4 ¹ ಯೇಸು ತಿರ್ಗಿ ಸಮುದ್ರುಮು ದಡುಮ್ಲ ಉಪದೇಶ್ಮು ಸೇಸ್ತವುಂಡೆ . ಬಹು ಜನಲು ಯೇಸು ದೆಗ್ರುಕಿ ವಚ್ಚಿoದಾನ್ನಿಂಚ ಯೇಸು ಸಮುದ್ರುಮುಲ ವುಂಡಿನ ದೋಣಿ ಎಕ್ಕಿ ಕುಚ್ಕೋನೆ , ಆ ಜನಲಂದ್ರು ಸಮುದ್ರುಮು ದೆಗ್ರ ನೆಲ್ಮಿಂದ ವುಂಡ್ರಿ . ² ಅಪ್ಡು ಯೇಸು ವಾಳ್ಕಿ ಸಾಮ್ಯುಮು ರೂಪ್ಮಾಯಿ ಅನೇಕ್ಮು ಸಂಗತಿಲ್ನಿ ಉಪದೇಶ್ಮು ಸೇಸೆ . ಆ ಉಪದೆಶುಮ್ಲ ವಾಳ್ಕಿ ಸೊಪ್ಪಿಂದೆಮಂಟೆ - ^{3 4} ಬಿತ್ತೋಡು ಬಿತ್ತೆದಾನ್ಕಿ ಪಾಯೇ . ಬಿತ್ತೆನಪ್ಡು ಕೊಂಚ್ಮು ಇತ್ಲು ದಾವ ಮಗ್ಗುಲ್ಲಾ ಪಡೆ , ⁵ 5 ಕೊಂಚ್ಮು ಇತ್ಲು ಹೆಕ್ವ ಮನ್ಲೇನಿನ ಬಂಡ ನೆಲ್ಮುಲ ಪಡೆ , ಆನ ಮನ್ನು ತೆಲ್ಗವುನ್ಡಿನ್ದಾನ್ನಿಂಚ ಅವಿ ಜಲ್ದಿ ಮೊಳ್ಸೆ , ಆಯ್ತೆ ಎಂಡ್ ವಚ್ನಪ್ಡು ಬಾಡಿ ಬೇರ್ಲೇನಿನ ಕಾರ್ಣುಮಿಂಚ ಎನ್ಡ್ಪಾಯೇ . ⁶ ಮಲಿ ಕೊಂಚ್ಮು ಇತ್ಲು ಮುಂಡ್ಲು ಶೆಟ್ಲುಲ ಪಡೆ , ⁷ ಶೆಟ್ಳು ಪೆರ್ಗಿ ಅವ್ಟ್ಲುನಿ ಅಡ್ಗಿಚ್ಚಿಡ್ಸೆ . ⁸ ಇಂಕ ಕೊಂಚ್ಮು ಮಂಚಿ ನೆಲ್ಮುಲ ಪಡಿ ಒಕ್ಟಿ ನೂರಂತ , ಒಕ್ಟಿ ಅರವತಂತ , ಒಕ್ಟಿ ಮೊಪೈಅಂತ ಪಲ್ಮುನಿ ಇಚ್ಚೆ . ⁹ ಶವ್ಲುವುಂಡೋಡು ಇನ್ನಿ ಅನೆ . ¹⁰ ವಾಡು ಒಕ್ಡೆ ವುನ್ನಪ್ಡು ವಾಡ್ ದೆಗ್ರ ವುಂಡ್ನೋಳು ಪನ್ನೆಂಡು ಮಂದಿ ಶಿಷ್ಯುಲು ಜೊತ್ಲ ಆ ಸಾಮ್ಯುಲ ವಿಷಯುಮ್ಲ ವಾಡ್ನಿ ಅಡುಗ್ರಿ . ¹¹ ವಾಡು ವಾಳ್ಕಿ - ದೇವುಡು ರಾಜ್ಯುಮಿನ ಗುಟ್ಟು ಮೀಕಿ ಇಚ್ಚಿಂದಿ , ಆಕ್ಟರೋಳ್ಕಿ ಅಂತಾನು ಸಾಮ್ಯುಮಿನ ಮರೇಲವುಂಡಾವಿ . ¹² ವಾಳು ಕನ್ಲುಂಡಿ ಸೂಸ್ತೆನು ಕನ್ಗುಡ್ದು , ಶವ್ಲುಂಡಿ ಇಂಟೇನು ತಿಚ್ಕೊಗುಡ್ದು . ಅಟ್ಟೆ ಕನಿ ತಿಲ್ಚ್ಕೊಂಟೆ ವಾಳು ದೇವುಡು ತೊಟ್ಗಿ ತಿರಿಕೋನಿ ಪಾಪ್ಮು ಕ್ಷಮೇನಿ ಹೊಂದೋಳು ಅನೆ ಮೂಸಿಪೆಟ್ಟಿoದಿ . ¹³ ಆಮಿಂದ ಯೇಸು ವಾಳ್ಕಿ ಸೊಪ್ಪಿಂದೆಮಂಟೆ - ಈ ಸಾಮ್ಯುಮು ಅರ್ಥ್ಮು ಮೀಕಿ ಗೊತ್ತಾವ್ಲೇದೋ ? ಅಟ್ಟಾಯ್ತೆ ನಾ ಅಂತ ಸಾಮ್ಯುಮುಲ್ನಿ ಎಟ್ಟ ತಿಲ್ಚ್ಕೊಂಟ್ರೀ? ಆ ಬಿತ್ತೋಡು ವಾಕ್ಯುಮನೆ ಇತ್ನಿ ಬಿತ್ತುತಾಡು . ^{14 15} ಕೆಲುವ್ಲು ವಾಕ್ಯುಮ್ನಿ ಇನಿನ ತಕ್ಷಣ್ಮೆ ಸೈತಾನುಡು ವಚ್ಚಿ ವಾಳ್ಳಾ ಬಿತ್ತಿನ ವಾಕ್ಯುಮ್ನಿ ಸೀಸಿಇಡ್ಸ್ತಾಡು . ವೂಳೇ ವಾಕ್ಯುಮು ಬಿತ್ತಿನ ದಾವ್ ಮಗ್ಗುಲ್ಲಾಯಿನಾರು . ^{16 17} ಅದೇ ಪ್ರಕಾರ್ಮು ಕೆಲುವ್ಲು ವಾಕ್ಯುಮ್ನಿ ಇನಿನ ತಕ್ಷಣ್ಮೆ ಸಂತೋಷ್ಮಿಂಚ ದಾನ್ನಿ ಸ್ವಿಕರಿಸ್ತಾರು , ವಾಳ್ಕಿ ಬೇರ್ಲೇನಿನ ಕಾರ್ಣ್ಮಿಂಚ ವೂಳು ಕೊಂಚ್ಮು ಕಾಲ್ಮು ಮಾತ್ರುಮೆ ವುಂಡಿ ಆಮಿಂಕ ಆ ವಾಕ್ಯುಮಿನ ನಿಮಿತ್ಮಾಯಿ ಸಂಕಟ್ಮಾವ್ನಿ ಹಿoಸ್ಮಾವ್ನಿ ವಸ್ತೆ ಜಲ್ದಿ ಎಡ್ಗಿ ಪಡ್ತಾರು , ವೂಳೇ ಇತ್ತ ಪಡಿನ ಬಂಡ ನೆಲ್ಮಾಯಿನಾರು . ^{18 19} ಇಂಕ ಕೆಲುವ್ಲು ವಾಕ್ಯುಮ್ನಿ ಇನುನ್ಟೇನು ಪ್ರಪಂಚ್ಮು ಚಿಂತೆಲು ಐಶ್ವರ್ಯುಮಿಂಚ ಆಯೆ ಮೋಸ್ಮು ಇಂಕ ಕೆಲ್ವು ವಿಷಯಲು ಪೈನಿನ ಆಶೆಲು ನೋನ್ಕಿ ಸೇರಿ ಆ ವಾಕ್ಯುಮ್ನಿ ಅಡ್ಗಿಚ್ಚಿ ಇಡ್ಸೆದಾನ್ನಿಂಚ ಪಲ್ಮುನಿ ಇಯ್ಕುಣ್ಣಾ ವುಂಟಾರು , ವೂಳೇ ಮುಲ್ಲುಶೆಟ್ಲುಲ ಇತ್ತ ಪಡಿನ ನೆಲ್ಮಾಯಿನಾರು . ²⁰ ಮಲ್ಲಿ ಕೆಲುವ್ಲು ವಾಕ್ಯುಮ್ನಿ ಇನಿ ನಡ್ಸ್ಕೋನಿ ಮುಪೈಅಂತಾವ್ನಿ ಅರವೈಅಂತಾವ್ನಿ ನೂರಂತಾವ್ನಿ ಪಲ್ಮುನಿ ಇಸ್ತಾರು ವೂಳೇ ಇತ್ತ ಪಡಿನ ಮಂಚಿ ನೆಲ್ಮಾಯಿನಾರು ಅನೆ . ²¹ ಇದ್ಕಾಕುನ್ನ ಯೇಸು ವಾಳ್ಕಿ - ದೀಪುಮ್ನಿ ಎತ್ಕೊಚ್ಚಿ ಕೊಳ್ಗುಮ್ಲ ಆವ್ನಿ ಮಂಚ್ಮು ದುಗುನಾವ್ನಿ ಪೆಡ್ತಾರಾ ? ದೀಪ್ಮು ಸ್ಥಂಭುಮಿಂದ ಪೆಡ್ತಾರೆ ? ²² ಯಾವ್ದಾವ್ನಿ ಪ್ರಕಾಶಂಕಿ ರಾವಲ್ನೆ ಹೊರ್ತು ರಹಸ್ಯುಮು ಆಯುಂಡೆಟ್ಲೆ , ಯಾವ್ದಾವ್ನಿ ಬೈಲಿಕಿ ರಾವಾಲ್ನೆ ಹೊರ್ತು ಗುಟ್ಟಾಯುಂಡೆಟ್ಲೆದು . ²³ ಇನೆದಾನ್ಕಿ ಶೆವ್ವುನ್ಡೋಡು ಇನ್ನಿ ಅನಿ ಸೊಪ್ಪೆ . ²⁴ ಮಲಿ ವಾಡು ವಾಳ್ಕಿ - ಮೀರು ಶೆವ್ವಿಚ್ಚೆ ವಿಷಯುಮ್ಲ ಎಚ್ರುಕ್ಮು . ಮೀರು ಅಳ್ಸೆ ಅಳ್ತೆ ಇಂಚಾನೆ ಮೀಕು ಅಳ್ಸ್ತಾರು , ಇಂಕ ಕೂಡಿಚ್ಚಿ ಇಸ್ತಾರು . ²⁵ ವುಂಡೋಡ್ಕಿ ಇಸ್ತಾದಿ , ಲೇನೋಡ್ ತೊಟ್ಟಿಂಚ ವುಂಡೆದಿ ಸೀಸ್ತಾದಿ ಅನಿ ಸೊಪ್ಪೆ . ^{26 27} ಇಂಕ ವಾಡು ವಾಳ್ಕಿ ಸೊಪ್ಪಿಂದಿ - ಒಕ್ಡು ಭೂಮಿಲ ಇತ್ನಿ ಏಸಿ ರಾತ್ರಿ ಪೊಂಗೊಂಟ ಪೊದ್ನ ಲೇಸ್ತ ವುಂಡೆಕಿ ವಾಡ್ಕಿ ತಿಲಿಲೇನಿನ ರೀತಿಲ ಆ ಇತ್ತ ಪುಟ್ಟಿ ಪೆರ್ಗ್ತಾದಿ . ದೀನ್ಲಾಕ್ನೆ ದೇವುಡು ರಾಜ್ಯುಮು . ²⁸ ಭೂಮಿ ಮೊದ್ಲು ಗರ್ಲುನಿ , ಆಮಿಂದ ಹೊಡೆನಿ , ಆಮಿಂದ ತೆನೇಲ ಹೆಕ್ವ ಗಿಂದ್ಲುನಿ ಅದಟ್ಗೆ ಅದೇ ಪುಟ್ತಾದಿ . ²⁹ ಆಯ್ತೆ ಪಲ್ಮು ಮಾಗಿನ್ಮಿಂದ ವಾಡು ಸುಗ್ಗಿ ಕಾಲ್ಮು ವಚ್ಚೆ ಅನಿ ಕೋಬಿಸ್ತಾಡು ಅನೆ . ³⁰ ಇಂಕ ವಾಡು ಸೊಪ್ಪಿಂದಿ - ದೇವುಡು ರಾಜ್ಯುಮ್ನಿ ಯಾವ್ದಾನ್ಕಿ ಹೋಲ್ಬಿತ್ತಾಮು ? ಯಾವ್ ಸಾಮ್ಯುಮಿಂಚ ದಾನ್ನಿ ಸೂಪಿತ್ತಾಮು ? ಆದಿ ಸಾಸ್ವು ಗಿಂಜುಲ್ಲಾಕ ವುಂಟಾದಿ . ³¹ ಭೂಮಿಲ ಬಿತ್ತೆನಪ್ಡು ಆದಿ ಭೂಮಿಲವುಂಡೆ ಅನ್ನಿ ಇತ್ಲುಕಿಂತಾನು ಸನ್ದಾಯಿಂದಿ . ³² ಬಿತ್ತಿನ್ಮಿಂದ ಆದಿ ಪೆರ್ಗಿ ಅನ್ನಿ ಕಾಯಿಪಲ್ಯುಮಿನ ಶೆಟ್ಳುಕಿಂತ ಪೆದ್ದುದಾಯಿ ಪೆದ್ದ ಪೆದ್ದ ಕೊಂಬೇಲ್ನಿ ಇಡ್ಸೆದಾನ್ನಿಂಚ ಆಕಾಶುಮ್ಲ ಪಾರಾಡೆ ಪಕ್ಷಿಲು ದಾನ್ ನೀಡ್ಲಾ ವಾಸ್ಮುಸೆಸೆದಾನ್ಕಿಆಯ್ತಾದಿ ಅನೆ . ³³ ಯೇಸು ಇಟ್ಟೆ ಅನೇಕ್ಮು ಸಾಮ್ಯುಲಿಂಚ ಜನಲು ಗ್ರಹಿಕೆಕಿ ತಕ್ಮಾಯಿ ದೇವುಡು ವಾಕ್ಯುಮ್ನಿ ಸೊಪ್ತವುಂಡೆ . ³⁴ ಸಾಮ್ಯುಮುಲೇಕುನ್ನಾ ವಾಳ್ಕಿ ಸೊಪ್ಲೇದು . ಆಯ್ತೆ ಪ್ರತ್ಯೆಕ್ಮಾಯಿ ಯೇಸು ವಾಳ್ ಆಪ್ತ ಶಿಷ್ಯುಲ್ಕಿ ಅಂತಾನು ಇಪ್ಪಿ ಸೊಪ್ಪೇ . ^{35 36} ಆ ಪೊದ್ದು ಮಾಟಾಲಾಯಿನಪ್ಡು ಯೇಸು ವಾಳ್ಕಿ - ಅಕ್ಡ ದಡುಮ್ಕಿ ಪದಾಮು ಅನಿ ಸೊಪ್ಪೆ ವಾಳು ಆ ಜನಲು ಗುಂಪ್ನಿ ಇಡ್ಸಿ ಯೇಸುನಿ ಅದೇ ದೋಣಿಲ ಅಟ್ಟೆ ತೊಡ್ಕೋನಿ ಪಾಯ್ರಿ . ³⁷ ದೋಣಿಲು ಯೇಸು ಜೊತ್ಲ ವುಂಡೆ . ಆಮಿಂದ ಪೆದ್ದ ಬಿರ್ಗಾಲಿ ಲೇಸಿ ತೆರೆಲು ಆ ದೋಣಿಕಿ ಕೊಟ್ಟಿ ನೋನ್ಕಿ ನುಗ್ಗಿಂದಾನಿಂಚ ಆ ದೋಣಿ ಅಪ್ಡೇ ನಿoಡೆದಾನ್ಕಿ ವಚ್ಚುಂಡೆ . ^{38 39} ಯೇಸು ಎನ್ಕ ತಲ್ಕೈ ದಿಂಬ್ನಿ ಒರ್ಗಿ ನಿದ್ರ ಸೇಸ್ತವುಂಡೆ. ವಾಳು ಯೇಸುನಿ ಲೇಪಿ - ಗುರುವಾ , ಮಾಮು ಮುಳ್ಗಿಪಾಯೇದಾಂಟ್ಲ ನೀಕಿ ಚಿಂತಲೇದಾ ಅನಿ ಅಡ್ಗೇಕಿ ಯೇಸು ಲೇಸಿ ಗಾಲಿನಿ ಗದ್ರಿಚ್ಚಿ ಸಮುದ್ರುಮ್ಕಿ - ಊರ್ಕುಂಡು , ಮೊರೆಯೊದ್ದು ಅನಿ ಅಪ್ಪಣ್ಮು ಇಚ್ಚೆ . ⁴⁰ ಇಚ್ನಟ್ಗೆ ಗಾಲಿ ನಿಲ್ಚ್ಪಾಯಿ ಅಂತ ಶಾಂತ್ಮಾಯೇ . ಆಮಿಂದ ಯೇಸು ವಾಳ್ನಿ ಎಂದ್ಗೂ ದೈರ್ಯುಮುಶೆಡ್ತಾರು ? ಇಂಕ ಮೀಕಿ ನಂಬುಕ್ಮುಲೇದಾ ಅನಿ ಅಡ್ಗೇಕಿ ವಾಳು ಬಯ್ಮು ಪಡಿ - ವೂಡು ಯೋಳುನ್ಡೊಚ್ಚು ? ⁴¹ ಸಮುದ್ರುಮುನು ಸಹ್ಮು ವೂಡ್ ಸೊಪ್ಪಿನಟ್ಗ ಇಂಟಾವೆ ಅನಿ ವಾಳ್ ವಾಳ್ನೋನ ಮಾಟ್ಲಾಡ್ಕೊನ್ರಿ .