¹ . Oko nsio biko, esuku le bato wuké, bakasangintiaka lonkina, bakambaka nkia yemba le ndeke leke; ² .Yesu ábesia bayekoli bá ndé étepela ndè: ndjoka isei wuké la esuku enè, bayala nsio bisatu mpika la mi, bakamba nkia yemba le ndeke leke. ³ . Lá nsoayisena la ndjala oko ndja bii bô, bango kondo oko mboka, ibango bankina bayima botale (belè). ⁴ . Bayekoli bá ndé, baokalola bwè. Okoka nyotia bô la mampa binè oko bosobé nghamoni? ⁵ . Yesu ayiwola bô: Bodia mampa kwe? baoyisena bwè: bisambialé. ⁶ . Nkaku bayalia esuku eku ansé oko mbotu, aposo mampa bisambiale, atondo Wangi, la mbisa abeke mampa pe apà bayekoli bá ndé ba kapela esuku eko. ⁷ . Bayalaké lonkina la wano ndambu le nsi, pe Yesu, ntondo le nkapela bô atondo lonkina Wangi, ayitia nkapéa. ⁸ . Baleke pe banyotaka, mbisa eka ilè, batongholoké bisaka bisambiale bâa la biteni bi mampa bikotikalaka. ⁹ . Esuku eko ediki la bato mpika-mpika 4000, mbisa eku Yesu ayisena ndja. ¹⁰ . Pe akondela oko wato ndia bayekoli bà ndé, itina li nsaka-saka oko etuka le Dalmanutha. ¹¹ . Bafalisayi bayake nkela biango bô la Yesu nko ibango baotumola, la ndiwola ndé edimbetelo enè eyima oko diko. ¹² . Yesu, ayoka iseyi oko bolimo bô ndé: Itina iyalo linè bakana nko bidimbetelo lá bée? me tepela nta sôo, iyalo linè, ntingo yenè bidimbetelo. ¹³ . Nkaku ayima oko bô akondela lonkina oko wato, asa oko mbisé-loko. ¹⁴ . Bayekoli bawaka diopa la mposo mampa, badiki nko la mampa emo oko wato. ¹⁵ . Yesu ayepolaké bayekoli bá ndé: boyale la nkepo là banè baka bafalisai la baka Herode batikaka belô oko mampa bii bô. ¹⁶ atepela: Elé itina ntembia mampa. ¹⁷ . Ngengo eki Yesu ayebaké botindo boatangéa ba bô, atepela: bokatungia nyò la nyò itna bosowa mampa diopa? bole nko la nkamba boyeli, ntabo sosola yè? ¹⁸ . Bodia bobonda wembu? Nokia béeso, ntoyene ye? Bodia batoyi ntoboyoka ye? ntombia bosoko? ¹⁹ . Ngengo enki mi mbekeke mampa bitano itina dika bato nkoto bitano, botongholoko bisaka kwè bii biteni bi mampa? diomu la bi pée baokalomwa. ²⁰ . La pe ngengo enki mi mbekeke mampa bisambiale, la ndeyisia bato nkoto binei, bisaka bi biteni kwè, bi ki nyo botongholoko? bisambiale baokalua. ²¹ . Ngaku atepela nde: nta sô bakamba nsosola? ²² . Alekaka oko Bethesaide: ba beleaka Yesu boto omo béeso basakowa, ngaku babotéa Yesu aowuta. ²³ . Awutaké bokonu oko lobô aobela oko bosale bo ndja: Aotika nsoi oko bèeso, aonangia ba bô, pe aoyiwola là ayene nkia yemba emo. ²⁴ . Alenda atepela, nyene bato ngaku, mayene nkonga bété bekende. ²⁵ . Yesu aonangia lonkina babo oko beso, ngengo esa bokonu asisimia, ayene ndè abika, ayene nta polélé. ²⁶ . Ngaku Yesu aoyisena oko lowu lô ndé la ntepela nde: Ntayotuaka oko eteyi le ndja. ²⁷ . Yesu ndia bayekoli bá ndé baleka oko ndja bii nio nio, bi Sezaré le Filipo, pe aoyiwolaké oko mboka, bato batepela bé itina dimi? ²⁸ . Baokalua: Yowane boyini, bankina bakobesia Eliya, là omo loka basakoli. ²⁹ . Yesu ayiwola ndè: ngaku nyo botepela wè ndé nani? Petelo aokalola nde: olé Mesi? ³⁰ . Yesu atepela nta wembu nde nta botepelaka mbo biku nkia la boto ye. ³¹ . Ngaku Yesu abanga ndjebia bô, esako komama la wana oka boto ango nyokuama, bango boya, la bankumu ba bateyi baka Wangi itina di ndiaka nde awé, la mbisa le nsio bisato akundwa. ³² . Atepelake mbo binkuma nta polélé, aku Petelo, aposo Yesu, aobéa oko bonki la nkasola ndé. ³³ . Yesu ayitia oko ndié eku; Ayene bayekoli bakasola Petelo; atepela ndé ntoyaké mpika la mi, Satan! Itina ntotangeli mbo bika Wangi ye, odia nko batangeli baka bato. ³⁴ . La mbisa Yesu abesia esuku le bato la bayekoli bá ndé: atepela nde là boto alanga mbenga mi, akaboya nde nkika, abela ingengwa (ekulusu) dii ndé la mbisa ambenga. ³⁵ . Ngaku, onè ongolanga mbikia bolimo bóo ndé, ango'ewungia, ngaku onè wungia bolimo bóo ndé itina di mi, la pe nsango le dilo, ango ke bikia. ³⁶ . Engondi bé leka boto lá asobá bolongo bonkuma pe awungia bolimo bô ndé? ³⁷ . Yemba be leka boto nsobitia la mbikia bolimo bô ndé? ³⁸ . Boto onkuma ongoyoka diemo itina dimi, pe itina dika bateyo báami, oko ngengo ènè ekela nyo pité la basumu, wana oka boto pe angoyoka diemo ngengo enga nde aye la lómu loka isé dii ndé, la b'andjelu ba tèe.