಿಳ್ಸಿರೋಯಿಂಗ್ರದು ನಿಂಗ್ಲುಕು ಗೊತಿದೂ . ^{3 4} 3 ಯಂತ್ಗುಯಿಂಡೆಕ್ಯ ನಂಗ್ಲ ಭೋದನೆಯು ಅಬದ್ದವಲ್ಲ ಅಶುದ್ದಅಲ್ಲ ,ಮೋಸಅಲ್ಲ ,ದವ್ರು ನಂಗ್ಲತ್ತೆಯ ಯೋಗ್ಯರಿಂಡು ಅನ್ಸಿ . 4 ಸುವಾರ್ತೆಯತ್ತೆಯ ನಂಗ್ಲ ವಶುತ್ಗು ಒಪ್ಪಿಸಿದು ಇಂಡು sಯೋಚುಸ್ರಗಾಯಿ ಮಂದಿಲತ್ತೆಯ ಮೆಚ್ಚಿಸ್ರುದುಯಿಂಗ್ದೆ ಹೃದಯತ್ತೆಯ ಪರಿಶೋದಿಸ್ರ ದವ್ರತ್ತೆಯೇ ಮೆಚ್ಚಿಸುರ್ದುಯಿಂಡು ವಸೇತರೋ. ^{5 6} 5 ನಿಂಗ್ಲುಕು ತಿಳ್ಜಿಕ್ರ ಪ್ರಕಾರ ನಂಗ ಎಪೋದು ಮೊಗುಸ್ತುತಿ ಸೈರಗಾಯಿ ಕಂಗ್ತಾ ವರುಲ .ಮತ್ತೆ ಕುಡ್ಕಿರ್ಕಾಯಿ ವೇಷತ್ತೆಯ ಒಟ್ಗೊಂಡಗ್ಯಅಲ್ಲ .ಇತ್ಗು ದವ್ರೆ ಸಾಕ್ಷಿ . 6 ಇದಲ್ದೆ ನಂಗ ಕ್ರಿಸ್ತನ ಅಪೋಸ್ತಲರಯಿಕ್ರತಿಂಡು ನಂಗುಕು ಗೌರವತ್ತೆಯ ತರೂದುಯಿ೦ಡು ಸೋನ್ನುಬೇಕಯಿಂದೆಕೂ ಮನುಶ್ರು೦ಡು ವರ್ರ ಮಾನತೆಯ ನಂಗ್ಲಿಡಗೋಟು ಬೇರೆಲಿಂಡಗೋಟು ಹೊಂದ್ರುಕುಪೇಕ್ಷೆಸ್ರಗಲ್ಲ . ^{7 8 9} 7 ಅಮ್ಮ ತಟ ಮಕ್ಕಿಲತ್ತೆಯ ವಲ್ಕಕೋ ಇಂಗ್ರುತರ ನಂಗ ನಿಂಗ್ಲ ಮದ್ಯತ್ಗೋರು ವಾತ್ಸಲ್ಯತಿಂಡು ನದ್ಡುಗೊಂಡ್ರೋ . 8 ನಿಂಗ ನಂಗ್ಲುಕು ಅತಿಪ್ರಿಯ ಅನಾ ಕಾರಣ ನಂಗ ನಿಂಗ್ಲೆಂಚ್ಲಿ ಮಮತೆಯುಲ್ಲಗಾಯಿ ದವ್ರ ಸುವಾರ್ತೆಯತ್ತೆಯ ಸೊಂಡ್ರುಕು ಅದ್ನೇಅಲ್ದೆ ನಿಂಗ್ಲುಕಾಯಿ ಜೀವತ್ತೆಯೇ ತರೂಕು ಸಂತೋಷಿಸ್ರಗಾಯಿರೋ . 9 ಅನ್ನಾ ತೆಂಬಿಮಾರ್ಲೆ ,ನಂಗ ನಿಂಗ್ಲೆಂಚ್ಲಿ ಎತ್ರ ಮೇನಿಯೂ ಭಾರಹೋಡ್ರುದಂಚುಯಿಂಡು ಪಗ್ಮರ್ಕು ನಾಮರ್ಕು ದುಡ್ಜು ಜೀವನ ಸೆ೦ದುಗ್ತ ದವ್ರ ಸುವಾರ್ತೆ ಯತ್ತೆಯ ನಿಂಗ್ಲುಕು ಸಾರಿರೋ ;ಆ ನಂಗ್ಲ ಕಷ್ಟವು ಪ್ರಯಾಸವು ನಿಂಗ್ಲ ನೆನ್ಪುಗೋರುಯಿಕ್ಯಅದ್ನೆ. ^{10 11 12} 10 ನಮ್ಬ್ರಂಗನ ನಿಂಗ್ಲ ವಿಷಯತ್ಗೋರು ನಂಗ ಎದ್ನೋ ಶುದ್ದರಾಯಿಯೂ ನೀತಿವಂತರಾಯಿಯೂ ನಿರ್ದೋಸಿಗಳಾಯಿ ನದ್ಗೋ೦ಡುಯಿಂಗಿರ್ಕು ನಿಂಗ ಸಾಕ್ಷಿಗ್ಯ .ದವ್ರು ಸಾಕ್ಷಿ . 11 ಅವೂ ತಟ ಮಕ್ಕಿಲ್ಕಿ ಎನ್ಗೋ ಅನ್ಗೆ ನಂಗ ನಿಂಗ್ಲುಲಿ ಅದ್ದಿಕೂ ಬುದ್ದಿಸೋನ್ತ. 12 ಧೈರ್ಯಪಡುಸ್ತ ತಟ ರಾಜ್ಯ ಪ್ರಬಾವತ್ಗೊರು ಪಾಲುಗಾರರಾಗುರ್ಕು ಅಕಿರ ದವ್ರುಕು ಯೋಗ್ಯರಾಯಿ ನಿಂಗ ನಡುದುಗ್ರುದುಯಿಂಡು ಖಂಡಿತವಾಯಿ ಸೋನ್ತ ಏರೋಯಿಂಗ್ರತ್ಗು ನಿಂಗ್ಲುಕು ತಿಳ್ಜಿದು. ¹³ 13 ಇನ್ಗಿಕ್ರಪೋದು ನಿಂಗ ದವ್ರ ವಾಕ್ಯತೆಯ ನಂಗ್ಲಿಂಡು ಕೋಟಪೋದು ಅತ್ತ ಮಂದಿಗ್ಯ ವಾಕ್ಯಯಿಂಡು ಅಣುಸ್ದೆ ದವ್ರ ವಾಕ್ಯಯಿಂಡೆ ತಿಳ್ಜು ಅಂಗಿಕರುಸ್ನಾತ್ಗಾಯಿ ನಂಗಂತೂ ಎಡೆಬಿಡದೆ ದವ್ರುಕು ಕೃತಜ್ಞತಾಸ್ತುತಿ ಸೈಯಾರೋ. ಅದು ಕಾರಣ್ಕೆ ದವ್ರ ವಾಕ್ಯವೇ ;ಅದು ನಮ್ಬ್ರಂಗನ ನಿಂಗ್ಲುಲಿ ಬಲವಾಯಿ ಪನಿ ನಡುಪ್ಗ್ಯಕು. ^{14 15 16} 14 ಅಂಬೋ ಅನ್ನಾತೆಂಬಿಮಾರ್ಲೆ ,ನಿಂಗ ಯೂದಯತ್ಗೋರು ಕ್ರಿಸ್ತ ಯೇಸುಕೋರುಯಿಕ್ರ ದವ್ರ ಸಭೆಲತ್ತೆಯ ಅನುಸರ್ಸ್ರಗ್ಯ ಅಯಿರಂಗ .ಐಗ್ಯ ಯೆಹೂದ್ಯರಿಂಡು ಅನುಭವುಸ್ನ ಕಷ್ಟಲತ್ತೆಯ ನಿಂಗ ನಿಂಗ್ಲ ದೇಸ್ತಲಿಂಡು ಅನುಭವ್ಸಿರಂಗ . 15 ಆ ಯೆಹೂದ್ಯಗ್ಯ ಕರ್ತಅನಾ ಯೇಸುಅತ್ತೆಯ ಪ್ರವಾದಿಲ್ಲತ್ತೆಯ ಕೊಂಡ್ರುಸ್ನು ನಂಗ್ಲುನು ಗದ್ಯೋಡುಸ್ನು ;ಐಗ್ಯ ದವ್ರತ್ತೇಯ ಮೆಚ್ಚಿಸ್ರಗ್ಯಅಲ್ಲ .ಅದ್ದಿ ಮಂದಿಲ್ಕಿ ವಿರೋಧಿಗೈನೂ . 16 ಅನ್ಯಮಂದಿಲ್ಕಿ ರಕ್ಷಣೆಅಗ್ರು ತರ ಸುವಾರ್ತೆಯತ್ತೆಯ ಕೊಕ್ರ ನಂಗ್ಲುಕು ಅಡ್ಡಿ ಸೈಯಾಕ್ನು ;ಹೀನ್ಗು ತಂಗ್ಲ ಪಾಪಕೃತ್ಯಲ್ಯ ಅದ್ದಿ ಕಾಲುತ್ಗೊರು ಪರಿಪೂರ್ಣಸೈರೂಕು ಹೊಕ್ಕುನು ಅನೇಕೆ ಕೋಪ ಅಲ್ತುಮೇನಿ ಸಂಪೂರ್ಣವಾಯಿ ಆಗ್ತ ವಂಚು. ^{17 18 19 20} 17 ಅನ್ನಾತೆಂಬಿಮಾರ್ಲೆ ,ನಂಗಂತೂ ಓಡ್ಮುಕೊರು ಮಾತ್ರ ನಿಂಗ್ಲತ್ತೆಯ ಅಳುದ್ನುನಾಲು ಉಟೇಕು ಹೃದಯತ್ಗೋರು ಅಗಲ್ದೆ ನಿಂಗ್ಲ ಮೊಗತ್ತೆಯ ಪಾಕುರ್ಕು ಅತ್ಯಾಶೆಯಿಂಡು ಸೇನ ಪ್ರಯತ್ನಸೇನ್ದಿರೋ . 18 ಯಂತ್ಗುಯಿಂಡೆಕ್ಯ ನಿಂಗ್ಲಚ್ಗು ವರೂಕೂ ನಂಗ್ಲುಕು ಮನ್ಸುಯಿಂಚು ;ಎನ್ಗೋ ಪೌಲಯಿಂಗ್ರ ನಾನು ಒಂಡುರಂಡ್ರಕ ವರ್ರಕ್ಕಿಂದೆ ;ಅನೇಕೆ ಸೈತಾನು ನಂಗ್ಲುಕು ಅಭ್ಯಂತರ ಸೆಂಚು . 19 ನಂಗ್ಲ ಕರ್ತಅನಾ ಯೇಸು ಪ್ರತ್ಯಕ್ಷ ಅಗ್ರಪೋದು ಅತ್ರ ಮುನ್ನಿ ನಂಗ್ಲ ಭರವಸವು ನಂಗ್ಲ ಸಂತೋಷ ನಂಗ ಹೋಗಳಿಗ್ರ ಜಯ ಮಾಲೆಯೂ ಎದೂ ?ನೀನೆ ಅಲ್ಯ . 20 ಕರನ್ಕೆ ನೀನೆ ನಂಗ್ಲ ಗೌರವವೂ ಸಂತೋಷ ಅಯೀರ.