¹ Obwon fa niho ibwo noholong Yesu omojo ibwo namaji, lobo lolohejek ho ngete ho najiman niho ngete, 'Hobu, itejiana ijie tatali moje toho itejianari Yuwana lolohejehi ho ngete.'' ² Yesu ho najiman nihosing, ''Nemojetete tojimata, 'Monye, ikie nafure hoji onyila. Ikie nakwatan hoji olotu, ³ Isiarahi niho jie nanyasu hojie noho tihitik. ⁴ Tolahahi nepalita hojie, to ho ohilahahinere jie nepalita ho lati hula ipalari nihojie.'' Heyaru ijie niho nahisusuta.''' ⁵ Yesu ho najiman nihosing, ''Ngai nihote la obwon ho lamorite, olo niho ngete to nahiji ho harie, ho najiman nihote 'morite, tolwahahi ne inihe nebuneji hutik, ⁶ obwon lobo morite ho ne hesiahita tahanya nihang, obe ibwo singe na otum ne esiarahi niho ngete.' ⁷ Etarang ba ele tohotwa ho haji ojo, 'Heyeyala ne. Ekiana nekat, ce bu abwon ne ho lemusak nihotwa ho haji agetere. Abu ne atum adeto nihisiarahinere iji nebune.' ⁸ Ajo ne nihote, dobu obu ngete odeto isiarahi nebune niho ji to narahan hoji amorite ho ngete, nyuo hati tovnahiwasihiso hoji imojo, odeto ba ngete isiarahi nebune huja olwaji toho iwahitere ji. ⁹ Ajo cebu ne niho ji, hifiace, ce bu hohiciarahini ba iji; totaha, ce bu hihorihi beji; idodungo, ¹⁰ ce bu honge ba nihoji. niho lati fad hula ifiace omojinite; ce bu latwani la hotahito ohorihita; ce bu niho latwani la itdodungo, ho ngacu ba. ¹¹ Ngai nihote hesiatahi niho lonyi nahiriahu nomo nefiasu lonyi nahayemi? ¹² Kuya nomo nefiasu ngete nahateli, ngete esiarahi nahitoni? ¹³ Inaha, nejianatate nahisiarahita nareji huja ongidari niho lemusak hote ite hule irohojata, baya hati ba Monye hote la obwon nihide isiarahi Nolohailong Na-Onyila niho hula ifiase ngete?'' ¹⁴ Orohito fa Yesu namininga ce bu obu iningo fa. Lo fa nalotu naminingati niger, ele twani iningo hovnatianya. Obayangi fa nalohoi ho lati! ¹⁵ Nyuo hati lati hilihe ojimi, ''To Beelsebul, lolohitwahaji ho nolohailongi huja iboti, orohito ngete nolohailongi huja iboti.'' ¹⁶ Hilihe ho natiaman ngete nihorihinere nahitetelehita to hide. ¹⁷ Nyuo hati ajien Yesu nahigigilita hosing ho najiman nihosing, ''Nahang na ihohwara nakwan hongete isaraya, nahaji na ihohwara nakwan hongete, ohuya ¹⁸ Nehohwara lahesuswani nakwan hongete, tatali hati nahaji ho ngete abwotia? Ijimatate arohito ne namininga to Beelsebul. ¹⁹ Narohito ne namininga niger to Beelsebul, to ngai hati lahejifitok hote orohitite? Ta anya,orahi hadi sing ahangotok hote. ²⁰ Nyuo hati narohito ne namininga niger to nahafiale ho Najyok, itelehi ojo alotu nahang ho Najyok nihote. ²¹ Lomo natieso latwani la ogol la nahaji ho ngete, ongidari nareji ho ngete , ²² nyuo hati neyalaya lobo latwani la ogol ngete, latwani la ogol ilany ho nahiyaru nabuhu niho ngete, ce bu ho nahiyaru nareji hongete. ²³ Latwani la obu obwon ho ne ohidaya ne, ce bu latwani la obu ohifuro ho ne itasararita. ²⁴ Lo fa nalo nolohailong nebot niho ele twani, ho naloten hara nimaji nobe nahari ce bu atahito nolowiriasere. No fa nabu ngete ohorihi,ngete ho najiman 'Ayito ba ne nihaji hone na alotinere ne.' ²⁵ Niyitiniso hongete , ohori ene haji nafiari ce bu ihuhumahini angida. ²⁶ Tinya ngete ho naloten ce bu iyaru ho ngete nolohailongi metaharik huja ilany ngete sing ho na fwoniso fad itwongo harabito. Tinya nahitwongo helen twani ho nabwanan na orohojaya ilany nolochifot.'' ²⁷ Abwon fa, loholong natianya ngete ehwe nareji, ibwo nangorite ho nahigworita to hiji ho lati to namurut na okwat bebe ho najiman nihongete, ''Ikie najwaha obwon nihotwa na ohiyisu iji ce bu nahik huja ohitanahini iji.'' ²⁸ Nyuo hati ngete ho najiman, ''Ati ikie najwaha obwon nihosing hula itiyire nahiramita ho Najyok ce bu otunahite.'' ²⁹ Nomo nafuruhine lati,ngete ho nahichak itianya ojo "Hule ati orahi alati hula iboti. Otahito nahitelehita, dobu obe ba ibwo nahitetelehita na isieri niho ngete mayak nahitelehita ho Yona. ³⁰ Toho olotinere Yona rahan ahitetelehita ni ho Ninefe, ora hadi hora ba ahitetelehiso niho hule ti. ³¹ Odetino hadi Nohobu nilongotere ho laliwa ho nangoton sing, olotu ngete to lohichungi ho fok nihityirari nolofero ho Salomone, ce bu nitialari, lobo latwani la obo ilany Salomone obwon inyini. ³² Odete hadi laliwa ho Ninefe ho longotere ho hule nolohilihitari ho hule ati, ongoti hadi sing,iwahe hadi sing nilohitotosere ho Yona, ce bu atiali, lobo latwani la obolo ilany Yona obwon inyini. ³³ Obe lobo, nomo netuwulorohi nahima ihwanahi nidimele kuya idimahi nihotwa ho buruso, nyuo hati nimaji na otod ongida lati hula irute obwoni nifangan. ³⁴ Ora nohonyek hoji ahima ho kwan hoji. Nangida nohonyek hoji, ifut nakwan hoji fad to nafangan. Nyuo hati naroho nohonyek hoji, ifut nakwan hoji to nadimele. ³⁵ Inaha to bwana angida ojo nafangan na obwon nihoji obu nedimele. ³⁶ Nomo nefut nakwan hoji to nafangan na obe ibwo nangati obwon ho nedimele, ora ba nakwan hoji to ho nomo nahima lofarang nihoji." ³⁷ Lo fa natuhohi ngete natianya, lobo laharisani ho nahifiasu ngete ojo ongida olo inyasu nihaji ho ngete, tinya Yesu ho naloten nihotwa ho nanyasu. ³⁸ Ele twani ho na bayangahiso ojo ichak ngete inyasu obe ofinaya. ³⁹ Nyuo hati Lohobu ho najiman niho ngete, ''Tahanya, ite laharisak itinyilajitete nohorwongite hecholiji ce bu naranyi, nyuo hati nahotwaji hote ifuti to nahihawura ho narohoji. ⁴⁰ Ite hule lati hula obu igigilete! Obe lora la ihuhumu niger cebu lihuhumu nohotwa? ⁴¹ Isiarahisi niho lahsparitak nasinge na obwon nihotwa, tinya nareji fad ba onyilaji nihote. ⁴² Nyuo hati ikie narohoji obwon nihote laharisak, to nanyuo isiarahitati te nareji to manata hote niho Najyok nyuo hati iluluhisi nangidari cebu nakwama ho Najyok. Ongida ite ligiamati na ongida cebu ikwamati Najyok, na obu ingotihisi nahigiama ho nareji hinihe. ⁴³ Ikie narohoji obwon nihote laharisak , ikwamatite nahitwongita ho nahatemeni nekelesia ho nahihata to nabayangi nimasik ho lohitenyangari . ⁴⁴ Ikie narohoji obwon nihote, ikialaritite to ho nohosereji huja iwowarahine, odahariti lati obu ojieni.'' ⁴⁵ Lobo lahetejianani ho nechihita ho Yahud ho nahitarang ngete ojo, ''Lahetejiananani, natianya hoji ohimoro ijie cebu.'' ⁴⁶ Yesu hona jiman, ''Ikie narohoji obwon nihote, lahitejianak hichihita! Itegiamatite lati to netegemita huja irosiji to natingito, nyuo hati obu itiroto ihwe hitegemita to nahafiala hote. ⁴⁷ Ikie narohoji obwon nihote, tonanyuo ifwahahisite nahihuyata nihosiereji ho laheramahitak ho hiramita, nyuo hati fa fafairok hote lifadari sing . ⁴⁸ Tinya irahatate ahapiahak cebu ahajianak niho nahigiama ho bo fafairok hotr, tonanyuo ifadari sing laheramahitak ho hiramita, hula ifahahisite nohosereji hosing. ⁴⁹ Ta anya hiram cebu, ojo nolofero ho Najyok , ' Asulahi hadi ne nihosing laheramahitak ho hiramita ho lahetejianak , olomi hadi sing ce bu ifadari hilihe nihosing.' ⁵⁰ Hule ti, ikianahini hadi nohotoji hosing fad nohotoji ho laheramahitak ho hiramita hulo fa ifadari many to lochifot ho fok, ⁵¹ many niho nohoto ho Abele olotu many nihoto ho Sakaria, lo fa ifadari nihiji ho altari ho natifine . Tarihe ajo ne nihoji, anya halahaji isieri hadi sing inefi nohoto. ⁵² Ikie narohoji obwon nihote lahetejianak hechihita ho Yahud , tonanyuo eyaritite nengata ho ngianyan; obu te ituruhisi nakwanite hote; cebu ititihitete lati hula iruhise.'' ⁵³ Lo fa nedahi Yesu da, lahegierok ce bu laharisak ho nahidayariso ngete ho nahifiasu ngete nareji huja olwaji, ⁵⁴ owak fa ngete inefiniso ngete to nahiramitaji ho ngete.