5 ¹ ಆಮಿಂದ ವಾಳು ಏಟ್ ಅಕ್ಡ ದಡುಮ್ಕಿ ಗೆರಸೇನುಲು ಸೀಮೇಕಿ ಮುಟ್ರಿ . ² ಯೇಸು ದೋಣಿ ಇಂಚ ದಿಗಿ ವಚ್ಚಿನಾಕ್ಷಣ್ಮೆ ದೈಮು ಪಟ್ನೋಡ್ ಒಕ್ಡು ಸಮಾದಿ ಗವಿಲ್ನೋನಿoಚ ವಾಡ್ ಎದ್ರುಗೆ ವಚ್ಚೆ . ^{3 4} ವಾಡ್ಕಿ ಸಮಾದಿ ಗವಿಲೇ ವಾಸ್ಮುಸ್ಥಲ್ಮಾಯುಂಡೆ . ವಾಡ್ನಿ ಅನೇಕ್ಮು ಸಾರಿ ಬೇಡಿಲಿಂಚಾನು ಸರ್ಪ್ನಿಲಿಂಚಾನು ಕಟ್ಟುಂಡ್ರಿ ವಾಡು ಸರ್ಪ್ನಿಲ್ನಿ ಪೆರ್ಕಿ ಬೇಡಿಲ್ನಿ ಇರ್ಸಿಏಸುಂಡೆ , ವಾಡ್ನಿ ಇಂಕ ಯೋಳು ಸರ್ಪ್ನಿಲಾನು ಕಟ್ಟಕಾಕುನ್ನ ಪಾಯ್ರಿ , ವಾಡ್ನಿ ಹತೋಟಿಕಿ ಎತ್ಕೊಚ್ಚೇಕಿ ಯೋಳಿಂಚಾನು ಆವ್ಲೇದು . ⁵ ವಾಡು ನಿತ್ಯುಮು ಮಾಟಾಲ ಪದ್ನ ಸಮಾದಿ ಗವಿಲ್ಲಾನು ಗುಡ್ದುಲ್ಲಾನು ಆರ್ಭಟಿಸ್ತ ರಾಯ್ಲಿಂಚ ವಾಡ್ನಿ ನರ್ಕೊಂಟ ವುಂಡೆ . ⁶ ವಾಡು ಯೇಸುನಿ ದೂರ್ಮಿಂಚ ಕನಿ ಪರ್ರೊಚ್ಚಿ ಯೇಸುಕಿ ಅಡ್ಮು ಪಡಿ ಪೆದ್ದ ಶಭ್ದುಮಿಂಚ ಆರ್ಭಟಿಚ್ಚಿ - ⁷ ಯೇಸುವಾ , ಪರಾತ್ಪುಡೈನ ದೇವುಡು ಕೊಡ್ಕಾ , ನಾ ಗೊಡ್ವ ನಿಕೇoದ್ಗು ? ದೇವುಡಾಣ , ನನ್ನೀ ಕಾಡೋದ್ದು ಅನಿ ಸೊಪ್ಪೆ . ⁸ ಎಂದ್ಕಂಟೆ - ಎಲಾ ದೈಮ , ವೂಡ್ನಿ ಇಡ್ಸಿಪೋ ಅನಿ ಯೇಸು ಸೊಪ್ಪೆ . ⁹ ಮಲಿ - ನೀ ಪೇರೇಮಿ ಅನಿ ವಾಡ್ನಿ ಅಡ್ಗಿನ್ದಾಂಕಿ ವಾಡು - ನಾ ಪೇರು ದಂಡು , ಎಂದ್ಕಂಟೆ ಮಾಮು ಬಹು ಮಂದಿಲು ವುಂಡಾಮು ಅನಿ ಸೊಪ್ಪಿ - ¹⁰ ಮಮ್ಮುಲ್ನಿ ಈ ಸೀಮೆಯಿಂಚ ಅಂಪಿಯೊದ್ದು ಅನಿ ಯೇಸುನಿ ಹೆಕ್ವಾಯಿ ಬೇಡ್ಕೊನೆ . ¹¹ ಆನಿನ ಗುಡ್ಡುಮ್ಲ ಪಂದ್ಲಿನ ಪೆದ್ದ ಹಿಂಡು ಮೇಸ್ತವುಂಡೆ . ¹² ಆ ದೈಮ್ಲು - ಆ ಪಂದ್ಲುನೋನ ಸೇರೆದಾನ್ಕು ಮಮ್ಮುಲ್ನಿ ಅಂಪಿಯ್ಯಿ ಅನಿ ಬೇಡ್ಕೊನೆ . ¹³ ಯೇಸು - ಆವ್ನಿ ಅನಿ ಅವುಟ್ಳುಕಿ ಅಪ್ಪುಣ್ಮು ಇಚ್ಚೇಕಿ ಆ ದೈಮ್ಲು ಆಕ್ಟರ್ಕಿ ವಚ್ಚಿ ಪಂದ್ಲುನೋನ್ಕಿ ಪಾಯೇ , ಆ ಪಾರಿ ಕಡಿದಾಯಿನ ಸ್ಥಲ್ಮಿಂಚ ಏಟ್ನೋನ್ಕಿ ಪಡಿ ಆನ ಉಸ್ರುಕಟ್ಟಿ ಸಚ್ಚೆ . ಹೆಕ್ವ-ತಕ್ವ ರೊಂಡು ಸಾವ್ರಾಲು ಪಂದ್ಲುಂಡೆ . ¹⁴ ಅವ್ಟ್ಲುನಿ ಮೇಸೋಳು ಪರ್ಪಾಯಿ ಆ ಊರ್ಲಾನು ಹಳ್ಳಿಲ್ಲಾನು ತಿಲ್ಬಿಚ್ಚೇಕಿ ಜನಲು ನಡ್ಸಿನ ಸಂಗತಿ ಏಮಿ ಅನಿ ಸೂಸೆದಾನ್ಕಿ ಪಾಯಿ ಯೇಸು ವುಂಡೆದಾನ್ಕಿ ವಚ್ಚಿ ಆ ದೈಮು ಪಟ್ಟುoಡ್ನೋಡು , ¹⁵ ಅಂಟೆ ದೈಮ್ಲು ದಂಡಿಂಚ ಪಟ್ಟಿನ್ಡುನೋಡಾಯಿಂಡೋಡು , ಬಟ್ಳುನಿ ಏಸ್ಕೋನಿ ಸ್ವಸ್ಥ್ಮುಬುದ್ದಿಯಿಂಚ ಕುಚ್ಚೋನುಂಡೆದ್ನಿ ಸೂಸಿ ಹೆದ್ರುರ್ರಿ . ^{16 17} ನಡ್ಸಿನ ಸಂಗತಿನಿ ಸೂಸುಂಡ್ನೋಳು ಆ ದೈಮು ಪಟ್ನೋಡ್ಕಿ ಇಟ್ಟ ಇಟ್ಟಾಯೆ ಅನೇದ್ನಿ ಪಂದ್ಲು ವಿಷಯುಮ್ನಿ ವಾಳ್ಕಿ ವಿವರಿಚ್ಚೇಕಿ ವಾಳು ವಾಳ್ ಸೀಮೇನಿ ಇಡ್ಸಿ ಪೋವಾಲನಿ ಯೇಸುನಿ ಬೇಡ್ಕೊನ್ರಿ . ¹⁸ ಯೇಸು ದೋಣಿನಿ ಎಕ್ಕೆನಪ್ಡು ಆ ಪಟ್ಟುಣ್ನೋಡು - ನಾನು ನೀ ದೆಗ್ರನೆ ವುಂಟಾನನಿ ಯೇಸುನಿ ಬೇಡೇಕಿಪಟ್ಕೊನೆ . ¹⁹ ಆಯ್ತೆ ವಾಡು ವಾಡ್ನಿ ವುನ್ದ್ಬಿಯ್ಕುನ್ನ ವಾಡ್ಕಿ - ನುವ್ವ ನೀ ಇಂಟ್ಕು ನೀ ಜನಲು ದೆಗ್ರುಕು ಪಾಯಿ ಸ್ವಾಮೀ ಮೀಲಾ ಕರುಣ್ಮು ಪೆಟ್ಟಿ ನೀಕಿ ಎಟ್ಟೆಟ್ಟೆ ಉಪಕಾರ್ಲುನಿ ಸೇಸ್ನಾಡೋ ದಾನ್ನಿ ಸೊಪ್ಪು ಅನೆ . ²⁰ ವಾಡು ಪಾಯಿ ಯೇಸು ವಾಡ್ಕಿ ಸೇಸಿನ ಉಪಕಾರ್ಲುನಿ ದೆಕಪೋಲಿ ಅನೆ ಸೀಮೇಲ ಸಾರೆದಾನ್ಕಿ ಪ್ರಾರಂಭಿಚ್ಚೆ , ಅಂದ್ರು ಆಶ್ಚರ್ಯುಮುಪಡ್ರಿ . ²¹ ಯೇಸು ತಿರ್ಗಿ ದೋಣಿಲ ಅಕ್ಡ ದಡುಮ್ಕಿ ವಚ್ನಪ್ಡು ಜನಲು ಬಹು ಪೆದ್ದ ಗುಂಪಾಯಿ ಯೇಸು ದೆಗ್ರುಕಿ ವಚ್ರಿ , ಯೇಸು ಏಟು ದಡುಮ್ಲ ವುಂಡೆ . ²² ಅಪ್ಡು ಸಭಾಮಂದಿರ್ಮು ಅಧಿಕಾರ್ಲುಲ ಒಕ್ಡಾಯಿನ ಯಾಯೀರುಡನೋಡು ವಚ್ಚಿ ಯೇಸುನಿ ಕನಿ ಪಾದಲ್ಕಿ ಪಡಿ - ²³ ನಾ ಸಿನ್ ಬಿಡ್ಡ ಇಪ್ಡು ಸಸ್ತಾದಿ , ಆದಿ ವಾಸಿಯಾಯಿ ಬದ್ಕೊನೆಅಟ್ಗ ನುವ್ವ ವಚ್ಚಿ ದಾನ್ ಮಿಂದ ಸೈ ಪೆಟ್ಟಾಲ ಅನಿ ಯೇಸುನಿ ಹೆಕ್ವಾಯಿ ಬೇಡ್ಕೊನೆ . ²⁴ ಯೇಸು ವಾಡ್ ಜೊತ್ಲ ಪಾಯೇ , ಮಲಿ ಬಹುಜನಲು ವಾಡ್ನಿ ನೂಕೋನಿ ಎನ್ಕ ಪಾಯ್ರಿ . ²⁵ ಅಪ್ಡು ಪನ್ನೆಂಡು ಯಾಡ್ದಿಲಿಂಚ ರಕ್ತುಮು ಕುಸುಮುಮು ರೋಗ್ಮುವುಂಡಿನ ಓಕ್ ಆಡ್ದಿ ವಚ್ಚೆ . ²⁶ ಆದಿ ಅನೇಕ್ಲು ವೈದ್ಯುಲಿಂಚ ಬಹು ಕಷ್ಟುಮ್ನಿ ಅನುಭವಿಚ್ಚಿ ಸೇತ್ಲ ವುನ್ಡಿoದಾನ್ನಿಅಂತ ಕಲ್ಸ್ಕೊಂಟೇನು ರೋಗ್ಮು ಹೆಕ್ವಾಯ್ತ ವಚ್ಚಿಂದೆ ಹೊರ್ತು ಮಲೇಮಿ ಪ್ರಯೋಜ್ನುಮ್ನಿ ಹೊಂದುಂಡ್ಲೆದು . ²⁷ ಆ ಆಡ್ದಿ ಯೇಸು ಸಮಾಚಾರ್ಮುನಿ ಇನಿ - ^{28 29} ನಾನು ವಾಡ್ ಬಟ್ಳುನಿ ಮುಟ್ತೆ ಸಾಲು , ನೆಟ್ಗಾಯ್ತಾನು ಅನಿ ಆಲೋಚ್ನುಮು ಸೇಸಿ ಗುಂಪ್ಲ ಎನ್ಕಿಂಚ ವಚ್ಚಿ ಯೇಸು ಬಟ್ಳುನಿ ಮುಟ್ಟೆ . ಮುಟ್ಟಿನ್ ತಕ್ಷಣ್ಮೆ ದಾನ್ಕಿ ರಕ್ತುಮು ಹರ್ಸೇದಿ ನಿಲ್ಚ್ಪಾಯಿಂದಾನ್ನಿಂಚ ಆದಿ ನನ್ನೀ ಕಾಡಿನ ರೋಗ್ಮು ಪಾಯಿ ನಾಕಿ ಗುಣ್ಮಾಯೇ ಅನಿ ದಾನ್ ನೋನೆ ತಿಚ್ಕೋನೆ . ³⁰ ಆ ಕ್ಷಣ್ಮೆ ಯೇಸು ನಾಯಿಂಚ ಶಕ್ತಿ ಪಾಯೇ ಅನಿ ವಾಳ್ಳಾ ತಿಲ್ಚ್ಕೋನಿ ಗುಂಪ್ಲ ಎನ್ಕ್ ತಿರ್ಗಿ - ನಾ ಬಟ್ಳುನಿ ಯೋಳು ಮುಟ್ಟ್ರಿ ? ಅನಿ ಅಡ್ಗೇಕಿ ಯೇಸು ಶಿಷ್ಯುಲು ವಾಡ್ಕಿ - ³¹ ಜನಲು ನಿನ್ನಿ ನೂಕೆದ್ನಿ ಕನಿ ಕನಿ ನನ್ನೀ ಯೋಳು ಮುಟ್ರಿ ಅನಿ ಅಡ್ಗ್ತಾವೆ ಅನಿ ಸೊಪ್ರಿ . ³² ಆಯ್ತೆ ಯೇಸು ಈ ಕೆಲ್ಸ್ಮು ಸೇಸಿನ್ದಾನ್ನಿ ಕನಾಲನಿ ಸುತ್ಲು ಸೂಸ್ತ ವುಂಡೋಲಾಯಿ ³³ ಆ ಆಡ್ದಿ ದಾನ್ಕಾಯಿಂದಾನ್ನಿ ತಿಲ್ಸ್ಕೋನಿ ಅಂಜಿ ನಡ್ಗ್ತಾ ವಚ್ಚಿ ಯೇಸುಕಿ ಅಡ್ಮು ಪಡಿ ವುಂಡಿನ ಸಂಗತಿನಿ ಅಂತ ಸೊಪ್ಪೆ . ³⁴ ಯೇಸು ದಾನ್ಕಿ - ಬಿಡ್ಡಾ , ನೀ ನಂಬುಕ್ಮೆ ನಿನ್ನೀ ಸ್ವಸ್ಥ್ಮು ಸೇಸೆ , ಸಮಧಾನ್ಮಿಂಚ ಪೋ , ನಿನ್ನೀ ಕಾಡಿನ ರೋಗ್ಮು ಪಾಯಿ ನೀಕಿ ಗುಣ್ಮಾವ್ನಿ ಅನಿ ಸೊಪ್ಪೆ . ³⁵ ಯೇಸು ಇಂಕ ಮಾಟ್ಲಾಡ್ತಾವುಂಡ್ನಪ್ಡು ಸಭಾಮಂದಿರ್ಮು ಅಧಿಕಾರಿಲು ತೊಟ್ಟೋಳು ವಚ್ಚಿ - ನೀ ಬಿಡ್ದ ಸಚ್ಪಾಯೇ , ಇಂಕೆದ್ಗು ಗುರುಕಿ ತೊಂದ್ರ ಇಚ್ಚೇದಿ ? ಅನ್ರಿ . ³⁶ ವಾಳು ಆಡಿನ ಮಾಟ್ನಿ ಯೇಸು ಲಕ್ಷ್ಯುಮು ಸೇಯ್ಕುನ್ನಾ ಸಭಾಮಂದಿರ್ಮು ಅಧಿಕಾರಿಕಿ - ಅಂಜೋದ್ದು , ನಂಬುಕ್ಮು ಮಾತ್ರುಮು ವುನ್ಡ್ನಿ ಅನಿ ಸೊಪ್ಪೆ . ³⁷ ಮಲಿ ವಾಡು ಪೇತ್ರುಡು , ಯಾಕೋಬುಡು , ಯಾಕೋಬುಡು ತೊಂಬ್ಡಾಯಿನ ಯೋಹಾನುಡು ವೂಳ್ನೆ ಹೊರ್ತು ಬೇರೆ ಯೋಳ್ನು ವಾಳ್ಜೊತ್ಲ ವಚ್ಚೆಕಿಡಿಲೇದು . ³⁸ ವಾಳು ಆ ಸಭಾಮಂದಿರ್ಮು ಅಧಿಕಾರಿಲು ಇಂಟ್ಕಿ ವಚ್ನಪ್ಡು ವಾಡು ಗದ್ದಲ್ಮುನಿ ಕೆಲುವ್ಲು ಹೆಕ್ವಾಯಿ ಏಡ್ಸೆದಾನ್ನಿ ಗೋಳಾಡೆದಾನ್ನಿ ಕನೆ . ³⁹ ಯೇಸು ನೋನ್ಲೇಕಿ ಪಾಯಿ - ಮೀರು ಗದ್ದಲ್ಮು ಸೇಸೇದಿ ಏಡ್ಸೇದಿ ಎಂದ್ಗೂ ? ⁴⁰ ಪಿಲ್ಲ ಸಾಯ್ಲೇದು , ನಿದ್ರ ಸೇಸ್ತ ವುಂಡಾದಿ ಅನೇಕಿ ವಾಳು ಯೇಸುನಿ ಹಾಸ್ಯುಮು ಸೇಸ್ರಿ . ಆಯ್ತೆ ಯೇಸು ಅಂದ್ರುನಿ ಆಕ್ಟರ್ಕಿ ಅಂಪಿಚ್ಚಿ ಆ ಪಿಲ್ಲಿನ ತಲ್ಲಿ ತಂಡ್ರಿನಿ ವಾಳ್ ಜೊತ್ಲ ವುನ್ಡ್ನೋಳ್ನಿ ಪಿಲ್ಲ ವುಂಡಿನ್ ತಾಕಿ ತೋಡ್ಕೋನಿ ಪಾಯಿ ದಾನ್ ಸೈ ಪಟ್ಟಿ - ತಲ್ಲಿಥಾ ಕೂಮ್ ಅನೆ . ⁴¹ ಆ ಮಾಟ್ಕಿ - ಅಮ್ಮಣ್ಣಿ , ಲೈಯಿಅoಟಾನು ಅನರ್ಥುಮು . ⁴² ತಕ್ಷಣ್ಮೆ ಆ ಪಿಲ್ಲ ಲೇಸಿ ನಡ್ಸಾಡೆ , ಆದಿ ಪನ್ನೆಂಡು ಎಂಡ್ಳು ಯಾಡ್ದಿದಿ . ⁴³ ವಾಳು ಬಹಳ್ಮು ಆಶ್ಚರ್ಯುಮಿಂಚ ಬೆರ್ಗಾಯ್ರಿ . ಆಮಿಂದ ಯೇಸು ವಾಳ್ಕಿ - ಇದಿ ಯೋಳ್ಕು ತಿಳಿಗುಡ್ದು ಅನಿ ಬಹು ನಿಜಮೈಯಿ ಸೊಪ್ಪಿ ಆ ಪಿಲ್ಕಿ ಊಟ್ಮು ಸೇಬಿಯಂಡ್ರಿ ಅನೆ .