1 Niho ehwe holongi, osulahi Saesar Augusto nahiram nihiramahinere ojo ongida ikeni ihoni lati fad hula omanye nifok ho Roma. 2 Ara fa anya nolochifot ho hikiana laholong orahitere Kirino alohitwahaji ho gala niho Siria. 3 Lati ho nahisiarahiso to nahangite nihitegierere nafureto hosing . 4 Yosefo hona loten to hahang nobolo nobo Nazaret niho Galileya hobna loten Yudea nihang noho noho Betehem, na ongelese ojo nahang nobolo noho Davide, tona rahan hongete ahito ho nekat ho Davide. 5 Olo ngete da ho Maria, no fa itarama ngete cebu owak fa tomoni. 6 Lo fa ho bwoni sing da,atuba fa noholong ho Maria nitomonari. 7 Ngete ho natomoniso lahito oleye, lolokang hohito hongete, ho nahibuk to nabongo ho nahitegetehiso ngete nitigol, to nabiangan ho haji nihosing to da. 8 Niho ene hang, obwoni fa lehejwahak ho hulabobwoni niboreto itiala nehoriangi hosing to naharie. 9 Anjilo ho Lohobu ho naleyeji niho sing, ce bu nafangan ho Lohobu nafarangi niger ho sing, sing ho obayangi bebe. 10 Anjilo ho natianya niho sing ojo, "Hebayangata, iyeno ne nihote natianya na ongida na hadi iyeno nakwama nahitwahaji niho lati fad. 11 Baya ayisini lahetalahani nihote nihang ho Davide! Ngete Kristo Lohobu! 12 Ngete anyani nahitelehiso na ba isieri nihote, ifwasi ihorihisi ba te lahito imuhi to nawaruji ho bongo itegetehini nitigol. 14 Harabito ho Anjelo ofwoni fa nalohoi ho segere to hide ho nahitokwata Najyok, ojo, 13 "Ikie nakwatan obwon niho Najyok nihide, ce bu ikie nayomo obwon nifok niho ngete la okwama ngete." 15 Lo fa nafwe Anjiloji nihide tiye hosing , lahejwahak hehoriangi ho na tianya nikwnite ho sing, "Adahati tahanya to ho Betelehem, nitialari anya singe, na itetelehi Lohobu niho jie." 16 Sing ho naruharu da ho nahorihiso Maria ho Yosefo, cebu ho nateliniso lahito ogeto nitigol. 17 Lo fa nateli sing anya, sing nahiramahiso niho lati nahiram na iramahini nihosing to lahito. 18 Lati hula itiyiri fad ho nabayangi natianya na iramahini lahejwahak nihosing. 19 Nyuo hati Maria itiringa ihuyasu nareji fad huja itiyir ngete, ho natunahiso nitaji hongete. 20 Lehejwahak ho nayiteriso, itokwate ce bu ihahate Najyok niho nareji hulo fa itiyiri sing ce bu oteli, toho otianyariti niho sing. 21 Lo fa nara niholongi metohutik ce bu ora aholong na ofwe fa ingutere lahito, sing ho na hitanyahiso nafure hongete Yesu, fure no fa isiarahi anjilo many ho be imwohoji ngete niho twa. 22 Lo fa naringari noholongi ho itinyilajari, to ho ojo nechihit ho Muse, Yosefo ho Maria ho nahiyeno lahito Yerusalem nitempulo nihisiarahinere ngete niho Lohobu. 23 Toho igierehini nichihita ho Hobu, "Latwani la onga nahotwa ongelese hadi ngete latwani le esieri niho Lohobu. " 24 Ofwoni ce bu sing isiarahita neyalita to ho ojo nechihita Lohobu, "Narigeji harik kuya nawoloji harik huja ho mutari." 25 Obwon fa lobo latwani Yerusalem la onya nafure Simeone. Opit fa ele twani cebu obayang. Itilasu fa lahetotosoni ho Isarayil, ce bu Nolohailong Na-Onyila obwon niho ngete. 26 Iramahini fa niho ngete ojo obu hadi ngete oye hobe ngete otel Lohobu Kristo. 27 Niho ibwo noholong ngete ho nalotiniso nitempulo, Nolohailong Na-Onyila linyamino. Lo fa neyene monye ho hotenge lahito niho twa ho lomojere, Yesu, nihigiamari nareji na owak nechihita, 28 Simeone ho nahifwotiniso ngete ho namojo niho Najyok ojo, 29 "Ikie legiamani hoji olo to nayomo, Lohobu, toho nitianya hojie. 30 Ateli nohonyehite ho ne nahitalahi ho ji, 31 na ihuhumahisite nihatemeni ho lati fad. 32 Ora hadi ngete afangan noho hitelehiso niho paganoji cebu akwatan niho lati ho Isarayile. 33 Monye ho lahito ojo hotenge ho nabayangi niho nareji huja otenyi fa to ngete. 34 Tinya Simeone ho najwahan sing ojo niho Maria iyang Yesu, ''Itiyire angida! ale hito ihuhumahini to lati ho Isarayile hula ohuyari ho hula odentine cebu nihitelehinere natianya na oroho na iramahini. 35 Ochuk hadi nanyaliru nolohailong hoji, ojo ongida nahigigilita ho tajio huja olwaji itelini." 36 Obwon fa naheramahitani ho hiramita na onya nafure hongete Anna da. Ora fa ngete angara ho Fanuel niho nemanit ho Asher. Abolo fa ngete ningaji. Etwongi ngete ho habi nengaji metaharik niyama ho ngete, 37 cebu etwong anguru ha fereni ningaji nehejek metohutik ho ongon. Obu fa ngete idahi nolo netempulo ce bu itiringa imojo Najyok to na biangan nyasu ho nemojita, to naharie ho nafarani. 38 Nihene holong, olotu fa ngete niho sing ho nahichak isiarahiso na awa niho Najyok. Otianya ngete to lahito niho lati fad hulo fa itilase lahetalahini ho Yerusalem. 39 Lo fa natuhohini sing nareji fad huja owahi sing ihuhuma to ojo nechihita ho Lohobu, sing ho na yiteriso Galileya, nihang hosing nobolo, Nazaret. 40 Lahito hona bolori ce bu hona golon, ho nafunahini nilofero, obwon fa namehino ho Najyok niho ngete. 41 Monye ho hotenge ho na dahito nengaji fad to ho Yerusalem niho nihiyomere neyom ho "lohichungi." 42 Lo fa nara ngete nengaji tomon ho harik, sing ho nafwoten to ho ojo nemanyit hosing niho neyom. 43 Lo fa netwongi sing noholongi olwaji niho neyom, sing ho nayiteriso nihang. Nyuo hati lahito Yesu otong nihalu (Yerusalem) monye ho hotenge obu ojieni. 44 Ogile sing ojo obwon ngete nihiji ho lati hulo fa odahe ho sing. Sing ho nahichak itahito ngete niho lati hosing ho lamorit. 45 Lo fa na bu sing ohorihini ngete, sing ho nayiteriso to ho Yerusalem ho natahito ngete daa. 46 To noholongi hutik, sing ho nahorihiso ngete nitempulo, itwongo nihiji ho lahetejianak, itiyira niho sing ce bu ifiasu sing nefiasita. 47 Lati hula itiyiri ngete ho nabayangi to najianan cebu nahitaranga ho ngete. 48 Lo fa nateli sing ngete, sing ho nahihihira. Hotenge ho najiman niho ngete , "Iha ne, nanyuo ji igem niho jie niho ja ? Itiyire, niho monye hoji cebu abwonune hona natahitere iji bebe." 49 Ngete ho najiman niho sing, "Nanyuo te itahitete ne? Ibete ijianata ojo ongida ne abwon nihaji ho monye ho ne?" 50 Nyuo hati obu sing ojieni nanyuo ngete otianya niho ehwe hiramita. 51 Ngete ho nayiteriso ho sing nihang to ho Nazaret cebu obayang sing. Hotenge ho na tunahiso ehwe reji fad nitaji hongete. 52 Nyuo hati Yesu ho nahitiranga bolori nilofero ce bu nikwan, ce bu ofwonahino niwahan ho Najyok cebu niho lati.