¹ Yesu ho nadaha hara Yeriko. ² Obwon fa lobo latwani da onya nafure hongete Sakeyo. Ora fa alohitwahaji ho laheduduhak ho mochoro cebu osam. ³ Owak fa ngete tialan ngai Yesu, nyuo hati obu otum otel tohiji ho lohoi ho lati, tonanyuo osuk fa ngete. ⁴ Ngete ho nahinam nihatemeni ho lati ho nadwahan nihide ho kiani ojo ongida atelu ngete, tonanyuo lojieriso fa Yesu hara nihene hoi. ⁵ Lo fa nalotu Yesu nihene maji, ho natiala nihide ho natianya niho ngete, ''Sakeyo, kwo nifok kerem, noho baya awak ne itwongo ne nihaji hoji.'' ⁶ Tinya ngete ho na hitohorino lotiniso nifok ho nahifwotiniso ngete to nakwama. ⁷ Lo fa nateli lati anya, sing fad honahingugwa, ojo, ''Olo ngete nihaji ho twani la hepalani.'' ⁸ Sakeyo ho nabotia ho najiman niho Lohobu, ''Totiale, Lohobu, nareji ho ne hinihe, isiarahi ne niho lahaparitak, ce bu nahohol ne lobo latwani tebwo nasinge , adum ba ne ngete nenyahita ongon niho narobia hongete. '' ⁹ Yesu ho najiman niho ngete, ''Baya alotu nahitalahino nihaji hoji, tonanyuo ngete cebu Iha Abramo. ¹⁰ Olotu Iha Najyok itahito cebu nihitalahiniso lati hula olitari.'' ¹² Ngete ho najiman t, ''Obwon fa lobo latwani la ongida niho nahang na olama niho nahifwotinere nakwan ho ngete cebu nayitinere. ¹³ Ngete ho nangeleniso lahegiamak ho ngete tomon, ho nahisiarahiso sing narobia tomon huja olwaji, ho najiman nihosing, 'Itiyisu many ayitu ne.' ¹⁴ Nyuo hati lati ho ngete idayari ngete ho nahirasulariso lahatianyak te nehalu ho ngete, ojo, 'Obu jie ohiwak ale twani ora alohitwahaji hojie.' ¹⁵ Alotu fa bwanan laholong nayitu ngete hari, nihifwotiniso na hang, ngete ho nahisiarahiso lahegiamak hulo fa isiarahi ngete narobia ongida ongeleni niho ngete, nihorihinere nohosi ho robia huja itiyisini sing. ¹⁶ Olotu lobo nihatemeni ho ngete, ho najiman, 'Lohobu, narobiati hoji ayisu narobia tomon.' ¹⁷ Ele twani ongida ho najiman niho ngete, 'Egem ji na ongida, lahegiamani la ongida. Tonanyuo inef ji nareji hula omutari, ira ba ji alohitwahaji ho hangite tomon.' ¹⁸ Loho harik ho na lotiniso, ojo, 'Narobia hoji, Lohobu, ayisu hinihe miyet.' ¹⁹ Ele twani ongida ho najiman nihongete, 'Inefite na hangite miyet.' ²⁰ Lobo ho nalotiniso, ojo, 'Lohobu, hunya narobia hoji, hunya edimahi ne ojo nibongo, ²¹ abayang ne iji, tonanyuo iji latwani la igol. Eyaru ji nareji huja obwo ji inuhahi, cebu idengu huja obu ji iyahi.' ²² Ele twani ongida ho na jiman niho ngete, 'To netenyita hoji angotohi ne niho iji, iji legiamani la imomwala.Ijien ji ojo ne latwani la aroho, eyarita huja abu ne hehwani nifok, ce bu denginita huja obu ne ayihi. ²³ Nyuo hati nanyoji obu ihwanahi narobia ho ne nilotunahinere, ongida nayitu ne, otum ne eduhu ho nohosi ?' ²⁴ Lahaboloroni ho najiman nihosing ojo to botiati inyi, 'Ho nahiyaru narobia nihongete, ho nahisiarahiso niho ngete la obwon ho narobia tomon huja olwaji.' ²⁵ Sing ho najiman niho ngete. 'Lohobu, abwonitere ngete narobia tomon.' ²⁶ 'Ajo ne nihote, lati fad hula obwoniterete, isieri ba nihosing huja olwaji, nyuo hati niho hula obu obwoniterete, dobu la obwonitere iyare ba niger. ²⁷ Nyuo hati hule merok hone, hula obu owahi ne henef sing, iyene sing inyini, ifadaye sing nihatemeni ho ne.''' ²⁸ Lo fa natianye ngete hunya reji, ngete ho naloten nihatemeni, odaha many Yerusalem. ²⁹ Laholong nanyiha ngete Betphage cebu Betany, niho ibwo nadenge na ongelese ojo Olivet, ngete ho nasulahiso lolohejehi harik, ³⁰ ojo, ''Ifwasi niho angati hang. Nomo neruhisite, ihorihisi bate nahito ho konikoni na hobe odahariti. Tolahusu ngete ho nahiyeno ngete niho ne. ³¹ Nefiasu lobo latwani ite ojo, ' Nanyuo te ilahati ngete?' Tojimata, ' Lohobu lowak ngete.''' ³² Ehule osulahini ho nafwoten ihorihiso nahito ho konikoni toho iramahinere Yesu sing. ³³ Lo fa nalahi sing , monyie ho najiman niho sing, '' Nanyuo te ilahati nahito ho konikoni?'' ³⁴ Sing ho na jiman, ''Lohobu lowak ngete.'' ³⁵ Sing ho nahiyeno ngete niho Yesu, cebu ihipirerehini nabongoji hosing niho nahito ho konikoni ho nahitotwongoso Yesu nitodo hongete. ³⁶ Lo fa nadahe, sing ho nafiatahiso nabongoji ho sing nihoi. ³⁷ Lo fa nanyiha ngete nimaji na ichiritere nadenge ho Olives nifok, lolohejehi ho nahichak nakwama ce bu nahitokwata Najyok to na murut na okwat to nahigemita fad huja oteli sing, ³⁸ ojimi, ''Ikie najwaha obwon niho Lohobu la olotu ta nafure ho Lohobu! Ikie nayomo obwon nihide cebu nakwatan nihide!'' ³⁹ Hilihe laharisak to hiji ho lati ho najiman niho ngete, ''Lahetejianani, irianga loloheyehi hoji.'' ⁴⁰ Yesu ho nahitarang ojo, ''Ahiramahi ne ite, hara ininge hula, ata namori aye niger.'' ⁴¹ Lo fa nalotu Yesu nyihaji nihang, ngete ho nayoo niho ngete ⁴² ojo, ''Nejienatate niho anya holong, dobu ite, nareji huja iyene nihoji nayomo! Nyuo hati tahanya edimari to honyehite hote. ⁴³ Ofwoni hadi noholongi nihote, lomo nefahi lamerok itulur nadafati niger hote, cebu ho nahitufud ite to masik fad. ⁴⁴ Ohiduhahini hadi sing ite nifok cebu lemusak hote. Obu hadi sing idahini ibwo namorwo iswodoho nitodo hebwo, tonanyuo obu te iruhoto no fa nawak Najyok italahiniso ite.'' ⁴⁵ Yesu hona hiruhiso nakelesia ho nahichak irohito lati hula itenyanga, ⁴⁶ ojo niho sing, ''Igierehini,ojo 'Nahaji ho ne ora ba ahaji ho lomojore,' nyuo hati etarahatate alohidimitere ho lahahohwalak.'' ⁴⁷ Itejianatito Yesu tihitik nikelesia .Lolohitwaha ho padiri cebu ho lahegierok ce bu lolohitwaha ho lati owahi ifadariso ngete, ⁴⁸ nyuo hati obu ohorihini nehoi na otum sing ifadajierete ngete, tonanyuo lati fad itiyire niho ngete ngiritiny.