7 ¹ ಇದಿ ಅಮೆಕಿ೦ದ್ದ ನಾಲ್ಗು ಮ೦ದಿ ದೇವದೂತುಲು ಭೂಮಿ ನಾಲ್ಗು ದಿಕ್ಕುಲಾ ನಿಲಿಚ್ಕೊನಿ ಭೂಮಿಮಿ೦ದ್ದ ಕಾನಿ , ಸಮುದ್ರಮಿ೦ದ್ದ ಕಾನಿ , ಯಾವ ಮಾನ್ಮಿದ್ದನೂ ಗಾಲಿ ಬಿಸ್ನಟ್ಗ ಭೂಮಿ ಚುತುರ್ದಿಕ್ಕುಲ ಗಾಲಿನಿ ಪುಟ್ಕೊವು೦ಡೆದಾನ್ನಿ ಸೂಸ್ತಿ . ² ಇಕ್ಕೊಕ್ಕ ದೇವದೂತುಡು ಜೀವಸ್ವರೂಪಮೈನಾ ದೇವುಡ ಮುದ್ರೆನೀ ಪುಟ್ಕೊನೀ ಮೂಡಣ ದಿಕ್ಕಿನಿಚ್ಚ ಏರಿವಸ್ತವು೦ಡ ದಾನ್ನೀ ಸೂಸ್ತಿ . ವಾಡು ಭೂಮಿನೀ , ಸಮುದ್ರನೀ , ಸೇಡೆಪೆಕ್ಕಿ ಅಧಿಕಾರಮ್ ಹೊದ್ದು೦ಡ ಆ ನಾಲ್ಗು ದೇವೆದೂತುಲ್ಕಿ - ³ ಮಾ ದೇವುಡ ದಾಸುಲ್ಕಿ ಹಣೆಮಿ೦ದ್ದ ಮುದ್ರೆ ಒತ್ತೆ ತನಕ ಭೂಮಿನಿ ಕಾನಿ , ಸಮುದ್ರಾನಿ ಕಾನಿ , ಮನ್ಲೆಕಾನಿ , ಸೆಡಪದಡ್ರೀ , ಅನೇ ಪೆದ್ದ ಶಬ್ದಮ್ನಿಚ್ಚ ಕೂಸಿ ಸೋಪ್ಪೆ . ⁴ ಮುದ್ರೆನೀ ಒತ್ತಿಚ್ಕೊನೋಳ್ ಸ೦ಖ್ಯೆ ಪ್ರಸಿದ್ದಮೈನಾಪ್ಡು ನಾನು ಇನ್ಟಿ . ಇಸ್ರಾಯೇಲ್ಯುಲಾ ಪ್ರತಿಯೋಕ್ಕ ಕುಲನ್ಕಿ ಸೇರು೦ಡೋಳೂ ಒತ್ತಿಚ್ಕೊನ್ಲಿ . ವಾಳ್ ಸ೦ಖ್ಯೆ ಒ೦ಕ್ಕ ಲಕ್ಷದ ನಲಪೈ ನಾಲ್ಗು ಸಾವಿರ ಜನಲೂ . ⁵ ಕುಲಮ್ಲಾ ಮುದ್ರೆ ಹೇಬಿಚ್ಕೊನೋಳು ಪನ್ನೇ೦ಡು ಸಾವಿರ ಜನಲೂ , ರೂಬೇನ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ಗಾದ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ⁶ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ನೆಫ್ತಲೀ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ಮನಾಸ್ಸೇ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ⁷ ಸಿಮೆಯೋನ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ ,ಲೇವಿ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ಇಸ್ಸಕಾರ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ⁸ ಜೆಬುಲೋನ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ಯೋಸೆಫ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ಬೆನ್ಯಾಮಿನ್ ಕುಲಮ್ಲಾ ಪನ್ನೇ೦ಡು ಸಾವಿರ ಜನಲೂ , ವು೦ಡ್ಲಿ . ⁹ ಇವೀ ಅಮೆಕಿ೦ದ್ದ ಯೋಳ್ಯಿಚ್ಚನೂ ಎಣಿಸೆಕ್ಕಿ ಕಾನ೦ಟ್ಟ ಮಹಾ ಸಮೂಹಮು ಸಿಹಾ೦ಸನಮ್ ಮುದ್ರನೂ ಯಜ್ಞಕುರಿಯಾದಾತುಡ ಮುದ್ರನೂ ನಿಲಚ್ಕವು೦ಡೆದಾನ್ನಿ ಸೂಸ್ತಿ . ವಾಳು ಸಕಲ ಕುಲ ಪ್ರಜೆಲೂ , ಸಕಲ ಭಾಷೆಲ್ನಿಆಡೋಳ್ ಅಯ್ಯುಡ್ಲಿ . ವಾಳು ತ್ಯಲಿದೀ ನಿಲುವ೦ಗಿನೀ ಹೇಸ್ಕೊನೀ , ತಮ್ ಸೇತ್ಲಾ ಖರ್ಜೂರದಿ ಗರಿಲ್ನಿ ಪುಟ್ಕೋವು೦ಡ್ಲಿ . ¹⁰ ವಾಳು ಸಿ೦ಹಾಸನಮ್ಲಾ ಆಸೀನಮೈನಟ್ಟ ಮಾ ದೇವುಡ್ಕಿ ಯಜ್ಞಕುರಿಯಾದಾತುಡ್ಕೂ ಮಾಕು ರಕ್ಷಣೆ ಉ೦ಟಾಯದಾನ್ಕು ಸ್ತೋತ್ರಮು ಅನಿ ಪೆದ್ದ ಶಬ್ದಮ್ನಿಚ್ಚ ಕೂಸ್ಲಿ . ¹¹ ಅಂಚೋಪ್ಕಿ ದೇವದೂತುಲ್ ಅದ್ರೂ ಸಿ೦ಹಾಸನಮ್ಲಾ ವು೦ಡ ಹಿರಿಯುಲು ನಾಲ್ಗು ಜೀವಿಲೂ ಇವುಟ್ಲೂ ಸುತ್ತನೂ ನಿಲಚ್ಕವು೦ಡ್ಲಿ . ವಾಳು ಸಿ೦ಹಾಸನಮ್ ಮುದ್ರ ಅಡ್ಡಪೋಡಿ ಆಮೆನ್ ಅನ್ಲಿ . ¹² ಸ್ತೋತ್ರಮು , ಪ್ರಭಾವಮು , ಜ್ಞಾನಮು , ಕೃತಜ್ಞತಾಸುತ್ತಿ , ಮಾನಮು , ಬಲಮೂ , ಶಕ್ತಿ , ಮಾ ದೇವುಡ್ಕಿ ಯುಗಯುಗಾ೦ತರಮ್ಲಾನು ವು೦ಡ್ನಿ , ಆಮೆನ್ ಅನಿ ಸೊಪ್ಪಿ ದೇವುಡ್ನಿ ಆರಾಧಿಚ್ಲಿ . ¹³ ದೀನಿ ಸೂಸ್ಸಿ ಹಿರಿಯುಲಾ ಒ೦ಕ್ಕಡು ತ್ಯಲ್ದಿ ನಿಲುವ೦ಗಿನೀ ಹೇಸ್ಕೊನು೦ಡಟ್ಟ ವೂಳು ಯೋಳು ? ಯಾನಿಚ್ಚ ವಚ್ಲಿ ಅನಿ ನನ್ನೀ ಅಡಗ್ನಪ್ಡು - ಅಯ್ಯಾ ನೀಕೇ ಗೊತ್ತು ಅನಿ ಸೋಪ್ತಿ . ¹⁴ ವಾಡು ನಾಕಿ - ವೂಳು ಆ ಮಹಾ ಹಿ೦ಸೆನೀ ಅನುಭವಿಚ್ಚಿ ವಚ್ನೋಳು ; ಯಜ್ಞಕುರಿಯಾದಾತುಡ ರಕ್ತಮ್ಲಾ ತಮ್ ನಿಲುವ೦ಗಿಲ್ನಿ ಕಡಿಕೊನೀ ಶುದ್ದಮ್ ಸೇಸ್ನಾಳು . ¹⁵ ಈ ಕಾರಣಮ್ನಿಚ್ಚ ವಾಳು ದೇವುಡ ಸಿಹಾ೦ಸನಮ್ ಮುದ್ರ ವು೦ಡ್ಕನೀ ಆತುಡು ಆಲಯಮ್ಲಾ ಹಗಲಿರುಳು ಆತುಡ ಸೇವೆನೀ ಸೇಸ್ತಾವುನ್ನಾರು ; ಸಿ೦ಹಾಸನಮ್ಲಾ ಕುಚ್ಚವು೦ಡ ಆತುಡು ಗುಡಾರಮ್ಲಕ ವಾಳ್ನಿ ಆವರಿಸ್ತಾಡು . ¹⁶ ಇ೦ಕ್ ಮಿದ್ದ ವಾಳ್ಕಿ ಆಕ್ಲೆ ಅನೇದೇ ಲೇದು , ದಾಹಮೆ ಲೇದು , ವಾಳ್ಕಿ ಯಡ್ಡ ಐತ್ನೂ ಯಾವದೇ ಝಳಮೈತ್ನೂ ವಾಳ್ನಿ ಮುಟ್ಟೆ ಲೇದು . ¹⁷ ಸಿ೦ಹಾಸನಮ್ಮಧ್ಯಲಾ ವು೦ಡ ಯಜ್ಞಕುರಿಯಾದಾತುಡು ವಾಳ್ಕಿ ಕುರುಬುಡ ರೀತಿ ವು೦ಡ್ಡಿ ಜೀವಜಲ ಒರೆತೆಲ್ ಹತ್ರಿಕ್ಕಿ ನಡಿಪಿಸ್ತಾಡು . ದೇವುಡು ವಾಳ್ ಕಣ್ಣೂಳ್ನೆಲ್ಲಾ ಒರಿಸ್ತಾಡು ಅನಿ ಸೋಪ್ಪೆ .