¹ Mukezye hanu, enwe mu fumite, mulire no ku kumba kakuli e shando limi kezyera. ² E chifumu chenu chi borete, ne zizyabaro zenu siza liwa ku maharantene. ³ E gauda ne chilivera zenu sezabi ne ngura. E ngura yazo yaraba bupaki bumi kwata. Yara mana mibili yenu mbwe muliro. Mubikire zi chifumu chenu ku ma manikizo a mazyuba. ⁴ Mubone, aa nga masheleni aba bereki benu- a masheleni aya nimwa kwatira aba niba zyangura mawa enu. Mi echiliro chaba zyanguli nichaka shuwahara mu matwi o Nfumu atu rwira. ⁵ Nimwahara nenja mu fasi nokuli kora. Nimwa nunisa e myezyo yenu mu zyuba lyoku yaya. ⁶ Ni mwa atura no kuyaya o muntu a rukite. Kali na kana. ⁷ Mulikete, bakwangu, mbita nakezye o Nfumu. Mutonde, ozyo alima alindira kuzyangura nenja mwibu. A lindira nali kekete, mbita zishiwana onvura wo kujora niwa mamanikizo. ⁸ Nenwe, bulyaho, mulikete. Mugore myezyo, kakuli okukezya ko Nfumu kwina hafwihi. ⁹ Mwasha biraeli, bakwangu, kulizokera, koti ye ne mureke ku atuliwa. Muwene, muatuli azyimene ha chizyi. ¹⁰ Muhinde mutara, bakwangu, kuku shanda no ku gora myezyo kwa ba porofita, aba kawamba muzina lyo Nfumu. ¹¹ Muwene, tu hinde bena niba kwatisa ye ba fwiyawirwe. Nimwa shuwa ze shando lya Jobo, kame muzyi no butokwa bo Nfumu, buti a nfwira enshe ne chishemo. ¹² Hawiru lyezi, bakwangu, mwasha fwizyi, ke wiru ne hanshi, kapa koku konkeswa. Shali bulyaho, Oreke o "Kuzumina" kwako ibe "Kuzumina" kame "Kukana" kwako ibe "Kukana", koti mwaha gwili munkaturo. ¹³ Kwina zyumunya kwenu a kere mushando? Mumu reke a rapere. Kwina zyo a boterwa? Mumu reke a zyimbe njimbo ze tubo. ¹⁴ Kwina zyumunya kwenu a rwara? Mumu reke a kuwe bakuru be nkereke, bake bamu raperere. Bamu singe mafuta muzina lyo Nfumu. ¹⁵ E ntapero ye ntumero ihoza murwere, mi no Nfumu mbwa mubuse. Heba na tenda zibbi, Nyambe mbwa mukwatire. ¹⁶ Muwambe e zibbi zenu ku bayenzenu, mi muli raperere, koti ye muholisiwe. E ntapero yo muntu a chenete i gorete hawa mu mitendo yayo. ¹⁷ Eliya kali muntu mbo ndiswe. Na rapera cho buniti ye onvura asha shoki, kame kali na shoka mu chishi ke myaka yo tatwe ne myezi ye anja ni konke. ¹⁸ Kame Eliya oku rapera kame. E wiru lyoku tira onvura, mi nefasi lyoku reta eziyangantu. ¹⁹ Bakwangu, heba zyumunya kwenu azwa mwi niti, zyomunya aku mutengurura, ²⁰ ozyo muntu azyibe ye yenshe ozyu a zora ozyo a tenda zibbi kwi njira zakwe mbwa muhaze kurufu, mi mbwa zike e zibbi zingi.