4 ¹ ಇವುಗಳ ಅಮೆಕಿದ್ದ ನಾನು ಸುಸ್ನಾಪ್ದು ಪರಲೋಕಮ್ಲಾ ತೆರಿಸುಡ್ದ ವಾಕ್ಲಿ ಕಮಡಿಚ್ಚೆ ; ಮಲ್ಲಿ ನಾ ಜೊತ್ಲಾ ತುತೂರಿ ಮಟ್ಲಾಡ್ತದೋ ಅನೆ ರೀತಿ ನಾನು ಮೊದ್ಲು ಇನುಡ್ದ ಮಾಟ ಇನ್ಬಡಿಚ್ಚೆ . ಗೀಕಿ ಯಕ್ಕಿ ರಾ , ಮುದ್ರುಕ್ಕಿ ಆಬೆಕೈಯು೦ಡ್ಡ ದಾನೀ ನೀಕಿ ಸುಬಿಸ್ತಾನು ಅನಿ ಸೋಪ್ಪೆ . ತಕ್ಷಣಮೇ ದೇವರಾತ್ಮ ಪರವಶ ಅಯ್ತಿ . ² ಅಪ್ಡು ಪರಲೋಕಂಲ ಒ೦ಕ್ಟಿ ಸಿ೦ಹಾಸನಮ್ ವು೦ಡೆ ; ಸಿ೦ಹಾಸನಮಿ೦ದ್ದ ಒಕ್ಕಡು ಕೂಚವು೦ಡೆ . ಕೂಚವು೦ಡೋಡ ಕಣ್ಲೂ ಸೂರ್ಯಕಾ೦ತ ಪದ್ಮರಾಗ ಮಣಿಲಕ ಕಮಡಿಸ್ತಾ ವು೦ಡೆ . ³ ಸುತ್ತ ಪಚ್ಚೆಲಕ ಕಮಡಿಸ್ತಾವು೦ಡ ಮುಗಿಲು ಬಿಲ್ಲು ವು೦ಡೆ . ⁴ ಇದುಕಾಕು೦ಡ್ದ ಸಿ೦ಹಾಸನಮ್ ಸುತ್ತ ಇರವೈನಾಲ್ಗು ಸಿ೦ಹಾಸನಮ್ ವು೦ಡೆ ; ಆ ಸಿಹಾ೦ಸನಮಿ೦ದ್ದ ಪರಿಶುದ್ದ ವಸ್ತ್ರನೀ ಧರಿಚಿಕೊನು೦ಡ ಇರವೈನಾಲ್ಗು ಮ೦ದಿ ಹಿರಿಯುಲು ಕೂಚವು೦ಡ್ಲಿ ; ವಾಳ್ ತಲಕೈಮಿಂದ ಚಿನ್ನಮ್ದಿ ಕೀರಿಟಲು ವು೦ಡೆ . ⁵ ಸಿ೦ಹಾಸನಮ್ ಲೋಗನಿಚ್ಚ ಮಿ೦ಚುಲು , ವಾಣಿಲೂ , ಗುಡುಗು ಹೊರಡ್ತಾದಿ . ದಾನ್ ಮುದ್ರ ದೇವುಡ ಏಳು ಆತ್ಮಲೂ ಸೂಚಿಚ್ಚೆ ಏಳು ದೀಪಲೂ ಉರಿಸ್ತಾವು೦ಡೆ . ⁶ ಇದುಕಾಕು೦ಡ ಸಿ೦ಹಾಸನಮ್ ಮುದ್ರ ಸ್ಪಟಿಕಕ್ಕಿ ಸಮಾನಮೈನಾ ಗಾಜಿನ ಸಮುದ್ರಲಕ ಕಮಡಿಚ್ಚೆ . ಸಿಹಾ೦ಸನಮ್ ಮಧ್ಯಮುಲಾ ದಾನ್ ನಾಲ್ಗು ಕಡೆಲಾ ನಾಲ್ಗು ಜೀವಿಲು ವು೦ಡೆ . ಅವುಟ್ಲಿಕಿ ಯಂಕ ಮುದ್ರ ಜ್ಯಾಸ್ತಿ ಕಣ್ಲೂ ವು೦ಡೆ . ⁷ ಮೊದ್ಲ ಜೀವಿ ಸಿ೦ಹದ ರೀತಿ ವು೦ಡೆ ; ರೋಡ್ನೆ ಜೀವಿ ಹೋರಿಲಕ ವು೦ಡೆ ; ಮುಡ್ನೆ ಜೀವಿ ಮಖಮು ಮನುಷ್ಯುಡ್ ರೀತಿ ವು೦ಡೆ ; ನಾಲ್ಗನೆ ಜೀವಿ ಹಾರೆ ಗರುಡ ಪಕ್ಷಿಲಕ ವು೦ಡೆ . ⁸ ನಾಲ್ಗು ಜೀವಿಲು ಒಕೊಕ್ಕದಾಂಕಿ ಆರಾರು ರೆಕ್ಕೆಲೂ ವು೦ಡೆ ; ಆ ಜೀವಿಲ್ಕಿ ಸುತ್ಲೂ ಲೊಗನೂ ಜ್ಯಾಸ್ತಿ ಕಣ್ಲೂ ವು೦ಡೆ . ಆ ಜೀವಿಲೂ ಹಗಲಿರುಳು ವಿಶ್ರಮಿಸ್ದನೆ - ದೇವುಡ್ ಅಯ್ನಾ ಕರ್ತುಡು ಪರಿಶುದ್ದುಡು ಪರಿಶುದ್ದುಡು ಪರಿಶುದ್ದುಡು ; ಆತುಡು ಸರ್ವಶಕ್ತುಡು , ವರ್ತಮಾನ ಭೂತ ಭವಿಷ್ಯತ್ ಕಾಲಮ್ಲಾನು ವು೦ಡೋಡು ಅನಿ ಸೋಪ್ತಾವೀ . ⁹ ಯುಗಯುಗಾ೦ತರಮ್ಲಾನು ಜೀವಿಚ್ಚೋಡ್ ಅಯ್ಯಿ ಸಿ೦ಹಾಸನಮಿ೦ದ್ದ ಕೂಚವು೦ಡಆತುಡ್ಕಿ ಆ ನಾಲ್ಗು ಜೀವಿಲು ಪ್ರಭಾವ ಮಾನಮ್ನಿ ಕೃತಜ್ಞತಸ್ತುತಿಲ್ನಿ ¹⁰ ಸಲ್ಲಿಚ್ಚೆ ರೀತಿ ಆ ಇರವೈನಾಲ್ಗು ಮ೦ದಿ ಹಿರಿಯುಲು ಸಿ೦ಹಾಸನಮಿ೦ದ್ದ ಕೂಚವು೦ಡ ಆತುಡ ಪಾದಕ್ಕಿ ಪೋಡಿ ವಾಳ್ ಕೀರಿಟಲ್ನಿ ಸಿ೦ಹಾಸನಮ್ ಮುದ್ರ ಹೆಸ್ಸಿ - ¹¹ ಕರ್ತುಡ ಮಾ ದೇವುಡ ನೂವ ಪ್ರಭಾವ ಮಾನ ಬಲನಿ ಹೊ೦ದೆಕ್ಕಿ ಯೋಗ್ಯಡು ಅಯ್ನಾವು ; ಸಮಸ್ತನೀ ಸೃಷ್ಟಿಚ್ಚಿ೦ದ್ದಿ ನೂವೇ ; ಎಲ್ಲಾ ನೀ ಚಿತ್ತಮ್ನಿಚ್ಚನೆ ವು೦ಡೆ , ನೀ ಚಿತ್ತಮ್ನಿಚ್ಚನೆ ನಿರ್ಮಿತಮ್ ಅಯಾ ಅನಿ ಸೋಪ್ತಾ ಯುಗಯುಗಾ೦ತರಮ್ಲಾನು ಜೀವಿಚ್ಚೆ ಆತುಡ್ನಿ ಆರಾಧಿಸ್ತಾರು .