ಅಧ್ಯಾಯಮು-15
1
ನಂಬಿಕೆವುಂಡ ಮಾಮು ಮಾ ಸುಖನಿ ಸುಸ್ಕೊನ್ದನೆ ದೃಢಮ್ ಲೇನಟ್ಟೋಳ್ ಅನುಮಾನಲ್ನಿ ಸಹಿಚ್ಕೊವಲಾ .
2
ಮಾಲ ಪ್ರತಿಯೋಕ್ಕಡು ವಾಡ್ ನೆರೆಯುಡ್ ಹಿತನ್ನಿ ಭಕ್ತಿವೃದ್ದಿನೀ ಅಪೆಕ್ಷೆ ಪಡೋಡ್ ಅಯ್ಯಿ ವಾಡ್ ಸುಖನೀ ಸುಸ್ಕೊನ್ನಿ .
3
ಯಂದ್ಗೂ ಅಂಟ್ಟೆ ಕ್ರಿಸ್ತುಡು ಸಹ ತನ್ ಸುಖನ್ನಿ ಸುಸ್ಕೊಲೇದು . ದೇವುಡ ನಿನ್ನಿ ದೂಷಿಚ್ಚೆ ನೊಳ ದೂಷನೆಲು ನಾ ಮಿಂದ್ದ ವಚ್ಚೆ ಅನಿ ರಾಸುಡ್ನಟ್ಗಾ ಆತುಡ್ಕಿ ಸಂಭವಿಚ್ಚೆ ಕದಾ .
4
ಪೂರ್ವಮ್ಲಾ ರಾಸಿನ್ದೆಲ್ಲಾ ಮಮಲ್ನಿ ಉಪದೆಶಿಚ್ಚೆದಾಂಕೈಯ್ಯಿ ರಾಯಲ್ಪಟ್ಟೆ . ಮಾಮು ಓದಿ ಸ್ಥಿರಚಿತ್ತನೀ ಆದರಣೆನೀ ಹೊ೦ದ್ಕೋನಿ ರಕ್ಷಣೆ ನೀರಿಕ್ಷೆ ವುಳೋಳ್ ಅಯ್ಯು೦ಡಾಲ್ ಅನಿ ಆ ಗ್ರ೦ಥಲೂ ರಾಸಿಚ್ಚಲ್ ಪಟ್ಟೆ .
5
ಆ ಸ್ಥಿರಚಿತ್ತನ್ನಿ ಆದರಣೆನ್ನಿ ಇಚ್ಚೆ ದೇವುಡು ಮೀಳು ಕ್ರಿಸ್ತ ಯೇಸುನ್ನಿ ಅನುಸರಿಚ್ಚೆ ಒಕ್ಕೆ ಮನಸ್ಸುಳೋಳ್ ಅಯ್ಯುನ್ಡಾಲನೀ ಮೀಕಿ ದಯಪಾಲಿನೀ .
6
ಮೀಳು ಏಕ ಮನಸ್ಸಿನಿಚ್ಚ ಒಮ್ಮುಖಮೈಯ್ಯಿ ಮಾ ಕರ್ತುಡ್ ಐನಾ ಯೇಸು ಕ್ರಿಸ್ತುಡ್ ತಂಡ್ರಿ ಐನಾ ದೇವುಡುನೀ ಕೊಂಡಾಡ೦ಡಿ .
7
ಅಂದ್ಗೂ ಕ್ರಿಸ್ತುಡು ಮಿಮಲ್ನಿ ಸೇರಿಬಿಚ್ಕೊನಟ್ಗ ಮೀಳು ಸಹ ಒಕ್ಕನೋಕ್ಕಳ್ನಿ ಸೇರಿಬಿಚ್ಕೊನಿ ದೇವುಡ ಮಹಿಮೆನೀ ಪ್ರಕಾಶ ಪಡಿಚಂಡಿ .
8
ಯಂದ್ಗೂ ಅಂಟ್ಟೆ ನಾನು ಸೋಪ್ಪೆದ್ ಹೆಮಂಟ್ಟೆ - ಕ್ರಿಸ್ತುಡು ಪಿತ್ರುಲ್ಕಿ ಉಂಟೈನಾ ದೇವುಡ ವಾಗ್ದಾನಲ್ನಿ ದೃಢಪಡಿಚ್ಚಿ ಆತುಡ ಸತ್ಯನ್ನಿ ಸೂಬಿಚ್ಚೆದಾನಕೈಯ್ಯಿ ಸುನ್ನತಿ ಅನೆ ಸ೦ಸ್ಕಾರಂಕಿ ಒಳಗಾಯ .
9
ಜನಾ೦ಗಲ್ ಅಯ್ತೆ ಕಾರುಣ್ಯಮ್ನಿಚ್ಚ ದೇವುಡ್ನಿ ಕೊಂಡಾಡತರ್ ಅನೇದೇ . ದಿನ್ಕಿ ಸರಿಅಯ್ಯಿ ಶಸ್ತ್ರಾಮ್ಲಾನೂ ರಾಸಿಂದಿ - ಈ ಕಾರಣಂನಿಚ್ಚ ಅನ್ಯ ಜನಲ್ ಮಧ್ಯಲಾ ನಿನ್ನಿ ಸುತ್ತಿಸ್ತಾನು ; ನೀ ನಾಮನ್ನಿ ಸಂಕೀರ್ತಿಸ್ತಾನು .
10
ಇಂಕ್ಕೋಕ ಸ್ಥಳಮ್ಲಾ - ಜನಾ೦ಗಗೂಲ ದೇವುಡ ಜನಲ್ ಜೊತ್ಲಾ ಉಲ್ಲಾಸಮ್ನಿ ಪಡಂಡಿ . ಅನಿ
11
ಇಂಕ್ಕೋಕ ಸ್ಥಳಮ್ಲಾ ಸರ್ವ ಜನಾ೦ಗಗೂಲ ಕರ್ತುಡ್ನಿ ಕೀರ್ತಿಚ್ಚಂಡಿ . ಸಮಸ್ತ ಪ್ರಜೆಲೂ ಆತನನ್ನಿ ಸಂಕಿರ್ತಿಚ್ನಿ ಅನಿ ರಾಸಿ೦ದ್ದಿ .
12
ಇಕ್ಕೊಂಕ ಸ್ಥಳಮ್ಲಾ ಯೇಶಾಯುಡು ಸೋಪ್ಪಿದ್ ಹೆಮಂಟ್ಟೆ ಇಷಯನ ಅಂಕುರದೊಡು ಅಂಟ್ಟೆ ಜನಾ೦ಗಲ್ನಿ ಆಳತಕ್ಕಮೊಡು ವಸ್ತಾಡು ಜನಾಂಗಲು ಆತುಡ್ನಿ ನಿರೀಕ್ಷಿಸ್ತಾವುನ್ನಾರು .
13
ನಿರೀಕ್ಷೆಕಿ ಮೂಲಮೈನ೦ಟ ದೇವುಡು ನ೦ಬಿಕೆನಿಚ್ಚ ಉಂಟೈಯ್ಯೇ ಸಂತೋಷನ್ನಿ , ಮನಶ್ಯಾ೦ತಿನ್ನಿ ಮೀಕಿ ಪರಿಪೂರ್ಣಮೈಯ್ಯಿ ದಯಪಾಲಿಚ್ಚಿ ಮೀಳು ಪವಿತ್ರಾತ್ಮ ಬಲಮ್ ಕುಡ್ನಾಟೋಳ್ ಅಯ್ಯಿ ನೀರಿಕ್ಷೆಲಾ ಅಭಿವೃದ್ದಿನೀ ಹೊಂದೇರೀತಿ ಅನುಗ್ರಹಿಚ್ನಿ .
14
ನಾ ಸಹೋದುರುಲಾ ಮಿಳಂತು ಮೊಚ್ಚಿದಾನಿಚ್ಚ ಭರಿತಲೈಯ್ಯಿ ಸಕಲ ಜ್ಞಾನಮ್ನಿಚ್ಚ ನೀಂಡ್ಡುಡೋಲ್ ಅಯ್ಯಿ ಒಕ್ಕಲಿಕಿ ಒಕ್ಕಲು ಬುದ್ದಿ ಸೋಪ್ಪೆಕಿ ಶಕ್ತಮೈಯ್ಯಿ ವುಂಡಾಳ್ ಅಯ್ಯಿ ಮೀ ವಿಷಯಮ್ಲಾ ನಾಕಿ ಗೊತ್ತು .
15
ಐತ್ನೂ ಮೀಕಿ ಜ್ಞಾಪಕಾಮ್ನಿ ಇಯ್ಯಲನಿ ಗಾನಾ ಗಾನಾ ಹೆಚೈನಾ ಧೈರ್ಯಮ್ನಿಚ್ಚ ರಾಸ್ನಾನು . ಯಂದ್ಗೂ ಅಂಟ್ಟೆ ನಾನು ಅನ್ಯಜನಲ್ಕೊಸ್ಕರಮು ಯೇಸು ಕ್ರಿಸ್ತುಡ ಸೇವಕುಡ್ ಅಯ್ಯೇಕಿ ನಾಕಿ ದೇವುಡ ಅನುಗ್ರಹಮ್ ಅಯಾ .
16
ನಾನು ದೇವುಡ ಸುವಾರ್ತೆ ಸೇವೆನೀ ಯಾಜಕ ಸೇವೆ ಅನ್ನಟ್ಗ ನಡಿಪಿಚ್ಚಿ ಅನ್ಯದೆಶಸ್ಥಲೂ ಅನಿ ಕಾಣಿಕೆ ಪವಿತ್ರಾತ್ಮಡು ಮೂಲಕಮೈಯ್ಯಿ ಪರಿಶುದ್ದಮ್ ಅಯ್ಯಿ ದೇವುಡ್ಕಿ ಸಮರ್ಪಕಮ್ ಅಯ್ಯೇ ರೀತಿ ಪ್ರಯತ್ನಮ್ ಸೇಸೋಡ್ ಐನಾನು .
17
ದೇವುಡ ಸೇವೆಲಾ ಹೊಗಳಿಕೊಳ್ಳೆಕಿ ಕ್ರಿಸ್ತ ಯೇಸುಲಾ ನಾಕಿ ಕಾರಣಮ್ ವುನ್ನಾದಿ .
18
ಕ್ರಿಸ್ತುಡು ಅನ್ಯ ಜನಲ್ನಿ ತನ್ಕಿ ಅಧೀನಮ್ ಸೇಸ್ಕೊನಕಿ ನಾ ಸೇತ್ಲಾನು , ಮಾಟ್ಲಾನೂ , ಕ್ರಿಯೆಲೆನೂ , ಅದ್ಬುತಕಾರ್ಯಲಾ ಬಲಮ್ನಿಚ್ಚನು ಪವಿತ್ರಾತ್ಮ ಡು ಬಲಮ್ನಿಚ್ಚನು ಸೇಸ್ನಾಟ್ಟ ಕಾರ್ಯಲ್ನಿ ಇಸ್ಪೆಟ್ಟಿ ಬೇರೆ ಯಾವ ಕಾರ್ಯಲ್ನಿ ಸೋಪ್ಪೆಕಿ ನಾಕಿ ಧೈರ್ಯಮ್ ಸಾಲೇದು .
19
ನಾನು ಯೆರೂಸಲೆಮ್ಲಾ ಮೊದಲುಗೊನ್ನಿ ಇಲ್ಲುರಕ ಸೀಮೆಯ ಪರ್ಯಂತರಕ್ಕೂ ಸುತ್ತಿ ಕ್ರಿಸ್ತುಡ ಸುವಾರ್ತೆ ಸಾರೋಣನ್ನಿ ನೇರೆವೆರಿಚ್ನಾನು .
20
ಬೇರೋಳು ಎಸ್ನಾಟ್ಟ ಅಸ್ತಿವಾರಮಿಂದ್ದ ಕತ್ಗುದ್ದಾನೀ ಮನಸ್ಲಾ ನೆನಚ್ಚಿ ಇತರುಲು ಕ್ರಿಸ್ತುಡ ಪೇರ್ನಿ ತಿಲಿಬಿಚ್ನಾಟ್ಟ ಸ್ಥಳಮ್ಲಾ ಸುವಾರ್ತೆನಿ ಪ್ರಕಟಿಚ್ಚೆಲೆದ್ ಅನಿ ನಿಷ್ಕರ್ಷೆನೀ ಸೇಸ್ಕೊಂಟ್ಟಿ .
21
ಯೋಳ್ಕಿ ಆತುಡ ಸಮಾಚಾರಮೂ ರಾಲೆದೋ ವಾಳೆ ಆತುಡ್ನಿ ಸುಸ್ತಾರು ; ಯೋಳು ಆತುಡ ವರ್ತಮಾನ್ನಿ ಇನ್ಲೇದೋ ವಾಳೆ ಗ್ರಹಿಚ್ಕೊಂಟಾರು ಅನಿ ರಾಸು೦ಡ ಪ್ರಕಾರ೦ಗ ನಾ ಕೆಲಸಮ್ನಿ ನಡಿಬಿಚ್ನಾನು .
22
ಕಾರಣಮ್ನಿಚ್ಚ ಮೀ ಹತ್ರಿಕಿ ವಚ್ಚೆಕಿ ನಾಕಿ ಅನೇಕ ಸಾರಿ ಅಭ್ಯಂತರಮ್ ಅಯಾ .
23
ಅಯ್ತೆ ಇಕ್ಕ ಮಿಂದ ಈ ಪ್ರಾಂತ್ಯಲ್ಲ ನಾಕಿ ಅನುಕೂಲಮ್ ಲೆಪೋತ್ನೂ ಮೀ ಹತ್ರನ್ಕಿ ವಚ್ಚೀಕಿ ಅನೇಕ ವರ್ಷಮ್ನಿಚ್ಚನೂ ಅಭಿಲಾಷೆ ವುಂಡೆದಾನ್ನಿಚ್ಚನೂ ನಾನು ಸ್ಪೇನ್ ದೇಶನ್ಕಿ ಪಯ್ಯೆನಪ್ಡು ನಾ ಮಾರ್ಗಮ್ಲಾ ಮೀ ದರ್ಶನನ್ನಿ ಸೇಯ್ಯಾಲನೆ ಅಭಿಪ್ರಾಯಮು ವುಂಡೆ .
24
ತರುವಾಯಮು ಮೀ ಸಹವಾಸಮ್ಲಾ ನಾಕಿ ಕೊಂಚ್ಚಮು ಸಂತೃಪ್ತಿ ಅಮೆಕಿ೦ದ್ದ ಮೀಳು ಆ ದೇಶನ್ಕಿ ನಾ ಪ್ರಯಾಣನ್ನಿ ಸಾಗಿಸ್ತಾರನಿ ನಂಬ್ತಾನು .
25
ಅಯ್ತೆ ಇಪ್ಡು ನಾನು ದೇವಜನಲ್ಕಿ ವಕ್ಕ ಧರ್ಮಕಾರ್ಯನ್ನಿ ಸೇಸ್ಸೋಡ್ ಅಯ್ಯಿ ಯೆರೂಸಲೆಮ್ಕಿ ಪತಾನೂ .
26
ಯಂದ್ಗು ಅಂಟ್ಟೆ ಯೆರೂಸಲೆಮ್ಲಾ ದೇವಜನಲ್ಲೊಗ ಬಡವಲ್ಕೊಸ್ಕರಮು ಕೊ೦ಚ್ಚಮು ದುಡ್ಲು ಸಹಾಯನ್ನಿ ಸೇಯ್ಯಲನಿ ಮೆಕೆದೊನ್ಯ ಅಖಾಯ ಸಿಮೆಯೋಳು ಇಷ್ಟನ್ನಿ ಪಡ್ನಾರು .
27
ದೀನಿ ಸೇಸ್ಸೇಕಿ ವೂಳು ಇಷ್ಟಮ್ನಿ ಪಡುಡೆದೀ ಕಾನ್ದನೆ ವೂಳು ವಾಳ್ ಹಂಗಿನೋಳ್ ಐನಾರು . ಯಂಟ್ಟ ಅಂಟ್ಟೆ ಅನ್ಯಜನಲು ವಾಳ ಆತ್ಮಸಂಬಂಧಮೈನಾ ಸಂಪತ್ತಿಕಿ ಪಾಲುಗಾರಲೈನಾ ಅಮೆಕಿ೦ದ್ದ ಲೋಕಸಂಬಂಧಮೈನಾ ಕಾರ್ಯಲ್ಲಾ ವಾಳ್ಕಿ ಸೇವೆಸೇಸ್ಸೇ ಹಂಗುಲಾವುನ್ನಾರ್ ಕದಾ .
28
ನಾನು ಈ ಕೆಲಸಮ್ನಿ ಮುಗಿಬಿಚ್ಕೊನಿ ಈ ಪ್ರೀತಿ ಫಲನೀ ಗಾಂನುಡೋಳ್ ವಶನ್ಕಿ ಯಥಾಕ್ರಮಮೈಯ್ಯಿ ಇಚ್ ಅಮೆಕಿ೦ದ್ದ ಮೀ ಮಾರ್ಗಮೈಯ್ಯಿ ಸ್ಪೇನ್ ದೇಶನ್ಕಿ ಪಾತ .
29
ಇದುಕಾಕು೦ಡ ಮೀ ಹತ್ರಕ್ಕಿ ವಚ್ಚೇನಪ್ಡು ಕ್ರಿಸ್ತುಡ್ನಿಚ್ಚ ಉಂಟೈಯ್ಯೇ ವರಲ್ನಿ ಹೇರಳಮೈಯ್ಯಿ ಹೆತ್ಕೊಸ್ತಾನ್ ಅನಿ ತೆಲಸ್ಸು .
30
ಮೀಳು ನಾಕ್ಕೊಸ್ಕರಮು ದೇವುಡ ಮುಂದ್ರ ಸೇಸ್ಸೇ ಪ್ರಾರ್ಥಾನೆಲಾ ನಾ ಜೊತ್ಲಾ ಬಲಿಯಮೈಯ್ಯಿ ವಿಜ್ಞಾಪಿಚ್ಕೊವಲನೀ ಮಾ ಕರ್ತುಡ್ ಐನಾ ಯೇಸು ಕ್ರಿಸ್ತುಡ ನೀಮಿತ್ತಮೈಯ್ಯಿ ಪವಿತ್ರಾತ್ಮನಿಚ್ಚನೂ ಪ್ರೀತಿಯ ನೀಮಿತ್ತಮೈಯ್ಯಿ ಮಿಮಲ್ನಿ ಅಡಿಕ್ಕೊಂಟಾನು .
31
ದೇವುಡು ನನ್ನೀ ಯೂದಾಯಮ್ಲಾ ವುಂಡ ಅವಿಧೇಯುಲಾ ಸೇತ್ಕಿ ತಪ್ಪಿಚಾಲನೀ ಯೆರೂಸಲೆಮ್ಕೊಸ್ಕರಮು ನಾನು ಸೇಸ್ಸೇ ಈ ಧರ್ಮಕಾರ್ಯನೀ ಗಾನುಂಡ ದೇವಜನಲ್ಕಿ ಹಿತಕರಮೈಯ್ಯಿ ಚೂಬಾಲನೀ ಪ್ರಾರ್ಥಾನೆ ಸೇಯಂಡ್ರಿ .
32
ಇಟ್ಟ ನಾನು ದೇವುಡ ಚಿತ್ತಾನುಸಾರಮೈ ಆನಂದ ವುಳ್ಲೋಡ್ ಅಯ್ಯಿ ಮೀ ಹತ್ರನ್ಕಿ ವಚ್ಚಿ ಮೀ ಜೊತ್ಲಾ ವಿಶ್ರಾಂತಿನೀ ಹೊಂದೆಕೈತಾದಿ .
33
ಶಾಂತಿದಾಯಕುಡು ಐನಾ ದೇವುಡು ಮೀ ಅದ್ರೂ ಜೊತ್ಲಾನೂ ವುಡ್ನಿ . ಆಮೆನ್ಶಾಂ ತಿದಾಯಕುಡು ಐನಾ ದೇವುಡು ಮೀ ಅದ್ರೂ ಜೊತ್ಲಾನೂ ವುಡ್ನಿ . ಆಮೆನ್