¹ 1 ಅರಸುಡಾಯಿನ ಹೆರೋದುಡು ದಿನುಮ್ಲ ಯೂದಾಯ್ಮು ಸೀಮೆ ಬೆತ್ಲೆಹೇಮ್ ಅನೆ ಊರ್ಲಾ ಯೇಸು ಪುಟ್ನಪ್ಪ್ದು ಮೂಡಣ್ಮು ದೇಶ್ಮು ಜೋಯಿಸ್ಲು ಯೆರೂಸಲೆಮ್ಕಿ ವಚ್ಚಿ - ² 2 ಯೆಹೂದ್ಯುಲ ಅರಸುಡಾಯಿ ಪುಟ್ಟ್ನೋಡು ಯಾನುಂಡಾಡು? ವಾಡ್ನಿ ಸೂಚಿಂಚೆ ನಕ್ಷತ್ರುಮ್ನಿ ಮಾಮು ಮೂಡಣ್ಮು ದೇಶುಮ್ಲ ಕನಿ ವಾಡ್ಕಿ ಅಡ್ಡಂ ಪಡೇಕಿ ವಸ್ತ್ಮಿ ಅನ್ರಿ. ³ 3 ದೀನ್ನಿ ಇನಿ ಅರಸುಡಾಯಿನ ಹೆರೋದುಡು ವಾಡ್ ಜೊತ್ಲೋ ಯೆರೂಸಲೆಮೊಳoದ್ರು ಕಳವಳ್ಮ್ ಪಡ್ರಿ. ⁴ ವಾಡು ಯೆಹೂದ್ಯುಲ ಅನ್ನೀ ಮಹಾಯಾಜಕುಲ್ನಿ ಶಾಸ್ತ್ರಿಲ್ನಿ ಸೇರ್ಬಿಚ್ಚಿ ಕ್ರಿಸ್ತುಡು ಪುಟ್ಬೆಕಾಯಿಂಡೆದಿ ಯಾನ ಅನಿ ವಾಳ್ನಿ ಅಡ್ಗೆ. ⁵ ವಾಳು ವಾಡ್ಕಿ ಯೂದಾಯಿನ ಬೆತ್ಲೇ ಹೇಮ್ಲಾನೆ, ಎಂದ್ಕಂಟೆ- ⁶ ಯೆಹೂದ ಸೀಮಿನ ಬೆತ್ಲೆಹೇಮೆ, ಯೆಹೂದಿನ ಮುಕ್ಯುಂ ಪಟ್ಟಣಮ್ಲ ನುವ್ವ ಎಂತ ಮಾತ್ರುಮ್ಕಿ ಸನ್ಡಿಕಾದು. ಒಕ್ಡು ಅಧಿಪತುಡು ನೀನೋನಿಂಚಾನೆ ಪಾತಾಡು, ವಾಡು ನಾ ಪ್ರಜೆಯಾಯಿನ ಇಸ್ರಾಯೇಲುಲ್ನಿ ಆಳೋಡು. ಅನಿ ಪ್ರವಾದುಲು ಮುಖಾಂತರ್ಮು ರಾಸಿಂದಿ ಅನಿ ಸೋಪ್ರಿ. ⁷ ಅಪ್ಡು ಹೆರೋದುಡು ಯೋಳ್ಕು ತಿಲ್ಸಿನಟ್ಗ ಆ ಜೋಯಿಸುಲ್ನಿ ಪಿಲ್ಬಿಂಚಿ ಆ ನಕ್ಷತ್ರುಮು ಕನಿನ ಕಾಲುಮ್ನಿ ವಾಳ್ ತೊಟ್ಟಿಂಚ ಬಾಗ ತಿಸ್ಕೋನಿ ⁸ ಮೀರು ಪಾಯಿ ಆ ಸಿನೋಡ್ ವಿಷಯುಮ್ಲ ಬಾಗ ವಿಚಾರಮ್ನಿ ಸೇಯಂಡ್ರಿ, ಆದಿ ಸಿಕ್ಮಿಂದ ನಾಕಿ ತಿಲ್ಬಿಯಂಡ್ರಿ, ನಾನು ವಚ್ಚಿ ದಾನ್ಕಿ ಅಡ್ಡಂ ಪಡಾಲ ಅನಿ ಸೊಪ್ಪಿ ವಾಳ್ನಿ ಬೆತ್ಲೆಹೇಮ್ಕು ಅಂಪಿನ್ಚೆ . ⁹ ವಾಳು ಅರಸುಡಿನ ಮಾಟ್ನಿ ಇನಿ ಪಾಯ್ನಪ್ಡು ಮೂಡಣ್ಮು ದೇಶುಮ್ಲ ಕನ್ನ ನಕ್ಷತ್ರುಮು ವಾಳ್ ಮುಂದ್ರ ಮುಂದ್ರ ನಡ್ಸಿ ಕೂಸುಂಡೆ ಜಾಗ್ಮಿಂದ ವಚ್ಚಿ ನಿಲ್ಪಡೆ. ¹⁰ ವಾಳು ನಕ್ಷತ್ರುಮ್ನಿ ಕನಿ ಜಾಸ್ತಿ ಸಂತೋಷ್ಮು ಪಡ್ರಿ. ¹¹ ಮಲಿ ಆ ಇಂಟ್ಲೇಕಿ ಪಾಯಿ ಅ ಕೂಸ್ನಿ ದಾನ್ ತಲ್ಲಿಯಾಯಿನ ಮರಿಯಳು ಜೊತ್ಲೋ ಕನಿ ದಾನ್ಕಿ ಸಾಷ್ಟoಗ್ಮುನಮಸ್ಕಾರ್ಮು ಸೇಸಿ ವಾಳ್ ಗಂಟ್ಲುನಿ ಇಪ್ಪಿ ದಾನ್ಕಿ ಚಿನ್ಮು ದೂಪ್ಮು ರಕ್ತ್ಮುಭೋಳಲ್ನಿ ಕಾಣುಕ್ಮಾಯಿ ಇಚ್ರಿ. ¹² ಆಮಿಂದ ದೇವುಡು ಕನುಸ್ಲ ವಾಲ್ಕಿ ಮೀರು ಹೆರೋದುಡು ಬಳಿಕಿ ತಿರಿಕೊನಿ ಪೋವ್ಕೂಡ್ದನಿ ಅಪ್ಪಣ್ಮ್ನಿ ಇಚ್ಚಿಂದಾನಿಂಚ ವಾಳು ಇಂಕೋಕ್ಟಿ ದಾವಿಂಚ ವಾಳ್ ದೇಶುಮ್ಕಿ ಪಾಯ್ರಿ. ¹³ ವಾಳು ಪಾಯಿನ್ಮಿಂದ ಕರ್ತುಡ್ ದೂತುಡು ಯೋಸೆಫುಡ್ಕಿ ಕನ್ಸ್ಲಾ ಕನ್ಬಿಚ್ಕೋನಿ- ನುವ್ವ ಲೇಸಿ ಈ ಕೂಸ್ನಿ ದಾನ್ ತಲ್ಲಿನಿ ತೊಡ್ಕೋನಿ ಐಗುಪ್ತ ದೇಶ್ಮುಕಿ ಪಾರ್ಪಾಯಿ ನಾನು ಮೀಕು ಸೊಪ್ಪೆಗಂಟ ಅನ್ನೇ ವುಂಡು, ಹೆರೂದುಡು ಈ ಕೂಸ್ನಿ ಸೋಮ್ಪೆಯಲ ಅನಿ ದಾನ್ನಿ ಹುಡುಕ್ತಾ ವುನ್ಡಾಡು ಅನೆ. ¹⁴ ಅಪ್ಡು ವಾಡು ಲೇಸಿ ಕೂಸ್ನಿ ದಾನ್ ತಲ್ಲಿನಿ ರಾತ್ರಿವೇಳ್ಳ ತೊಡ್ಕೋನಿ ಐಗುಪ್ತ ದೇಶುಮ್ಕಿ ಪಾಯಿ ಹೆರೂದುಡು ಸಚ್ಚಿಪಾಯೇಗಂಟ ಆನೆ ವುಂಡೆ. ¹⁵ ದೀನಿಂಚಿ - ನಾ ಕೊಡುಕ್ನಿ ಐಗುಪ್ತ್ಮು ದೇಶ್ಮ್ನೋನಿಂಚ ಪಿಲ್ಚೆ ಅನಿ ಕರ್ತುಡು ಪ್ರವಾದಿಲು ಮುಖಾಂತ್ರುಮು ಸೊಪ್ಪಿನ ಮಾಟ ನೆರ್ವೇರೆ. ¹⁶ 16 ಅಪ್ಡು ಹೆರೋದುಡು ನಾಕಿ ಜೋಯಿಸ್ಲು ಮೊಸ್ಮ್ ಸೇಸ್ರಿ ಅನಿ ತಿಲ್ಸಿ ಕೋಪ್ಮಾಯಿ ಆಳ್ನಿ ಅಂಪಿಚ್ಚಿ ವಾಳು ಜೋಯಿಸುಳವಾಲಿಂಚ ತಿಲ್ಸ್ಕೊನುಂಡೆ ಕಾಲಮ್ಕಿ ಸರಿಯಾಯಿ ಬೆತ್ಲೆಹೇಮಿದಾನ್ಟ್ಲೋನು ದಾನಿನ ಅನ್ನಿ ನೆರೆಹೊರೆ ಹಳ್ಳಿಲ್ಲಾನು ರೊಂಡು ಯಾಡದಿನೋನಿನ ಮೊಗ್ಸೀನೋಳ್ನಿ ಅಂದ್ರುನ್ನಿ ಸೊಮ್ಪೇಬಿಚ್ಚೆ. ¹⁷ ಯೆರೆಮಿಯುಡು ಅನೆ ಪ್ರವಾದಿಡು ಸೊಪ್ಪಿನ ಮಾಟ ಆ ಕಾಲುಮ್ಲ ನೆರ್ವೇಸೆ. ಅದೇಮಂಟೆ- ¹⁸ ರಾಮಲ ಬೊಬ್ಬೇಲು ಇನೆ. ಆಳೇದಿ ಬಹುಲ ಗೋಳಾಟ್ಮು ಉಂಟಾಯೆ.ರಾಹೇಲುಲು ದಾನ್ ಬಿಡ್ಳುಕೊಸ್ಕರ್ಮು ಏಡ್ಸಿ ಏಡ್ಸಿ ವಾಳು ಲೇಕುನ್ನಪಾಯಿಂಡೆದಾಂಕಾಯಿ ಸಮಾದಾನ್ಮು ಸೇಸ್ಕೊನೆಕಿ ಆಯ್ಕುನ್ನ ವುಂಡೆ ಅನೇದಿ. ¹⁹ ಹೆರೋದುಡು ಸಚ್ಚಿಪಾಯಿನ್ಮಿಂದ ಐಗುಪ್ತ ದೇಶುಮ್ಲ ಕರ್ತುಡಿನ ದೂತುಡು ಯೋಸೆಫುಡ್ಕಿ ಕನ್ಸ್ಲಾ ಕನ್ಬಿಚ್ಕೊನಿ - ²⁰ 20 ನುವ್ವ ಲೇಸಿ ಕೂಸ್ನಿ ದಾನ್ ತಲ್ಲಿನಿ ತೋಡ್ಕೋನಿ ಇಸ್ರಾಯೇಲ್ ದೇಶುಮ್ಕಿ ಪೋ, ಕೂಸಿನಿ ಪ್ರಾಣುಮ್ನಿ ಸಿಯಾಲ ಅನ್ಕೊನುಂಡೆವಾಳ್ಳು ಸಚ್ಚಿಪಾಯ್ರಿ ಅನಿ ಸೊಪ್ಪೇ. ²¹ ಅಪ್ಡು ಯೋಸೆಫುಡು ಲೇಸಿ ಕೂಸ್ನಿ ದಾನ್ ತಲ್ಲಿನಿ ತೊಡ್ಕೋನಿ ಇಸ್ರಾಯೇಲ್ ದೇಶುಮ್ಕಿ ವಚ್ಚೆ. ಆಯ್ತೆ ಅರ್ಖೇಲಾಯುಡು ವಾಳ್ ತಂದ್ರಿಯಾಯಿನ ಹೆರೋದುಡ್ಕಿ ಬದ್ಲಿಕಿ ಯೂದಾಯುಮ್ನಿ ಆಲ್ತಾಡನಿ ಅಡ್ಗಿ ಆನ್ಕು ಪಾಯೇಕಿ ಅಂಜ್ಕೊನೆ. ಅಪ್ಡು ವಾಡು ಕನ್ಸ್ಲೋ ದೇವುಡಿಲ ಅಪ್ಪಣೆನಿ ಹೊಂದ್ಕೊನಿ ಗಲಿಲಾಯ ಸೀಮೆಕಿ ಪಾಯೇ. ²² ಮಲಿ ನಜರೇತನೆ ಊರ್ಕಿ ವಚ್ಚಿ ಆನ ಇಲ್ಲು ಸೇಸ್ಕೊನಿ ವುಂಡೆ. ದೀನ್ನಿಂಚ ನಜರಾಯೇ ²³ ಅನೆ ಪೇರು ವಾಡ್ಕಿ ವಸ್ತಾದಿ ಅನಿ ಪ್ರವಾದಿಲಿಂಚ ಸೊಪ್ಪಿ೦ಚಿನ ಮಾಟ ನೆರ್ವೇರೆ.