¹ ಯೇಸು ಕ್ರಿಸ್ತುಡಿನ ವಂಶ್ಮು.ವಾಡು ದಾವಿದುಡ ವಂಶ್ಮೊಡು.ದಾವಿದುಡು ಅಬ್ರಾಮುಡು ವಂಶ್ಮೋಡು. ² ಅಬ್ರಾಮುಡು ಇಸಾಕುಡ್ನಿ ಪಡ್ಸ್ಕೊನೆ.ಇಸಾಕುಡು ಯಾಕೊಬುಡ್ನಿ ಪಡ್ಸ್ಕೊನೆ. ಯಾಕೊಬುಡು ಯೆಹೂದುಡ್ನಿ ವಾಡ್ ಅನ್ನ ದೊಮ್ಬುಡ್ನಿ ಪಡ್ಸ್ಕೊನೆ. ³ ಯೆಹೂದುಡು ತಾಮಾರ್ಲಾ ಪೆರಚುಡ್ನಿ ಜೆರಹುಡ್ನಿ ಪಡ್ಸ್ಕೊನೆ. ಪೆರೋಚುಡು ಹೆಚ್ಚ್ರೋಡುನಿ ಪಡ್ಸ್ಕೊನೆ. ⁴ ಹೆಚ್ಚ್ರೋಹನು ಆರಾಮುಡ್ನಿ ಪಡ್ಸ್ಕೊನೆ. ಆರಾಮುಡು ಅಮ್ಮಿನಾದಬುಡ್ನಿ ಪಡ್ಸ್ಕೊನೆ. ಅಮ್ಮಿನಾದಾಬುಡು ನಹಶೋಮುಡ್ನಿ ಪಡ್ಸ್ಕೊನೆ. ನಹಶೋನುಡು ಸಲ್ಮೊನುಡ್ನಿ ಪಡ್ಸ್ಕೊನೆ. ⁵ ಸಲ್ಮೊನುಡು ರಾಹಾಬುಲಾ ಬೋವೊಜುಡ್ನಿ ಪಡ್ಸ್ಕೊನೆ .ಬೋವೊಜುಡು ರೂತಲ ಒಬೆದುಡ್ನಿ ಪಡ್ಸ್ಕೊನೆ. ಒಬೇದುಡು ಇಷಯುಡ್ನಿ ಪಡ್ಸ್ಕೊನೆ. ⁶ ಇಷಯುಡು ದಾವಿದುಡ್ನಿ ಪಡ್ಸ್ಕೊನೆ. ದಾವಿದುಡು ಊರಿಯುಡಿನ ಪೆನ್ಡ್ಲಾಂ ಅಯುಂಡೆದಾ೦ಟ್ಲ ಸೋಲೋಮುಡ್ನಿ ಪಡ್ಸ್ಕೊನೆ. ⁷ ಸೋಲೋಮುಡು ರೆಹಾಬುಡ್ನಿ ಪಡ್ಸ್ಕೊನೆ. ರೆಹಾಬುಡು ಅಬೀಯುಡ್ನಿ ಪಡ್ಸ್ಕೊನೆ. ಅಬಿಯುಡು ಆಸನುಡ್ನಿ ಪಡ್ಸ್ಕೊನೆ. ⁸ ಆಸನು ಯೆಹೂಷ್ವಾಪಾಟನುಡ್ನಿ ಪಡ್ಸ್ಕೊನೆ.ಯೆಹೂಸ್ವಾಪಾಟುಡು ಯೆಹೊರಾಮುಡ್ನಿ ಪಡ್ಸ್ಕೊನೆ. ಯೇಹೊರಾಮುಡು ಉಜ್ಜೀಯುಡ್ನಿ ಪಡ್ಸ್ಕೊನೆ. ⁹ ಉಜ್ಜೀಯುಡು ಯೋತಾಮುಡ್ನಿ ಪಡ್ಸ್ಕೊನೆ. ಯೋತಾಮುಡು ಅಹಾಜುಡ್ನಿ ಪಡ್ಸ್ಕೊನೆ. ಅಹಾಜುಡು ಹಿಜ್ಕೀಯುಡ್ನಿ ಪಡ್ಸ್ಕೊನೆ. ¹⁰ ಹಿಜ್ಕೀಯುಡು ಮನಸ್ಸೇಯುಡ್ನಿ ಪಡ್ಸ್ಕೊನೆ. ಮನಸ್ಸೇಯುಡು ಆಮೋನುಡ್ನಿ ಪಡ್ಸ್ಕೊನೆ. ¹¹ ಆಮೋನುಡು ಯೋಷಿಯುಡ್ನಿ ಪಡ್ಸ್ಕೊನೆ. ಪ್ರಜುಲು ಬಾಬೇಲಿಕು ಸೆರಪಾಯಿನ ಸಮಯುಮ್ಲ ಯೋಷಿಯುಡು ಯೆಕೊನ್ಯನುಡ್ನಿ ವಾಡ್ ಅನ್ನ್ದಮ್ಮುಲ್ನಿ ಪಡ್ಸ್ಕೊನೆ. ¹² ಬಾಬೇಲಿಕಿ ಸೆರೆ ಪಾಯಿನ್ಮಿಂದ ಯೇಕೋನ್ಯುಡು ಶೆಯಲ್ತಿಯೇಲುಡ್ನಿ ಪಡ್ಸ್ಕೊನೆ. ಶೆಯಲ್ತಿಯೇಲುಡು ಜೆರುಬ್ಬಾಬೆಲುಡ್ನಿ ಪಡ್ಸ್ಕೊನೆ. ¹³ ಜೆರುಬ್ಬಾಬೆಲುಡು ಅಬಿಹೂದುಡ್ನಿ ಪಡ್ಸ್ಕೊನೆ. ಅಬಿಹೂದುಡು ಎಲ್ಕೀಮುಡ್ನಿ ಪಡ್ಸ್ಕೊನೆ. ಎಲ್ಕೀಮುಡು ಎಜೋರುಡ್ನಿ ಪಡ್ಸ್ಕೊನೆ. ¹⁴ ಅಜೋರುಡು ಸದೋಕುಡ್ನಿ ಪಡ್ಸ್ಕೊನೆ. ಸದೋಕುಡು ಅಖೀಮುಡ್ನಿ ಪಡ್ಸ್ಕೊನೆ. ಅಖೀಮುಡು ಎಲಿಹೂದುಡ್ನಿ ಪಡ್ಸ್ಕೊನೆ. ¹⁵ ಎಲಿಹೂದುಡು ಎಲಿಯಾಜುರುಡ್ನಿ ಪಡ್ಸ್ಕೊನೆ. ಎಲಿಯಾಜುರುಡು ಮತ್ತಾನುಡ್ನಿ ಪಡ್ಸ್ಕೊನೆ. ಮತ್ತಾನುಡು ಯಾಕೊಬುಡ್ನಿ ಪಡ್ಸ್ಕೊನೆ. ¹⁶ ಯಾಕೊಬುಡು ಮರಿಯಳು ಮೊಗುಡಾಯಿನ ಯೋಸೆಫುಡ್ನಿ ಪಡ್ಸ್ಕೊನೆ. ಈ ಮರಿಯಳ್ಲ ಕ್ರಿಸ್ತುಡನೆ ಯೇಸು ಪುಟ್ಟೆ. ¹⁷ ಇಟ್ಟ ಅಬ್ರಾಮುಡಿಂಚ ದಾವಿದುಡು ಗಂಟ ಒಟ್ಟ್ಕು ಪದ್ನಾಲ್ಗು ತಲ್ಕಾಯ್ಲು. ದಾವಿದುಡು ಮೊದ್ಲುಕೊನಿ ಬಾಬೇಲಿಕಿ ಸೆರೆ ಪಾಯಿನ ಗಂಟ ಪದ್ನಾಲ್ಗು ತಲ್ಕಾಯ್ಲು. ಬಾಬೇಲ್ಕಿ ಸೆರೆ ಪಾಯ್ನಪ್ಡಿಂಚ ಕ್ರಿಸ್ತುಡ್ಗಂಟ ಪದ್ನಾಲ್ಗು ತಲ್ಕಾಯ್ಲು. ¹⁸ ಯೇಸು ಕ್ರಿಸ್ತುಡಿನ ಜನನ್ಮು ಎಟ್ಟಆಯೆಅಂಟೆ ವಾಳ್ ತಲ್ಲಿಯಾಯಿನ ಮರಿಯಲ್ನಿ ಯೋಸೆಫುಡ್ಕಿ ನಿಶ್ಚಯ್ಮು ಸೆಸುಂಡಾಯಿ ವಾಳ್ ಇಚ್ಚೆಕಿಂತ ಮುಂದಾಯಿ ಅದಿ ಪವಿತ್ರಾಥ್ಮುಡಿ೦ಚಿ ನಿನ್ಮನ್ಸಾಯಿಂಡೆದಿ ತಿಲ್ಸ್ ವಚ್ಚೆ. ¹⁹ ಆಯ್ತೆ ದಾನ್ ಮೊಗ್ಡಾಯಿನ ಯೋಸೆಫುಡು ಸಜ್ಜುಡಾಯುಂಡಿ ದಾನ್ನಿ ಬೈಲ್ಕು ಎತ್ಕೊಚ್ಚೇಕಿ ಮನ್ಸ್ಲೇಕುನ್ನ, ಯೋಳ್ಕು ಗೊತ್ತಕುಣ್ಣ ದಾನ್ನಿ ಇಡ್ಸಿಡಲ ಅನ್ಕೊನುಂಡೆ. ²⁰ ವಾಡು ದಾನ್ನಿ ಯೋಚ್ನುಮ್ನಿ ಸೇಸ್ತಾವುನ್ನಪ್ದು ಕರ್ತುಡಿನ ದೂತುಡು ವಾಡ್ಕಿ ಕನ್ಸ್ಲಾ ಕನ್ಬಿಚ್ಚ್ಕೊನಿ ಯೋಸೇಫುಡ ದಾವಿದುಡು ವಂಶ್ಮೂಡ, ನೀ ಪೆನ್ಡ್ಲಾಮಾಯಿನ ಮರಿಯಳ್ನಿ ಸೇರ್ಸ್ಕೊನೆಕಿ ಅಂಜ್ಕೊವದ್ದು ಗರ್ಬ್ಮು ಪವಿತ್ರಾತ್ಮುಡಿನ್ಚನೆ ಆಯಿಂದ. ²¹ ಆದಿ ಒಕ್ಕ ಕೊಡ್ಕ್ನಿ ಪುಟ್ಟಿಸ್ತಾದಿ ನುವ್ವ ವಾಡ್ಕಿ ಯೇಸು ಅನಿ ಪೇರ್ ಪೆಟ್ಟಾಲ . ಎಂದ್ಕಂಟೆ ವಾಡೆ ಆ ಜನಲ್ನಿ ವಾಳ್ ಪಾಪಲ್ಮ್ಲಿಂಚ ಇಡ್ಬಿಚ್ಚಿ ಕಾಸೋಡು ಅನೆ. ²² ಕರ್ತುಡು ಪ್ರವಾದುಡು ಮುಖಾಂತರ್ಮು ಸೊಪ್ಪಿನ ಮಾಟ ನೆರ್ವೆರಟ್ಗ ಇದಂತ ನಡ್ಸೆ. ಆ ಮಾಟ ಎಮಂಟೆ ²³ ಇಗೋ ಒಕ್ಕ ಕನ್ನಿಕೆ ನಿನ್ಮನ್ಸಾಯಿ ಕೊಡ್ಕ್ನಿ ಪಡ್ಸ್ತಾಡಿ , ವಾಡ್ಕಿ ಇಮ್ಮಾನುವೇಲುಡು ಅನೆ ಪೇರ್ ಪೆಡ್ತಾರು ಅನೇದಿ. ದೇವುಡು ಮಾ ಜೊತ್ಲ ಉಂಡಾಡನಿ ಅರ್ತ್ಮು. ²⁴ ಅಪ್ಡು ಯೋಸೆಫುಡು ನಿದ್ರಿಂಚ ತಿಲ್ಸಿ ಲೇಸಿ ಕರ್ತುಡ ದೂತುಡು ಅಪ್ಪಣನಿ ಇಚ್ನಟ್ಗ ವಾಡ್ ಪೆನ್ಡ್ಲಾಮ್ನ್ನಿ ಸೇರ್ಸ್ಕೊನೆ. ²⁵ ಆಯ್ತೆ ಆದಿ ಮೊಗ್ಸಿನೋಡ್ನಿ ಪಡ್ಸ್ಕೊನೆ ಗಂಟ ದಾನ್ನಿ ಅರ್ಸ್ಕೊಲೇ. ಸಿನೋಡ್ಕಿ ಯೇಸು ಅನಿ ಪೇರ್ ಪೆಟ್ಟೆ.