¹ Jakobo, omwika wa Nyambe newa Nfumu Jeso Kiresite, ku mishobo ye kumi ni tobire ikere kunje ya Isilaele: murumere. ² Bakwangu, muzihinde ke ntabo, hamu si liwana mu bukababu bungi. ³ Muzyi ye entatubo ye entumero yenu i reta ku kwatisa. ⁴ Musiye oku kwatisa kumanikize o mutendo wateni, kuti ye muhure ho kusepa bulyo kwa Kireste noku tenda omu ashakira muzintu zonshe. ⁵ Kono heba zyumwinya kwenu ashaka butali, abu kumbire kwa Nyambe, ozyo aha ko bungi ozyo ka kalihili bena ba kumbira, mi mbwa muhe. ⁶ Kono akumbire kentumero, nazyi ye mbwamu tabe Nyambe. Kakuli yenshe ozyo akakana afwana mbwe nji kumpesi lyomu wate litimbiwa ku ruho noku twaliwa konshe-konshe. ⁷ Mi ozyo muntu asha hupuli kuti ye mbwa wane chitu kwa Nyambe. ⁸ O muntu wa bulyaho akwesi engana zobire, kakwatisiki muzintu zonshe. ⁹ Musiye ozyo kali wanini ali tembe ke chibaka chakwe chi hanzi, ¹⁰ kono omukwame ozyo afumite kechibaka chakwe chi dana, kakuli mbwa fwe shina empalisa yomu mutemwa ina mu sozu. ¹¹ Kakuli ezyuba liñatura no kuhisa kwalyo mi lizyumisa e sozu. E mpaliisa yiwa, no burotu bwayo bumana. Kenjira iswana, o mukwame zyo afumite mbwa manine hakati ko musipili. ¹² Akwesi nfuyauzi muntu ozyo a kwatisa mu nako ye miliko. Kakuli shaka na mane kuwora entatubo, nara wana o mushukwe wo buharo, owo niwa sepiswa kwabena bashaka Nyambe. ¹³ Kwasabi omuntu ena mu miliko ozyo ata ye, "Ndi Nyambe andi lika," kakuli Nyambe kalikiwa ku chibi, mi kame neye ka liki muntu. ¹⁴ Kono muntu yenshe a likiwa kuya ke ntakazo yakwe, imu kokorora noku muhomenena. ¹⁵ Cware hai si paka entakazo, ireta e chibi. Mi aho shi chakuli hawa e chibi, chireta efu. ¹⁶ Bakwangu bashakiwa, mwasha homenenwa. ¹⁷ Empo ndotu ne mpo irukite izwa kuwiru. Ikezya hanshi kukazwa ku Shi wa mamuni. Kwakwe kwazya kuzoka kapa o munzure kebaka lyoku zoka. ¹⁸ Nyambe na liketera kutu reta ke zywi lye niti, kuti ye tube mufuta we ziyangantu zama tatikiro kuzintu zonshe ezi na tenda. ¹⁹ Muzizyi ezi, bakwangu bashakiwa: kube ye muntu yenshe ahwere ku kushuwa, noku liyeha ku kubenga. ²⁰ Kakuli hasi benga o muntu kawoli kutenda musebezi wo kuchena kwa Nyambe. ²¹ Mi cware mu zwise masira e chibi onshe no bungi bo bubbi. Muku li bozekeza hanshi mutambure ezywi elyo nilya byarwa, elyo liwora ku haza o myuzya yenu. ²² Mube batendi be zywi kali bashuwi bulyo, nemu lihoma. ²³ Kakuli heba muntu mushuwi we zwyi kono kali mutendi, afwana mbwe o muntu zyo atonda echifateho chakwe mucimboni. ²⁴ Ali tonda mo mi cware azwa ho noku yenda mi haho bulyo azibara omu afwanina. ²⁵ Kono o muntu ozyo atonda nenja mu murao murotu we ntukuruho, mi azwira habuso kutenda bulyaho, kali kuba bulyo mushuwi ozyo azibara, ozyo mukwame mbwawane enfuyauzi mu zitendantu zakwe. ²⁶ Heba muntu ali hinda ye ngwe ntumero, kono heba kamameli o rulimi rwakwe, ahoma mozyo wakwe, mi nentumero yakwe yazya ntuso. ²⁷ E ntumero yichena yazya masira habuso bwa Nyambe ne Shwetu nje yinu: kutusa ba azya beshwabo naba nfwirwa mu kushanda kwabo, noku ki chenesa ku fasi.