¹ Niho noholong ibwo,no fa nefure lalohoi ho lati nalif harabito , ihihire fa sing bebe nikwanite hosing, ngete ho nahichak itianya niho lolohejehi hongete ojo nilchifot , ''Tojianata nabula ho laharisak, ngete nahitunia. ² Nyuo hati obe ibeo nasinge idimahini, na obu ba itelini, ce bu obe ibwo sing nedimahini, na obu ba ojieni. ³ Nasinge na itianya iji nidimele, itiyirini ba nifangan, ce bu nasinge na itianya ji nihijok nihotwa ho hayik igogworori hadi to nahaiyi. ⁴ Ajo ne nihote morit hone, hebayangata lati hula ifadarite nakwan, nyuo hati obe obwoni ho nagolon na nihihwanari ibwo nahigiama. ⁵ Nyuo hati ahireng ne ite ojo nagai te hebayangata. Tobayangata latwani la lomo lafadaya ngete, obwonitere ho nagolon nihipirehinere iji Iferno. Ee, ajo ne nihote, tobayangata ngete. ⁶ Obe itenyangari nakeny miyet to narobia huja omutari harik? Nyuo hati obe oluluhuni lobo abito nihosing nihatemeni ho Najyok. ⁷ Nyuo hati dobu nafofi ho nihou hoji ikienine fad. Hebayang. Ingidaratate ilanyata nakeny huja olwaji. ⁸ Ajo ne nihote, latwani la itokwata ne nihiji ho lati,itokwata hafi cebu iha Najyok ngete nihatemeni ho anjeloji ho Najyok, ⁹ nyuo hati latwan la ohimon ne nihatemeni ho lati, omoni hadi cebu ngete nihatemeni ho anjiloji ho Najyok . ¹⁰ Latwani la otianya nahiramita huja orohoji to iha Najyok, ibalahini hadi ngete, nyuo hati ngete la omoro Nolohailong Na-Onyila, obu ibalahini. ¹¹ Nomo nahiyene ite nihatemeni ho kelesia, nihatemeni ho lohitwaha, hehuyasete ojo tatali ba te itianyati nihitarangari hote,kuya nanyuo ba te itianyati, ¹² ohitejien ba ite Nolohailong Na-Onyila to natianya." ¹³ Lobo latwani to hiji ho lati ho najiman niho ngete, ''Lahetejianani, iramahi hilasi ho ne ohihwarahi ne nareji ho lolunyot.'' ¹⁴ Yesu ho najiman niho ngete, ''Ale twani, ngai lohihwanahi ne ahangotoni kuya ajayo niho te?'' ¹⁵ Ngete ho najiman niho sing, ''Tojianata ojo itunatate nakwanite hote to nawahan ho hihawura, tonanyuo nahisu ho twani obu obwonitere nareji hongete.'' ¹⁶ Tinya Yesu ho nahiramahiso sing nodoho, ojo, ''Namana ho lahasamani ongi bebe, ¹⁷ ngete ho nahigigilo nikwan hongete, ojo, 'Nanyuo ba ne ehon, abu ne abwonitere ho namaji na atunahinere ne nangamang ho ne? ¹⁸ Ngete ho najiman, 'Ngete anya nasinge na alo ne ihon. Abwonyuo ba ne neragaji ho ne nifok ho nahifak nangejuho huja obolori, ongida atunahi ngamang ho ne fad ce bu nareji hinihe. ¹⁹ Ajo ba ne niho nolohailong ho ne, ''Nolohailong, ibwon ji ho nareji huja olwaji huja otunahini nengaji huja olwaji. towire na ongida, tonyase, tomate, tobwana ho na kwama.'' ²⁰ Nyuo hati Najyok ho najiman niho ngete, 'Lahadatajieni ho twani, nihanya harie owahi nolohailong nihoji, nareji huja ihuhumahi ji, orahi ba sing noho ngai? ²¹ Okialare naja ho latwani la otunahi nareji ho ngete obe osam niho Najyok.'' ²² Yesu ho najiman niho lolohejehi ho ngete, ''Inaha, ajo ne nihote, hesawudoto to nahisu hote- nanyuo ba te inyesete, kuya to nakwanite hote- nanyuo ijafah ba te ijefitete. ²³ Ilany nahisu nangirang, ce bu nakwan ilany nabongoji. ²⁴ Totialata nakeny, huja obu oreme kuya odenge. obu obwoniterete nahaji ho ngamang ho naraga kuya neraga, nyuo hati Najyok ita nyasu sing. Baya nangidari ho hote ilany nakeny! ²⁵ Ce bu ngai nihote hatum ofwunahi noholongi ho hisu hongete? ²⁶ Nabuji itum ihon ile singe omuta nahomuta, nanyuo hatite ihuyasete to nareji hinihe? ²⁷ Totialata naturuhak tatali sing obolori. Obu sing igiame, kuya ilorite sing. Nyuo hati ajo ne nihote, dobu Solamone nikwatan hongete fad obu ijiefito nabongoji to ho hunya. ²⁸ Netejif Najyok namiyang ho nimana, huja obwoni baya, ce bu hubanyi ipirehini nikiali, baya ba ngete ohitejef ite, ite hule omutari nehiruk! ²⁹ Hetahitete ojo nanyuo ba te inyasete ce bu nanyuo ba te imatati, ce bu hehuyasete. ³⁰ Nahangite fad noho nifok otahita hunya reji, ce bu Monye hote ojien ojo iwahatate hunya reji. ³¹ Nyuo hati, totahitetesoni nahang ho Najyok, ofunahini hadi hunya reji nihote. ³² Hebayangata, napore na omuta, tonanyuo okwama Monye hote okwama nahisiarahinere nihote nahaji. ³³ Itenyangeye nareji hoji isiarahi niho lahaparitak. Ihuhumusu nolokoboli ho robia hote huja obu otuhohine- to tunahise nihide na obu otuhohino niger, na obu otuhohino,namaji na obe lahohwalani onyihahi, ce bu nafire otum ipalaya. ³⁴ Namaji na itunahinere ji obwon, nataji hoji cebu. ³⁵ Ikie nabongo hoji na ohadu otodohino nihotwa to namuhunyoti, ce bu ikie nahimaji hote itirenge wulori, ³⁶ ce bu tokialariti to ho lati hula otahite lolohitwahaji hosing nomo nayitu ngete to loyamari, ojo nomo nalotu ngete ho nahifiding, otum sing onge nekat niho ngete. ³⁷ Ikie najwaha obwon niho ehule lahegiamak, hula ohorihi Lohobu otiale nomo nalotu ngete. Ahiramahi ne ite natarihe ojo otodohi ba ngete nohofito ho ngete na ohadu to namuhunyoti, isiarahi sing itwonge nifok ningirang, ngete ho nalotiniso ho nahisiarahiso nihosing. ³⁸ Nomo nalotu lolhitwahaji nitialari nohoharik noho naharie, kuya dobu niho natiala noho hutik, ohorihi sing ihuhumahine, ikie najwaha obwon niho ehule higiamak. ³⁹ Tojianata anya, ojo nomo najien monye hohaji noholong na olotinere lahahoholiseni olotiniso, habu ngete edahi nahaji ho ngete okeli. ⁴⁰ Ihuhumahinete cebu, tonanyuo obu te ijianata nasa na olotinere Iha Latwani.'' ⁴¹ Petur ho najiman, ''Lohobu, iramahiso ji anya tianya nihojie hama, kuya cebu niho lati fad? ⁴² Lohobu ho najiman, ''Ngai hati lora aheruhoni ce bu legiamani la ilefero la otum lohobu hongete ihwanahi ahouti niho lahegiamak hilihe nihisiarahitari sing nangirang niholongi huja otirahini? ⁴³ Ikie najwaha obwon niho ele hegiamani, la ohorihi lohobu ho ngete igiama nomo nalotu ngete. ⁴⁴ Ahiramahi ne ite natarihe ojo isiarahi hadi ngete ele twani otiala nareji hongete fad. ⁴⁵ Nyuo hati natianya ele higiamani nitaji ho ngete ojo, ' Abu Lohobu ho ne oyitu kerem, 'ngete ho nahichak ibeho lahegiamak hula orahi alwawa cebu huja orahi angorwo, ho nanyasu cebu ho namata, ho naruma, ⁴⁶ lohobu hele hegiamani ho olotiniso niholong na obu ngete ojien, ho nahingungut ngete atuli ho nanyumuniso namaji nihongete ho lati hula obu iruhi. ⁴⁷ Ele giamani, ho najianan nawahan ho Lohobu ho ngete, ce bu obu nebengitere ihuhumahino kuya igiamari to ho niwahan ho ngete, obehi ba ngete to nebehita huja olwaji. ⁴⁸ Nyuo hati ngete la obu ojien, ce bu igiama nareji huja iyene nabeho, obehi ba tenebehita huja omutari.Latwani la isieri olwaji,owahi ba niho ngete huja olwaji, niho latwani la isieri sing huja olwaji, ifii hadi sing huja olwaji bebe niho ngete. ⁴⁹ Alotu ne ipirehiso nahima nifok, toho egigilere ne ojo etuwulorohini. ⁵⁰ Nyuo hati abwonitere ne nabatismo na ibatiserete to ngete, ce bu tatali ne ehuyasu many natuhohino ngete! ⁵¹ Igigiletete ojo alotu ne iyeno nayomo nifok? Obu,aheramahi ne ite, nyuo hati nahwara. ⁵² Ichahak to baya to ho nihatemeni, obwoni ba lati miyet nihaji abito ohwara-- lati hutik idayari ba lati harik, cebu lati harik idayari lati hutik. ⁵³ Ohwari hadi sing, monye idaya lonyi, ce bu lonyi idaya monye; hotenge idaya ngarini , ce bu ngarini idaya hotenge; nohomoni idaya ngoru lonyi, cebu nguru lonyi idaya homoni hongete.'' ⁵⁵ Cebu nahuta nolobwangi teten fok, tojimata, 'Obwon ba nanuhan na orohojaya,' cebu olotu rahan tarihe. ⁵⁶ Lahetunuhurak, ijianatete nahiramahita neleyejita ho fok cebu ho hide, nyuo hati tatalite ibe ijianata nahiramahiso anya holong? ⁵⁷ Nanyuo te obu ijianata nanyuo na longida nikwanite hote? ⁵⁸ Nomo neloji ho lamereni hoji nihatemeni ho lahangotoni, nihoi totiama itianya niho ngete nihihuhumahinere hongete , ongida obu ohiyaru iji niho lahangotoni ho hiramati, cebu ongida lahangotoni ho hiramita obu ohiyaru iji niho lagalani, cebu ongida lagalani obu ohiyaru iji nilotwarari. ⁵⁹ Ajo ne nihoji, obu ba ji ilotu toda many idum ji robia fad.''