¹ Alwaji lati hula atemi nihihwanari hunya nahiramita huja egemi nihiji hojie, ² to ho isiarahini sing nihojie, hula many to lochifit, orahi sing ahabiahak cebu ahigiemak hanya tianya. ³ Niho ne ce bu, natel ne angida nihoi ho hunya reji fad many to lohichahi- ijobu ongida niho ne nihigierehinere sing nifok-lohitwahiji lobolo bebe Tiofilo. ⁴ Ora anya ojo ongida ite ijianata natarihe noho nareji hu lofa itejiana nihote. ⁵ Niho ehwe holongi ho Herode, lohobu ho Yudea, obwon fa lobo lapadiri nafure hongete Sakaria,lo ho nahang ho Abija. Ora fa ngore noho ngarinok ho Aron, ce bu nafure hongete Elisabeta. ⁶ Ongidari fa sing fad nihatemini ho Najyok; obu fa sing obwoni hinihe nepalita niho nechihita fad cebu nihigemita ho Hobu. ⁷ Nyuo hati obu fa sing obwoni ho lahito, to nanyuo obotia(ikolif) fa Elisabeta, cebu eragangi fa sing fad. ⁸ Alotu fa bwanan lo fa nabwon Sakaria nihatemeni ho Jyok, nihigiamari nahigiama ho padiri nimaji ho higiama hongete. ⁹ To nemanyita ho nyumere ali padiri hegiama, anyumuni fa ngete to nakuri nihigiamari nitempul ho Lohobu nihidwosere niheru. ¹⁰ Nalohoi ho lati omoje niloke nisa na idwoserete neheru. ¹¹ Anjelo ho Lohobu ho naleyeji niho ngete ho nabotia niteten ho altari. ¹² Sakaria ho nabayangi lo fa natelu ngete;nabangi ho nahinef ngete. ¹³ Nyuo hati Anjelo ho najiman niho ngete, "Hebayang, Sakaria, to nanyuo itiyiri nemojita hoji. Otomonu hadi guru ji lahito. Itanyahi hasi ngete Yuwana. ¹⁴ Ibwon hadi ji ho nakwama cebu okwama hadi lalohoi niholong na oyisinerete ngete. ¹⁵ Obolo hadi ngete bebe nihatemeni ho Lohobu. Obu hadi ngete omata nabalu kuya ibwo nasinge na odwar, cebu itufuti hadi ngete to no Lohailong- Na- Onyila many to ho twa ho hotenge. ¹⁶ Olwaji hadi lati ho Isarayi hula ofwoni niho Lohobu Najyok hosing. Olo hadi ngete nihomom ho Lohobu to nolohailong cebu nihifirang he Elija. Ihon hadi ngete anya nihibielere natajio ho monye niho lemusak, ojo ongida nabiangan bayangi odaha nihilefereji ho lahangidarak. ¹⁷ Igem hadi ngete anya nihihuhumahinere niho Lohobu ho lati hula ihuhumahini to ngete." ¹⁸ Sakaria hona tianya niho anjelo "Tatali ne hajien anya? Etwongo ne aragangani cebu guru ne abolo nigaji. " ¹⁹ Angelo hona hitarang ngete," Ne Gabriele, la abwotia nihatemeni ho Najyok. Ohisuluni ne ojo ongida ne atianya nihote, eyeno nihote anya tianya ongida. ²⁰ Iningete hadi te, obu itumata itianyati, many niholong na ofwoninerete hunya reji. Ora anya to nabiangan hiruk netenyita ho ne, huja ba ofwoni itufutahiso niholong na ongida. ²¹ Itilase fa lati Sakatia. Obayangi fa sing nijiman iyaru ngete noholongi olwaji nitempulo. ²² Nyuo hati nofa na lotu ngete niger, obu ngete otum otianya nihosing. Sing ho nahihuyaniso ojo otelu ngete naleyeji nodwo obwonitere ngete nitempulo. Itiringa ngete itelihita nihosing ahitelehita ce bu owasihi hiningo. ²³ Lofa natuhohini noholongi ho higiama ho ngete, ngete ho nayiteriso nihang hongete. ²⁴ Nihalu hehwe holongi, nguru na ngete Elisabeta ho nahimwohoji. Ngete nabwon ho nayafaji miyet. Ngete ho najiman, ²⁵ "Ngete anya nasinge na igem Lohobu niho ne nofa natiala ngete niho ne to namehino ojo ongida ngete iyaru niho ne nariri to hatemeni ho lati." ²⁶ Niyafa hele ho himohoji ho Elisabeta, Najyok ho nasuluniso anjelo Gabriele nihang ho Galilee na onya Nasaren, ²⁷ niho nahurie nahomuta na itaram lobo latwani onya Yosefo. hora fa loho nihaji ho Davide, ce bu nafure he ne hurie onya Maria. ²⁸ Ngete ho nalotiniso nihongete ho najiman, "Ahihatu,iji na ohinyumuni!ObwonLohobu hoji." ²⁹ Nyuo hati abwon fa nahigayanga niho Maria to netejnyita ho ngete, Maria ho najiman ani hihata anya ta hanya. ³⁰ Angelo hona tianya niho ngete, "Hebagang , maria, ehorihi ji namehino niho Najyok. ³¹ Totiala, ilotu hadi ji imwohoji ce bu iyisu lahito. Itanyahi hadi ji nafure hongete 'Yesu.' ³² Obolo hadi ngete ce bu ongelese hadi ngete Ahito ho Lahaboloroni. Isiarahi hadi Lohobu Najyok ngete nolohitwengere ho fafai hongete Davide. ³³ Olotu hadi ngete inef nahang ho Yacobo many jik, cebu obu hadi nolohichungi niho nabolori ho ngete. ³⁴ Maria ho najiman niho Anjelo, "Tatali ba anya ichak, ne hobu ohigeto to lobo laleye?" ³⁵ Anjelo hona hitaranga ngete, "Nolo hailong na Onyila olotu ba niho ji, ce bu nahifirang ho Lahaboloroni olotu oba niho ji. Lahanyilajani la oyisinise ongelese hadi ngete Ahito ho Najyok. ³⁶ Totiale, hinasi hoji Elisabetha imwoho lahito to hiragang. Arahi nayafi ile , ngete nofa ongelese ahekolifeni. ³⁷ Obe ibwo nasinge ilanyu Najyok." ³⁸ Maria ho najiman, "Totiale, ara ne angorite na etwongo ahegiamani ho Hobu. Ikie ora niho ne to ho na itianyariji." Anjelo ho nahidahiso ngete. ³⁹ Maria ho na deto kerem niho ihwe holongi ho naloten to ho nahang hosing , nihang nobolo niho Yudea. ⁴⁰ Ngete ho loten nihaji ho Sakaria ce bu ho nahihat Elisabeta. ⁴¹ Lofa netiyir Elisabeta nahihata ho Maria, lahito tohotwa hongete hona hifirita; ce bu Elisabeta hona honahifut ho no Lohailong Na-Onyila. ⁴² Ngete ho natingon namurut hongete bebe ho najiman, "Ikie najwaha obwon nihoji to hiji hongorwo, cebu ikie ce bu lahito to hotwa hoji obwon ho najoha. ⁴³ Cebu nanyuo anya olotu bwanan niho ne ojo iyang ho Hobu ho ne olotu niho ne? ⁴⁴ Totiale, laholong netiyir ne nahihata hoji,lahito ho nahifirita to ho twa ho ne to nakwama. ⁴⁵ Ikie najwaha obwon niho ngete na iruk ojo obwon hadi natarihiso niho nareji huja fa itelehini ngete niho Lohobu." ⁴⁶ Maria ho natianya, "Nolohailong ho ne ho nahito kwata Lohobu, ⁴⁷ cebu nolohailong ho ne ho nakwama niho Najyok lahetalahani ho ne." ⁴⁸ Otiala ngete nifok niho nemanyita hegiamani hongete na ora angorite. Lati fad ohingelese hadi ne la onyumuni. ⁴⁹ Ngete la ogol egem niho ne nareji huja ogoli ce bu nafure hongete na onyila. ⁵⁰ Namehino ho ngete iwasihi niho lati hula obayangi ngete. Eteteliehi ngete nahifirang ho lohoyo hongete. ⁵¹ Egem ngete nareji huja ogoli ta nehene hongete; etasaraya ngete hulofa opufe to nahgigilita hotajio hosing. ⁵² Ebirehi ngete nifok lemusak ho hobuk tolohitwengere hosing, ce bu atingo ngete lati hula obwoni ho nemanyita hula inyahi nemanyita. ⁵³ Itanyasu ngete lati hula onyasu nahure to nareji huja ongidari, nyuo hati orohoyo ngete lati hula opare niger nebe ibwo singe. ⁵⁴ Alwak fa ngete Isarayile lahegiamani ho ngete, ojo ongida ihuyanitare namehino ⁵⁵ ( toho iramahinere ngete niho fafairok hojie) niho Abramo ho lemusak hongete many jik." ⁵⁶ Itwongo Maria ho Elisabeta nayafaji hutik ho nayitereso nihaji hongete. ⁵⁷ Alotu fa noholong niho Elisabete nitomonari, ngete ho natomoniniso lahito ho leye. ⁵⁸ Nati huja omanye hongete namaji abito ho nati hongete ho nakwama harabito hongete nofa nitiyiri sing ojo esiarahi Lohobu namehino hongete niho Elisabeta. ⁵⁹ Niholongi metohutik, sing ho nahiyaru lahito ojo ongida ongoti. Hatum fa sing itanyahini ngete"Sakaria,"nafure ho monye, ⁶⁰ nyuo hati iyang hongete ho nahitarang ojo, "Obu; itanyahisi ngete Yuwana." ⁶¹ Sing ho najiman niho Elisabeta,"Obu lobo latwani hote onya to hoja." ⁶² Sing ho natianya niho monye ho hito tenehes ojo ongida iramahi ani fure itanyahini lonyi. ⁶³ Monye ho nahifiniso nahigieri ho nahigierehiso, "Nafure hongete Yuwana. "Sing fad ho nahilongojita. ⁶⁴ Nahutuk hongete ho nangasu ce bu nangadef hongete ho natawahi. Ngete ho natianya cebu ho nahitokwata Najyok. ⁶⁵ Nabayangi ho na lotiniso niho lati hula itwonge niger hosing. Hunya nareji fad ho nahisarahiso nihotwa ho hang ho Yudea. ⁶⁶ Cebu ehule itiyiri sing ho natunahiso sing nitajio hosing, ojo, "Anyuo hati hadi ale hito olotu?" Obwon fa nehene ho Hobu nihongete. ⁶⁷ Monye hongete Sakaria ifut fa ho Nolohailong Na Onyila ce bu iramahita nahirabita, ojo, ⁶⁸ "Itokwatati Lohobu, Najyok ho Isarayil, alwak ngete ce bu igem nahitalahino ho lati hongete." ⁶⁹ Atingu ngete namwarak ho hitalahino tojie nihaji ho lahegiamani ho Davide, tekat ho lahegiamani hongete Davide, ⁷⁰ lofa natianya ngete to nahutuk ho laheramahitak ho hiramita ho berien. ⁷¹ Iyeno hadi ngete nahitalahino niho lamerok hojie ce bu niho nehes he hule oswe niho jie. ⁷² Igiem hadi ngete anya nihitelehinere namehino niho monye ho jie, cebu nahitihuyahinere nahiruk hongete na onyilaji, ⁷³ nahitina nofa otianya ngete niho Abramo monye ho jie. ⁷⁴ Itin ngete nihisiarahinere ijie ojo ongida ijie, hula etalahini tehes ho merok hojie, cebu ongidar isiarahi ijie ohigiama niho ngete obu tanabayangi, ninyilaji cebu nitarihe ⁷⁵ nihatemeni hongete noholongi fad. ⁷⁶ Ee, cebu iji, lahito, ongelese hadi ngete aheramahitani ho hiramita la Obolo, ifwasi hadi te nihomom ho Lohobu nihihuhumahinere nihoiha hongete, nihihuhumahinere lati nilotinere hongete, ⁷⁷ nihisiarahinere najianan ho hitalahino niho lati ho hongete, to nalahahinere nepalita hosing. ⁷⁸ Olotu hadi anya bwanan to nangidari ho mehino ho Najyok hojie, to nasinge na otulu nere noholong to maji na otodo olotu hadi nihojie, ⁷⁹ nihimedehari nihosing hula itwenge nidimele ce bu nirifi ho yeyi. Ihon ngete anya nilwahari nihejiaha hojie nihoi ho yomo." ⁸⁰ Tahanya obolo lahito cebu agol nilohailong, cebu obwon fa ngete nitimere many niholong na oleyejiere ngete niho Isarayile.