3 ¹ ಸಾರ್ದಿಸ್ಲಾ ವುಂಡ ಸಭೆ ದೂತುಡ್ಕಿ ರಾಯ್ಯಿ - ದೇವುಡ ಯೋಡು ಆತ್ಮಲು ಯೋಡು ನಕ್ಷತ್ರಲು ವುಡ್ನಾಟ್ಟ ಆತುಡು ಸೋಪ್ಪೆದಿ ಹೆಮಂಟ್ಟೆ - ನೀ ಕೃತ್ಯಲ್ನಿ ಬಲ್ಲೇನು ; ಜೀವಿನ್ಚೋಡು ಅನೆ ಪೇರು ನಿಕ್ ವುಟ್ನೂ ಸೇಚ್ಚಿಪೈನೋಡ್ ಐನಾವು ಅನ್ನೇದಾನಿ ಬಲ್ಲೆನು . ² ಎಚ್ಚರಮೈಯ್ಯಿ ವುಂಡು ಸೇಚ್ಚೆ ರೀತಿ ವುಂಡಟ್ಟ ಉಳಿಸುನ್ನೋಡೋಳ್ನಿ ದೃಢಪಡಿಚ್ಚು ನಾ ದೇವುಡ ಮುಂದ್ರ ನೀ ಕೃತ್ಯಲ್ಲಾ ಒಕ್ಟೈತ್ನೂ ಸಂಪೂರ್ಣಮೈನ್ದಿ ಅನಿ ನಾನು ಸುಡ್ಲೆದೂ . ³ ದಾನಿಚ್ಚ ನೂವ ಹೊದ್ನಾಟ್ಟ ಉಪದೇಶನ್ನಿ ದಾನಿ ಇನ್ನಾಟ್ಟ ರೀತಿನೀ ನೇನಪ್ಕಿ ಸಿಸ್ಕೊನಿ ದಾನ್ನಿ ಕಾಪಾಡ್ಕೋ . ಮಲ್ಲಿ ದೇವುಡ್ ತೋಟು ತಿರಿಕೋ . ನೂವ ಎಚ್ಚರಮ್ಲೆದು ಅಂಟ್ಟೆ ದೊಂಗ ವಚ್ಚೆ ರೀತಿ ವಸ್ತಾನು . ನಾನು ಯಪ್ಡು ಯಾವ್ ಗಳಿಗೆಲಾ ನೀ ಮಿಂದ ವಸ್ತಾನೋ ಅದಿ ನೀಕಿ ಗೊತೈಯ್ಯೇ ಲೇದು . ⁴ ತಮ್ ವಸ್ತ್ರಲ್ನಿ ಮೈಲಿಗೆ ಸೇಸ್ಕಂದನೆ ವುಂಡ ಕೊಚ್ಚುಮ್ ಜನಲೂ ಸಾರ್ದಿಸ್ಲೋಗ ವುನ್ನಾರು ; ವಾಳು ಯೋಗ್ಯಲಯ್ಯಿ ವುಂಡೆದಾನಿಚ್ಚ ಶುಭಾವಸ್ತ್ರಲ್ನಿ ಧರಿಚ್ಕೊನೀ ನಾ ಜೋತ್ಲಾ ನಡಿಸ್ತಾರು . ಜಯಶಾಲಿಕಿ ಇಟ್ಟ ಶುಭಾವಸ್ತ್ರಲ್ನಿ ಹೊದಿಸ್ತಾರು . ⁵ ಜೀವಾಬಾಧ್ಯ ಪಟ್ಟಿಯಿಂಚ ವಾಡ್ ಪೇರ್ನಿ ನಾನು ಅಳಿಸ್ದನೆ ವಾಡು ನಾವೋಡು ನಾ ತಂಡ್ರಿ ಮುಂದ್ರನೂ ಆತುಡ ದೂತುಲಾ ಮುಂದ್ರನೂ ಒಪ್ತಾನು . ⁶ ಸಭೆಲ್ಕಿ ಸೋಪ್ಪೆದಾನಿ ಸೌವು೦ಡೋಡು ಇನ್ನಿ . ⁷ ಫಿಲಿದೆಲ್ಪಿಯಲಾ ವುಂಡ ಸಭೆ ದೂತುಡ್ಕಿ ರಾಯ್ಯಿ - ಪರಿಶುದ್ದುಡೂ ಸತ್ಯವಂತೂಡು ದಾವೀದುಡ ಬಿಗ್ದೆಸ್ಟುಲ್ಲು ವುಂಡಟೋಡು ಯೋಳು ಮೂಸ್ ನಟ್ಗ ಸಿಸ್ಸೋಡು ಯೋಳು ಸಿಸ್ನಾಟ್ಗ ಮುಸೋಡು ಐನ್ನಾಟ್ಟ ಆತುಡು ಸೋಪ್ಪೆದಿ ಹೆಮಂಟ್ಟೆ - ನೀ ಕೃತ್ಯಲ್ನಿ ಬಲ್ಲೆನು . ⁸ ನೀಕುಂಡ ಶಕ್ತಿ ಕೊಂಚುಮ್ ಅಯ್ಯು೦ಟ್ನೂ ನೂವ ನಾಕಿ ಸೇರುನ್ಡೋಡ್ ಕಾದ್ ಸೊಪ್ದನೆ ನಾ ವಾಕ್ಯನ್ನಿ ಕಾಪಾಡುಂಡೆದಾನಿಚ್ಚ ಇಗೋ ನೀ ಎದುರ್ಲಾ ಒಕ್ಕ ವಾಕುಲ್ನಿ ತೇರ್ಸಿ ಪೆಟ್ನಾನೂ ; ದಾನ್ನಿ ಯೋಳು ಮೂಸ್ಸೆ ಲೇದು . ⁹ ನಾನು ನೀಕಿ ಅನುಗ್ರಹಿಂಚ್ಚೆದ್ ಹೆಮಂಟ್ಟೆ ಮಾಮು ಯೆಹೂದ್ಯುಲ್ ಅನಿ ಸುಳ್ಳಾಯ್ಯಿ ಕೊಚ್ಕನೆ ಸೈತಾನ ಸಮಾಜಮ್ಲಾ ಕೊಚ್ಚುಮ್ ಜನಲ್ ವಚ್ಚಿ ನೀ ಪಾದಲ್ ಮುಂದ್ರ ಪೊಡೆ ರೀತಿ ನೀನ್ನಿ ನಾನು ಪ್ರೀತಿಚ್ಚೆದಾನ್ನಿ ತಿಳಿಚ್ಕೊನೆ ರೀತಿ ಸೇಸ್ತಾನು . ¹⁰ ನೂವ ನಾ ಸಹನ ವಾಕ್ಯಲ್ನಿ ಕಾಪಾಡುಂಡೆದಾನಿಚ್ಚ ಭೂನಿವಾಸಿಲ್ನಿ ಪರಿಕ್ಷೆಚ್ಚೆದಾನ್ಕಿ ಲೋಕ ಮಿಂದ್ ಎಲ್ಲಾ ವಚ್ಚೆಕೀ ವುಂಡ ಶೋಧನೆ ಸಮಯಮ್ಲಾ ನೀನ್ನಿ ತಪ್ಪಿಚ್ಚಿ ಕಾಪಾಡ್ತಾನು . ¹¹ ಬಿರ್ನಾ ವಸ್ತಾನು ; ನೀಕಿ ವುಂಡೆದಾನ್ನಿ ಪುಟ್ಕಾನುಂಡು ; ನೀ ಜಯಮಾಲೆನ್ನಿ ಯೋಳು ಅಪಹರಿಚ್ಕುಡ್ದೂ . ¹² ಯೋವಡು ಜಯಮ್ ಹೊಂದ್ತಾಡೋ ವಾಡ್ನಿ ನಾ ದೇವುಡ್ ಆಲಯಮ್ಲಾ ಸ್ತಂಭಮೈಯ್ಯಿ ನಿಲ್ಪೆಟ್ತಾನೂ ; ವಾಡು ಇಕ್ಕ ಮು೦ದ್ರ ದಾನ್ ಲೋಗನಿಚ್ಚ ಪಯ್ಯೇದೆ ಲೇದು . ಇದುಕಾಕು೦ಡ ನಾ ದೇವುಡ್ ಪೆರ್ನೀ ನಾ ದೇವುಡ ಬಳಿಯಿಂಚ್ಚ ಪರಲೊಕಂಲೋಗನಿಚ್ಚ ದಿಗಿ ವಚ್ಚೆ ಕೊತ್ತ ಯೆರೂಸಲೆಮ್ ಪಟ್ಟಣಮ್ ಅನೆ ನಾ ದೇವುಡ ಪಟ್ಟಣಮ್ ಪೆರ್ನೀ ನಾ ಕೊತ್ತ ಪೇರ್ನೀ ವಾಡ್ ಮಿಂದ ರಾಸ್ತಾನು . ¹³ ದೇವರಾತ್ಮುಡು ಸಭೆಲ್ಕಿ ಸೋಪ್ಪೆದಾನಿ ಸೌವು೦ಡೋಡು ಇನ್ನಿ . ¹⁴ ಲವೊದಿಕೆಲಾ ವುಂಡ ಸಭೆ ದೂತುಡ್ಕಿ ರಾಯ್ಯಿ - ಆಮೆನ್ ಎಂಬಾತುಡು ಅಂಟ್ಟೆ ನಂಬೆಕ್ಕಿ ಯೋಗ್ಯಮೈನಾಟ್ಟ ಸತ್ಯಸಾಕ್ಷಿ ದೇವುಡ ದೃಷ್ಟಿಕೀ ಮೂಲುಡು ಐನಾಟ್ಟ ಆತುಡು ಸೋಪ್ಪೆದಿ ಹೆಮಂಟ್ಟೆ - ನೀ ಕೃತ್ಯಲ್ನಿ ಬಲ್ಲೆನು . ¹⁵ ನೂವ ತಣ್ಗೂ ಲೇದು ಬೇಚ್ಗು ಲೇದು ನೂವ ತಣ್ಗಕಾನಿ ಬೇಚ್ಗಕಾನಿ ವುಂಡೆ ಮೊಂಚಿದೀ . ¹⁶ ನೂವ ಬೇಚ್ಗನೂ ಲೇನ್ದನೆ ತಣ್ಗೂ ಲೇನ್ದನೆ ಉಗುರು ಬೇಚ್ಗ ವುಂಡೆದಾನಿಚ್ಚ ನೀನ್ನಿ ನಾ ನೋರಿ೦ಚ್ಚ ಕಾರ್ತಾನೂ . ¹⁷ ನೂವ ನೀ ವಿಷಯಮ್ಲಾ - ನಾನು ಐಶ್ವರ್ಯವಂತುಡು , ಸಂಪನ್ನುಡು , ಓಕ್ ದಾಟ್ಲಾನೂ ಕೊರತೆಲೇನೋಡು ಅನಿ ಸೋಪ್ಕಾಂಟಾವೂ ; ಅಯ್ತೆ ನೂವ ಕೇವಲ ದುರವಸ್ಥೆಲಾ ಪೊಡುಂಡೋಡು , ದೌರ್ಭಾಗ್ಯುಡು , ದರಿದ್ರುಡು , ಕುರುಡೂಡು , ಬಟ್ಲೂ ಲೇನೋಡು ಅಯ್ಯುಂಡೆ ದಾನ್ನಿ ತಿಳಿಚ್ಕೊಂದನೇ ವುಂಡಾವ್ . ¹⁸ ನೂವ ಐಶ್ವರ್ಯುಡು ಅಯ್ಯೇಕಿ ಅಗ್ಗಿಲಾ ಪುಟಂಕಿ ಹೇಸ್ನಾಟ್ಟ ಚಿನ್ನಮ್ನಿ , ಲಜ್ಜಾಸ್ಪದಮೈನಾ ನೀ ಬೆತ್ತಲೆ ತನನ್ನಿ ಕಮಡಿ ಗೂಡ್ ನಟ್ಗಾ ಹೊದ್ದುಕೊನೆಕೀ ತ್ಯಾಲ್ ವಸ್ತ್ರಲ್ನಿ ಕಣ್ಲೂ ಕಮಡಿಚ್ಚೆ ರೀತಿ ನೀ ಕಣ್ಲೂಕೀ ಹೇಸ್ಸೇಕಿ ಅಂಜನಾನ್ನಿ ನಾಯಿಂಚ್ಚ ಸಿಸ್ಕೊವಾಲನೀ ನೀಕಿ ಬುದ್ದಿ ಸೋಪ್ತಾನು . ¹⁹ ನಾನು ಯೋಳ್ ಯೋಳ್ನಿ ಪ್ರೀತಿಸ್ತಾನೋ ವಾಳ್ನಿ ಗದರಿಸ್ತಾನು ಮಲ್ಲಿ ಶಿಕ್ಷಿಸ್ತಾನು . ದಾನಿಚ್ಚ ನೂವ ಆಸಕ್ತಮೈಯ್ಯಿ ವುಂಡು ; ದೇವುಡ್ ತೋಟು ತಿರಿಕ್ಕೋ . ²⁰ ಇಗೋ ವಾಕ್ಕುಲ್ಲಾ ನಿಲಚ್ಕೊನೀ ತಟ್ತಾ ವುನ್ನಾನು ; ಯೋವಡೈತೋ ನಾ ಶಬ್ದನ್ನಿ ಇನಿ ವಾಕ್ಕಿಲ್ನಿ ಸಿಸ್ತೆ ನಾನು ಲೊಗ ವಚ್ಚಿ ವಾಡ್ ಜೊತ್ಲಾ ಊಟಮ್ನಿ ಸೇಸ್ತಾನು , ವಾಡು ನಾ ಜೊತ್ಲಾ ಊಟಮ್ ಸೇಸ್ತಾಡು . ²¹ ನಾನು ಜಯಮ್ನಿ ಹೊಂದಿ ನಾ ತಂಡ್ರಿ ಜೊತ್ಲಾ ಸಿಂಹಾಸನಮ್ಲಾ ಕುಚ್ಚೊಂಟಿ ; ಅಟ್ಟೆ ಜಯಮ್ ಹೊಂದೊಡ್ನಿ ನಾ ಜೊತ್ಲಾ ಸಿಂಹಾಸನಮ್ಲಾ ಕುಚ್ಕೊನೆ ರೀತಿ ಸೇಸ್ತಾನು . ²² ದೇವರಾತ್ಮುಡು ಸಭೆಲ್ಕಿ ಸೋಪ್ಪೆದಾನಿ ಸೌವು೦ಡೋಡು ಇನ್ನಿ .