¹ . ಪ್ರತಿಯೋಕ್ಡು ಪೇದ್ ಯಾಜಕುಡು ಮನುಷ್ಯುಡು ನೋನಿಂಚ ಆರ್ಬಿಚ್ಚಲ್ಪಡಿ ನೋಡಾಯುಂಡಿ ಮನುಷ್ಯುಲುಕೋಸ್ಕರ್ಮು ದೇವುಡು ಕಾರ್ಯಲ್ನಿ ಜರಿಚ್ಚೆದಾನ್ನಾಯಿ ನೆಮೀಚ್ಚೆ ಪಡಿನೋಡಾಯಿತ್ತಾಡೆ ವಾಡು ವಾಳ್ಕೊಸ್ಕರ್ಮು ಕಾಣಿಕೆಲ್ನಿ ಪಾಪ್ಮು ನಿವಾರಣ್ಮುಕಾಯಿ ಯಜ್ಞಮ್ಲುನಿ ಸಮರ್ಪಿಯಾಲ . ² ತಾನು ಬಲಹಿನುಡು ಆಯುಂಡೆ ದಾನ್ನಿಂಚ ವಾಡು ಜ್ಞಾನ್ಮು ಲೆನಿನೋಳ್ನಿ ಮಾರ್ಗುಮು ತಪ್ಪಿ ನಡ್ಸೋಳ್ಳಿ ತಾಳ್ಮೆಯಿಂಚ ಸಹಿಚ್ಚಿಕೊನೆದಾನ್ನಿ ಶಕ್ತುಡಾಯುಂಡಾಡು. ³ ಆ ಬಳಹೀನತ್ಮು ಕಾರ್ಲುಮಿಂಚ ವಾಡು ಜನಲುಕೋಸ್ಕರ್ಮು ಎಟ್ಟೋ ಅಟ್ಟೆನೆ ತನ್ಕೊಸ್ಕರ್ಮು ಪಾಪ್ಮು ನಿವಾರಣ್ಮು ಅರ್ಥಮಾಯಿ ಯಜ್ಞಮ್ಲುನಿ ಸೇಸೋಡಾಯಿನಾಡು . ⁴ . ಇದ್ಕಾಕುನ್ನ ಯೋಡು ವಾಡಟ್ಗೆ ವಾಡೆ ಈ ಗೌರವ್ಮುನಿ ವಹಿಚ್ಚೆಕೊಕುನ್ನ ದೇವುಡಿಂಚ ನೇಮಿಚ್ಚಲ್ಪಡಿ ನೇಮಿಚ್ಕೊoಟಾಡು ಆರೋನುಡು ಸಹ್ಮು ದೇವುಡಿoಚಾನೆ ನೇಮಿಚ್ಚೆಲ್ಪಡಿ ಆ ಗೌರವ್ಮುನಿ ವಹಿಚ್ಕೊನ್ನೇ . ⁵ . ಅಟ್ಟಿನೆ ಕ್ರಿಸ್ತುಡು ಸಹ್ಮು ತನ್ನಿ ಘನ್ಮು ಪಡಿಚ್ಕೋನಿ ವಾಡ್ನಿ ವಾಡೆ ಪೆದ್ ಯಾಜಕುಡಾಯಿ ಸೇಸ್ಕೊಲೆದು ಆಯ್ತೆ ನಾಕಿ ನುವ್ವ ಕೊಡ್ಕ ನಾನೇ ಈ ಪೋದ್ದು ನಿನ್ನಿ ಪಡ್ಸ್ತಾನು ಅನಿ ಸೋಪ್ಪಿನೋಡು ಈ ಗೌರವ್ಮುನಿ ವಾಡ್ಕಿ ಇಚ್ಛೆ . ⁶ ವಾಡು ಇಂಕೋಕ್ಟಿ ಸ್ಥಳ್ಮುಲ ನುವ್ವ ಸದಾಕಾಲ್ಮು ಮಲ್ಕಿ ಜೇದೆಕನ ತರಹದ ಯಾಜಕುಡು ಅನಿ ಸೋಪ್ತಾಡು . ⁷ . ಕ್ರಿಸ್ತುಡು ತಾನು ಭೂಲೋಕ್ಮುಲವುಂಡೆನಪ್ಡು ಮರಣ್ಮುಕಿ ತಪ್ಪಿಚ್ಚಿ ಕಾಪಾಡ ಶಕ್ತುಡಾಯಿಯೋಡಿಕಿ ಬಲ್ಮಾಯಿ ಕೂಸ್ತ ಕನ್ನೊಳ್ಳಿ ಸುರ್ಬಿಸ್ತ ಪ್ರಾರ್ಥನ್ಮು ವಿಜ್ಞಾಪನ್ಮುಲ್ನಿ ಸಮರ್ಪಿಚ್ಚಿ ದೇವುಡು ಮಿಂದಿನ ಭಯ್ಮುಭಕ್ತಿ ನಿಮಿತ್ಮು ಇನಿನಲ್ಪಡೆ . ⁸ . ಇಟ್ಟೆ ವಾಡು ಕೊಡ್ಕಾಯುಂಟೇನು ಅನುಭವಿಚ್ಚಿನ ನಪ್ಪಿನಿಂಚಾನೆ ವಿಧೇಯತ್ಮುನಿ ನೆರ್ಸಿಕೊನೆ . ⁹ . ಇದ್ಕಾಕುನ್ನ ವಾಡು ನೆದ್ದಿಕಿ ವಚ್ಚಿ ದೆವುಡಿಂಚ ಮೇಲ್ಕ ಬೇದೆಕುಡು ತರ್ಮು ಪೆದ್ ಯಾಜಕುಡು ¹⁰ ಅನ್ಬಿಚ್ಕೊನೋಡಾಯಿ ತನ್ನಿ ವಿರೋದ್ಮಾಯಿ ವುಂಡೋಳoದ್ರುಕು ನಿರಂತ್ರುಮು ಆಯಿನ ರಕ್ಷಣ್ಮುಕಿ ಕಾರಣ್ಮು ಆಯೇ . ¹¹ ಈ ವಿಷಯುಮ್ಲ ಮಾಮು ಸೋಪ್ಪ ಬೇಕಾಯಿನ ಮಾಟ ಹೆಕ್ವ ವುಂಡಾದಿ ಆಯ್ತೆ ಮೀ ಶವು ಮುಂದ್ಮು ಆಯಿಂದಾನ್ನಿಂಚ ದಾನ್ನಿ ವಿವರಿಚ್ಚೆದಿ ಕಷ್ಟುಮು ಆಯಿಂದಿ . ¹² . ಕಾಲ್ಮುನಿ ಸೂಸ್ತೆ ಮೀರು ಇಂತ್ನೋನ ಬೋದಕುಲು ಅವಾಲನುಂಟೇನು ಒಕ್ಡು ಮೀಕಿ ದೈವೋಕ್ತಿಲು ಪಾಠ್ಮುಲ್ನಿ ತಿರಿಗಿ ನೆರ್ಬಿಯಾಲಾಯಿಂದಿ ಮೀರು ಪಾಲು ತಾಗೋಳು ತಕ್ಮೊಳೆ ಹೊರ್ತು ಗಟ್ಟಿಯಾಯಿನ ಆಹಾರ್ಮುನಿ ತಿನೆತಕ್ಮೋಳು ಕಾದು . ¹³ . ಪಾಲು ಬೇಕಾಯಿನೊಡು ಕೂಸಿನಟ್ಟವುಂಡಿ ನೀತಿವಾಕ್ಯುಮ್ಲ ಅನುಭವ್ಮು ಲೆನೋಡುಆಯಿನಾಡು . ¹⁴ . ಗಟ್ಟಿಯಾಯಿನ ಆಹಾರ್ಮು ಪ್ರಾಯಸ್ಥುಲುಕೊಸ್ಕರ್ಮು ಅಂಟೆ ಜ್ಞಾನೆಂದ್ರಿಯಲ್ನಿ ಸಾಧನ್ಮುಯಿಂಚ ಶಿಕ್ಷಿಚ್ಕೋನಿ ಇದಿ ಮಂಚಿದಿ ಆದಿ ಶೆಡ್ಡೆದಿ ಅನೆ ಭೇದ್ಮುನಿ ತಿಳ್ಸಿನೋಳುಕೋಸ್ಕರ್ಮು ಆಯಿಂದಿ .