¹ ನ೦ಬಿಕೆಲಾ ದೃಢಮ್ಲೆನೋಳ್ನಿ ಸೇರಿಬಿಚ್ಕೊಂಡಿ . ಅಯ್ತೆ ಸಂದೇಹಾಸ್ಪದಮೈನಾ ಕಾರ್ಯಲ್ನಿ ವಾಳ್ ಮುಂದ್ರ ಚರ್ಚೆ ಸೇಯ್ಯದಂಡ್ರಿ . ² ಯಾವದೈತ್ನೂ ತಿನ್ನೋಚ್ ಅನಿ ನಂಬ್ತಾಡೂ . ನಂಬಿಕೆಲಾ ದೃಢಮ್ಲೆನೋಡು ಕಾಯಿಪಲ್ಯಲ್ನಿ ಮಾತ್ರ ತಿನ್ಟಾಡು . ³ ತಿನ್ನೋಡು ತಿನ್ದನೆವುಂಡೋಡ್ನಿ ಹೀನೈಚ್ಕೂಡ್ದೂ ; ತಿನ್ನೋಡು ತಿನ್ದನೆವುಂಡೋಡ್ನಿ ದೋಷಿ ಅನಿ ಎಣಿಚ್ಕೂಡ್ದೂ . ದೇವುಡು ಇದ್ರೂನ್ನು ಸೇರಿಚ್ಕೋನಾಡ್ಕದಾ . ⁴ ಮತ್ತೊಕ್ಕ ಸೇವಕುಡ ವಿಷಯಮೈಯ್ಯಿ ತೀರ್ಪುಸೇಸ್ಸೆಕಿ ನೂವ ಯೋಳು ? ವಾಡು ನಿರ್ದೊಷಿ ಅಯ್ಯಿ ನಿಲಚ್ಕಾಟ್ನು ದೋಷಿ ಅಯ್ಯಿ ಪೋಡತ್ನು ಅದಿ ವಾಡ್ ಯಾಜಮಾನುಡ್ಕಿ ಸೇರಿನ್ದಿ . ವಾಡು ನಿರ್ದೋಷಿ ಅಯ್ಯಿ ನಿಲ್ಲಿಚಲ್ ಪಡ್ತಾಡು . ವಾಡ್ನಿ ನಿಲ್ಲಿಬಿಚ್ಚೆಕಿ ಕರ್ತುಡು ಶಕ್ತಮೈನಾಡು . ⁵ ಒಕ್ಕಡು ಒಕ್ಕ ದಿನಕಿಂತ ಇಕೊಂಕ್ಕ ದಿನಮು ವಿಶೇಷಮ್ ಅನಿ ಎಣಿಸ್ತಾಡು ; ಇಕೊಂಕ್ಕಡು ಎಲ್ಲಾ ದಿನಲ್ನಿ ವಿಶೇಷಮ್ ಅನಿ ಎಣಿಸ್ತಾಡು ; ಪ್ರತಿಯೋಕ್ಕುಡು ವಾಡ್ ವಾಡ್ ಮನಸ್ಲಾ ನಿಶ್ಚಯಿಚ್ಕೊವು೦ಡಲಾ . ⁶ ದಿನಮ್ನಿ ಗಣ್ಯಸೆಸ್ಸೋಡು ಕರ್ತುಡ್ ಕೈಯ್ಯಿ ದಾನ್ನಿ ಗಣ್ಯಸೆಸ್ತಾಡು . ತಿನ್ನೋಡು ಕರ್ತುಡ್ ಕೈಯ್ಯಿ ತಿನ್ಟಾಡು . ವಾಡು ದೇವ ಸ್ತೋತ್ರಮ್ನಿ ಸೇಸ್ತಾಡ್ ಕದಾ . ತಿನ್ದನೆ ವುಂಡೋಡು ಕೂಡ ಕರ್ತುಡ್ ಕೈಯ್ಯಿ ತಿನ್ದನೆ ದೇವ ಸ್ತೋತ್ರಮ್ನಿ ಸೇಸ್ತಾಡು . ⁷ ಒಕ್ಕಡ್ ಐತ್ನೂ ವಾಡ್ ಕೈಯ್ಯಿ ಬದಕಲೇದು , ವಾಡ್ ಕೈಯ್ಯಿ ಸೇಚ್ಚಿ ಪಯಾಲೇದು . ⁸ ಮಾಮು ಬದಕ್ತೆ ಕರ್ತುಡ್ ಕೈಯ್ಯಿ ಬದಕುತಾಮೂ ; ಸೇಚ್ಚಿಪೋತೆ ಕರ್ತುಡ್ ಕೈಯ್ಯಿ ಸೇಸ್ತಾಮು ; ಬದಕತ್ನೂ ಸೇಚ್ಚುತ್ನೂ ಮಾಮು ಕರ್ತನೋಳು ⁹ ಯದ್ಗು ಅಂಟ್ಟೆ ಸೇಚ್ಚಿಪೊನೋಳ್ಕು , ಜೀವಿನ್ಚೋಳ್ಕು , ಒಡೆಯುಡು ಆಯ್ಯುಂಡಾಲನೆ ಕ್ರಿಸ್ತುಡು ಸೇಚ್ಚಿ ಜೀವ೦ತಮ್ ಅಯಾ . ¹⁰ ತಿನ್ದನೆ ವುಂಡೋಡ ನೀ ಸಹೋದುರುಡ ವಿಷಯಾಮೈ ನೂವ ತೀರ್ಪು ಸೇಸೇದಿ ಹೇಮಿ ? ತಿನ್ನೋಡ ನೀ ಸಹೋದುರುಡ್ನಿ ನೂವ ಹೀನೈಚ್ಚೆದೇಮಿ ? ಮಾಮಂದ್ರು ದೇವುಡ ನ್ಯಾಯಾಸನ ಮುಂದ್ರ ನಿಲಚಿಕೊವಲ್ ಕದಾ . ¹¹ ನಾ ಜೀವಮ್ ಆಣೆ ಅಂದ್ರೂ ನಾಕಿ ಅಡ್ಡ ಪೋಡ್ತಾರು , ಅಂದ್ರೂ ನನ್ನೀ ದೇವುಡ್ ಅನಿ ಪ್ರತಿಜ್ಞೆ ಸೇಸ್ತಾರು ಅನಿ ಕರ್ತುಡು ಸೊಪ್ನಾಡು ಅನಿ ದಾಸಿಂದ್ದಿ . ¹² ಇಟ್ಟುಡದಾನ್ಕಿ ಮಾಲ ಪ್ರತಿಯೋಕ್ಕುಡು ವಾಡ್ ವಾಡ್ ವಿಷಯಾಮೈ ದೇವುಡ ಮುಂದ್ರ ಉತ್ತರಮ್ನಿ ಇಯಲಾ . ¹³ ಅಂದ್ಗೂ ಇಕ್ಕಮಿಂದ್ದ ಒಕ್ಕಲ್ ವಿಷಯಮ್ಲಾ ಒಕ್ಕಲು ತೀರ್ಪು ಸೇಸ್ದಾನೆ ವುನ್ದಾಮು . ದಾನ್ಕಿ ಬದಲೈಯ್ಯಿ ಸಹೋದುರುಡ ಮುಂದ್ರ ಅಡ್ಡಿನ್ಕಾನಿ ಎಡತಡೆನೆ ಕಾನಿ ಹೇಯ್ಗುಡ್ದನಿ ತಿರ್ಮಾನಿಚ್ಕೊಂಡಿ . ¹⁴ ಯಾವ ಪದಾರ್ಥಮು ಸ್ವತ ಅಶುದ್ದಮ್ ಕಾದು ಅನಿ ಗೊತ್ತು . ಮಲ್ಲಿ ಕರ್ತುಡ್ಐನಾ ಯೇಸುಲಾ ವುಡ್ಕಾನೀ ದೃಢಮೈಯ್ಯಿ ನಮ್ನಾನು ; ಅಯ್ತೆ ಯಾವ್ದೇ ಒಕ್ಕ ಪದಾರ್ಥಮು ಅಶುದ್ದಮ್ ಅನಿ ಒಕ್ಕಡು ಭಾವಿಸ್ತೆ ಅದಿ ವಾಡ್ಕಿ ಅಶುದ್ದಮು . ¹⁵ ನೂವ ಸಿಸ್ಕನೆ ಆಹಾರಮ್ನಿಚ್ಚ ನೀ ಸಹೋದುರುಡ ಮನಸ್ಸಿಕಿ ನಪ್ಐತೇ ನೂವ ಪ್ರೀತಿಕಿ ಸರಿಅಯ್ಯಿ ಇಕ್ಕ ನಡಿಸ್ತಾವು೦ಡೋಡ್ ಕಾದು . ಯೋವಡ್ಕೈಯ್ಯಿ ಕ್ರಿಸ್ತುಡು ಪ್ರಾಣಮ್ನಿ ಇಚ್ನೋ ವಾಡ್ನಿ ನೀ ಇಷ್ಟಮೈನಾ ಆಹಾರಮ್ನಿಚ್ಚ ಸೇಡಪಗುಡ್ದೂ . ¹⁶ ಮಿಕುಂಡ ಮೇಲು ದೂಷಣೆಕಿ ಆಸ್ಪದಮ್ ಕಾಗುಡ್ದು . ಯದ್ಗು ಅಂಟ್ಟೆ ತಿನ್ನೇದೀ ¹⁷ ತಾಗೆದಿ ದೇವುಡ ರಾಜ್ಯಮ್ಕಾದು ; ನೀತಿ ಸಮಾಧಾನಮು ಪವಿತ್ರಾತ್ಮನಿ೦ಚ್ಚ ಉಂಟೈಯೇ ಆನಂದಮ್ ಅಯಿನ್ದಿ . ¹⁸ ಈ ಪ್ರಾಕಾರಮೈಯ್ಯಿ ಕ್ರಿಸ್ತುಡ ಸೇವೆನೀ ಸೇಸ್ಸೋಡು ದೇವುಡ್ಕಿ ಮೆಚ್ಚಿಕೆಅಯ್ಯಿ ಮನುಷ್ಯುಲ್ಕಿ ಸಂಭಾವಿತುಡ್ ಅಯ್ಯಿ ವುಂಡಾಡು ಅಂತೆ . ¹⁹ ಅಂದ್ಗೂ ಮಾಮು ಸಮಾಧಾನಕ್ಕೂ ಪರಸ್ಪರ ಭಕ್ತಿವೃದ್ದಿಕ್ಕೂ ಅನುಕೂಲಮ್ ಐಯುಂಡ ಎಲ್ಲಾನೀ ಸಾಧಿಚ್ಕೊಂದಾಮು . ²⁰ ದೇವುಡು ಕಟ್ಟಿನ್ದಾನಿ ನೂವ ಆಹಾರಮ್ನಿಚ್ಚ ಪೊಡೆಯದು . ಎಲ್ಲಾ ಪದಾರ್ಥಲು ಶುದ್ದಮೆ ; ಅಯ್ತೆ ತಿನ್ನಿ ಇಕ್ಕೊಕುಲ್ಕಿ ತೊಂದರೆ ಉಂಟುಸೇಸೇದಿ ಸೇಡ್ಡೆದೀ . ²¹ ಮಾಂಸನ್ನಿ ತಿನ್ನೇದಿಕಾನಿ , ದ್ರಾಕ್ಷರಸಮ್ನಿ ತಾಗೆದಿಕಾನಿ , ನೀ ಸಹೋದುರುಡ್ಕಿ ಅಡ್ಡಿನೀ ಉಂಟುಸೇಸ್ಸೇ ಬೇರೇ ಯಾವ್ದೇಕಾನಿ ಇಸ್ಪೇಟೆದೀ ಮೊಂಚ್ಚಿದ್ದಿ . ²² ನೀಕುಂಡ ನಂಬಿಕೆ ದೇವುಡ್ಕಿ ಮಾತ್ರ ಗೋಚರಮ್ ಅಯ್ಯಿ ನೀ ಮಟ್ಕಿ ವುಂಡ್ನಿ . ವಾಡೆ ಒಪ್ನಾಟ್ಟ ಕೆಲಸಮ್ ವಿಷಯಮ್ಲಾ ಇದಿ ಸರಿಯೋ ಸರಿಕಾದೋ ಅನಿ ಸಂಶಯಮ್ ಪಡದನೆ ವುಂಡೋಡೆ ಧನ್ಯುಡು . ²³ ಸಂಶಯಮ್ ಪಡಿ ತಿನ್ನೋಡು ಸಂಶಯಮ್ನಿಚ್ಚ ತಿನ್ನೇದಾನ್ನಿಚ್ಚ ದೋಷಿಯಯ್ನಾಡು . ಯವ್ದಾನ್ಕಿ ನಂಬಿಕೆ ಆಧಾರಮ್ ವುಂಡೆಲೇದೋ ಅದಿ ಪಾಪಮು .