^{1 2 3} 1 ಪ್ರಿಯರೇ, ಶೇನ ಮಂದಿ ಸುಳ್ಳುಪ್ರವಾದಿಗ್ಯ ಲೋಕುತ್ಗೊರು ವಂದಿಕ್ರತ್ಗು ನಿಂಗ ಆತ್ಮತ ಅದ್ದಿ ಒಕತ್ತೆಯ ನಮ್ದೇ ಆಯಾ ಒಕತ್ತೆಯ ದೌವ್ರಿಂಡು ಪ್ರೇರಿತಅನಾದೋ ಇಲ್ಯೋ ಇಂಡು ಐಲ್ಯತ್ತೆಯ ಪರೀಕ್ಷಿಸುರ್ದು. 2 ಪ್ರೇರಿಸ್ರಾದು ದೌರು ಆತ್ಮನೇಯಿಂಡು ತಿಳುಜ್ಗುರ್ಕು ಲಕ್ಷಣ ಎಂದಯಿಂಡೆಕ್ಯ–ಮನುಷ್ಯಆಯಿ ವಂದ ಯೇಸು ಕ್ರಿಸ್ತನತ್ತೆಯ ಒಪ್ಪಿಗ್ರ ಆತ್ಮ ದೌವ್ರಿಂಡು ಪ್ರೇರಿತ ಅನಾದೂ. 3 ಯೇಸುಆತ್ತೆಯ ಒಪ್ದೆ ಇಕ್ರ ಆತ್ಮ ದೌವ್ರಿಂಡು ಪ್ರೇರಿತಅನಾದ್ದಲ್ಲ ;ಅದು ಕ್ರಿಸ್ತ ವಿರೋಧಿಯ ಆತ್ಮಯೈದು, ಅದು ವಾರಕು ಇಂಗ್ರತ ನಿಂಗ ಕೋಟಿರಂಗಲ್ಯ; ಈಪೋದು ಲೋಕುತ್ಗೋರು ಇದೂ. ^{4 5 6} 4 ಪ್ರಿಯರಾನ ಮಕ್ಕಿಲೇ, ನಿಂಗಂತೂ ದೌವ್ರಿಂಡು ಪರ್ದಿಕ್ರಗ್ಯಐರಂಗ; ಮತ್ತೆ ಲೋಕುತ್ಗೋರು ಇಕ್ರತ್ಗಿಂತ ನಂಗ್ಲ೦ಚ್ಲಿಕ್ರದು ಬೇರಾದು ಹೈಕ್ರತಿಂಡು ನಿಂಗ ಆ ಸುಳ್ಳು ಪ್ರವಾದಿಲ್ಯತ್ತೆಯ ಜೈಸಿರಂಗ. 5 ಐಗ್ಯ ಲೋಕುತಿಂಡು ಪರ್ದಿಕ್ರಗೈನು; ಈ ಕಾರಣತಿಂಡು ಐಗ್ಯ ಲೋಕ ಪ್ರೇರಿತರಾಯಿ ವಸೇತಾಕ್ನು, ಮತ್ತೆ ಲೋಕುತಾಗ್ಯ ಐಲ್ತ ಒಕತ್ತೆಯ ಕೊಕಾಕ್ನು. 6 ನಂಗಂತೂ ದೌವ್ರಿಂಡು ಪರ್ದಿಕ್ರಗೈರೋ; ದೌರತ್ತೆಯ ತಿಳ್ಜ್ಗೊಂಡಿಕ್ರದು ನಂಗ್ಲ ಒಕತ್ತೆಯ ಕೊಕಾಕ್ನು ;ದೌರಿಂಡು ಪರ್ಕ್ದೆಯಿಕ್ರದು ನಂಗ್ಲ ಒಕತ್ತೆಯ ಕೊಕ್ದಿಲ್ಲ ,ಇದು ಸುಳ್ಳತ್ತೆಯ ಬೋಧಿಸ್ರ ಆತ್ಮ ಇಂಡು ಇತ್ತಿ೦ಡೆ ತಿಳ್ಜ್ಗರೋ. ^{7 8} 7 ಪ್ರಿಯರೇ, ನಂಗ ಒಂಡಲ್ನೊಂಡು ಪ್ರೀತಿ ಸೈಯೋಮು, ಪ್ರೀತಿ ದೌವ್ರಿಂಡೈದೂ, ಮತ್ತೆ ಪ್ರೀತಿ ಸೇಯಿರ ಪ್ರತಿಯೊಂಡು ದೌರಿಂಡು ಪರ್ದಿಕ್ರದು ದವ್ರಿಂಡು ತಿಳ್ಜ್ಗೊಂಡಿಕ್ರದು ಐದೂ. 8 ಪ್ರೀತಿಯಿಲ್ದೆ ಇಕ್ರದು ದೌರತ್ತೆಯ ತಿಳ್ಜ್ಗೊಂಡಿಕ್ರದಲ್ಲ ಯಂತ್ಗುಯಿಂಡೆಕ್ಯ ದವ್ರು ಪ್ರೀತಿ ಸ್ವರೂಪಿ. ^{9 10} 9 ದವ್ರು ತಟ ಒಂಡೇ ಮೌವತ್ತೆಯ ನಂಗ ಅತ್ರ ಮೂಲಕ ಜೀವಿಸ್ರುಕಾಯಿ ಲೋಕುತ್ಗು ಅಮ್ ಪ್ನತ್ಗೊರೆ ದವ್ರ ಪ್ರೀತಿ ನಂಗ್ಲ೦ಚ್ಲಿ ಪ್ರತ್ಯಷಯೈದು. 10 ನಂಗ ದೌವ್ರತ್ತೆಯ ಪ್ರೀತಿ ಸೇನ್ದತಿಂಡು ಅಲ್ಲ, ಅದು ನಂಗ್ಲತ್ತೆಯ ಪ್ರೀತಿಸಿ ನಂಗ್ಲ ಪಾಪನಿವಾರನಾರ್ಥವಾಯಿ ತಟ ಮೌವತ್ತೆಯ ಅಮ್ ಪ್ನತ್ಗೊರೆ ಪ್ರೀತಿಯ ಕರ ಗುಣ ಕಂಗಾಕು. ^{11 12 13 14} 11 ಪ್ರಿಯರೇ, ದವ್ರು ನಂಗ್ಲತ್ತೆಯ ಹಿನ್ಗು ಪ್ರೀತುಸ್ನಪೋದು ನಂಗ ಒಂಡಲ್ನೊಂಡು ಪ್ರೀತುಸ್ರ ಹಂಗುಕೋರು ಇರೋ. ದೌವ್ರತ್ತೆಯ ಎದೂ ಎಮಾನು ಪಾಕುಲ್ಲ; 12 ನಂಗ ಒಂಡಲ್ನೊಂಡು ಪ್ರೀತುಸ್ನೇಕೆ ದವ್ರು ನಂಗ್ಲುಲ್ಲಿ ನೆಲೆಗೊಂಡಿದು, ಮತ್ತೆ ಅತ್ತಿಂಡು ಆಗ್ರಾ ಪ್ರೀತಿ ನಂಗ್ಲುಲ್ಲಿ ಸಿದ್ದಿಕಿ ವಾರಕು. 13 ದೌವ್ರು ನಂಗ್ಲುಕು ತಟ ಆತ್ಮತ್ಗೊರು ಪಾಲನ್ನು ಅನುಗ್ರಹಿಸ್ನಾತಿಂಡೆ ನಂಗ ಅತಂಚ್ಲಿ ನೆಲೆಗೊಂಡಿರೋಯಿಂಡು ಅದು ನಂಗ್ಲುಲಿ ನೆಲೆಗೊಂಡಿದುಯಿಂಡು ತಿಳ್ಜ್ಗರೋ. 14 ಆವಾ ತಟ ಮೌವತ್ತೆಯ ಲೋಕ ರಕ್ಷಕನನಾಯಿ ಅಮ್ಪಿಕ್ರತನಂಗ ಪಾತಿರೋ ,ಅತ್ರ ವಿಷಯತ್ಗೋರು ಸಾಕ್ಷಿ ಸೋನ್ನರೋ. ^{15 16} 15 ಯೇಸು ದೌರ ಮೌವಯಿದಿಂಡು ಏದು ಒಪ್ಪಿಗೊಂಡು ಸೋನ್ನಕೋ ಅತ್ತ೦ಚ್ಲಿ ದವ್ರು ನೆಲೆಗೊಂಡಿದು ,ಅದು ದೌರುಲ್ಲಿ ನೆಲೆಗೊಂಡಿದು. 16 ದೌರು ನಂಗ್ಲುಮೇನಿ ಹಚ್ಚಿಕ್ರ ಪ್ರೀತಿಯಾತ್ತೆಯ ನಂಗ ತಿಳ್ಜ್ಗೊಂಡ್ರೋ ಅತ್ತ ನಂಬಿರೋ, ದವ್ರು ಪ್ರೀತಿ ಸ್ವರೂಪಿ ;ಪ್ರೀತಿಕೊರು ನೆಲೆಗೊಂಡಿಕ್ರಾದು ದೌವ್ರುಕೋರು ನೆಲೆಗೊಂಡಿದು ,ದೌರು ಅತಂಚ್ಲಿ ನೆಲೆಗೊಂಡಿದು. ^{17 18} 17 ನ್ಯಾಯತೀರ್ಪಿನ ನಲ್ತ್ಗೊರು ನಂಗ್ಲುಕುಯಿಕ್ರ ಧೈರ್ಯತ್ಗೊರೆ ಅತ್ರ ಪ್ರೀತಿ ನಂಗ್ಲುಲ್ಲಿ ಸಿದ್ದಿಕಿ ವಂಚು, ಯಂತ್ಗುಯಿಂಡೆಕ್ಯ ಕ್ರಿಸ್ತನು ಎಂಥದುಯೈದೋನಂಗ ಅಂಥಲ್ತರನೆ ಈ ಲೋಕುತ್ಗೋರು ಇರೋ. 18 ಪ್ರೀತಿ ಇಕ್ರಂಚ್ಲಿ ಹೆದ್ರಿಕೆಯಿಲ್ಲ ,ಹೆದರಿಕೆ ಯಾತನೆಯತ್ತೆಯ ಹೊಂದ್ತ ಇಕ್ಯಾಕು, ಪೂರ್ಣ ಪ್ರೀತಿ ಹೆದರಿಕೆಯಾತ್ತೆಯ ಗದ್ಯೋಡಾಕು ,ಹೆದರಾದು ಪ್ರೀತಿಕೋರು ಸಿದ್ದಿಕಿ ವಂದಾದು ಅಲ್ಲ. ^{19 20 21} 19 ದೌರು ಮುನ್ನಿ ನಂಗ್ಲತ್ತೆಯ ಪ್ರೀತುಸ್ನತಿಂಡು ನಂಗು ಪ್ರೀತುಸಾರೋ. 20 ಒಂಡು ತಾನು ದೌರತ್ತೆಯ ಪ್ರೀತುಸಾರೆಯಿಂಡು ಸೋನ್ನಿ ತಟ ಅನ್ನಾತೆಂಬಿ ಮಾರ್ಲ ದ್ವೇಷಿಸ್ನೇಕೆ ಅದು ಸುಳ್ಳುಗಾರನೈದು. ತಾನು ಪಾತ ತಟ ಅನ್ನಾತೆಂಬಿಲ್ಯ ಪ್ರೀತುಸ್ದೆ ಇಕ್ರದು ತಾನು ಕಂಗಾದೆ ಇಕ್ರ ದೌರತ್ತೆಯ ಪ್ರೀತುಸ್ದಿಲ್ಲ. 21 ದೌರತ್ತೆಯ ಪ್ರೀತುಸ್ರಾದೂ ತಟ ಅನ್ನಾತೆಂಬಿಮಾರ್ಲ ಪ್ರೀತುಸುರ್ದು ಇಂಗ್ರ ಆಜ್ಞೆಯಾತ್ತೆಯ ನಂಗ ಅತ್ತಿಂಡು ಪಡಜ್ಗೊಂಡ್ರೋ.